EGU TAMANA be lagani 1899 ai Graz, Austria ai ia vara, bona Tanobada Tuarina Ginigunana ai ia be mero matamata. Lagani 1939 ai Tanobada Tuarina Iharuana ia vara neganai, egu tamana be German ami lalonai idia vareai. Lagani 1943 ai Russia ai idia tuari noho lalonai ia mase. Madi, unai dala ai egu tamana lau haboioa; egu mauri lagani be rua sibona. Lau be ia lau diba lasi, bona lau ura dikadika lau be mai egu tamana, badina sikuli ai lau itaia memero momo be mai edia tamadia. Gabeai, lau bada neganai, lau laloparara ita be mai iseda guba Tamana bona ia mase diba lasi. Unai ese lau ia hagoadaia bada.​—⁠Hab. 1:12.

Egu mauri lagani be 7 neganai Skaot Memero (Boy Scouts) oreana lalonai lau vareai. Skaot Memero be lagani 1908 ai, Britain ami ena lutanet jeneral ladana, Robert Stephenson Smyth Baden-Powell ese ia hamatamaia bona ia be tanobada hegegemadai oreana ta. Lagani 1916 ai, ia ese Skaot Maragidia (o Wolf Cubs) oreana ia hagania lau bamona memero maragidia totona.

Wikeni ai, kamepa totona gunika dekenai ai lao karana lau moalelaia. Unai negadia ai palai rumadia ai ai mahuta, iunifom ai hahedokilaia, daramu idia botaia ena regena ai badinaia bona ai masi. Hanuaboi ai Skaot memero haida ida lahi badinai ai helai, ane ai abia bona uda lalonai ai gadara karana lau moalelaia bada. Mauri gaudia idauidau ai stadilaia dainai, lau ese iseda Havaraia Tauna ese ia karaia gaudia lau lalodia bada.

Skaot Memero idia gunalaia taudia ese ai idia hagoadaia dina ta lalonai kara namona ta do ai karaia. Unai be edia taravatu badana. Ta ta ai hedavari neganai, ai gwau: “Noho Hegaegae.” Unai hereva lau ura henia. Aiemai grup lalonai memero ibounai be 100 bamona, bona kahana be Katolik bona kahana be Protestan dubu bona tamona be Budis tomadiho merona.

Lagani 1920 amo, intanesinol Skaot hebouheboudia o jamboree be lagani ta ta ai idia karaia. August 1951 ai, Bad Ischl, Austria ai Tanobada Hegegemadai Skaot Hebou namba 7 dekenai lau lao, bona August 1957 ai, Sutton Park, Birmingham kahirakahira, England ai Tanobada Hegegemadai Skaot Hebou namba 9 lau lao danu. England ena hebou ai Skaot Memero ibounai 33,000 be tano bona gabu idauidau 85 amo idia mai. Danu, taunimanima ibounai 750,000 bona Kwini Elizabeth be ai idia vadivadi henia. Lau laloa Skaot Memero Oreana be tanobada hegegemadai tadikaka oreana ta bamona. To, lau diba lasi gabeai lau be unai orea ia hereaia tadikaka oreana ma ta lalonai do lau vareai. Unai be tomadiho oreana ta.

Lagani 1958 ai, Graz, Austria ai, Grand Hotel Wiesler dekenai egu weita treinini lau karaia noho bona kahirakahira do lau haorea. Unuseniai,  Rudolf Tschiggerl, egu gaukara turana bona paraoa gabua tauna ese lau ia haroro henia. Unai be nega ginigunana hereva momokani lau kamonai. Ia ese Toi Tamona ia herevalaia, bona ia gwau ia be Baibel ena hahediba herevana lasi. To, lau gwau Toi Tamona Dirava be ia noho momokani, bona lau ura iena hereva lau hakoikoia. Rudolf lau ura henia bona lau ura iena lalona do lau veria Katolik Dubu dekenai do ia giroa lou.

Rudolf, ena ladana ma ta be Rudi, ia ura lau dekenai Baibel ta ia henia. Lau hamaoroa lau be Katolik Baibel sibona lau ura. Unai dainai, ta ia henia lau dekenai bona lau duahia matamaia neganai, lau itaia Rudi ese Baibel lalonai Watchtower Society ena pepapepa ta ia atoa. Unai pepapepa lau ura henia lasi, badina lau laloa idia torea namo herea, to idia be koikoi herevadia. Rudi ia laloparara bona lau dekenai pepapepa o magasin ta ia henia lasi. Hua toi lalonai, nega ta ta Baibel ai herevalaia bona nega momo ia lao bona hanuaboi momokani.

Egu hanua Graz ai, hotel dekenai egu treinini lau haorea murinai, egu sinana ese hotel haheaua sikuli dekenai lau ia siaia. Unai sikuli be Bad Hofgastein, Alps kourana ai ia noho. Unai sikuli bona Grand Hotel idia gaukara hebou dainai, nega haida unuseniai lau gaukara diba ma haida lau abia totona.

Rudi ese egu adres matamata be Vienna brens ofesi dekenai ia siaia, bona idia ese misinari taihu rua, Ilse Unterdörfer and Elfriede Löhr dekenai idia henia. a Dina ta hotel ena risepsen ese lau ia boiria bona ia gwau hahine rua be murimuri ai motuka dekenai idia helai bona idia ura lau idia hereva henia. Lau daradara badina lau be idia lau diba lasi, to lau lao idia lau hedavari henia. Gabeai, lau davaria Tanobada Tuarina Iharuana lalonai, Nazi gavamani ese Germany ia lohia bona Iehova ena Witnes taudia edia gaukara idia taravatua neganai, unai taihu rua be hunia dalanai Baibel bukadia idia haria. Danu, tuari ia do matamaia lasi neganai, Germany ena pulisi (Gestapo) taudia ese idia dogoatao bona Lichtenburg dibura kamepa dekenai idia atoa. Bena, tuari negana lalonai, idia be Ravensbrück kamepa, Berlin kahirakahira ai idia siaidia.

Unai taihu rua edia mauri lagani be egu sinana bamona dainai, idia lau matauraia bona lau ura lasi edia nega lau haorea. Lau ura lasi ai herevahereva bena wiki o hua haida murinai do lau hamaorodia, lau ura lasi lau do idia vadivadi henia lou. Unai dainai, idia lau nanadaia bema namo Katolik dubu ena hahediba herevana, pope be aposetolo edia gabu idia abia karana idia herevalaia siridia do idia torea bona do idia mailaia. Lau hamaorodia unai siri be pris tauna ida do lau herevalaia. Lau laloa unai dala amo hereva momokani do lau davaria.

Katolik Dubu ena hahediba herevana ta be inai: Pope taudia be aposetolo edia gabu idia abia, unai  be aposetolo Petero amo ema bona hari. (Katolik Dubu ese Mataio 16:18, 19 ai Iesu ese ia gwauraia herevana idia hadibaia kerere.) Danu, idia laloa pope be sea ai ia helai (ex cathedra) bona hahediba herevadia ia gwauraia neganai, ia kerere diba lasi. Unai lau abia dae bona lau laloa bema pope, Katolik taudia ese idia boiria Tamana Helagana, be hahediba herevadia ia gwauraia neganai ia kerere diba lasi, bema ia gwau Toi Tamona Diravana be hereva momokani, vadaeni unai be hereva momokani. To, bema ia be kerere ia karaia diba, vadaeni reana Toi Tamona hahediba herevana be koikoi. Unai dainai, pope be aposetolo taudia edia gabu ia abia hahediba herevana be mai anina bada, badina bema ia be momokani, vadaeni Katolik hahediba herevadia ibounai be momokani, to bema ia be koikoi vadaeni idia be koikoi!

Pris tauna dekenai lau lao neganai, egu henanadai ia haerelaidia lasi, to Katolik dubu ese ia abia dae pope be aposetolo taudia edia gabu idia abia ia herevalaia bukana ta be lau dekenai ia henia. Lau abia bona ia hereva hegeregerena lau duahia, bona lau giroa neganai egu henanadai be momo. Pris be egu henanadai ia haerelaidia diba lasi dainai, ia gwau: “Emu lalona lau haidaua diba lasi bona egu lalona oi haidaua diba lasi. . . . Oi lao!” Ia ura lasi lau do ia hereva henia lou.

Unai nega ai egu lalona lau hadaia Ilse bona Elfriede ida Baibel do lau stadilaia. Idia ese lau dekenai Iehova Dirava, guba ai ia noho Tamana Helagana momokanina ena sivarai idia hadibaia. (Ioa. 17:11) Unai nega ai kongrigeisen be lasi dainai, unai taihu rua ese kamonai famili ta ena ruma dekenai heboudia idia karaia. Haida sibona idia lao. Hebou ia hakaua bapatiso tadikaka be lasi dainai, Ilse bona Elfriede ese hebou gaudia be idia huanai idia herevalaia sibona. Nega ta ta ai, tadikaka ta be gabu ma ta amo ia mai bona idia rentaia ruma ta ai pablik tok ia henia.

October 1958 ai, Ilse bona Elfriede ese lau ida Baibel idia stadilaia matamaia, bona hua toi murinai January 1959 ai bapatiso lau abia. Lau do bapatiso lasi neganai, lau nanadaidia bema ia namo ruma-ta-ruma-ta haroro gaukara ai idia lau bamoa, badina lau ura haroro gaukara dalana lau diba. (Kara 20:20) Nega ginigunana idia lau bamoa murinai, lau noidia bema teritori ta idia henia diba lau sibona lau haroro totona. Idia ese hanua ta ena teritori idia henia lau dekenai, bona lau sibona be ruma ta ruma ta dekenai lau haroro bona kamonai taudia lau lou henidia. Gabeai, sekit naria tauna ia vadivadi neganai, unai be nega ginigunana tadikaka ta ida lau gaukara.

Lagani 1960 ai, egu hotel haheaua sikuli lau haorea murinai, egu hanua dekenai lau giroa bona egu varavara dekenai Baibel ena hereva momokani lau hadibaia toho. Ema bona hari, ta be hereva momokani lalonai ia do vareai lasi, to haida be idia kamonai.

Lagani 1961 ai, kongrigeisen dekenai brens ofesi amo ia mai revareva ta idia duahia. Unai revareva ese tadikaka taihu ia hagoadaia painia gaukara idia karaia totona. Lau be singul bona goada dainai, lau laloa gau ta ese lau ia koua lasi lau painia totona. Lau ese sekit tadikaka Kurt Kuhn lau nanadaia, dahaka ia laloa bema hua haida lau gaukara bona motuka ta lau hoia egu painia gaukara durua totona. Ena haere be dahaka? Ia gwau: “Iesu bona aposetolo taudia be motuka idia gaukaralaia ful-taim hesiai gaukara idia karaia totona, a?” Iena haere ese lau ia durua bada! Karaharaga, palani lau  karaia painia gaukara lau vareai totona. To, lau be hotel ena aniani gabuna ai wiki ta ta lalonai hora 72 lau gaukara dainai, gau haida do lau haidaua guna be namo.

Egu bosi lau noia bema ia hegeregere hora 60 sibona do lau gaukara. Egu noinoi ia abia dae bona egu pei ia haidaua lasi. Wiki haida murinai, lau noia bema ia hegeregere wiki ta ta ai hora 48 sibona do lau gaukara. Unai ia abia dae danu bona egu pei ia haidaua lasi. Gabeai, lau noia bema ia hegeregere, wiki ta ta ai hora 36 sibona do lau gaukara, bona ia abia dae lou. Lau hoa badina egu pei ia utua lasi! Toana be egu bosi ia ura lasi gaukara lau rakatania. Unai ese lau ia durua regula painia gaukara lau karaia totona. Unai nega ai, painia taudia be hua ta ta ai hora 100 idia hagugurua.

Hua foa murinai, Carinthia ena taoni ladana Spittal an der Drau ena kongrigeisen maragina ai lau idia abia hidi congregation servant bona spesel painia gaukara lau karaia totona. Unai nega ai, spesel painia taudia be hua ta ta ai hora 150 idia hagugurua. Lau be painia patna lasi, to taihu Gertrude Lobner, ia be congregation servant ena durua taihu, ese haroro gaukara ai lau ia bamoa bona ena heduru lau laloa bada. b

Lagani 1963 ai, lau idia abia hidi sekit gaukara do lau karaia. Nega haida trein amo kongrigeisen ta ta lau vadivadi henia, egu sutkeisi metaudia danu lau abia lao. Tadikaka momo be motuka lasi dainai, ta ese trein steiseni ai lau ia udaia lasi. Lau ura lasi lau hekokoroku dainai teksi lau abia lasi, to trein steiseni amo tadikaka edia ruma dekenai lau raka lao.

Lagani 1965 ai, lau do singul lalonai, lau idia boiria Gilead Sikuli ena klas namba 41 dekenai do lau lao. Egu klas taudia momo be singul danu. Gradueisen dinana ai, lau hoa badina lau idia siaia giroa egu hanua Austria dekenai sekit gaukara lau karaia totona. To, United States lau do rakatania lasi neganai, lau idia noia wiki foa lalonai sekit naria tauna ta lau bamoa. Tadikaka Anthony Conte ida lau gaukara hebou karana lau moalelaia bada, ia be lalokau tadikaka, haroro tauna namona bona haroro gaukara ia ura henia bada. Ai be New York ai, Cornwall kahana dekenai ai gaukara hebou.

Austria dekenai lau giroa lao murinai, lau idia siaia sekit teritori ai, singul taihu namona ta ladana Tove Merete ida lau hedavari. Iena mauri lagani be 5 negana amo, iena famili be hereva momokani lalonai idia vareai. Turadia idia henanadai edena dala ai ai hedavari neganai, ai hevaseha ai gwau: “Brens ofesi ese dala ia karaia.” Lagani tamona murinai, April 1967 ai ai headava bona gwaumaoro ai abia sekit gaukara do ai karaia hebou.

Unai lagani murinai, lau laloparara Iehova ese ena hebogahisi hereadaena amo lau ia abia hidi iena lauma natuna ta ai do lau lao. Unai nega amo, egu guba Tamana bona idia “boiboi: ‘Abba, Tamana!’” taudia ida hetura karana namona lau hamatamaia.​—⁠Roma 8:15.

Lau bona Merete be sekit bona distrik gaukara ai karaia ela bona lagani 1976. Keru negadiai, ai mahuta daiutu be aisi boksi bamona. Nega ta ai  noga neganai ai itaia, emai blanketi ena ataiai kahana be ia auka bona aisi ia noho, badina ai hahodi ena hodahoda be aisi ai ia lao! Unai dainai ai laloa electric heater ta do ai abia loaloa, unai amo hanuaboi ai daiutu hasiahua diba. Gabu haida dekenai, hanuaboi ai toileti gaukaralaia totona ai be sinou lalonai ai raka lao badina toileti be murimuri ai. Danu, ai be ruma lasi dainai, ai vadivadi kongrigeisen tadikaka ena ruma dekenai ai noho ela bona Tuesday daba, bena kongrigeisen ma ta dekenai ai lao.

Momokani, unai lagani iboudiai lalonai egu lalokau adavana be lau ia durua bada. Ia be haroro gaukara ia ura henia, unai dainai lau doria lasi ia haroro totona. Ia be tadikaka taihu ia lalokau henidia bona ma haida ia lalodia bada. Unai ese lau ia durua.

Lagani 1976 ai, Austria ena brens ofesi, Vienna dekenai ai idia boiria bona lau idia abia hidi Brens Komiti gaukara lau karaia totona. Unai nega ai, Austria brens ese Eastern Europe tanodia haida edia gaukara ia naria, bona hunia dalanai edia buka bona magasin idia siaia. Tadikaka Jürgen Rundel be mai aonega ida unai gaukara ia gunalaia. Lau be ia ida lau gaukara bona gabeai lau idia noia Eastern Europe tanodia 10 ai gado hanaia gaukara lau naria totona. Hari, Jürgen bona ena adavana Gertrude be Germany ai spesel painia gaukara idia karaia noho. Lagani 1978 ai, Austria brens be kompiuta amo magasin printaia dalana (phototypeset) idia hegaegaelaia, bona printa masini maragina ta amo gado 6 ai magasin idia printaia. Danu hanua idauidau dekenai sabskripsen ai siaia. Otto Kuglitsch be unai gaukara ia naria. Hari ia bona ena adavana Ingrid be Germany brens ofesi ai idia gaukara.

Eastern Europe tanodia ai tadikaka sibodia ese mimeograph masini bona film amo buka bona magasin edia kopi idia karaia. To, tano ma haida amo heduru idia abia be namo. Iehova ese unai gaukara ia gimaia bona ai, brens ofesi tadikaka, be unai tadikaka bona taihu ai lalodia bada badina ena be lagani momo lalonai gavamani ese edia gaukara idia taravatua bona hekwakwanai momo idia davaria, to idia haheauka.

Lagani 1989 ai, lau ese Tadikaka Theodore Jaracz, Hakaua Oreana tauna ta lau bamoa bona  Romania dekenai ai lao. Ai lao badina be ai ura unuseniai tadikaka edia grup badana ta do ai durua orea dekenai idia giroa mai totona. Lagani 1949 ai, gau haida dainai idia ese orea idia rakatania bona sibodia edia kongrigeisen idia haganidia. To, kamonai matamata taudia idia bapatisodia bona idia haroro noho. Hedikwota ese ia abidia dae kongrigeisen taudia be tuari lalonai idia vareai lasi dainai gavamani ese dibura ruma ai ia koudia. Unai hegeregerena, orea idia rakatania bona sibodia edia kongrigeisen idia haginia taudia be unai bamona idia karaia dainai, gavamani ese dibura ruma ai ia koudia. Romania gavamani be iseda gaukara ia taravatua dainai, ai be hunia dekenai Tadikaka Pamfil Albu ena ruma ai unai grup edia elda foa bona hedikwota ese ia makaia Romania ena Tano Komiti tadikaka haida ida ai hebou. Austria amo gado ia hanaia tadikaka Rolf Kellner be ai ia bamoa danu.

Ai hebou hanuaboi iharuana ai, Tadikaka Albu ese iena elda turadia foa ia hamaorodia ai ida idia lalotamona totona. Ia gwau: “Bema hari ita karaia lasi, reana gabeai dala be lasi.” Unai murinai, tadikaka 5,000 be orea dekenai idia giroa mai. Oibe, Iehova ia kwalimu bona Satani ia lusi!

Lagani 1989 dokonai, Eastern Europe ai komiunis gavamani ia do moru lasi lalonai, Hakaua Oreana ese lau bona egu adavana idia boiria hedikwota, New York dekenai do ai gaukara. Ai hoa bada. Lagani 1990 July ai, Brooklyn Brens ai emai gaukara ai hamatamaia. Lagani 1992 ai, lau idia abia hidi Hakaua Oreana ena Hesiai Komiti ai heduru tauna ena gaukara lau karaia totona. Bona July 1994 amo, lau be Hakaua Oreana ena memba ta ai lau lao.

Guna hotel ai weita gaukara lau karaia negana be ia ore vadaeni. Hari, lau moale badina tanobada hegegemadai tadikaka oreana dekenai Dirava ena hereva hegaegaelaia bona haria gaukarana lau durua. (Mat. 24:45-47) Lagani 50 mai kahana ful-taim hesiai gaukara lau karaia vadaeni, bona lau moale bada badina lau itaia Iehova ese tanobada hegegemadai tadikaka oreana ena gaukara ia hanamoa noho. Intanesinol hebouhebou lau moalelaidia, badina unuseniai iseda guba Tamana, Iehova bona Baibel ena hereva momokani dibaia karana idia herevalaia.

Lau guriguri taunimanima milioni momo ese Baibel do idia stadilaia, hereva momokani do idia abia dae bona iseda tanobada hegegemadai tadikaka oreana ida Iehova do idia hesiai henia hebou. (1 Pet. 2:17) Danu, mai moale ida guba amo egu tamana korikorina be tanobada ai do ia toreisi lou negana lau naria noho. Egu ura be Paradaiso ai, egu tamana, sinana bona varavara haida be Iehova do idia tomadiho henia.