1, 2. Iehova ese Mose dekenai dahaka gaukara ia henia, bona edena gwauhamata ia karaia?

 MANI oi laloa, oi be gavamani tauna badana ta vairanai oi gini bona Iehova ena taunimanima totona do oi hereva, emu hemami be edena bamona? Reana do oi gari bona oi laloa oi be hegeregere lasi. Do oi gwauraia herevana be edena bamona do oi hegaegaelaia? Oi be siahu ibounai Diravana ena gwaukau tauna dainai, dahaka do oi karaia mai gari lasi ida oi hereva totona?

² Mose dekenai unai bamona ia vara danu. Baibel ia gwau: “Tanobada taudia ibounai edia huanai [Mose] sibona be manau herea.” (Num. 12:3) Iehova ese Mose ia siaia Israela taudia be Aigupito ena igui amo ia ruhaia totona. To idia vara gaudia ese idia hahedinaraia, Farao be hekokoroku bona hemataurai lasi tauna. (Eso. 5:1, 2) Iehova ia ura Mose ese Farao do ia oda henia Dirava ena taunimanima milioni momo be igui hesiai amo do ia ruhaia! To, Mose ese Iehova ia nanadaia: “Lau be daika, dohore Farao dekenai lau lao, bona Israela taudia Aigupito dekena amo do lau hakaua siri?” Reana Mose ia gari bona ia mamia ia hegeregere lasi. To, Dirava ese Mose ia hamaoroa ia ida do ia noho. Ia gwau: “Dohore lau durua oi.”—Eso. 3:9-12.

3, 4. (a) Dahaka dainai Mose ia gari? (b) Edena dala ai ita be Mose ese ia davaria hekwakwanai ita davaria diba?

 ³ Dahaka dainai Mose ia gari? Badina ia laloa Farao be Iehova Dirava ese ia siaia tauna do ia abia dae lasi bona do ia kamonai henia lasi. Danu, Mose ia gari badina ia laloa Israela taudia be do idia abia dae lasi, ia be Iehova ese ia abia hidi Aigupito amo idia ia ruhaia totona. Unai dainai, Mose ese Iehova ia hamaoroa: “Israela taudia be dohore idia kamonai henia lasi lau dekenai. Lauegu hereva do idia abia dae lasi, do idia gwau, ‘Lohiabada be ia hedinarai henia lasi oi dekenai.’”—Eso. 3:15-18; 4:1.

⁴ Iehova ese Mose ia haere henia dalana, bona unai murinai idia vara gaudia amo ita ta ta ese mai anina bada gauna ta ita diba. Momokani, reana oi be gavamani tauna badana ta ena vairanai do oi gini lasi. To, emu teritori taudia dekenai Iehova bona ena Basileia oi harorolaia totona oi gari, a? Bema oibe, mani ita itaia edena dala ai Mose ena sivarai ese oi ia durua diba.

5. Iehova ese Mose ena imana dekenai dahaka ia atoa, bona edena dala ai unai ese Mose ia durua ia gari lasi totona? (Laulau ginigunana itaia.)

⁵ Mose ese Iehova ia hamaoroa Israela taudia be iena hereva do idia abia dae lasi neganai, Dirava ese Mose ia durua gabeai do idia vara gaudia totona do ia hegaegae. Baibel ia gwau: “Lohiabada [be Mose dekenai] ia gwau, ‘Unai be dahaka oiemu imana dekenai?’ Ia haere, ia gwau, ‘Itotohi.’ Lohiabada ia gwau, ‘Tano dekenai oi negea diho.’ Tano dekenai ia negea diho, vadaeni itotohi be Lohiabada ese gaigai ia halaoa. Vadaeni Mose ia heau, ia rakatania. To Lohiabada ia hereva Mose dekenai ia gwau, ‘Oiemu imana oi atoa lao, iena iuna dekenai oi dogoatao.’ Unai dainai iena imana ia atoa lao, ia dogoatao. Vadaeni Lohiabada ese itotohi ma ia halaoa iena imana dekenai. Lohiabada ia gwau, ‘Inai bamona oi karaia, vadaeni dohore idia diba [Iehova], . . . ese ia hedinarai henia vadaeni oi dekenai.’” (Eso. 4:2-5) Mose be Dirava ese siahu ia henia dainai, mai gari lasi ida Israela taudia bona Farao vairanai Dirava ena hereva ia gwauraia diba.—Eso. 4:29-31; 7:8-13.

6. (a) Haroro gaukara lalonai, dahaka ita dogoatao be namo, bona dahaka dainai? (b) Edena dala ai “Dirava ena hereva be ia mauri noho” bona “ia be mai ena siahu”?

⁶ Haroro gaukara ai ma haida dekenai Baibel ena sivarai ita abia lao neganai, reana idia danu do idia henanadai: “Unai be dahaka oiemu imana dekenai?” Nega momo, Baibel be iseda imana ai ita dogoatao ita gaukaralaia totona. Ena be haida idia laloa Baibel be buka ta sibona, to unai be maoro lasi, badina Baibel lalonai Dirava ena hereva idia noho. (2 Pet. 1:21) Baibel ese Dirava ena gwauhamata bona ena Basileia ese do ia karaia gaudia ia herevalaia. Unai dainai, aposetolo Paulo ia gwau: “Dirava ena hereva be ia mauri noho, bona ia be mai ena siahu.” (Heberu 4:12 duahia.) Iehova ena gwauhamata herevadia be idia guguru noho, badina Ia gaukara noho ia hagugurudia totona. (Isa. 46:10; 55:11) Ta be unai ia lalopararalaia neganai, do ia mamia Baibel amo ia duahia herevadia be mai edia siahu iena mauri idia haidaua totona.

7. Edena dala ai ‘hereva momokani ita hadibaia maoromaoro’ diba?

⁷ Oibe, Iehova ese iseda imana lalonai Baibel ia atoa. Unai tulu amo ita hahedinaraia diba ita gwauraia sivaraina be momokani bona ia be Dirava amo. Unai dainai, Paulo be Heberu taudia ia tore henia murinai, Timoteo ia hagoadaia ‘do ia gaukara goada hereva momokani ia hadibaia maoromaoro’ totona. (2 Tim. 2:15) Edena dala ai Paulo ena sisiba ita badinaia diba? Namona be siri namodia ita abia hidi bona ita duahia, unai amo kamonai tauna ena lalona ita veria diba. Lagani 2013 ai idia halasia pepapepa matamatadia be ita idia durua diba, unai ita karaia totona.

8. Haroro naria tauna ta ese pepapepa matamatadia be edena bamona ia herevalaidia?

⁸ Pepapepa matamatadia ibounai edia sitaelo be tamona. Unai dainai, bema ita be pepapepa tamona hariharilaia dalana ita diba, vadaeni ita be pepapepa ibounai do ita hariharilaia diba. Hawaii, U.S.A. ai, haroro naria tauna ta ia gwau: “Ai davaria ruma-ta-ruma-ta bona taunimanima momo idia loaloa gabudiai ai haroro neganai, inai tulu matamatadia ese ai idia durua bada.” Dahaka dainai unai pepapepa hariharilaia be auka lasi? Tadikaka ia gwau, ia auka lasi badina pepapepa vairanai henanadai bona haere haida idia noho danu. Unai ese ruma tauna ia durua haere ia henia totona do ia gari lasi. Ma ia gwau, ia davaria unai pepapepa idia torea dalana ese taunimanima edia lalona idia veria bona herevahereva dalana ia kehoa.

9, 10. (a) Edena dala ai iseda pepapepa matamatadia ese ita idia durua Baibel ita gaukaralaia totona? (b) Edena pepapepa be taunimanima momo ese idia ura henia, bona dahaka dainai?

⁹ Pepapepa ta ta ese ita idia durua siri namona ta ita duahia totona. Hegeregere, pepapepa ladana Hisihisi Do idia Ore, A? mani ita laloa. Herevana ruma tauna ena haere be “oibe,” “lasi” o “reana,” to pepapepa oi kehoa bona oi gwau, “Baibel ia gwau.” Bena Apokalupo 21:3, 4 oi duahia.

¹⁰ Pepapepa ladana Baibel be Edena Bamona Oi Laloa? oi gaukaralaia neganai, herevana ruma tauna ese edena haere ia abia hidi, to pepapepa oi kehoa bona oi gwau, “Baibel ia gwau, ‘Toretore Helagadia be Dirava ena hahekau henunai idia torea.’” Bena reana ma oi gwau, “To, hereva ma haida idia noho danu.” Bena emu Baibel oi kehoa bona 2 Timoteo 3:16, 17 oi duahia.

11, 12. (a) Emu haroro gaukara oi moalelaia totona, edena dala ai pepapepa oi gaukaralaia diba? (b) Edena dala ai pepapepa ese oi do idia durua lou henia oi karaia totona?

¹¹ Bema ruma tauna ia ura, unai pepapepa ena hereva ma haida oi herevalaia diba. To bema ia ura lasi, gau badana be Baibel amo siri ta o rua oi duahia vadaeni. Gabeai, oi lou henia bona pepapepa ena hereva ma haida umui herevalaia diba.

¹² Pepapepa ta ta edia murinai inai hereva kwarana, “Mani Oi Laloa” henunai henanadai ta bona siri haida idia noho, bona kamonai  tauna oi lou henia neganai umui herevalaia diba. Pepapepa ladana Vaira Negana be Edena Bamona Oi Laloa? lalonai, lou henia karaia totona inai henanadai ia noho, “Edena dala ai Dirava ese iseda tanobada do ia hanamoa?” bona Mataio 6:9, 10 bona Daniela 2:44 idia noho. Danu, pepapepa ladana Mase Taudia Idia Toreisi Lou Diba, A? lalonai, inai henanadai “Dahaka dainai ita buruka bona ita mase?” bona Genese 3:17-19 bona Roma 5:12 idia noho.

13. Pepapepa amo Baibel stadi oi hamatamaia diba dalana mani oi herevalaia.

¹³ Pepapepa oi gaukaralaidia diba, Baibel stadi ta oi hamatamaia totona. Bema ta ese mobael fon amo pepapepa ena murinai ia noho QR (Quick Response) code ia skenia, maoromaoro iseda Web sait dekenai do ia lao, bona Baibel stadi totona ia noinoi diba. Danu, pepapepa ta ta ese Dirava Ena Sivarai Namona! buklet idia hahedinaraia, bona ena kahana ta idia herevalaia. Hegeregere, pepapepa ladana Daika ese Inai Tanobada Ia Biagua? ese duahia tauna ia hamaoroa unai buklet ena karoa 5 ia duahia totona. Bona pepapepa ladana, Famili Ia Moale Totona Dahaka be Gau Badana? ese duahia tauna ia hamaoroa unai buklet ena karoa 9 ia duahia totona. Bema dala maorona ai unai pepapepa oi gaukaralaidia, nega ginigunana ruma tauna oi haroro henia bona oi lou henia neganai, Baibel do oi gaukaralaia diba. Unai amo oi ese Baibel stadi ma haida do oi hamatamaia. Dahaka oi karaia diba, haroro gaukara ai Baibel oi gaukaralaia namonamo totona?

14, 15. Edena dala ai haroro gaukara ai oi ese Paulo ena haheitalai oi tohotohoa diba?

¹⁴ Paulo ia ura bada ia haroro henia “taunimanima momo” ese idia laloa gaudia do ia diba. (1 Korinto 9:19-23 duahia.) Paulo ia ura “Iuda taudia . . . taravatu henunai idia noho taudia . . . taravatu lasi taudia” bona “manoka taudia” ia haroro henidia. Oibe, Paulo ia ura “taunimanima idauidau ibounai [ia] durua . . . , unai amo dala idauidau ibounai amo haida [ia] hamauria diba.” (Kara 20:21) Edena dala ai Paulo bamona ita hegaegae namonamo teritori ai “taunimanima idauidau” dekenai hereva momokani ita harorolaia totona?—1 Tim. 2:3, 4.

¹⁵ Hua ta ta ai, Iseda Basileia Gaukara dekenai hamatamaia herevadia idia hedinarai. Namona be unai dala idauidau oi tohoa. To, bema emu teritori ai taunimanima be gau ma ta idia laloa momo, edia lalona do ia veria hamatamaia herevadia oi laloa be namo. Emu teritori ena mauri dalana, unuseniai idia noho taudia bona idia ese idia laloa momo gaudia oi laloa. Bena, idia laloa momo gauna ia herevalaia siri ta oi abia hidi diba. Sekit naria tauna ta be ia bona ena adavana ese haroro gaukara ai Baibel idia gaukaralaia dalana ia herevalaia, ia gwau: “Ruma taudia idia ura ai ese Baibel siri ta do ai duahia, bema emai hereva ia kwadogi bona point badana sibona ai hahedinaraia. Ruma tauna ai hedavari henia murinai, emai Baibel ai kehoa bona siri ta ai duahia.” Henunai paragraf lalodiai, momo ese idia gaukaralaia hamatamaia herevadia, henanadai bona Baibel siri haida do ita herevalaia. Emu teritori ai unai dala oi tohoa diba.

16. Haroro gaukara ai Isaia 14:7 ita gaukaralaia diba dalana mani oi herevalaia.

¹⁶ Bema oi noho gabuna ai raskol bona dagedage karadia be momo, reana ruma tauna oi nanadaia diba: “Oi laloa nega ta inai hereva be niuspepa ena vairanai do ia hedinarai: ‘Hari, tanobada ena kahana ibounai ai maino ia vara bona taunimanima be mai moale ida ane idia abia,’ a? Isaia 14:7 ese unai ia herevalaia. To danu, Baibel lalonai Dirava ena gwauhamata momo idia noho, bona idia hahedinaraia nega vaira ai maino do ia havaraia.” Bena ruma tauna oi noia Baibel amo unai gwauhamata namona ta oi duahia totona.

17. Edena dala ai haroro gaukara lalonai Mataio 5:3 oi gaukaralaia diba?

¹⁷ Emu gabu ai tatau momo idia hekwarahi  edia ruma bese idia naria totona, a? Bema oibe, ruma tauna oi nanadaia: “Oi laloa tau ta dekenai pei hida be hegeregere, iena ruma bese ia naria totona?” Ruma tauna ia haere murinai, oi gwau: “Ena be tama momo be pei badana idia abia, to edia ruma bese be idia moale lasi. Oi laloa dahaka ese idia do ia hamoalea diba?” Mataio 5:3 oi duahia murinai, bena dala oi karaia Baibel stadi oi hamatamaia totona.

18. Edena dala ai Salamo 37:11 amo ma haida oi hagoadaia diba?

¹⁸ Emu teritori taudia be vanegai sibona ia vara hekwakwanai ta dainai idia lalohisihisi, a? Inai bamona oi hereva diba: “Lau mai oi dekenai hagoadaia sirina ta lau duahia totona. (Salamo 37:11 duahia.) Inai siri lalonai Dirava ia ura do ita abia gaudia rua oi itaia, a? ‘Moale’ bona ‘maino.’ Oibe, Dirava ia ura ita ese eda mauri do ita moalelaia. To, edena dala ai unai ia vara diba?” Bena Sivarai Namona buklet ena kahana ta oi herevalaia.

19. Dirava idia laloa bada taudia ida oi herevahereva neganai, edena dala ai Apokalupo 14:6, 7 oi gaukaralaia diba?

¹⁹ Emu neiba taudia be Dirava idia laloa bada, a? Bema oibe, emu hereva be inai bamona oi hamatamaia diba: “Bema aneru ta be oi ia hereva henia, do oi kamonai, a? (Apokalupo 14:6, 7 duahia.) Inai siri lalonai aneru ta ia gwau, ‘Dirava umui gari henia.’ To, ia be edena Dirava ia herevalaia? Unai aneru ese haere ia henia badina ia gwau, ia be ‘guba bona tanobada ia karaia Tauna.’ Unai be daika?” Bena Salamo 83:18 oi duahia, ia gwau: “Vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Bena ruma tauna oi noia bema namo ia dekenai Iehova Dirava ena kara ma haida do oi herevalaia.

20. (a) Edena dala ai Aonega Herevadia 30:4 amo ma ta dekenai Dirava ena ladana ita hahedinaraia diba? (b) Edena Baibel siri ta oi gaukaralaia vadaeni bona kamonai tauna ia durua?

²⁰ Bema oi be matamata tauna ta oi hereva henia, reana inai bamona emu hereva oi hamatamaia diba: “Lau ura henanadai badana ta ia gwauraia sirina do lau duahia. (Aonega Herevadia 30:4 duahia.) Inai siri ese ia herevalaia gaudia be taunimanima ta ese ia karaia diba lasi, unai dainai ita gwau diba ia be iseda Havaraia Tauna ia herevalaia. a Edena bamona iena ladana do ita diba? Lau ura Baibel amo unai ladana be oi dekenai lau hahedinaraia.”

21, 22. (a) Edena dala ai oi abia hidi siri namona ta ese ruma tauna ia durua diba? (b) Emu lalona oi hadaia haroro gaukara ai dahaka do oi karaia totona?

²¹ Ita diba lasi ita abia hidi sirina ese edena dala ai ruma tauna do ia durua. Hegeregere, Australia ai taihu rua be hahinena ta ena iduara dekenai idia pidipidi. Idia ta ia henanadai: “Dirava ena ladana oi diba, a?” bena Salamo 83:18 ia duahia. Unai hahine ia gwau: “Lau hoa bada! Lau idia rakatania murinai, egu motuka lau guia bona kilomita 56 bamona lau heau lao buka hoihoilaia stoa ta dekenai, bona Baibel ma haida ese unai ladana idia hahanaia dalana lau sekea. Diksenari ai unai ladana ena anina lau tahua danu. Lau hamomokania Dirava ena ladana be Iehova, bena lau laloparara lau be gau momo lau do diba lasi.” Unai murinai, ia bona gabeai ia adavaia tauna be Baibel stadi idia hamatamaia, bona gabeai idia bapatiso.

²² Baibel be mai ena siahu taunimanima edia mauri ia haidaua totona. Bema ta be Baibel ia duahia, ia ese Iehova ena gwauhamata namodia idauidau do ia abidadama henia. Unai abidadama karana ese ia do ia durua, ia dibaia gaudia ia badinaia totona. (1 Tesalonika 2:13 duahia.) Baibel sibona be mai ena siahu ruma tauna ena lalona ia veria totona. Unai dainai, bema haroro gaukara ai dala ia kehoa, namona be Baibel ita gaukaralaia. Oibe, Dirava ena Hereva be ia mauri noho!