1, 2. (a) Dahaka dainai ita gwau diba Mose be Farao ese ia hamasea diba? (Laulau ginigunana itaia.) (b) Dahaka dainai Mose be Farao ena badu garina ia gari lasi?

 FARAO be lohia goadana ta bona Aigupito taudia ese dirava ta bamona idia tomadiho henia. Buka ta (When Egypt Ruled the East) ia gwau, edia matanai Farao be “tanobada ai idia noho mauri gaudia ibounai edia aonega bona siahu” ia hereaia. Ena taunimanima ia hagaria totona, Farao ese ena korona dekenai kobra gaigaina ena laulau ia atoa. Unai kobra toana be ia hegaegae ta ia koria totona, bona unai ese ia hahedinaraia Farao be ena inai taudia ia hamasea haraga diba. Unai dainai, Iehova ese Mose ia hamaoroa Farao do ia hereva henia neganai, reana Mose ia gari bada. Iehova ia gwau: “Dohore lau siaia oi Farao dekenai, lauegu bese taudia Israela be Aigupito dekena amo dohore oi hakaudia siri totona.”—Eso. 3:10.

² Mose be Farao dekenai ia lao, Dirava ena hereva ia gwauraia neganai, Farao ia badu dikadika. Hisihisi 9 idia vara murinai, Farao ese Mose ia hamaoroa: “Lauegu vairana dohore oi itaia lou lasi, badina be oi itaia dinana dekenai, do oi mase.” (Eso. 10:28) Mose be Farao ia do rakatania lasi neganai ia peroveta ia gwau, Farao ena natuna roboana do ia mase. (Eso. 11:4-8) Mose ese Israela ruma bese ta ta ia hamaorodia mamoe o nani tau ta do idia alaia, bona ena rara be edia  iduara ai do idia atoa. To, Aigupito taudia ese mamoe tau idia hahelagaia, badina ia be edia dina diravana Ra ia laulaulaia. (Eso. 12:5-7) Farao be dahaka do ia karaia? Mose be Farao dekenai ia gari lasi. Dahaka dainai? Baibel ia gwau, ena abidadama dainai “king ena badu garina ia gari lasi, badina ia gini goada noho, ita itaia diba lasi Tauna ia itaia bamona.”—Heberu 11:27, 28 duahia.

3. Mose ena sivarai ita herevalaia neganai, edena henanadai do ita haerelaidia?

³ Emu abidadama be ia goada dainai, ‘Dirava oi itaia’ diba, a? (Mat. 5:8) Eda abidadama ia goada bona “ita itaia diba lasi Tauna [ita] itaia” totona, inai stadi ai Mose ena sivarai do ita herevalaia. Edena dala ai Mose be Iehova abidadama henia karana ese ia durua taunimanima ia gari henia lasi totona? Edena dala ai Dirava ena gwauhamata ia abidadama henidia? Mose bona ena taunimanima be dika idia davaria gwauraia neganai, edena dala ai “ita itaia diba lasi Tauna ia itaia” karana ese Mose ia hagoadaia?

4. Taunimanima edia matanai Mose be Farao ida ia hegeregere, a?

⁴ Taunimanima edia matanai Farao ena goada be bada, to Mose be hegeregere lasi. Farao ese Mose ia hamasea diba. Mose be Iehova ia nanadaia: “Lau be daika, dohore Farao dekenai lau lao, bona Israela taudia Aigupito dekena amo do lau hakaua siri?” (Eso. 3:11) Lagani 40 gunanai, Mose be Aigupito amo ia heau boio. Reana ia laloa, ‘Aigupito ai do lau giroa lou bona Farao lau habadua be aonega karana, a?’

5, 6. Dahaka ese Mose ia durua Iehova ia gari henia, to Farao lasi?

⁵ Mose be Aigupito ai ia do giroa lou lasi neganai, Dirava ese ia dekenai mai anina bada gauna ta ia hadibaia. Gabeai Iobu bukana ai Mose ese unai gauna ia torea: “Lohiabada do umui gari henia, aonega be unai.” (Iobu 28:28) Iehova ese taunimanima ida ia sibona ia hahegeregerea, unai amo Mose ia durua ia do ia gari henia bona dala maorona ia badinaia. Ia gwau: “Taunimanima edia uduna daika ese ia karaia? Daika ese tau ta ena uduna ia hakapua, o iena taiana ia koua? Daika ese matana ia kehoa? Daika ese iena matana ia hakepulua? Lau inai Lohiabada, ani?”—Eso. 4:11.

⁶ Unai amo Dirava be Mose dekenai dahaka ia hadibaia? Namona be Mose do ia gari lasi badina ia be Iehova ese ia siaia bona ia ese siahu do ia henia Iena hereva be Farao dekenai ia gwauraia totona. Danu, Iehova ena goada be bada, to Farao be hegeregere lasi. Unai be nega ginigunana lasi Aigupito besena ese Dirava ena hesiai taudia idia hahisia. Sedira Mose be ia, Iosepa bona Aberahamo be Iehova ese Farao ma haida amo ia hamauridia dalana ia laloatao danu. (Gen. 12:17-19; 41:14, 39-41; Eso. 1:22–2:10) Mose be Iehova, “ita itaia diba lasi Tauna” ia abidadama henia dainai, mai gari lasi ida Farao vairanai ia gini bona Iehova ena hereva ibounai ia gwauraia.

7. Edena dala ai abidadama ese taihu ta ia gimaia?

⁷ Abidadama ese taihu ta ladana Ella ia durua, unai amo taunimanima gari henia karana ia hanaia diba. Lagani 1949 ai, Ella be Estonia ai KGB ese idia dogoatao, ena dabua idia kokia bona pulisi memerodia ese idia raraia. Ia gwau: “Lau hemarai bada. To, Iehova lau guriguri henia murinai, lau gari lasi bona lalomaino lau mamia.” Gabeai, Ella be dibura ruma ena daiutu maragina ta lalonai dina toi idia koua. Ia gwau: “Pulisi ofesa taudia idia boiboi: ‘Umui do ai haorea, unai amo Iehova ena ladana be Estonia amo do idia laloa boio! Oi be dibura kamepa dekenai do ai siaia bona ma haida be Siberia dekenai do idia lao!’ Lau idia hauraia, idia gwau: ‘Oiemu Iehova be edeseni?’” Ella be taunimanima do ia gari henia o Iehova do ia abidadama henia? Unai dagedage taudia ese ia idia nanadaia neganai, mai gari lasi ida ia haere: “Lau ese inai gauna lau lalohadailaia namonamo vadaeni, bona egu lalona lau hadaia dibura ruma ai do lau noho, unai amo Dirava do lau tura henia noho. To, lau ura lasi dibura ruma lau rakatania bona ena lalonamo lau haboioa.” Ella ena matanai Iehova  ia itaia momokani bamona, unai dagedage taudia ia itaia hegeregerena. Iena abidadama dainai Dirava ia badinaia auka.

8, 9. (a) Dahaka ese oi do ia durua taunimanima oi gari henia lasi totona? (b) Taunimanima gari henia ena hahetoho oi davaria neganai, dahaka oi laloatao be gau badana?

⁸ Bema Iehova oi abidadama henia, unai ese oi do ia durua oi gari lasi totona. Bema gavamani taudia ese emu tomadiho karana idia koua toho, toana be idia ese oi idia hadikaia diba. Reana do oi laloa: ‘Iehova lau tomadiho henia noho bona gavamani taudia lau habadua be aonega karana, a?’ Laloatao: Taunimanima oi gari henia lasi totona, Dirava oi abidadama henia be gau badana. (Aonega Herevadia 29:25 duahia.) Iehova ia henanadai: ‘Dahaka dainai oi ese taunimanima, idia mase diba taudia bona rei bamona idia kakoro idia lao taudia oi gari henia noho?’—Isa. 51:12, 13.

⁹ Namona be emu Siahu Ibounai Tamana do oi laloa noho. Ia ese gavamani dikadia henunai dagedage idia davaria taudia edia hisihisi ia itaia, ia mamia bona do ia durudia. (Eso. 3:7-10) Ena be emu abidadama dainai gavamani vairadiai do oi gini, to ‘edena bamona do oi hereva bona dahaka do oi herevalaia be oi lalohekwarahilaia lasi, badina do oi herevalaia gauna be unai nega dekenai do oi diba.’ (Mat. 10:18-20) Gavamani bona edia ofesa taudia edia goada be Iehova ena goada ida ia hegeregere lasi. Hari, bema emu abidadama oi hagoadaia noho, do oi itaia Iehova be Tau Korikorina ta bamona bona ia ura oi do ia durua.

10. (a) Lagani 1513 B.C.E., Nisan huana ai, Iehova ese Israela taudia dekenai edena hadibaia hereva ia henia? (b) Dahaka dainai Mose ese Iehova ena hereva ia badinaia?

¹⁰ Lagani 1513 B.C.E., Nisan huana ai Iehova ese Mose bona Arona ia hamaorodia Israela taudia dekenai inai hadibaia hereva do idia henia: Emui mamoe o nani tau, bero lasi gauna do umui abia hidi, umui alaia bona ena rara be emui iduara ena au kahana kahana bona ataiai do umui dahua. (Eso. 12:3-7) Mose be dahaka ia karaia? Aposetolo Paulo be gabeai Mose ia herevalaia neganai ia gwau: “Ia abidadama dainai, ia ese pasova ia karaia bona rara be iduara dekenai ia atoa, unai amo Dirava ena aneru ese edia vara guna natudia do ia alaia mase lasi.” (Heb. 11:28) Mose ia diba Iehova dekenai ia tabekau diba bona ia abia dae Iehova ese ena gwauhamata hegeregerena Aigupito taudia edia vara guna natudia ibounai do ia hamasedia.

11. Dahaka dainai Mose ese Israela ruma besedia ia hadibaia edia natudia memero roboadia idia gimaia totona?

¹¹ Mose ena natudia memero be gabu daudauna, Midiana ai idia noho, bona “aneru” ese idia do ia hamasea lasi. (Eso. 18:1-6) To, Mose be ena tadikaka ia lalokau henidia dainai, Israela ruma besedia ia hadibaia edia natudia memero roboadia idia gimaia totona. Baibel ia gwau: “Mose ese Israela tau badadia ibounai dekenai ia boiboi, ia hereva idia dekenai, ia gwau, ‘Mamoe o nani edia natuna . . . Pasova gauna do umui alaia mase.’”—Eso. 12:21.

12. Iehova ese ita ia hamaoroa edena mai anina bada sivaraina ita harorolaia totona?

¹² Aneru edia hakaua henunai Iehova ena taunimanima be mai anina bada sivaraina ta idia harorolaia noho. Idia gwau: “Dirava umui gari henia, bona ia umui hanamoa, badina iena hahemaoro negana be ia ginidae vadaeni, unai dainai guba, tanobada, davara, bona idia lohilohi ranudia ia karaia Tauna do umui tomadiho henia.” (Apok. 14:7) Hari iseda negai, unai sivarai ita harorolaia be namo. Iseda dekena taudia do ita hadibaia Babulonia Badana idia rakatania totona, unai amo ‘ia ida iena davana dikana do idia abia’ hebou lasi. (Apok. 18:4) “Mamoe ma haida” be horoa Keristani taudia ida, taunimanima dekenai idia gwau: “Dirava ida maino umui karaia.”—Ioa. 10:16; 2 Kor. 5:20.

13. Dahaka ese ita do ia durua, unai amo sivarai namona harorolaia gaukarana do ita goadalaia?

¹³ Ita abia dae momokani Dirava ena “hahemaoro negana be ia ginidae vadaeni.” Unai dainai,  ita abia dae eda haroro bona taunimanima be hahediba taudia ai halaoa gaukarana ita karaia goadagoada be gau badana. Matahanai ta lalonai aposetolo Ioane ese “aneru 4 [ia] itaia, tanobada ena kona 4 dekenai idia gini. Idia ese tanobada ena lai 4 idia dogoatao auka.” (Apok. 7:1) Emu abidadama dainai, oi itaia unai aneru be kahirakahira idia dogoatao lai badadia 4 do idia rakatania tanobada idia hadikaia totona, a? Bema emu abidadama dainai unai aneru oi itadia, sivarai namona do oi harorolaia goadagoada.

14. Dahaka dainai ita ura ‘dika tauna do ita sisiba henia ena kara dika ia rakatania’ totona?

¹⁴ Ita Keristani taudia be Iehova ita tura henia namonamo bona mauri hanaihanai ena helaro ita moalelaia. To, ita laloparara ita dekenai maduna ia noho ‘dika tauna do ita sisiba henia ena dika do ia rakatania, vadaeni do ia mase lasi.’ (Esekiela 3:17-19 duahia.) To, unai sibona dainai ita haroro lasi. Ita be Iehova bona iseda dekena taudia ita lalokau henia. Iesu ese lalokau bona hebogahisi edia anina be Samaria tauna namona ena parabole amo ia hahedinaraia. Reana sibona do ita nanadaia, ‘Lau be Samaria tauna namona bamona, “hebogahisi” dainai ma haida lau haroro henidia, a?’ Ita ura lasi ita be unai parabole lalonai hahelaga tauna o Levi tauna bamona, ita hanaia sibona bona ‘dala kahanai ita raka lao.’ (Luka 10:25-37) Bema Dirava ena gwauhamata ita abidadama henidia bona iseda dekena taudia ita lalokau henidia, dokona ia do mai lasi lalonai haroro gaukara do ita goadalaia noho.

15. Dahaka dainai Israela taudia idia mamia dala be lasi?

¹⁵ Mose be “ita itaia diba lasi Tauna” ia abidadama henia dainai, Israela taudia be Aigupito idia rakatania bona kahirakahira  dika idia davaria, to ia gari lasi. Baibel ia gwau: “Israela taudia ese edia matana idia negea, idia itaia, Aigupito taudia be idia ginidae vadaeni idia dekenai. Vadaeni idia gari dikadika, bona Lohiabada dekenai idia taitai.” (Eso. 14:10-12) Israela taudia idia diba unai do ia vara, badina Iehova ese unai ia perovetalaia vadaeni. Ia gwau: “Vadaeni lau ese Farao ena lalona do lau ha-aukaia, bona umui emui murina dekenai do ia mai haragaharaga. To lau ese Farao bona ena tuari taudia ibounai do lau halusia, do lau kwalimu, vadaeni lauegu ladana do ia bada. Unai neganai Aigupito taudia do idia diba lau be Lohiabada.” (Eso. 14:4) Ena be Iehova ese unai ia gwauraia, to ia idia abidadama henia lasi. Idia itaia edia vairanai Davara Kakakakana ia noho, edia murinai be Farao ena tuari orea ena kariota idia heau mai haraga noho, bona edia gunalaia tauna be mauri lagani 80, mamoe naria tau burukana ta! Idia mamia dala be lasi.

16. Edena dala ai abidadama karana ese Davara Kakakakana ai Mose ia hagoadaia?

¹⁶ To, Mose be ia gari lasi. Dahaka dainai? Mose ena abidadama be ia goada dainai, ia ese Davara Kakakakana eiava Farao ena tuari oreana sibona ia itaia lasi, to Iehova ena siahu ia itaia danu. Ia ese “Lohiabada ena hamauria kara [ia] itaia,” bona ia diba Iehova be Israela besena totona do ia tuari. (Esodo 14:13, 14 duahia.) Mose ena abidadama karana ese Dirava ena taunimanima ia hagoadaia. Baibel ia gwau: “Israela taudia idia abidadama dainai, Davara Kakakakana idia raka hanai, hegeregere idia be tano kaukauna ai idia raka hanai bamona, to Aigupito taudia be idia raka hanai gwauraia neganai, idia maloa mase.” (Heb. 11:29) Unai murinai, Israela taudia “idia gari Lohiabada dekenai, idia abidadama henia Lohiabada dekenai, iena hesiai tauna Mose danu idia abidadama henia.”—Eso. 14:31.

17. Vaira negana ai do ia vara karana ta ese edena dala ai iseda abidadama do ia tohoa?

¹⁷ Toana be kahirakahira ita dekenai dika ta do ia vara. Hisihisi badana ena dokonai, tanobada ena gavamani ese tomadiho oreadia ibounai do idia hadikaia ore; idia be tomadiho orea badadia to iseda orea be maragi. (Apok. 17:16) Iehova be ena peroveta herevana ta lalonai ia gwau, ita be “magu lasi hanuadia” bamona do ita noho, bona gau ta ese ita ia gimaia lasi. (Ese. 38:10-12, 14-16) Taunimanima edia matanai, toana be do ita roho mauri diba lasi. Oi be dahaka do oi karaia?

18. Dahaka dainai hisihisi badana ena dokonai ita gini goada diba?

¹⁸ Namona be do ita gari lasi. Dahaka dainai? Badina Iehova be gavamani ese ena taunimanima do idia tuari henia karana ia perovetalaia vadaeni, bona ia gwau iena taunimanima do ia hamauridia. Baibel ia gwau: “Unai dina dekenai, Goga ese Israela tano do ia tuari henia hamatamaia dinana dekenai, egu badu do ia toreisi. Badina be egu badu ena siahu dainai, lau ese lau gwauraia inai.” (Ese. 38:18-23) Unai nega ai, Dirava ese iena taunimanima idia ura hadikaia taudia ibounai do ia haorea. Bema oi abia dae Iehova ese ena “dina badana” mai garina ai oi do ia gimaia, “Lohiabada ena hamauria kara do [oi] itaia” bona do oi gini goada.—Ioe. 2:31, 32.

19. (a) Mose ena hetura karana Iehova ida be edena bamona? (b) Bema oi karaia gaudia ibounai lalonai Iehova oi laloa, dahaka hahenamo do oi moalelaia?

¹⁹ Unai gaudia dainai oi hegaegae totona, namona be hanaihanai ‘oi gini goada noho, bona ita itaia diba lasi Tauna oi itaia bamona’! Namona be hanaihanai sibona emu stadi bona guriguri karana amo emu hetura karana Iehova Dirava ida oi hagoadaia. Mose ena hetura karana Iehova ida be ia goada dainai, Iehova ese ia gaukaralaia Iena ura ia hagugurua totona. Unai dainai, Baibel ia gwau Mose be Iehova ida ia “herevahereva.” (Deu. 34:10) Mose be peroveta tauna idauna ta. To, oi danu be emu abidadama dainai Iehova do oi tura henia namonamo diba, hegeregere ia be emu matana amo oi itaia diba. Bema Baibel ena hereva hegeregerena hanaihanai “oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—Aon. 3:6.