1. Edena orea ese Israela besena ena gabu ia abia? (Laulau ginigunana itaia.)

 IEHOVA do ita hanamoa, badina aposetolo edia negai ia ese Keristani kongrigeisen ia haginia, bona iseda negai tomadiho momokanina ia haginia lou. Guna, Israela taudia be Dirava ese ia abia hidi besena. To, idia ese Dirava idia badinaia lasi. Unai dainai, Iehova ese Keriso murinai idia raka taudia ia abia hidi iena orea matamatana taudia ai idia lao totona. Unai orea ese Iehova ena ladana ia abia. Lagani 70 C.E. ai Ierusalema idia hadikaia neganai, Dirava ese ia abia hidi orea matamata taudia be idia roho mauri. (Luka 21:20, 21) Aposetolo edia negai idia vara gaudia ese hari inai negai Iehova ena orea dekenai do idia vara gaudia ia laulaulaia. Satani ena tanobada dikana be kahirakahira do ia ore, to Dirava ena orea taudia be do idia roho mauri. (2 Tim. 3:1) Edena dala ai unai ita diba?

2. Iesu ese “hisihisi badana” be edena bamona ia herevalaia, bona edena bamona do ia matamaia?

² Iesu ese nega dokona ia perovetalaia neganai, ia gwau: “Unai nega ai hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi, bona gabeai danu do ia vara lasi.” (Mat. 24:3, 21) Iehova ese tanobada ena gavamani do ia gaukaralaidia “Babulonia Badana,” tanobada  ena tomadiho koikoi oreadia ibounai unai, ia hadikaia neganai, hisihisi badana do ia matamaia. (Apok. 17:3-5, 16) Unai murinai dahaka do ia vara?

3. Tomadiho koikoi ibounai idia hadikaia ore murinai, Iehova ena Witnes taudia dekenai dahaka do ia vara?

³ Tomadiho koikoi ibounai idia hadikaia ore murinai, Satani bona ena orea taudia ese Iehova ena Witnes taudia do idia tuari henia. Hegeregere, Baibel ese “Goga, Magoga tano tauna” ia herevalaia ia gwau: “Goga e, mai oiemu tuari orea, bona oi danu idia mai bese momo taudia ese unai tano Israela do umui tuari henia haraga herea, lai guba bamona. Umui ese unai tano ori bamona do umui koua.” Iehova ena Witnes taudia be tuari taudia lasi to idia be maino taudia dainai, toana be Satani ese idia do ia hadikaia haraga diba. To, unai do ia vara diba lasi!—Ese. 38:1, 2, 9-12.

4, 5. Satani ia ura Dirava ena taunimanima ia hadikaia gwauraia neganai, Iehova be dahaka do ia karaia?

⁴ Satani be Dirava ena taunimanima ia hadikaia gwauraia neganai, Dirava be dahaka do ia karaia? Guba bona Tanobada edia Lohia Badana ese ena taunimanima do ia durua. Satani ese Iehova ena taunimanima ia tuari henia neganai, unai be hegeregere Iehova ia tuari henia bamona. (Sekaraia 2:8 duahia.) Unai dainai, iseda guba Tamana ese kara ta do ia karaia haraga ita ia hamauria totona. Unai nega ai, Iehova ese Satani ena tanobada be, “Siahu Ibounai Diravana ena Dina Badana,” Aramagedono tuarina ai do ia haorea.—Apok. 16:14, 16.

⁵ Baibel ese Aramagedono ia perovetalaia, ia gwau: “‘Lohiabada ese taunimanima ibounai do ia kota henidia, bona ia ese kara dika taudia do ia alaia mase. Lohiabada ia hereva vadaeni inai.’ Siahu Ibounai Lohiabada ma ia gwau, ‘Kamonai! Dika be basileia ta dekena amo, ela bona ma basileia ta dekenai ia lao noho. Lai guba badana momokani be ia toa hamatamaia noho, tanobada ena dokona gabudia daudaudia dekena amo. Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho. Tau ta ese idia dainai do ia taitai lasi, bona tau ta ese idia do ia haboua lasi, bona tau ta ese idia do ia guria lasi. Idia be tano ena kopina dekenai do idia noho, boromakau ena kukuri hegeregerena.’” (Ier. 25:31-33) Aramagedono ai inai tanobada dikana do ia ore vaitani. Satani ena tanobada be do ia ore, to Iehova ena tanobada oreana be do ia noho.

6, 7. (a) “Hutuma bada” taudia be edeseni amo idia mai? (b) Vanegai lagani lalodiai Dirava ena orea be edena dala ai ia bada ia lao?

⁶ Iehova ena orea ia bada ia lao noho badina unai orea lalonai idia noho taudia ia lalonamo henidia. Baibel ia gwau: “Iehova ena matana be kara maoromaoro taudia ia itaia, bona ena taiana amo edia guriguri ia kamonai.” (1 Pet. 3:12) Unai kara maoromaoro taudia be “hutuma bada” taudia bona idia be “hisihisi badana” amo do idia roho mauri. (Apok. 7:9, 14) Idia be “hutuma” sibona lasi, to “hutuma bada” taudia. Oi piksaia diba oi be “hisihisi badana” amo idia roho mauri taudia huanai oi noho, a?

⁷ Unai hutuma bada taudia be tano idauidau taudia, bona Dirava ese haroro gaukara amo idia ia haboua noho. Iesu ese unai ia perovetalaia, ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mat. 24:14) Inai nega dokona ai, haroro gaukara be Dirava ena  orea ena gaukara badana. Tanobada hegegemadai Iehova ena Witnes taudia edia haroro bona hadibaia gaukarana dainai, taunimanima milioni momo ese “lauma ai bona momokani ai” Dirava idia tomadiho henia noho. (Ioa. 4:23, 24) Hegeregere, lagani 2003 ela bona 2012 lalodiai, taunimanima 2,707,000 mai kahana be Dirava dekenai edia mauri idia gwauhamatalaia bona bapatiso idia abia. Hari, tanobada hegegemadai Iehova ena Witnes taudia 7,900,000 mai kahana idia noho, bona lagani ta ta ai taunimanima milioni momo be Memorial hebouna dekenai idia mai. Ita moale badina hutuma bada taudia edia namba ia tubu daekau haraga noho, bona ita diba Iehova ese ia habadaia noho.—1 Kor. 3:5-7.

8. Dahaka dainai hari Iehova ena orea be ia tubu daekau haraga noho?

⁸ Dirava ena hesiai taudia edia namba be ia tubu daekau noho, badina Iehova ese ena Witnes taudia ia durua noho. (Isaia 43:10-12 duahia.) Isaia ese unai ia perovetalaia, ia gwau: “Ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau ese inai kara do lau havaraia haraga. Lau inai Lohiabada!” (Isa. 60:22) Guna, horoa taudia, “Dirava ena Israela” unai, be “ladana maragi momokani tauna” bamona, to Iehova ese edia haroro gaukara ia hanamoa. Horoa taudia ma haida be Dirava ena orea lalonai idia vareai neganai, edia namba ia tubu daekau. (Gal. 6:16) Iehova ese ena orea ia hanamoa dainai, idia hanaia laganidia lalonai hutuma bada taudia edia namba ia tubu daekau danu.

9. Iehova ese Baibel lalonai ia gwauhamatalaia vaira nega namona ita moalelaia totona, dahaka ita karaia be namo?

⁹ Herevana ita be horoa Keristani taudia eiava hutuma bada taudia, to ita ibounai be Iehova ese Baibel lalonai ia gwauhamatalaia vaira negana namona ita moalelaia diba. Unai ita moalelaia totona, gau badana be Iehova ena ura do ita badinaia. (Isa. 48:17, 18) Mani Mose ena Taravatu ita laloa. Unai Taravatu ese Israela taudia do ia gimaia bona hadibaia edena dala ai edia famili idia moale, turana namodia idia davaria, mai momokani ida bisinesi idia karaia, bona ma haida idia kara namo henidia. (Eso. 20:14; Lev. 19:18, 35-37; Deu. 6:6-9) Unai hegeregerena, Dirava ena taravatu ita badinaia ese ita dekenai namo do ia havaraia bona iena ura ita badinaia be auka lasi. (1 Ioane 5:3 duahia.) Oibe, Mose ena Taravatu ese Israela taudia ia gimaia hegeregerena, Iehova Dirava ena taravatu bona hakaua herevadia badinaia karana ese ita do ia gimaia bona eda ‘abidadama do ia hagoadaia.’—Tito 1:13.

10. Dahaka dainai wiki ta ta ai sibona eda stadi bona Ruma Bese Ena Tomadiho totona nega ita atoa be namo?

¹⁰ Iehova ena tanobada oreana be ia heau haraga noho. Hegeregere, Baibel ena hereva momokani dekenai iseda laloparara ia bada ia lao noho. Unai be Baibel ena hereva hegeregerena, ia gwau: “Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” (Aon. 4:18) To, namona be sibona ita nanadaia: ‘Baibel ena hereva momokani dekenai diba matamata idia halasia neganai, lau lalopararalaia, a? Lau be dina ta ta ai Baibel lau duahia, a? Lau be mai ura bada ida iseda magasin bona buka lau duahia, a? Lau bona egu famili be wiki ta ta ai Ruma Bese Ena Tomadiho ai karaia, a?’ Ita diba unai gaudia ita karaia be auka lasi. To, gau badana be nega ita atoa unai gaudia ita karaia totona. Bona hisihisi badana be kahirakahira momokani dainai, namona be Baibel ena diba maorona ita abia, ita badinaia, bona ita goada ita lao!

11. Dahaka dainai Iehova ena taunimanima be hebouhebou badadia bona maragidia dekenai idia lao?

 ¹¹ Iehova ena orea ese ita ia laloa bada dainai, ita ia hadibaia aposetolo Paulo ena sisiba do ita badinaia. Ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona. Bona iseda hebou karana ita rakatania lasi, vaia haida ese idia karaia bamona, to do ita hagoadaia heheni, bona unai kara do ita habadaia noho, badina umui itaia unai dina be ia kahirakahira noho.” (Heb. 10:24, 25) Lagani ta ta ai idia karaia ariadia bona hebou ma haida ese Israela taudia edia hetura karana Dirava ida idia hagoadaia. Hegeregere, Nehemia ena negai idia karaia Au Raurau Ruma Maragidia ena Aria be moale negana. (Eso. 23:15, 16; Neh. 8:9-18) Hari, ita danu be iseda hebouhebou badadia bona maragidia amo namo ita davaria. Namona be unai bamona heboudia dekenai ita lao hanaihanai, unai amo Iehova kahirakahira do ita noho bona eda hesiai gaukara do ita moalelaia.—Tito 2:2.

12. Basileia harorolaia gaukarana be edena bamona ita laloa be namo?

¹² Ita be Dirava ena orea ida ita gaukara hebou dainai, mai moale ida “Dirava ena sivarai namona harorolaia gaukarana” ita karaia, ia be gaukara ‘helagana.’ (Roma 15:16) Unai gaukara ita karaia neganai, ita be “Helaga Tauna” Iehova ida ita gaukara hebou. (1 Kor. 3:9; 1 Pet. 1:15) Sivarai namona ita harorolaia amo Iehova ena ladana ita hahelagaia. Bona ita ese “moale Diravana ena hairai sivarai namona” ita harorolaia be hahenamo badana.—1 Tim. 1:11.

13. Eda hetura karana Iehova ida ia goada bona mauri ita abia totona dahaka ita karaia be namo?

¹³ Iehova ia ura eda hetura karana ia ida do ia goada. Unai ita karaia totona, ia dekenai ita tabekau bona ena orea ena gaukara idauidau ita durua. Mose ese Israela taudia ia hamaoroa: “Hari dina, guba bona tanobada dekenai lau boiboi noho, idia ese umui do idia uitnesi henia. Badina lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho. Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo. Unai neganai ia be emui mauri ena badina, bona ia ese mauri lagani momo herea umui dekenai do ia henia. Bona emui sene taudia Aberahamo bona Isako bona Iakobo dekenai Lohiabada ese ia gwauhamata henidia tano lalonai do umui noho daudau herea.” (Deu. 30:19, 20) Mauri do ita abia bema Iehova ena ura ita karaia, ita lalokau henia, ena hereva ita kamonai, bona ia ita badinaia.

14. Tadikaka ta ese Dirava ena tanobada oreana be edena bamona ia laloa?

¹⁴ Dirava bona ena orea ia badinaia noho Tadikaka ta ladana Pryce Hughes, ia gwau: “Lau moale badina lagani 1914 be do lasi neganai, lau ese Iehova ena ura lau badinaia . . . Lau davaria inai be mai anina bada: Iehova ena orea kahirakahira do lau noho. Lau dibaia gaudia amo lau laloparara taunimanima edia lalohadai dekenai lau tabekau be aonega karana lasi. Unai murinai, egu lalona lau hadaia Iehova ena orea do lau badinaia noho. Unai dala sibona amo Iehova ena lalonamo bona hahenamo ita abia diba.”

15. Edena Baibel sivaraina ese ita ia durua, orea ese ia halasia diba matamata ita abia dae totona?

¹⁵ Iehova ena lalonamo bona hahenamo ita abia totona, namona be iena orea do ita durua bona idia halasia diba matamatadia ita abia dae. Mani inai oi laloa: Iesu ia mase murinai, Iuda Keristani taudia tausen momo be mai edia ura bada ida Mose  ena Taravatu idia badinaia, bona idia dadaraia be auka. (Kara 21:17-20) To, Paulo ena revareva ese idia ia durua, unai amo idia laloparara Dirava ese edia kara dika be “Taravatu hegeregerena idia henia” boubou gaudia amo ia gwauatao lasi, to “Iesu Keriso ese nega tamona sibona ena tauanina ia bouboulaia” karana amo ia gwauatao. (Heb. 10:5-10) Unai Iuda Keristani taudia momo be Paulo ena sisiba idia abia dae bona edia lalohadai idia haidaua. Unai dainai, namona be ita danu Baibel do ita stadilaia namonamo bona orea amo ita abia diba matamatadia o haroro gaukara ena dala matamatadia do ita badinaia.

16. (a) Tanobada matamatana ai dahaka hahenamo idauidau do ita moalelaia? (b) Tanobada matamatana ai oi ura dahaka do oi moalelaia?

¹⁶ Iehova bona ena orea idia badinaia noho taudia be Iehova ese do ia hanamodia. Abidadama horoa taudia be guba ai Keriso ida do idia lohia. (Roma 8:16, 17) Bema ita be tanobada helarona ita abia, ita be mai moale ida Paradaiso ai do ita noho. Ita, Iehova ena orea taudia ita moale, badina Dirava ese ia gwauhamatalaia tanobada matamatana ena sivarai be ma haida dekenai ita harorolaia! (2 Pet. 3:13) Salamo 37:11 ia gwau: “Manau taudia ese noho gabuna tano do idia abia, do idia helai namonamo, mai moale bona mai maino danu.” Taunimanima ese “ruma do idia haginia, bona unai ruma lalonai do idia noho” bona “edia imana gaukara dekenai idia karaia gaudia” do idia moalelaia. (Isa. 65:21, 22) Dagedage, ogogami bona hitolo be do idia ore. (Sal. 72:13-16) Babulonia Badana be do ia noho lasi dainai, taunimanima do ia koia lou lasi. (Apok. 18:8, 21) Mase taudia be do idia toreisi lou bona mauri hanaihanai do idia abia. (Isa. 25:8; Kara 24:15) Oibe, Iehova dekenai edia mauri idia gwauhamatalaia taudia milioni momo be hahenamo momo do idia abia! Ita dekenai unai gwauhamata idia momokani totona, gau badana be eda hetura karana Dirava ida ita hagoadaia, bona iena orea ida do ita heau noho.

17. Iehova tomadiho henia karana bona iena orea be edena bamona ita lalodia be namo?

¹⁷ Inai nega dokona be kahirakahira do ia ore dainai, namona be eda abidadama ia goada bona Iehova ena orea ida ia do ita tomadiho henia noho. Davida be unai bamona ia karaia danu, ia gwau: “Gau tamona sibona Lohiabada dekena amo do lau noinoi, unai gau sibona do lau tahua. Lau ura Lohiabada ena Dubu lalonai do lau noho, egu mauri dinadia ibounai. Vadaeni Lohiabada ena namo do lau laloa, bona iena aonega do lau tahua.” (Sal. 27:4) Namona be ita ta ta be Iehova dekenai ita tabekau, bona iena orea ida ita heau noho.