ENA be egu tok idia kamonai taudia be momo lasi, to lau laloa momo lasi. Lau maragi negana amo, lau be hemarai merona. Nega haida vadivadi taudia be emai ruma dekenai idia mai neganai, idia amo lau komu ena be idia lau diba.

Reana do oi hoa, badina Iehova ena orea lalonai taunimanima idauidau ida lau gaukara​—egu turadia bona lau diba lasi taudia. To, edena dala ai ia hemarai bona diba bada lasi tauna be ma haida ida ia gaukara hebou diba? Lau sibona egu goada amo unai lau karaia diba lasi. Iehova ese hanaihanai lau ia durua egu gaukara lau karaia namonamo totona. Ena gwauhamata ia hagugurua, ia gwau: “Lau ese umui do lau hagoadaia, bona umui do lau durua. Lau ese umui do lau naria, bona umui do lau hamauria.” (Isa. 41:10) Iehova ese Keristani tadikaka taihu amo lau ia durua. Mani idia haida edia sivarai lau herevalaia. Lau maragi negana amo do lau hamatamaia.

Lagani 1940 lalodiai, Sunday daba ta ai Elsie Huntingford be emai famili ena farm, Ontario ena sautwest kahana dekenai ia mai. Egu tamana be hemarai tauna danu, unai dainai egu sinana ese iduara ia kehoa. Egu  tamana ia laloa Taihu Huntingford be kohu hoihoilaia hahinena bona ia ura lasi egu Sinana ese kohu ta do ia hoia. Unai dainai, egu Tamana be iduara dekenai ia lao Taihu Huntingford do ia hamaoroa ai ura lasi. To, Taihu Huntingford ia henanadai, “Umui ura Baibel umui stadilaia, a?” Egu tamana ia haere: “Oibe, ai be unai ai ura.”

Taihu Huntingford be nega korikori ai ai ia vadivadi henia. Badina egu tama sina be Canada ai United Church dubu ena memba taudia, to vanegai sibona unai dubu idia rakatania. Dahaka dainai? Badina ta be, pasto ta ese dubu dekenai moni idia henia taudia ibounai edia ladana be lista ta ai ia torea bona ibounai ese idia itaia diba gabuna ta ai ia atoa. Egu tama sina be ogogami taudia dainai, nega momo edia ladana be lista ena dokona kahanai ia noho, bona pasto taudia ese idia doria moni momo idia henia totona. Badina ma ta be, pasto ma ta ia gwau ia ura lasi ena dagi ia haboioa dainai, ia be ia abia dae momokani gaudia ia hahedibalaia lasi. Unai dainai ai ese emai dubu ai rakatania, to ai ura Dirava do ai tomadiho henia bona iena ura do ai dibaia noho.

Canada ai, Iehova ena Witnes taudia edia gaukara be idia taravatua dainai, Taihu Huntingford ese Baibel bona buka koremana maragina ta ai ia torea herevadia amo emai famili ia stadi henia. Gabeai, ia laloparara ai ese gavamani taudia dekenai ia do ai samania lasi, unai dainai ai totona Baibel bukadia ia mailaia. Nega ibounai emai stadi ia ore murinai, unai buka ai hunidia. a

Ena be Taihu Huntingford ese dagedage bona koua gaudia ia davaria, to ia be mai gari lasi ida sivarai namona ia harorolaia. Iena haheitalai ese lau ia hagoadaia dainai, lau ura Iehova do lau hesiai henia. Egu tama sina idia bapatiso bena lagani ta murinai, February 27, 1949 ai, lau danu be Dirava dekenai egu mauri lau gwauhamatalaia bona animal ese ranu idia inua daramu lalonai lau bapatiso. Unai neganai egu mauri lagani be 17. Unai murinai, egu lalona lau hadaia ful-taim hesiai gaukara lau karaia totona.

Lau be maoromaoro painia gaukara lalonai lau karaia lasi, badina lau laloa moni haida lau haboua guna be namo. Unai dainai lau ese moni gaukara rua lau abia, ta be banika dekenai bona ma ta be  ofesi ta dekenai. To lau be do matamata dainai, lau davaria moni be karaharaga lau haorea. Unai dainai tadikaka ta ladana Ted Sargent ese lau ia hagoadaia do lau gari lasi bona Iehova do lau abidadama henia. (1 Siv. 28:10) Iena hagoadaia hereva namona ese lau ia durua bona November 1951 ai lau painia matamaia. Unai neganai lau dekenai be dola 40, basikele ta, bona buka udaia baege ta. To, Iehova ese hanaihanai lau ia durua egu dabu gaudia lau abia totona. Ted lau tanikiu henia bada badina lau ia hagoadaia lau painia totona! Painia gaukara dainai hahenamo momo lau moalelaia.

August 1952 adorahi ta ai, Canada ena brens ofesi Toronto ai, ese lau idia rini henia. Lau idia noia September ai unuseniai Betele gaukara do lau hamatamaia. Ena be lau hemarai bona lau be nega ta unai brens lau do vadivadi henia lasi, to lau moale badina painia haida ese guna lau idia hamaoroa Betele be gabu namona. Lau ginidae neganai, Betele lau ura henia.

Daudau lasi murinai, Bill Yacos ena gabu lau abia bona Toronto ena kongrigeisen ta ena elda orea ena kodineita ena gaukara lau karaia. Egu mauri lagani be 23 sibona, unai dainai lau mamia lau be hegeregere lasi. To, Tadikaka Yacos ese mai manau bona lalokau ida lau ia hadibaia namonamo. Bona Iehova ese lau ia durua bada.

Tadikaka Yacos be tau kwadogina, hanaihanai kiri toana ia hahedinaraia bona taunimanima ia laloa bada. Tadikaka taihu ia lalokau henia bona idia ese ia idia lalokau henia danu. Bona nega momo tadikaka ia vadivadi henia, hekwakwanai idia davaria negadia ai sibona lasi. Bill Yacos ese lau ia hagoadaia unai bamona do lau karaia, bona haroro gaukara ai tadikaka taihu do lau bamoa. Ia gwau: “Ken, tadikaka dekenai oi hahedinaraia idia oi laloa bada. Unai ese oi do ia durua edia dika oi gwauatao totona.”

January 1957 amo, Iehova ese lau be dala idauna ai ia hanamoa. Unai hua ai, lau ese Evelyn lau adavaia. Ia be Gilead Sikuli ena klas namba 14 ia lao taihu ta. Ai do headava lasi neganai, Evelyn be French gado idia herevalaia provinsi Quebec dekenai ia painia. Unai negai, Quebec be Roman Katolik Oreana ese ia biagua. Unai dainai, Evelyn be unuseniai ia haroro be auka, to ia haheauka bona Iehova dekenai ia tabekau.

Evelyn ese lau ia badinaia danu. (Efe. 5:31) Ai headava murinai ia vara gauna ta ese Evelyn ena badinaia karana ia tohoa! Ai be palani ai karaia Florida, U.S.A., dekenai do ai lao. To, emai headava dinana murinai brens ese lau ia noia Canada Betele do lau lao bona wiki ta lalonai do ai hebou. Momokani, unai hebou ese lau bona Evelyn emai palani ia hadikaia, to ai ruaosi be ai ura Iehova ena hereva do ai badinaia. Unai dainai emai headava ena holidei ai haidaua. Unai wiki lalonai Evelyn be brens kahirakahira ia haroro. Ena be unai teritori be Quebec bamona lasi, to ia haheauka.

Unai wiki dokonai, lau hoa badina lau idia abia hidi Ontario ena not kahana ai sekit naria gaukara do lau karaia totona. Ena be lau be vanegai sibona lau headava, egu mauri lagani be 25 sibona bona gau momo lau diba lasi, to ai lao badina ai diba Iehova  ese ai do ia durua. Canada ena paraka negana ta ai, lau bona Evelyn be edia asainmen dekenai idia giroa loaloa naria taudia haida ida trein tamona dekenai ai guia, bona unai hanuaboi ai Ontario dekenai ai lao. Idia ese ai idia hagoadaia bada! Tadikaka ta ia ura lasi ai be hanuaboi ibounai do ai helai. Unai dainai, ai ia hamaoroa ena mahuta daiutu do ai gaukaralaia. Daba ai, ai be Hornepayne ai ia noho grup maragina ai vadivadi henia, matamanai lau hereva bamona. Unai be emai asainmen ginigunana bona emai headava dinadia be 15 sibona.

To, lau bona Evelyn emai mauri lalonai gau ma haida idia idau danu. Lagani 1960 lalonai, distrik naria gaukara ai karaia noho lalonai, lau idia boiria Gilead Sikuli ena klas namba 36 do lau lao. Unai Sikuli be February 1961 ai do ia matamaia. Lau moale badina unai ese dala ia kehoa hua ten lalonai Baibel lau stadilaia totona. To, lau lalometau badina Evelyn be unai sikuli dekenai idia boiria lasi, taihu ma haida danu be unai bamona. To, ia idia hamaoroa revareva ta do ia torea bona do ia gwau ia abia dae ai be hua ten do ai parara. Ena be Evelyn ia tai, to ai lalotamona lau be Gilead Sikuli dekenai do lau lao bona ia moale badina unuseniai treinini namona do lau abia.

Lau be Brooklyn ai lau noho neganai, Evelyn be Canada ena Betele ai ia gaukara. Unai negai ia be horoa taihu ladana Margaret Lovell ida daiutu tamona ai idia noho. Momokani, lau bona Evelyn be ta ta ai reaia bada. To, Iehova ena heduru dainai, emai gaukara ai moalelaia. Evelyn ese ena lalona ia hadaia sibona ena ura do ia dadaraia unai amo Iehova do ai hesiai henia diba, bona unai ese egu kudouna ia hamarerea.

Gilead Sikuli ai lau noho bona hua toi murinai, Tadikaka Nathan Knorr, unai negai tanobada ibounai gaukarana ia gunalaia tauna, amo revareva ta lau davaria. Lau ia nanadaia bema lau hegeregere unai nega ai Gilead Sikuli do lau rakatania bona Canada dekenai lau giroa, unai amo hua haida lalonai brens ai Basileia Hesiai Gaukara Sikuli ena hadibaia gaukara do lau karaia. Tadikaka Knorr ia gwau, bema lau ura lasi lau abia dae, unai danu be namo. Ia gwau bema lau ura, Gilead Sikuli do lau haorea bena misinari gaukara totona lau do idia siaia. Danu, ia gwau bema egu lalona lau hadaia Canada do lau lao, reana Gilead dekenai lau do idia boiria lou lasi, bona reana gabeai Canada dekenai painia gaukara do lau karaia. Lau ia hamaoroa egu adavana ida unai do ai herevalaia bona abia hidi do ai karaia.

Evelyn ena lalohadai tiokratik gaukaradia dekenai be lau ia hadibaia vadaeni, unai dainai maoromaoro Tadikaka Knorr lau hamaoroa: “Iehova ena orea ia ura dahaka do ai karaia, be mai moale ida do ai karaia sibona.” Ai be hanaihanai inai bamona ai laloa, bema Iehova ena orea ese ai be gabu ta dekenai ia siaia, unuseniai do ai lao sibona herevana unai be emai ura hegeregerena lasi.

Unai dainai April 1961 ai, Brooklyn lau rakatania bona Canada ai Basileia Hesiai Gaukara Sikuli dekenai hadibaia gaukara lau karaia. Gabeai, ai be  Betele gaukara ai karaia. Bena lau ese revareva ma ta lau davaria. Lau idia boiria Gilead ena klas namba 40 do lau lao; unai sikuli be lagani 1965 ai ia matamaia. Unai negai danu, Evelyn ese revareva do ia torea bona ia hahedinaraia lau be Gilead Sikuli lau lao neganai, ia be mai ena ura ida Canada ai do ia noho. To wiki haida murinai, ai moale bada badina Evelyn danu be revareva ta ia davaria bona ia idia boiria lau ida unai sikuli do ai lao.

Gilead Sikuli dekenai ai ginidae murinai, Tadikaka Knorr ese ai ia hamaoroa stiuden be French gado sikuli idia abia, badina ai ibounai be Africa dekenai do idia siaia. To, gradueisen dinana ai, ai be Canada dekenai idia siaia! Lau idia abia hidi brens ovasia matamata (hari idia gwauraia Brens Komiti kodineita) ena gaukara lau karaia totona. Egu mauri lagani be 34 sibona, unai dainai Tadikaka Knorr lau hamaoroa, “Lau be mero matamata sibona.” To, ia ese lau ia hagoadaia bada. Bona unai nega amo, lau ese abia hidi badana ta lau do karaia lasi neganai, Betele ai lo tadikaka edia heduru lau tahua guna.

Betele gaukara ese dala ia kehoa ma haida amo diba lau abia totona. Lau ese Brens Komiti ena memba taudia ma haida lau matauraia bona edia gaukara lau laloa bada. Danu, lau ese dala namodia momo ai, Betele dekenai o ai vadivadi henia kongrigeisen ta ta lalonai lau davaria Keristani tadikaka taihu matamatadia bona burukadia amo gau momo lau dibaia.

Danu, Betele gaukara ese dala ia kehoa ma haida lau hadibaia bona edia abidadama lau hagoadaia totona. Aposetolo Paulo be Timoteo dekenai ia gwau: “Oi dibaia gaudia do oi badinaia noho.” Ma ia gwau: “Lau amo oi kamonai hereva be taunimanima momo ese idia hamomokania danu, unai hereva be abidadama taudia dekenai do oi henia, unai amo idia danu be do idia hegeregere ma haida idia hadibaia totona.” (2 Tim. 2:2; 3:14) Nega haida tadikaka taihu haida ese lau idia nanadaia, lagani 57 Betele ai lau noho ese lau dekenai dahaka ia hadibaia. Egu haere be inai: “Namona be nega ibounai Iehova ena orea ia ura do oi karaia gauna oi karaia sibona, bona Iehova dekenai oi tabekau oi ia durua totona.”

Betele dekenai lau ginidae matamaia negana lau do laloatao noho. Lau be lau hemarai bona egu diba be bada lasi. To, idia hanaia laganidia lalonai Iehova ese ‘lau ia durua.’ Ia ese lalokau tadikaka taihu ia gaukaralaia lau idia durua totona, bona lau ia hamaoroa: ‘Do oi gari lasi, lau ese oi do lau durua.’​—Isa. 41:13.