LAGANI 1923 ai, São Paulo ena Drama bona Miusiki Rumana be taunimanima ese idia hahonua! George Young ena gadona oi kamonai diba, a? Iena tok be Portugal gado ai idia hahanaia. Bona taunimanima 585 be iena tok idia kamonai namonamo. Baibel siridia Portugal gado ai be slaid piksa bamona idia hahedinaraia. Ena tok dokonai, buklet ladana, Millions Now Living Will Never Die! ena kopi handred mai kahana idia hariharilaia. Unai buklet be Portugal, English, Germany, bona Italy gado gaudia. Momo ese unai tok idia moalelaia dainai gabu momo dekenai idia sivarailaia. Hanuaboi rua murinai, taunimanima idia haboua lou tok ma ta idia kamonai totona. To, unai ibounai idia do vara lasi neganai, dahaka ia vara guna?

Lagani 1867 ai, Sarah Bellona Ferguson be ena famili ida United States idia rakatania bona Brazil idia lao. Lagani 1899 ai, Sarah be ena tadina mero ese United States amo ia abia mai Baibel bukadia ia duahia murinai, ia laloparara unai be hereva momokani. Ia be duahiduahi karana ia ura henia dainai, hanaihanai English Watch Tower ia abia. Baibel ena sivarai ia moalelaia dainai Tadikaka C. T. Russell ia tore henia bona sibona ia herevalaia ia gwau, “iena sivarai ese ia hamomokania hereva momokani be gabu idauidau dekenai idia noho taudia ese do idia kamonai diba.”

Sarah Ferguson be ia gaukara goada ma haida dekenai Baibel ena hereva momokani ia harorolaia totona. To nega momo ia laloa, daika ese ia, ena famili bona Brazil ai idia noho kudou maoro taudia do ia durua. Lagani 1912 ai, Brooklyn Betele ese ia idia hadibaia, tadikaka ta be São Paulo dekenai do ia mai bona Portugal gado ai idia hahanaia pepapepa ladana, Where Are the Dead? ena kopi tausen momo do ia abidia mai danu. Lagani 1915 ai, ia gwau ia hoa badina ia itaia Bible Student taudia momo idia laloa idia be kahirakahira guba dekenai do idia daekau. Iena revareva lalonai ia gwau: “Brazil bona South America tanodia ibounai be edena bamona? . . . Bema South America ena tano ibounai oi laloa, do oi laloparara gogoa gaukarana be  bada herea.” Oibe, gogoa gaukarana bada herea ia do noho!

Lagani 1920 bamona ai, Brazil ena tuari sisima ta ia dika bona idia hanamoa lalonai, unai sisima dekenai idia gaukara memero eit be New York ai kongrigeisen heboudia haida dekenai idia lao. Rio de Janeiro dekenai idia giroa neganai, Baibel amo idia dibaia helaro matamatana be ma haida dekenai idia hadibaia. Daudau lasi murinai, March 1923 ai, loaloa naria tauna George Young be Rio de Janeiro dekenai ia ginidae neganai, kamonai taudia momo ia davaria. Ia ese dala ia karaia iseda pablikeisen haida be Portugal gado ai do idia hahanaia totona. Unai murinai, Tadikaka Young be São Paulo dekenai ia lao, ena popiuleisen be 600,000 bamona. Unuseniai tok ia henia bona buklet ladana, Millions Now Living Will Never Die! ia hariharilaia, matamanai ita herevalaia bamona. Ia gwau: “Lau sibona be Witnes tauna dainai, nega momo niuspepa dekenai egu tok lau advatais. Brazil ai unai be nega ginigunana I.B.S.A. ena ladana ai niuspepa dekenai pablik tok ta idia advatais.” a

Brazil ena sivarai ia herevalaia neganai, Watch Tower, December 15, 1923, ia gwau: “Brazil dekenai iseda gaukara be June 1 ai ia hamatamaia neganai, pablikeisen be momo lasi. Unai ita laloa neganai ita laloparara Lohiabada ese unai gaukara ia hanamoa bada.” Unai magasin ma ia gwau, June 1 ia lao September 30 ai, Tadikaka Young be pablik tok ibounai 21 ia henia bona idia kamonai taudia ibounai be 3,600. Unai tok 21 amo rua be São Paulo dekenai ia henia. Rio de Janeiro ai, Basileia ena sivarai be metairametaira ia bada ia lao. Bona hua haida sibona murinai, Portugal gado ai pablikeisen 7,000 mai kahana idia hariharilaia vadaeni! Danu, The Watch Tower, Portugal gado ai be November-December 1923 gauna amo idia halasia matamaia.

The Watch Tower ese George Young bona Sarah Ferguson idia hedavari negana ia herevalaia, ia gwau: “Taihu be Tadikaka Young ia hedavari henia neganai, ia hereva be auka. To Tadikaka Young ena imana ia dogoatao bona ena vairana ia itaia noho, bena ia gwau: ‘Momokani oi be loaloa naria tauna, a?’” Gabeai, taihu bona ena natudia foa be bapatiso idia abia. Oibe, taihu be lagani 25 ia naria bapatiso ia abia totona! Watch Tower, August 1, 1924 ia gwau, Brazil ai taunimanima 50 idia bapatiso, bona idia momo be Rio de Janeiro ai idia bapatiso.

Hari, lagani 90 idia hanaia vadaeni, bona do ita gwau lasi: “Brazil bona South America tanodia ibounai be edena bamona?” Badina hari, Iehova ena Witnes taudia 760,000 mai kahana be Brazil dekenai sivarai namona idia harorolaia noho. Bona South America tanodia ibounai dekenai Basileia ena sivarai namona be Portugal, Spanish bona gado momo ai idia harorolaia noho. Lagani 1915 ai, Sarah Ferguson ese ia gwauraia herevana be maoro, ‘Oibe, unai negai gogoa gaukarana be bada herea.’​—Orea ena histori Brazil amo.