ITA be nega aukana lalonai ita noho. (2 Tim. 3:1-5) Dina ta ta ai, gau idauidau ese iseda lalokau bona Iehova badinaia karana idia tohoa. Iesu be iseda negai do idia vara gaudia ia diba, bona ena murinai idia raka taudia dekenai ia gwauhamata do ia hagoadadia, unai amo do idia haheauka ela bona dokona. (Mat. 24:3, 13; 28:20) Iesu ese ena murinai idia raka taudia ia hagoadaia totona, igui hesiai tauna mai ena kamonai bona kara maoromaoro ia abia hidi “nega korikori ai edia aniani do ia henia.”​—Mat. 24:45, 46.

Iehova ese igui hesiai tauna be lagani 1919 ai ia horoa. Unai nega amo, unai igui hesiai tauna ese Baibel buka bona magasin be gado idauidau ai ia halasia. (Mat. 24:14; Apok. 22:17) To madi, unai Baibel buka bona magasin be gado haida dekenai idia hahanaia lasi. Danu, gabu haida ai Intanet be lasi dainai, taunimanima haida be unai pablikeisen idia abia lasi. Unai ena anina be idia be Dirava amo idia mai hereva haida idia reaia, a? Haere maorona ita abia totona, namona be inai mai anina bada henanadai foa ita lalodia.

Satani ese Iesu ia dibagania nadi be paraoa ai do ia halaoa neganai, Iesu ia haere: “Taunimanima be aniani sibona amo lasi, to Iehova ena uduna amo idia mai hereva ibounai dainai do idia mauri.” (Mat. 4:3, 4) Iehova ena hereva ibounai be Baibel lalonai idia noho. (2 Pet. 1:20, 21) Unai dainai, Baibel be Iehova amo idia mai herevadia ena kahana badana.​—2 Tim. 3:16, 17.

Iehova ena orea ese New World Translation of the Holy Scriptures (Nega Matamata Baibel) ia hahanaia. Unai Baibel ibounai eiava ena kahana be gado 120 mai kahana ai idia hahanaia vadaeni, bona lagani ta ta ai gado ma haida dekenai idia halasia noho. Baibel ma haida edia kahana ibounai eiava kahana be gado tausen momo ai idia hahanaia danu. Unai ibounai ese Iehova ena ura idia hagugurua. Iena ura be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:3, 4) Bona Iehova be taunimanima edia kudouna ia diba dainai, ita diba “Dirava dibaia totona idia hitolo taudia” be ena orea dekenai do ia veria mai, bona iena hereva be idia dekenai do ia hadibaia.​—Mat. 5:3, 6; Ioa. 6:44; 10:14; Heb. 4:13.

Bema ta ia ura ena abidadama do ia goada, Baibel ia duahia sibona be hegeregere lasi. Namona be ia duahia gaudia ia lalopararalaia bona ia dibaia gaudia ia badinaia. (Iam. 1:22-25) Aposetolo edia negai, Etiopia tauna ta be unai bamona ia karaia. Ia be Dirava ena Hereva ia duahia noho lalonai, evanelia tauna Filipi ese ia nanadaia: “Oi duahia gaudia oi lalopararalaia, a?” Etiopia tauna ia haere: “Edena bamona do lau laloparara bema ta ese lau ia hadibaia lasi?” (Kara 8:26-31) Filipi ese unai tauna ia durua Dirava ena Hereva ia lalopararalaia namonamo totona. Unai Etiopia tauna be ia dibaia gaudia ese ena kudouna idia hamarerea dainai, bapatiso ia abia. (Kara 8:32-38) Unai hegeregerena, iseda pablikeisen idauidau ese ita idia durua hereva momokani ita lalopararalaia namonamo totona. Ita duahia gaudia ese iseda kudouna idia hamarerea bona ita idia durua ita dibaia gaudia ita badinaia totona.​—Kol. 1:9, 10.

Ita be Iehova ena hesiai taudia dainai, iseda pablikeisen idauidau amo gau namodia momo ita ‘ania’ bona ‘inua.’ (Isa. 65:13) Hegeregere, Gima Kohorona be gado 210 mai kahana ai idia hahanaia. Ia ese peroveta herevadia edia anina ia hahedinaraia, ita ia durua Baibel ena hereva momokani dobudia ita lalopararalaia totona, bona ita ia durua eda mauri lalonai Baibel ena hakaua herevadia ita badinaia totona. Awake! magasin be gado 100 mai kahana ai idia hahanaia. Ia ese iseda diba Iehova ena havaraia gaudia dekenai ia habadaia, bona Baibel ena sisiba namodia ita badinaia daladia ia hahedinaraia. (Aon. 3:21-23; Roma 1:20) Igui hesiai tauna ese Baibel buka bona magasin be gado 680 mai kahana lalonai ia halasia! Dina ta ta ai oi ese nega oi atoa Baibel oi duahia totona, a? Oi ese magasin matamatadia bona lagani ta ta ai emu gado ai idia halasia pablikeisen idauidau oi duahia, a?

 Iehova ena orea be buka bona magasin sibona idia halasia lasi, to iseda hebou badadia bona maragidia lalonai ita kamonai tok idia hegaegaelaia danu. Unai hebou idauidau ai idia karaia tok, drama, haheitalai bona intaviu idauidau oi moalelaia, a? Oibe, Iehova ese ita totona aria namona ia hegaegaelaia!​—Isa. 25:6.

Lasi. To, namo lasi ita hoa bema nega haida Iehova ena hesiai taudia haida ese Dirava ena hereva momo idia abia, to ma haida be lasi. Dahaka dainai? Mani aposetolo taudia ita laloa. Iesu ese idia dekenai gau momo ia hadibaia, to iena hahediba taudia ma haida dekenai gau haida sibona ia hadibaia. (Mar. 4:10; 9:35-37) To, unai hahediba taudia ma haida be Dirava ena Hereva dekenai gau haida idia reaia lasi; idia dibaia gaudia be hegeregere idia totona.​—Efe. 4:20-24; 1 Pet. 1:8.

Namona be ita laloatao, Iesu be tanobada ai ia noho neganai ia gwauraia herevadia bona ia karaia karadia momo be Baibel lalonai idia torea lasi. Aposetolo Ioane ia gwau: “Iesu ese ma gau momo ia karaia danu, to bema unai ibounai edia sivarai idia torea, lau laloa tanobada do ia hegeregere lasi unai lokua toretore ibounai ia haboua totona.” (Ioa. 21:25) Momokani, Iesu ena hahediba taudia be iena sivarai momo idia diba, to Iehova ese ita dekenai danu Iesu ena sivarai haida ia hadibaia. Unai amo ita be Iesu ena aena gabudia ai ita raka diba.​—1 Pet. 2:21.

Mani aposetolo taudia ese kongrigeisen ta ta dekenai idia siaia revareva ita laloa. Momokani, Paulo ese ia torea revareva ta be Baibel lalonai idia atoa lasi. (Kol. 4:16) To, unai revareva ita abia lasi dainai, ita gwau diba ita be Baibel ena hereva haida ita reaia, a? Lasi. Iehova be iseda dabu gaudia ia diba bona unai hegeregerena ita dekenai iena hereva ia halasia iseda abidadama ia goada totona.​—Mat. 6:8.

Hari, Iehova ena hesiai taudia haida be Dirava amo idia mai herevadia momo idia abia. Reana emu gado ai pablikeisen haida sibona idia halasia. Bema unai ia vara, namona be oi diba Iehova be oi ia laloa bada. Oi dekenai idia noho pablikeisen oi stadilaia bona oi lalopararalaia diba gado ai idia karaia heboudia dekenai oi lao. Unai dala amo, oiemu hetura karana Iehova ida be do ia goada noho.​—Sal. 1:2; Heb. 10:24, 25.

Iseda Web sait ai, iseda magasin bona Baibel stadilaia bukadia ma haida ita halasia. Web sait ai headava taudia, memero kekeni, bona natu maragidia durua gaudia idia noho danu. Famili ta ta ese edia Ruma Bese ena Tomadiho negana ai, unai gaudia idia stadilaia neganai, heduru bada idia abia. Unai sibona lasi, to iseda Web sait ai spesel gaudia haida ita halasia danu. Hegeregere, Gilead sikuli ena gradueisen bona lagani ena hebou. Danu, tanobada hegegemadai Iehova ena taunimanima be disasta idia davaria, eiava edia inai taudia ese kota dekenai idia abia lao sivaraidia ita halasia danu. (1 Pet. 5:8, 9) Iseda Web sait be haroro gaukara ena tulu namona ta, badina iseda gaukara idia koua o taravatua tanodia ai sivarai namona ia abia lao.

Herevana oi be iseda Web sait oi itaia o lasi, emu abidadama ia goada noho diba. Igui hesiai tauna be ia gaukara goada magasin bona buka momo ia printaia, unai amo Keristani taudia ibounai be Dirava ena hereva idia abia diba. Unai dainai, namo lasi oi laloa jw.org oi itaia totona, mobael fon o kompiuta ta oi hoia be namo. Haida be iseda Web sait amo gau haida idia printaia bona Web sait idia itaia diba lasi tadikaka taihu dekenai idia henia diba, to kongrigeisen be unai do ia karaia lasi.

Ita moale badina Iesu be iena gwauhamata ia badinaia bona Dirava ena hereva be ita dekenai ia henia noho. Inai nega aukadia edia dokona ia kahirakahira lalonai, ita diba momokani Iehova be “nega korikori ai” iena hereva do ia halasia noho.