1, 2. Iehova ese ena hesiai taudia be edena bamona ia laloa?

 TAMA SINA be edia natudia idia gadara idia itaia neganai, natudia ese idia karaia diba gaudia dekenai idia hoa. Reana oi danu be unai oi itaia. Reana natu ta be heau helulu ai ia heau haraga diba, eiava ma ta ia ura piksa ia torea o imana amo gau haida ia karaia. Herevana natudia edia diba be idauidau, to tama sina ese natudia idia durua edia diba idia habadaia totona.

² Iehova be iena tanobada natudia ese idia karaia diba gaudia ia itaia danu. Ia itaia iena hesiai taudia be “bese ibounai edia kohu namodia” bamona. (Hag. 2:7) Idia be “kohu namodia” badina idia ese ia idia badinaia bona abidadama henia. Reana oi danu oi itaia tadikaka taihu edia diba be idauidau. Tadikaka haida be tok henia karana idia diba momo, to ma haida be gaukara ta idia hegaegaelaia namonamo diba. Taihu momo be gado idauidau idia dibaia haraga diba, bona haroro gaukara ai idia gaukaralaia. To, ma haida be manoka o gorere taudia idia hagoadaia bona durua karana idia manadalaia. (Roma 16:1, 12) Ita moale badina kongrigeisen lalonai unai bamona tadikaka taihu ita bamoa diba.

3. Inai stadi lalonai edena henanadai do ita herevalaidia?

³ To, tadikaka taihu haida, matamata tadikaka o vanegai sibona  idia bapatiso tadikaka danu, be kongrigeisen gaukaradia lalonai idia vareai momo lasi dainai, idia mamia kongrigeisen lalonai idia be anina lasi. Edena dala ai unai bamona taudia ita durua gabeai kongrigeisen ai gaukara ma haida idia karaia totona? Dahaka dainai Iehova ita tohotohoa, bona iseda tadikaka edia kara namodia ita itaia be namo?

4, 5. Edena dala ai Gunalaia Taudia 6:11-16 ese ia hahedinaraia, Iehova be ena hesiai taudia ese idia karaia diba gaudia ia itaia?

⁴ Baibel ena sivarai haida ese idia hahedinaraia Iehova be ena hesiai taudia edia kara namo sibona ia itaia lasi, to idia karaia diba gaudia ia itaia danu. Hegeregere, Dirava ese Gideona ia abia hidi iena taunimanima be Midiana edia dagedage karadia amo do ia hamauridia neganai, Gideona ia hoa badina aneru ia gwau: “Goada herea tauna e, Lohiabada be oi dekenai ia noho.” To, Gideona ia mamia ia be “goada herea tauna” lasi, bona Dirava ena taunimanima ia hamauria diba lasi. To, edia herevahereva karana amo ia hedinarai, ena be Gideona ena hemami be unai bamona, to Iehova ia laloa Gideona be ia hegeregere.—Gunalaia Taudia 6:11-16 duahia.

⁵ Iehova be Gideona ese ia karaia diba gaudia ia itaia dainai, ia diba Gideona ese Israela besena ia hamauria diba. Hegeregere, Iehova ena aneru ia itaia Gideona be mai ena goada ibounai ida witi ia kwadia. Aneru be ma gau ta ia itaia danu. Baibel negadiai, biru taudia be murimuri ai witi idia kwadia, unai amo lai ese witi ena momoru ia odaia lao diba. To, Gideona be wain idia moia rumana lalonai hunia dalanai witi ia kwadia, badina ena witi be bada lasi bona ia ura lasi Midiana taudia ese do idia abia. Unai be aonega karana! Unai dainai, Iehova matanai Gideona be biru tauna ta sibona lasi, to ia be aonega tauna danu. Oibe, Iehova be Gideona ese ia karaia diba gaudia ia itaia dainai, ia dekenai treinini ia henia.

6, 7. (a) Iehova ese Amosa be edena bamona ia laloa, to Israela taudia edia lalohadai be dahaka? (b) Edena bamona ita diba Iehova ese Amosa ia abia hidi be maoro?

⁶ Unai hegeregerena, ena be momo idia laloa Amosa be ogogami bona hereva momo lasi tauna, to Iehova be Amosa ese ia karaia diba gaudia ia itaia. Amosa ia gwau iena gaukara be mamoe bona fig audia ia naria—unai fig huahua be ogogami taudia ese idia ania gauna. Iehova ese Amosa ia abia hidi kaivakuku idia tomadiho henia Israela ena basileia 10 dekenai ena hahemaoro herevadia do ia gwauraia neganai, Israela taudia haida idia laloa Amosa be ia hegeregere lasi.—Amosa 7:14, 15 duahia.

⁷ Amosa be gunika hanuana ta amo ia mai. To, ia be bese ma haida edia kastom bona lohia taudia ia diba, badina reana hanua idaudia amo idia mai loaloa bisinesi taudia ida ia herevahereva. Hegeregere, Amosa be kahirakahira idia noho besedia edia sivarai bona Israela ai idia vara kara dikadia ia diba. (Amo. 1:6, 9, 11, 13; 2:8; 6:4-6) Hari, Baibel idia diba bada taudia idia gwau Amosa ena toretore dalana be namo herea. Ia gaukaralaia herevadia be auka lasi, to mai edia siahu. Danu, Amosa be mai gari lasi ida hahelaga tauna dikana Amasaia ia hereva henia. Oibe, Iehova ese tau maorona ia abia hidi iena hahemaoro herevadia ia gwauraia totona. Iehova be Amosa ese ia karaia diba gaudia ia itaia, ena be haida ese idia itaia lasi.—Amo. 7:12, 13, 16, 17.

8. (a) Iehova ese Davida dekenai dahaka gwauhamata ia gwauraia? (b) Dahaka dainai Salamo 32:8 ena hereva ese manoka o edia diba be bada lasi taudia ia hagoadaia?

⁸ Oibe, Iehova be ena hesiai taudia ese  idia karaia diba gaudia ia itaia. Iehova ese King Davida ia hamaoroa do ia hakaua bona ena ‘matana amo do ia itaia noho.’ (Sal. 32:8, NW) Dahaka dainai unai ese ita ia hagoadaia diba? Ena be ita laloa ita hegeregere lasi, to Iehova ese ita ia durua dainai, ita laloa ita karaia diba lasi gaudia ita karaia diba. Tama ta ese ena natuna dekenai basikele taria dalana ia hadibaia hegeregerena, Iehova ia ura ita do ia hadibaia ela bona lo taudia ai ita lao. Danu, Iehova ese tadikaka taihu ma haida ia gaukaralaia ita idia durua totona. Edena dala ai?

9. Edena dala ai Paulo ena sisiba, “ma haida edia namo danu do umui laloa,” ita badinaia diba?

⁹ Paulo ese Keristani taudia ibounai ia hagoadaia, ‘ma haida edia namo danu do idia laloa.’ (Filipi 2:3, 4 duahia.) Anina be haida ese idia karaia gaukara namodia do ita itaia bena idia ita hanamoa. Bema ta ia itaia ita goada ita lao bona ita ia hanamoa, eda hemami be edena bamona? Iena hereva ese ita do ia hagoadaia bona do ita ura eda gaukara ita hanamoa noho. Unai hegeregerena, bema iseda tadikaka taihu edia gaukara ita hanamoa, unai ese idia do ia hagoadaia bona edia hesiai gaukara do idia hanamoa.

10. Daidia ita durudia be namo?

¹⁰ Daidia ita durua diba? Momokani, ita ibounai be nega ta ta ai heduru ita abia be namo. To, namona be matamata o vanegai sibona idia bapatiso tadikaka idia mamia idia be kongrigeisen ena gaukara haida idia karaia diba. Unai amo do idia mamia idia be Iehova ena orea taudia. Bema edia gaukara namona ita laloa bada lasi, do idia lalomanoka bona idia ura lasi hesiai gaukara idia karaia. To, Baibel ese idia ia hagoadaia kongrigeisen lalonai gaukara namona idia karaia totona.—1 Tim. 3:1.

11. (a) Edena dala ai elda tauna ta ese hemarai merona ta ia durua? (b) Julien ena sivarai amo dahaka oi dibaia?

¹¹ Elda ta ladana Ludovic be ia matamata neganai, unai bamona heduru ia abia. Ia gwau: “Bema tadikaka ta dekenai hanamoa hereva lau gwauraia, unai ese ia durua bena ia goada ia lao haraga.” Ludovic ese hemarai momo merona ta ladana Julien ia herevalaia, ia gwau: “Julien ia ura ia heduru, to ia be hemarai merona dainai ia daradara bona gaukara ia karaia namonamo lasi. To, lau itaia ia be ma haida ia laloa bada, bona ia ura kongrigeisen tadikaka taihu ia durua. Unai dainai, Julien lau gwau henia lasi, to iena kara namodia lau laloa bona lau hagoadaia.” Daudau lasi murinai, Julien be hesiai tauna ai ia lao bona hari ia be regula painia ta.

12. Bema ita ura ta ita durua ia karaia diba gaudia ia hagugurua totona, dahaka be mai anina bada? Haheitalai gwauraia.

¹² Bema ita ura ma haida ita durua idia karaia diba gaudia idia hagugurua totona, namona be edia gaukara dalana ita lalopararalaia. Julien ena sivarai bamona, namo lasi ta ena manoka gaudia ita laloa, to ena gaukara dalana do ita itaia, bena do ita diba edena dala ai ia ita durua diba ena gaukara ia hanamoa totona. Iesu ese Petero be unai bamona ia kara henia. Ena be nega haida Petero ia manoka, to Iesu ese iena ladana ia atoa Kepa o Petero, anina be nadi. Unai amo ia hahedinaraia Petero be nadi bamona do ia gini goada.—Ioa. 1:42.

13, 14. (a) Edena dala ai Banaba be mai aonega ida Mareko ia kara henia? (b) Mareko ena sivarai bamona, Alexandre be edena dala ai elda ta ese ia durua? (Laulau ginigunana itaia.)

¹³ Banaba ese Ioane, iena Roma ladana ma ta be Mareko, be unai bamona ia durua danu. (Kara 12:25) Paulo bona Banaba edia  misinari loaloana ginigunana ai, Mareko be idia ida ia lao bona idia ia durua. To, Pamupulia ai idia ginidae neganai, Mareko be karaharaga idia ia rakatania. Paulo bona Banaba sibodia be raskol momo gabuna amo idia raka hanaia. (Kara 13:5, 13) Banaba ese Mareko ena kara ia laloa lasi, bona gabeai ia durua lo Keristani tauna ta ai ia lao totona. (Kara 15:37-39) Ita moale badina Paulo be Roma dekenai dibura ruma ai ia noho neganai, Mareko ese ia naria. Danu, Paulo be Kolose Keristani kongrigeisen ia tore henia neganai, Mareko ia hanamoa. (Kol. 4:10) Mani oi laloa, reana Banaba ia moale bada badina Paulo be Mareko ena heduru totona ia noinoi.—2 Tim. 4:11.

¹⁴ Elda matamata ta Alexandre, be tadikaka ma ta ese ia durua dalana ia herevalaia, ia gwau: “Lau matamata neganai, lau gari ma haida vairanai guriguri lau gwauraia totona. Elda ta ese lau ia durua edena dala ai do lau hegaegae unai amo lau gari lasi totona. Ia ese lau ia reaia lasi, to hanaihanai haroro grup ai lau ia noia guriguri lau gwauraia totona. Daudau lasi murinai, mai gari lasi ida guriguri gwauraia karana lau manadalaia.”

15. Edena dala ai Paulo ia hahedinaraia ia ese ena tadikaka edia kara ia laloa bada?

¹⁵ Keristani tadikaka o taihu ta ena kara namodia ita itaia neganai, iena kara dainai ita hanamoa, a? Roma karoa 16 lalonai, Paulo ese tadikaka taihu 20 edia kara namodia dainai ia hanamodia. (Roma 16:3-7, 13) Hegeregere, Paulo ia gwau Anedroniko bona Iunia be ia bamona lasi, badina idia be nega daudau lalonai mai haheauka ida Keriso idia hesiai henia. Danu, Paulo ese Rufo ena sinana ia herevalaia, badina guna ia ese mai hebogahisi ida Paulo ia naria.

16. Matamata tauna ta ena kara namodia dainai ita hanamoa neganai, dahaka namo ia vara diba?

¹⁶ Ma haida dekenai hanamoa herevadia ita gwauraia neganai, namo ita davaria danu. Mani France ai ia noho mero ta, Rico ena sivarai oi laloa. Rico ia moale lasi badina ena Witnes lasi tamana ia ura lasi Rico do ia bapatiso. Rico ia laloa do ia naria ela bona iena mauri lagani be 18, bena Iehova ena hesiai gaukara do ia karaia. Danu, ia lalohisihisi badina ena sikuli turadia ese idia hevasehalaia. Kongrigeisen elda ta, Frédéric ese Rico ia stadi henia, bona ia gwau: “Rico lau hanamoa badina ena sikuli turadia ese idia hevasehalaia karana ese ia hahedinaraia ia be mai gari lasi ida ena tomadiho ia herevalaia.” Unai hanamoa herevadia ese Rico idia hagoadaia do ia gini goada, bona ena tamana ia tura henia namonamo totona. Rico ena mauri lagani be 12 neganai bapatiso ia abia.

17. (a) Edena dala ai iseda tadikaka ita durua diba edia hesiai gaukara idia hanamoa totona? (b) Misinari ta ese edena dala ai tadikaka matamatadia ia durua, bona dahaka namo ia vara?

¹⁷ Tadikaka o taihu ta be tok ia henia, o gaukara ta ia karaia namonamo dainai ita hanamoa neganai, unai ese ia hagoadaia Iehova ia hesiai henia goadagoada totona. Sylvie, a be lagani momo lalonai France  Betele dekenai ia gaukara, bona ia gwau taihu ese tadikaka dekenai hanamoa herevadia idia gwauraia diba. Ia gwau, taihu be tadikaka ese idia itaia lasi gaudia idia itaia diba. Sylvie ia gwau: “Edia hagoadaia herevadia ese lo tadikaka edia hagoadaia herevadia ia durua diba.” Ma ia gwau: “Ma haida dekenai hanamoa herevadia lau gwauraia be egu maduna ta.” (Aon. 3:27, NW) Jerome, be misinari ta French Guiana dekenai, bona ia ese tadikaka matamatadia momo ia durua vadaeni misinari taudia ai idia lao totona. Ia gwau: “Tadikaka matamatadia edia kara namona ta haroro gaukara ai, o hebou ai haere namodia idia henia dainai lau hanamoa neganai, lau itaia edia hesiai gaukara ia namo ia lao bona idia goada.”

18. Dahaka dainai tadikaka matamatadia ida ita gaukara be namo?

¹⁸ Tadikaka taihu ida ita gaukara hebou neganai, idia ita durua hereva momokani lalonai idia goada idia lao totona. Hegeregere, bema buruka taudia be kompiuta lasi, elda ta ese tadikaka matamata ta ia noia diba idia totona jw.org amo hereva haida do ia printaia. Eiava bema Kingdom Hall ai gaukara haida umui karaia, tadikaka matamata ta oi noia diba oi ida ia gaukara hebou totona. Unai dala amo oi ese matamata taudia edia gaukara dalana oi itaia diba, idia oi hanamoa bona idia goada idia lao oi itaia.—Aon. 15:23.

19, 20. Dahaka dainai ma haida ita durua idia karaia diba gaudia idia hagugurua totona?

¹⁹ Iehova ese Iosua ia abia hidi Israela besena do ia gunalaia neganai, Mose ia hamaoroa Iosua do ia “hagoadaia” bona ena lalona do ia “ha-aukaia.” (Deuteronomi 3:28 duahia.) Hari, taunimanima momo be Iehova ena tanobada oreana lalonai idia vareai noho. Namona be elda sibodia lasi, to lo Keristani taudia ibounai danu, ese matamata o vanegai sibona idia bapatiso tadikaka idia durua idia karaia diba gaudia idia hagugurua totona. Unai amo idia momo be ful-taim hesiai gaukara lalonai do idia vareai, bona idia momo be “do idia hegeregere ma haida idia hadibaia totona.”—2 Tim. 2:2.

²⁰ Herevana ita be kongrigeisen badana o grup maragina lalonai ita noho, to namona be nega vaira totona ita gaukara goadagoada. Gau badana be Iehova do ita tohotohoa, badina ia be nega ibounai iena hesiai taudia edia kara namodia ia laloa bada.