1. Haroro gaukara ai taunimanima ita kara namo henia ese namo ia havaraia, a? Haheitalai ta gwauraia. (Laulau ginigunana itaia.)

 LAGANI haida gunanai, Fiji dekenai tadikaka ta bona adavana be idia haroro bona taunimanima idia boiria Memorial hebouna idia mai totona. Hahine ta be ena ruma murimuri ai idia hereva henia noho lalonai, medu ia diho matamaia. Tadikaka ese damaru ta be unai hahine ia henia, bona ia be ena adavana ida damaru tamona idia gaukaralaia. Idia moale badina unai hahine be Memorial hebouna dekenai ia mai. Ia gwau, ia be unai tadikaka bona adavana ese idia vadivadi henia neganai, idia gwauraia herevadia haida ia laloatao lasi. To, ia idia kara namo henia dainai, ia ura Memorial hebouna ia lao. Dahaka dainai ruma hahinena be unai bamona ia hereva? Badina unai headava taudia be Iesu ese ia gwauraia Hakaua Herevana Hereadaena idia badinaia.

2. Iesu be dahaka sisiba ia henia, bona edena dala ai do ita badinaia diba?

² Iesu be dahaka sisiba ia henia? Ia gwau: “Gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia.” (Mat. 7:12) Edena dala ai unai sisiba ita badinaia diba? Dala rua ai: Ginigunana be sibona do ita nanadaia: ‘Bema lau be unai tauna, lau ura ma haida ese edena  dala ai lau do idia kara henia?’ Iharuana be unai dala hegeregerena ia ita kara henia be namo.—1 Kor. 10:24.

3, 4. (a) Dahaka dainai Iesu ena sisiba be taunimanima ibounai dekenai ita hahedinaraia be namo? (b) Inai stadi ai dahaka do ita herevalaia?

³ Iesu ena hereva anina be tadikaka bona taihu sibona do ita kara namo henidia, a? Lasi. Iesu ese taunimanima ibounai, eda inai taudia danu, ita kara namo henia dalana ia herevalaia. (Luka 6:27, 28, 31, 35 duahia.) Bema Iesu ese ia gwauraia kara namo be iseda inai taudia dekenai do ita hahedinaraia, namona be ita haroro henia taudia dekenai ita hahedinaraia danu. Badina idia momo be “mauri hanaihanai idia ura kudou-maoro taudia”!—Kara 13:48.

⁴ Hari, ita ese henanadai foa do ita herevalaia bona haroro gaukara ai ita lalodia tao be namo: Daika lau hereva henia noho? Edeseniai idia lau hereva henia noho? Edena nega be hegeregere idia lau hereva henia totona? Edena dala ai idia lau hereva henia be namo? Inai stadi ai do ita itaia, edena dala ai unai henanadai foa ese ita do idia durua ruma tauna ena hemami ita laloa, unai amo eda haroro dalana ita haidaua diba.—1 Kor. 9:19-23.

5. Edena henanadai ita lalodia be namo?

⁵ Haroro gaukara ai, ita be taunimanima idauidau ita hereva henia, bona idia ta ta edia hekwakwanai bona mauri daladia be idauidau. (2 Siv. 6:29) Ruma tauna dekenai sivarai namona ita ura herevalaia neganai, namona be sibona ita nanadaia: ‘Bema lau be unai tauna, lau ura ia ese edena dala ai lau ia kara henia? Do lau moale bema ia laloa lau be anina lasi tauna ta, a? Eiava do lau ura ia ese lau ia diba namonamo?’ Unai henanadai ese ita do idia durua Iesu ena sisiba do ita badinaia, bona taunimanima ta ta ita kara namo henidia totona.

6, 7. Bema ruma tauna be ia hereva auka o ia badu, dahaka ita karaia be namo?

⁶ Ita Keristani taudia be ita hekwarahi ‘hanaihanai mai gado namo ida do ita hereva’ totona. (Kol. 4:6) To ita be goevadae lasi dainai, nega momo ita hereva haraga bona gabeai ita lalohisihisi. (Iam. 3:2) Bema hekwakwanai ta dainai ita moale lasi bona ta ita hereva auka henia, ita ura lasi do ia gwau, iseda kara be namo lasi bona haida edia hemami ita laloa lasi. To, ita ura unai tauna do ia laloparara ita moale lasi dainai, unai bamona ita hereva. Unai ita diba dainai, namona be ita laloatao ita dekenai idia hereva auka taudia be gabeai edia hereva dainai do idia lalohisihisi danu.

⁷ Bema ruma tauna be oi dekenai ia hereva auka o ia badu, namona be unai bamona ia karaia ena badina ita lalopararalaia be namo. Reana ia be sikuli o gaukara gabuna ai hekwakwanai haida ia davaria, a? Ia gorere, a? Nega momo unai bamona taudia momo be gabeai hereva momokani idia abia dae, badina Iehova ena Witnes taudia ese manau bona hemataurai dalanai idia kara henidia.—Aon. 15:1; 1 Pet. 3:15.

8. Dahaka dainai Basileia ena sivarai be “taunimanima idauidau ibounai” dekenai ita harorolaia be namo?

⁸ Ita be hanua o gado idauidau taudia ita haroro henidia. Hegeregere, vanegai laganidia lalonai, Gima Kohorona ena kahana ta ladana, “Baibel ese Mauri Ia Haidaua” lalonai taunimanima 60 edia ekspiriens idia halasia. Unai taudia haida be guna henaohenao, inuinu kekero, raskol oreana ta idia badinaia, o drag dikadia idia gaukaralaia taudia. Haida be politikol, dubu gunalaia o gaukara badana idia karaia taudia. Haida be matabodaga maurina idia noholaia. To, idia ibounai be sivarai namona idia kamonai, Baibel stadi idia abia dae, edia mauri idia haidaua bona hereva momokani lalonai idia vareai. Unai dainai, namo lasi ita laloa taunimanima haida be Basileia ena sivarai do idia abia dae diba lasi. (1 Korinto 6:9-11 duahia.) To, namona be ita abia dae “taunimanima idauidau ibounai” be sivarai namona idia abia dae diba.—1 Kor. 9:22.

9. Dahaka dainai haida edia ruma ita matauraia be namo?

⁹ Haroro gaukara ai taunimanima be edeseniai ita hereva henidia? Nega momo edia ruma ai ita haroro henidia. (Mat. 10:11-13) Ita ura taunimanima be eda ruma bona kohu idia matauraia. Oibe, iseda ruma ita laloa bada. Ita ura eda ruma lalonai ita noho neganai do ita gari lasi bona ma haida ese ita idia itaia lasi. Namona be iseda dekena taudia be unai bamona ita matauraidia danu. Unai hegeregerena, ruma-ta-ruma-ta haroro gaukara ai, ruma tauna ena ruma ita matauraia be namo.—Kara 5:42.

10. Edena dala ai iseda haroro gaukara amo taunimanima ita habadua lasi?

¹⁰ Hari, kara dika tanobadana ai ita noho dainai, ruma taudia momo be taunimanima idaudia idia itaia neganai idia gari. (2 Tim. 3:1-5) Namo lasi iseda kara dainai ruma tauna ia gari. Hegeregere, reana ita be ruma ta dekenai ita lao bona iduara ai ita pidipidi. Bema ta ia haere lasi, namo lasi windo amo ruma lalona ita itaia, o ruma murinai ita lao ruma tauna ita tahua totona. Emu teritori ai unai bamona kara ese ruma tauna ia habadua diba, a? Iena dekena taudia be dahaka do idia laloa? Momokani, unai oi karaia badina emu haroro gaukara ai oi ura taunimanima momo oi davaria. (Kara 10:42) Ita ura sivarai namona ita harorolaia bona taunimanima ita durua Dirava idia dibaia totona. (Roma 1:14, 15) To, ita ura lasi eda kara amo eda teritori dekenai idia noho taudia ita habadua. Aposetolo Paulo ia gwau: “Dala ta dekenai ta ai hahekwakwanaia lasi, unai amo taunimanima ese emai hesiai gaukara do idia gwauraia dika lasi.” (2 Kor. 6:3) Eda teritori taudia edia ruma bona kohu ita matauraia neganai, iseda kara dainai haida be hereva momokani idia abia dae diba.—1 Petero 2:12 duahia.

11. Dahaka dainai ma haida ese iseda sediual idia matauraia neganai ita moale?

¹¹ Ita Keristani taudia be ita bisi bada herea. Unai dainai, eda gaukara ita hagugurua totona, sediual namona ita karaia bona eda nega ita haria namonamo. (Efe. 5:16; Fili. 1:10) Bema gau ta ese iseda sediual ia hadikaia, reana do ita moale lasi. Unai dainai, ita moale bema ma haida be ita idia matauraia, bona danu idia laloparara ita be nega kwadogina sibona lalonai idia ida do ita herevahereva. Edena dala ai Iesu ena sisiba ese ita ia durua ma haida edia nega ita matauraia totona?

12. Edena dala ai do ita diba edena nega be hegeregere taunimanima ita haroro henidia totona?

¹² Namona be ita tahua edena nega be hegeregere taunimanima ita haroro henidia totona. Iseda teritori ai edena nega ai taunimanima be ruma ai idia noho? Edena nega ai ruma taudia be idia kamonai namonamo? Namona be unai hegeregerena iseda haroro sediual ita haidaua be namo. Tano haida ai, adorahi o gabu ia do dibura lasi neganai, ruma-ta-ruma-ta haroro gaukara ai momo ita davaria diba. Bema emui teritori be unai bamona, ruma-ta-ruma-ta haroro gaukara be unai negadiai umui karaia diba, a? (1 Korinto 10:24 duahia.) Ita diba bema haroro negadia ita haidaua bona teritori taudia idia noho negadiai ita haroro, Iehova ese eda hekwarahi do ia hanamoa.

13. Edena dala ita hahedinaraia ruma tauna ita matauraia?

¹³ Edena dala ma ta ai ruma tauna ita matauraia diba? Kamonai tauna ta ita davaria neganai, ia ita haroro henia namonamo diba, to namo lasi ita noho daudau. Reana ruma tauna be unai nega ia makaia vadaeni mai anina bada gauna ta ia karaia totona. Bema ia gwau ia bisi, namona be ita gwau nega kwadogina sibona do ita herevahereva—iseda hereva ita badinaia be namo. (Mat. 5:37) Eda hereva dokonai, namona  be ruma tauna ita nanadaia ia dekenai edena nega be namo ita lou henia totona. Pablisa haida idia davaria dala namona ta be inai bamona idia hereva: “Lau moale bema oi do lau vadivadi henia lou. Ia namo bema lau do mai lasi neganai, oi lau rini o teks henia guna, a?” Teritori taudia edia sediual ita matauraia neganai, ita be Paulo ena haheitalai ita tohotohoa. Ia be ‘sibona ena namo ia tahua lasi, to momo edia namo ia tahua, hahemauri idia abia totona.’—1 Kor. 10:33.

14-16. (a) Dahaka dainai eda vadivadi ena badina be ruma tauna dekenai ita gwauraia hedinarai be namo? Haheitalai gwauraia. (b) Loaloa naria tauna ta be edena dala namona ta ia gaukaralaia?

¹⁴ Mani oi laloa, nega ta oi be ta ese ia rini henia to iena gadona oi diba lasi. Ia oi diba lasi, to ia ese oi ia nanadaia edena bamona aniani oi ura henidia. Oi daradara ia be daika bona dahaka ia ura. Oi matauraia dainai, nega kwadogina lalonai ia ida oi herevahereva, bena emui herevahereva karana oi hadokoa. To, mani oi laloa bema ia rini tauna be ena ladana ia gwauraia hedinarai, ia gwau iena gaukara be taunimanima ia hadibaia aniani maorodia idia ania totona. Bona mai hemataurai ida ia gwau ia ura oi dekenai heduru herevadia haida ia gwauraia. Reana do oi ura iena hereva oi kamonai, ani? Oibe, ita ura taunimanima be ita idia hereva henia ena badina idia gwauraia hedinarai, bona mai hemataurai ida ita idia hereva henia. Edena dala ai haroro gaukara lalonai ruma tauna dekenai unai bamona hemataurai karana do ita hahedinaraia?

 ¹⁵ Teritori momo ai, ita haroro ena badina be ruma tauna dekenai ita gwauraia hedinarai be namo. Momokani, ita be ruma tauna dekenai mai anina bada herevana ita abia lao. To mani oi laloa, bema ita be eda ladana bona ita lao ena badina ita gwauraia lasi, to maoromaoro ita henanadai: “Bema oi be tanobada ai idia vara hekwakwanai ta oi kokia diba, edena do oi kokia?” Ita diba unai bamona ita henanadai badina ita ura ruma tauna ena lalohadai ita dibaia, bena Baibel amo haere ita henia diba. To, reana ruma tauna do ia laloa: ‘Inai tauna be daika bona dahaka dainai ia mai? Dahaka dainai unai henanadai ia henia?’ Ita ura ruma tauna be mai moale ida ita do ia hereva henia. (Fili. 2:3, 4) Vadaeni, edena dala ai unai ita karaia diba?

¹⁶ Loaloa naria tauna ta be ruma tauna hereva henia dalana namona ta ia davaria. Ruma tauna ia hanamoa murinai, Oi Ura Hereva Momokani Oi Diba, A? pepapepa ta ia henia bona ia gwau: “Inai gabu dekenai ai davaria taudia ibounai dekenai inai pepapepa ta ai henia. Ia be taunimanima momo ese idia laloa henanadai siks ia herevalaia. Inai be oiemu kopi.” Unai tadikaka ia gwau, ruma tauna be eda vadivadi ena badina ia diba murinai mai moale ida ia kamonai. Unai ese dala ia kehoa ia ida ita herevahereva totona. Loaloa naria tauna ese ruma tauna ia nanadaia: “Oi be nega ta inai henanadai ta oi laloa, a?” Bema ruma tauna ese henanadai ta ia abia hidi, tadikaka ese pepapepa ia kehoa bona Baibel ena haere ia duahia diba. Eiava, ia ese henanadai ta ia abia hidi bona ia herevalaia, unai amo ruma tauna ia hahemaraia lasi. Momokani, herevahereva hamatamaia daladia be idauidau. Gabu haida ai ruma tauna ita hedavari henia neganai, ita hanamoa, ita sekehani bona ena famili totona ita henanadai, bena unai murinai iseda vadivadi ena badina ita gwauraia hedinarai. Mai anina bada gauna be teritori ai iseda hamatamaia herevana be ruma tauna ena lalona ia veria dalanai do ita karaia.

17. Edena dala idauidau ai haroro gaukara lalonai, Iesu ese ia herevalaia Hakaua Herevana Hereadaena ita badinaia diba?

¹⁷ Edena dala idauidau ai haroro gaukara lalonai Iesu ese ia herevalaia Hakaua Herevana Hereadaena ita badinaia diba? Namona be ita laloatao haroro gaukara ai ita be taunimanima idauidau ita hereva henia, bona idia ta ta edia hekwakwanai bona mauri daladia be idauidau. Ruma tauna ena ruma bona kohu do ita matauraia. Ita ura taunimanima be ruma ai idia noho, bona idia kamonai namonamo negadia ai ita haroro henidia. Bona ita ura iseda hamatamaia herevana be ruma tauna ena lalona ia veria dalanai do ita karaia.

18. Dahaka dainai teritori ai ita ura taunimanima ese ita do idia kara henia dalanai idia ita kara henidia be namo?

¹⁸ Bema eda teritori ai taunimanima be ita ura idia ese ita do idia kara henia dalanai ita kara namo henidia, namo do ia havaraia. Taunimanima ita laloa bada bona kara namo henidia neganai, edia vairanai eda diari ita hahedinaraia, ita hamomokania Baibel ena hakaua herevana be mai anina bada bona iseda guba Tamana ita hanamoa. (Mat. 5:16) Mai hemataurai ida taunimanima ita haroro henidia neganai, hereva momokani dekenai idia ita veria mai diba. (1 Tim. 4:16) Herevana ita haroro henia taudia be Basileia ena sivarai idia abia dae o lasi, to ita moale badina ita diba ita be ita hekwarahi eda hesiai gaukara ita hagugurua totona. (2 Tim. 4:5) Namona be ita ta ta ese aposetolo Paulo ita tohotohoa. Ia gwau: “Sivarai namona totona gau ibounai lau karaia, unai amo ma haida dekenai sivarai namona lau harorolaia diba.” (1 Kor. 9:23) Unai ita karaia totona, namona be iseda haroro gaukara ai Iesu ese ia gwauraia Hakaua Herevana Hereadaena ita badinaia.