Oi Goada Totona “Emu Raka Dalana Do Oi Laloa Namonamo Guna

PLAY

LAGANI 537 B.C.E. ai, Israela taudia be Babulonia idia rakatania bona Ierusalema idia lao neganai, Iehova be edia giroa lou dalana ia laloa bada. Ia hamaorodia: “Emui bese taudia edia raka lou mai dalana ta do umui karaia. Laolao dalana do umui hagoevaia, do umui karaia hegaegae. Nadi do umui gogoa.” (Isa. 62:10) Unai hahegani badinaia totona, Israela taudia be dahaka idia karaia? Reana idia haida idia lao guna bona dala idia hanamoa, hegeregere guri gabudia idia koua. Unai amo edia murinai idia mai tadikaka edia raka dalana idia hanamoa.

Unai hegeregerena, ita danu be Iehova ena hesiai gaukara idauidau ita hagugurua totona, dala ta ita badinaia. Bona Iehova ia ura ena hesiai gaukara ita karaia neganai, gau ta ese ita do ia koua lasi. Baibel ese ita ia hagoadaia: “Emu raka dalana do oi laloa namonamo guna, unai amo emu dala ibounai be do idia momokani.” (Aon. 4:26, NW) Herevana oi be matamata o buruka, to unai sisiba ese oi ia durua diba.

ABIA HIDI NAMODIA OI KARAIA

Baibel ia gwau: “Eregabe taudia edia hairaina be edia goada.” (Aon. 20:29) Matamata taudia momo edia tauanina be goada, edia laloparara be haraga, bona idia ura mauri lalonai do idia kwalimu. Taunimanima badadia ese matamata taudia edia diba bona goada idia itaia, bona idia ura idia ese idia karaia diba gaudia do idia hagugurua. Matamata taudia be moale korikorina do idia davaria, bema edia diba bona goada idia gaukaralaia Iehova idia hesiai henia totona.

To tanobada taudia ese iseda matamata taudia edia diba bona aonega idia ura henia danu. Bema sikuli ai Witnes mero o kekeni ta ena diba be bada, reana ena tisa o stiuden ma haida ese do idia doria iunivesiti ia lao totona. Eiava spot gadara idia diba namonamo matamata taudia be ma haida ese do idia doria, spot gadara idia atoa guna totona. Reana oi eiava ma ta dekenai unai bamona ia vara danu. Dahaka ese Keristani tauna ia durua diba abia hidi maorona ia karaia totona?

Baibel ena hahediba herevadia ese ta ia durua diba, ia hegaegae dala maorona ia badinaia totona. Hadibaia Tauna 12:1 ia gwau: “Oi be eregabe neganai, ia ese oi ia karaia Dirava do oi laloa.” Edena dala ai oi o matamata tauna ma ta ese ‘umui ia karaia Diravana do umui laloa’?

West Africa ai, matamata tadikaka ta ladana Eric a dekenai ia vara gauna mani oi laloa. Ia be soka gadara ia ura henia dikadika. Iena mauri lagani be 15 neganai, ia idia abia hidi tim ta ai do ia gadara. Anina be daudau lasi murinai, Eric be Europe ai soka treinini namona do ia abia, bona soka gadara tauna namona ai do ia lao. To, edena dala ai inai hakaua herevana, “oi ia karaia Dirava do oi laloa” ese Eric ia durua? Bona Eric ena sivarai amo dahaka ita dibaia?

Eric be ia do sikuli noho lalonai, Iehova ena Witnes taudia ida Baibel ia stadilaia. Unai amo ia laloparara, iena Havaraia Tauna ese taunimanima edia hekwakwanai do ia haorea vaitani. Eric ia laloparara namona be ena diba bona goada ia gaukaralaia Dirava ena ura ia karaia totona. Unai lalohadai maorona ia abia dainai, abia hidi ia karaia spot gadara do ia atoa guna lasi. To, ia bapatiso bona ena diba bona goada ia gaukaralaia Iehova ia hesiai henia totona. Gabeai, hesiai tauna ai ia lao bona ia idia boiria Singul Tadikaka Edia Baibel Sikuli dekenai ia lao totona.

Bema Eric be soka gadara ia atoa guna, reana ia be taga bona ladana bada tauna ai do ia lao. To ia ese Baibel ena hakaua herevana ta ia laloatao. Baibel ia gwau: “Kohu momo tauna ena kohu bona moni, be hanua aukana hegeregerena ia dekenai, bona ia laloa idia be magu badana bamona, idia ese ia idia gimaia noho.” (Aon. 18:11) To, moni ese taunimanima ia koia diba, bona idia ia gimaia lasi. Danu, taga maurina idia tahua momo taudia be “hisihisi momo amo idia sibodia idia gwadaia” bamona.—1 Tim. 6:9, 10.

Ita moale badina ita itaia matamata taudia momo be ful-taim hesiai gaukara idia karaia dainai, idia moale bona mauri namona idia davaria. Eric ia gwau: “Lau be Iehova ena ful-taim hesiai taudia edia ‘tim’ lalonai lau vareai. Unai be tim namo hereana, bona Iehova lau tanikiu henia badina ia ese lau dekenai moale korikorina bona mauri namona ena dala ia hahedinaraia.”

Oi be edena bamona? Namo lasi tanobada gaudia oi tahua guna, to Iehova ena vairanai “emu dala ibounai” oi hagoevaia bona painia gaukara oi karaia.—Maua ladana “ Iunivesiti ia Hereaia Hahenamo Idauidau” itaia.

EMU DALA AMO KOUA GAUDIA OI KOKIA

Tadikaka ta bona ena adavana be United States ena brens ofesi idia vadivadi henia neganai, idia itaia unuseniai Iehova idia hesiai henia Betele taudia be idia moale. Gabeai, taihu ia gwau: “Ai be kohu momo maurina ai moalelaia, to Iehova hesiai henia gaukaradia momo ai karaia lasi.” Unai dainai, edia lalona idia hadaia edia nega bona goada bada do idia gaukaralaia Iehova idia hesiai henia totona.

Matamanai, tadikaka bona ena adavana ese edia mauri dalana idia haidaua be auka. To, dina ta idia ese Iesu ena hereva Ioane 8:31 dekenai idia laloa, ia gwau: “Bema egu hereva umui badinaia, umui be momokani egu hahediba taudia.” Unai siri ena hereva ese idia ia durua dainai, idia gwau: “Ena be emai kohu momo ai hoihoilaia, to unai ese namo ia havaraia.” Edia ruma badana idia hoihoilaia, anina lasi gaudia idia dadaraia, bona kongrigeisen ma ta dekenai idia lao heduru idia henia totona. Hari, idia painia noho, to danu idia ese Kingdom Hall haginia gaukara idia durua bona distrik hebouhebou ai volantia gaukara idia karaia. Edia hemami be edena bamona? Idia gwau: “Ai hoa badina kohu momo lasi maurina ai noholaia, bona Iehova ena orea ese ai ia henia gaukaradia ai karaia neganai ai moale.”

DALA MAORONA BADINAIA NOHO

Solomona ia gwau: “Oiemu matana dekena amo. vairana kahana do oi itaia noho. Mai laloa maoromaoro danu gau do oi itaia noho.” (Aon. 4:25) Draiva be vairana kahana sibona ia itaia bamona, namona be iseda matana idia veria diba gaudia ita raraia lasi, unai amo Iehova hesiai henia totona tahua gaudia ita atoa bona ita hagugurudia diba.

Edena tahua gaudia oi atoa bona hagugurua diba? Tahua gauna namona ta be ful-taim hesiai gaukara. Eiava pablisa be momo lasi to ena teritori be bada kongrigeisen ta dekenai oi lao diba. Bema oi be tadikaka, reana elda o hesiai taudia be momo lasi kongrigeisen ta dekenai oi lao diba. Unai dala ta ai heduru oi henia diba, a? Sekit naria tauna oi hereva henia diba, unai amo do oi diba edena kongrigeisen oi durua diba. Bema oi ura gabu daudauna ai ia noho kongrigeisen ta oi durua, vadaeni sekit naria tauna ida unai oi herevalaia diba. b

Isaia 62:10 ai ita herevalaia sivaraina mani ita laloa lou. Iuda taudia haida be idia gaukara goada dala idia hanamoa lou totona, unai amo Dirava ena taunimanima be Ierusalema dekenai do idia ginidae haraga. Bema oi be oi gaukara goada emu tahua gaudia oi hagugurua totona, namona be oi hesiku lasi. Iehova ena heduru amo emu tahua gaudia do oi hagugurua. Namona be hanaihanai Iehova oi noia oi dekenai aonega do ia henia, unai amo koua gaudia do oi kokia. Nega korikori ai, do oi itaia edena dala ai Iehova be oi ia durua “emu raka dalana do oi laloa namonamo guna” totona.—Aon. 4:26, NW.

a Ladana ai haidaua.

b Buka ladana Iehova Ena Ura Ia Karaia Orea rau 111-112 itaia.

Iunivesiti Ia Hereaia Hahenamo Idauidau

FLAVIA be kekeni maragina neganai, ena tubuna hahinena ese Baibel ia hadibaia. Iena tubuna be Iehova ena Witnes hahinena ta. To, Flavia ena tamana be tisa tauna, bona ia ese Flavia ia hagoadaia Dirava ese ia havaraia gaudia do ia stadilaia bona sikuli badana do ia lao. Ma haida ese Flavia idia hamaoroa: “Oiemu uru taudia ese tanobada idia hanamoa diba.” Ena tamana ese ia durua bona iunivesiti badana ta dekenai ia lao. Unuseniai petrol goevana karaia daladia idauidau ia stadilaia.

Daudau lasi murinai, Flavia ia itaia stiuden momo be ‘tanobada hanamoa’ karana idia laloa bada lasi. Danu, bisinesi oreadia ese iunivesiti ena gaukara durua totona moni idia henia dainai, tahua gaukara karaia taudia be unai bisinesi oreadia idia durua totona ripoti koikoidia idia torea. Flavia be unai ia itaia neganai ia moale lasi. Iehova ena Witnes taudia be Flavia ena ruma idia lao neganai, ia ura Baibel ena hereva Dirava bona vaira negana totona ia kamonai lou.

Flavia ese hereva momokani ia abia dae bona ia bapatiso. To, ia be digri kosi ta ia karaia dainai, nega be lasi sivarai namona ia harorolaia totona. Dina ta, ia kamonai sekit naria tauna ese Iamesi 4:17 ia herevalaia, ia gwau: “Bema ta be kara maorona karaia dalana ia diba, to ia karaia lasi, ia be ia kara dika.” Unai ese Flavia ia durua sibona ena mauri ia laloa totona. Ia gwau: “Lau ura Iehova ena hahenamo do lau abia, to lau ura danu egu saiens gaukara amo haere maorodia do lau davaria. Abia hidi ta lau karaia be namo.”

Flavia ese lalona ia hadaia iunivesiti do ia rakatania. Unai dainai ia lalohisihisi, a? Ia gwau:

“Iehova ena hesiai gaukara lalonai, lau abia hahenamo ese iunivesiti ai lau abia hahenamo idia hereaia. Iehova ese lau ia laloa bada. Ia ese lau ia hadibaia hebogahisi bona lalokau lau hahedinaraia, bona Baibel amo ma haida lau durua totona. Egu headava lau moalelaia bona vaira negana totona helaro namona lau davaria. Saiens amo unai lau davaria lasi. Iehova sibona ese tanobada ia hanamoa diba. Ia do lau rakatania lasi.” Flavia bona ena adavana be New York ai, Iehova ena Witnes taudia edia hedikwota dekenai idia gaukara.

GIMA KOHORONA—STADI GAUNA