King Davida ese ane amo Havaraia Tauna ia hanamoa, ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.” (Sal. 40:8) Herevana Davida be ena mauri lalonai hahetoho bona hekwakwanai haida ia davaria, to ia ese Dirava ena gaukara ia moalelaia bada. Davida sibona lasi, to Iehova idia tomadiho henia taudia ma haida danu be Dirava ena hesiai gaukara idia moalelaia bada.

Aposetolo Paulo ese Salamo 40:8 ena hereva be Mesia o Keriso dekenai ia gwauraia. Ia gwau: “[Iesu] be tanobada dekenai ia mai neganai, ia be Dirava dekenai ia gwau: ‘Oi be boubou gaudia bona harihari gaudia oi ura henia lasi, to oi ese lau totona tauanina ta oi hegaegaelaia. Oi ese gabua bouboudia, bona kara dika dainai idia henia boubou gaudia oi abia dae lasi.’ Bena lau gwau, ‘Dirava e, lau mai oiemu ura lau karaia totona. Toretore Helagadia lalonai lau idia sivarailaia hegeregerena.’”​—Heb. 10:5-7.

Iesu be tanobada ai ia noho neganai, Dirava ese ia havaraia gaudia ia raraia, ena turadia ia bamoa, bona ma haida ida aniani hebou karana ia moalelaia. (Mat. 6:26-29; Ioa. 2:1, 2; 12:1, 2) To, ena guba Tamana ena ura ia karaia guna bona ia moalelaia. Iesu ia gwau: “Lauegu aniani be lau ia siaia tauna ena ura do lau karaia bona iena gaukara do lau karaia haorea.” (Ioa. 4:34; 6:38) Iesu ena hahediba taudia be edia Biaguna amo moale korikori idia davaria ena badina idia dibaia. Mai moale bona ura bada ida idia ese ma haida dekenai Basileia ena sivarai idia harorolaia.​—Luka 10:1, 8, 9, 17.

Iesu ese ena hahediba taudia ia oda henidia: “Umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa,  bona idia umui hadibaia, umui lau hamaoroa gaudia ibounai be do idia badinaia. Bona lau be dina iboudiai umui ida do lau noho ela bona inai nega oromana ena dokona.” (Mat. 28:19, 20) Unai oda herevana ita badinaia totona, namona be taunimanima idia noho gabudia ibounai dekenai ita haroro, kamonai taudia ita lou henidia, bona idia ida Baibel ita stadilaia. Unai gaukara ita karaia neganai, moale bada do ita davaria.

Herevana taunimanima idia kamonai o lasi, to iseda haroro gaukara ita moalelaia totona, lalohadai maorona ita abia be namo. To, dahaka dainai ita ura ita haroro noho, ena be taunimanima idia ura lasi kamonai? Badina ita laloparara, Basileia ena sivarai ita harorolaia bona taunimanima be hahediba taudia ai ita halaoa gaukarana amo ita hahedinaraia, ita be Dirava bona eda dekena taudia ita lalokau henidia. Oibe, ita bona eda dekena taudia be dika ita davaria diba. (Ese. 3:17-21; 1 Tim. 4:16) Mani ita itaia, ena be eda tadikaka taihu haida be teritori aukadia ai idia haroro, to dahaka ese ia durudia haroro gaukara idia goadalaia noho totona?

Haroro gaukara ai henanadai namodia ita gaukaralaia neganai, ekspiriens namodia ita davaria diba. Daba ta, Amalia ia itaia loaloa uma gabuna ta ai tau ta be niuspepa ia duahia noho. Unai tau ia nanadaia bema ia be sivarai namona ta ia duahia. Unai tau ia gwau “lasi” neganai, Amalia ia gwau: “Lau ese Dirava ena Basileia ena sivarai namona lau mailaia.” Unai ese unai tau ena lalona ia veria bona Baibel stadi ia abia dae. Oibe, unai loaloa uma gabuna lalonai Amalia ese Baibel stadi toi ia hamatamaia.

Janice ese ena gaukara gabuna be ena haroro teritori ai ia halaoa. Sekuriti gadi rua be Gima Kohorona ena hereva ta idia moalelaia neganai, Janice ese ia hamaorodia idia dekenai hanaihanai magasin ia henia diba. Ena gaukara turana ta be Gima Kohorona bona Awake! edia hereva idauidau ia moalelaia neganai, Janice ese hanaihanai ia dekenai magasin ia henia danu. Unai ia karaia dainai, ena gaukara turana ma ta be magasin totona ia henanadai. Janice ia gwau: “Unai be hahenamo Iehova amo!” Gabeai, ia be taunimanima ibounai 11 dekenai hanaihanai magasin ia abia lao.

Sekit naria tauna ta ia gwau, ruma-ta-ruma-ta haroro gaukara lalonai, namo lasi pablisa ese ruma tauna dekenai ia gwau: “Ma nega ta do lau giroa mai.” To, namona be ia nanadaia: “Ia namo oi dekenai Baibel stadi karaia dalana lau hahedinaraia, a?” o “Edena nega bona taim be hegeregere oi dekenai, do lau giroa mai bona Baibel ena hereva ma haida ita herevalaia diba?” Unai sekit naria tauna ena ripoti dekenai ia gwau, kongrigeisen  ta dekenai tadikaka taihu be unai dala idia badinaia dainai, pura ta lalonai Baibel stadi ibounai 44 idia hamatamaia.

Ruma tauna ita lou henia haraga​—dina rua o toi murinai​—ese namo bada ia havaraia diba. Dahaka dainai? Badina unai bamona ita karaia neganai, ita hahedinaraia ita ura kudou maoro taudia ita durua Baibel idia lalopararalaia totona. Haida ese hahine ta idia nanadaia dahaka dainai Iehova ena Witnes taudia ida Baibel ia stadilaia neganai, ia haere: “Baibel stadi lau abia dae badina idia hahedinaraia idia be lau idia laloa bada.”

Madaí be Painia Gaukara Sikuli ia lao bona daudau lasi murinai Baibel stadi 15 ia karaia, bona ena stadi ma 5 be pablisa haida ia henia. Ena Baibel stadi haida be hebou idia mai hanaihanai. Dahaka ese Madaí ia durua Baibel stadi momo ia hamatamaia totona? Unai sikuli ese ia hadibaia namona be lou henia do ia karaia loulou ela bona kamonai tauna do ia davaria lou. Momo ia durudia Baibel ena hereva momokani idia dibaia Witnes taihu ta ia gwau, “Lau dibaia gauna be Iehova idia ura diba taudia ita durua totona, lou henia ita karaia loulou be gau badana.”

Lou henia bona Baibel stadi ita karaia totona, do ita gaukara goadagoada. To, ita abia hahenamo ese iseda hekwarahi ibounai ia hanaia. Basileia ena sivarai ita harorolaia goadagoada neganai, ita ese taunimanima do ita durua “hereva momokani ena diba maoromaoro” idia abia, unai amo idia roho mauri diba. (1 Tim. 2:3, 4) Unai ese ita do ia hamoalea bada.