PETERO be nega toi Iesu ia gorea murinai, ia tai dikadika. Ena be gabeai Petero do ia hekwarahi ena abidadama ia hagoadaia lou totona, to Iesu ia ura Petero ia gaukaralaia ma haida ia durua totona. Unai dainai, Petero dekenai ia gwau: “Oi helalo-kerehai neganai, emu tadikaka do oi hagoadaia.” (Luka 22:32, 54-62) Gabeai, Petero be aposetolo edia negai ia noho Keristani kongrigeisen ena du goadana ta ai ia lao. (Gal. 2:9) Unai hegeregerena, guna elda maduna ia haboioa tadikaka ta ese unai maduna ia abia lou diba, bona mai moale ida ena tadikaka do ia durua edia abidadama idia hagoadaia noho totona.

Reana guna elda haida be edia maduna amo idia kokia dainai, idia laloa idia be hegeregere lasi. Julio a be lagani 20 mai kahana lalonai South America dekenai elda gaukara ia karaia, bona ia gwau: “Tok hegaegaelaia, tadikaka taihu vadivadi henia, bona kongrigeisen taudia dekenai mamoe vadivadi karaia karana be egu mauri ena kahana badana ta ai ia lao! Bena karaharaga unai hahenamo ibounai idia boio, bona lau dekenai gaukara be momo lasi. Lau dekenai unai be lalohisihisi bada negana.” Hari, Julio be ena elda maduna ma ia abia lou.

Hahediba tauna Iamesi ia gwau: “Lauegu tadikaka e, hahetoho idauidau umui davaria neganai, umui moale.” (Iam. 1:2) Iamesi be dagedage bona iseda goevadae lasi tauanina dainai ita davaria diba hahetoho ia herevalaidia. Ia ese tauanina ena ura dikadia, ita ura henia taudia sibona ita kara namo henia karana bona kara ma haida ia herevalaia. (Iam. 1:14; 2:1; 4:1, 2, 11) Momokani, Iehova amo matahakani ita abia neganai, reana do ita lalohisihisi. (Heb. 12:11) To, namo lasi unai ese iseda moale ia hadikaia.

Ena be kongrigeisen lalonai eda maduna idia kokia, to dala ia noho eda abidadama ita hagoadaia noho bona eda lalokau Iehova dekenai ita hahedinaraia  totona. Danu, unai maduna ita abia ena badina ita laloa dobu be namo. Unai maduna ita abia badina Dirava ita lalokau henia, bona ita abia dae kongrigeisen be iena bona mai lalokau ida ita naria be namo, a? Eiava, unai maduna ita abia badina ita ura sibona eda ladana ita abia isi? (Kara 20:28-30) Ena be tadikaka haida ese edia elda maduna idia haboioa, to mai moale ida Dirava idia hesiai henia noho, bona unai ese taunimanima bona Satani dekenai ia hamomokania, idia be mai momokani ida Iehova idia lalokau henia.

King Davida be kara dika badadia ia karaia dainai Dirava ese ia matahakani henia neganai, unai sisiba ia abia dae bona Dirava ese ena dika ia gwauatao. Davida ia gwau: “Bema Dirava ese tau ta ena kara dika ia gwauatao neganai, unai tau be ia namo. Bema iena kerere be Dirava ese ia gwauatao, unai tau be ia moale. Bema Lohiabada ese tau ta kerere totona ia samania lasi, bona unai tau ena lauma lalonai koikoi sisina ia noho lasi, unai tau be mai moale danu.” (Sal. 32:1, 2) Davida be matahakani ia abia dae dainai, unai ese ia durua Dirava ena mamoe naria tauna namona ai ia lao totona.

Nega momo, tadikaka be elda maduna idia abia lou neganai, idia be mamoe naria taudia namodia ai idia lao, guna bamona lasi. Unai bamona elda ta ia gwau: “Hari, lau be idia kerere taudia durua namonamo dalana lau lalopararalaia.” Elda ma ta ia gwau: “Hari, lau ese tadikaka hesiai henia gaukarana lau laloa bada.”

Salamo torea tauna ia gwau: “[Iehova] ese ita do ia gwau henia hanaihanai lasi.” (Sal. 103:9) Unai dainai, namo lasi ita laloa Iehova ese kara dika badana ia karaia tauna dekenai maduna do ia henia lou lasi. Ricardo be lagani momo elda maduna ia huaia, to gabeai unai maduna ia haboioa, bona ia gwau: “Egu kerere dainai lau lalohisihisi bada. Nega daudau lalonai lau mamia lau be hegeregere lasi elda maduna lau abia lou bona egu tadikaka lau durudia totona. Lau lalomanoka badina lau laloa unai maduna do lau abia lou diba lasi. To, lau be ma haida durua karana lau moalelaia dainai, lau ese Baibel stadi lau karaia, Kingdom Hall ai tadikaka taihu lau hagoadaia, bona haroro gaukara ai idia lau bamoa. Unai ese lau ia hagoadaia, bona hari elda maduna lau abia lou.”

Bema tadikaka ta be ma ta ia badu henia noho, do  ia hegeregere lasi elda maduna ia abia totona. Iehova ena hesiai tauna Davida be haheitalai namona, ia be mama tauna King Saulo amo ia heau! Ena be Davida dekenai dala ia kehoa Saulo ia hamasea totona, to ia ura lasi unai bamona ia karaia. (1 Sam. 24:4-7; 26:8-12) Saulo be tuari ai ia mase neganai, Davida be ia totona ia tai, bona ia ese Saulo bona ena natuna Ionatana ia gwauraidia “mai edia lalokau, bona mai edia sivarai namo” taudia. (2 Sam. 1:21-23) Oibe, Davida be Saulo ia badu henia noho lasi.

Bema oi mamia ma ta ese oi ia laloa kerere o oi ia kara dika henia, namo lasi ia oi badu henia noho. Hegeregere, Britain ai William be lagani 30 lalonai elda maduna ia huaia, to ena maduna idia kokia neganai, ia ese elda ma haida ia badu henia. Dahaka ese William ia durua lalohadai maorona ia abia totona? Ia gwau: “Baibel ai Iobu ena sivarai lau duahia neganai, lau ia durua. Bema Iehova ese Iobu ia durua ena turadia toi ida maino ia karaia totona, vadaeni Ia ese lau ia durua diba Keristani elda taudia ida maino lau karaia totona!”​—Iobu 42:7-9.

Bema oi sibona ese abia hidi oi karaia Dirava ena mamoe naria gaukarana oi rakatania, namona be unai oi karaia ena badina oi laloa namonamo. Hekwakwanai momo oi davaria dainai unai abia hidi oi karaia, a? Emu mauri lalonai gau ma haida oi atoa guna, a? Ma haida edia kerere dainai oi lalomanoka, a? Herevana dahaka ia vara, to namona be oi laloatao guna elda maduna oi huaia neganai, dala momo ai oi ese ma haida oi durua. Oiemu tok bona haheitalai namona ese idia ia hagoadaia, bona emu mamoe vadivadi gaukarana amo idia oi durua edia hahetoho idia haheaukalaidia totona. Elda gaukara oi karaia neganai, Iehova ena kudouna oi hamoalea bona oi danu oi moale.​—Aon. 27:11.

Iehova ese tadikaka momo ia durua do idia moale bona kongrigeisen lalonai elda maduna do idia abia lou urana idia habadaia totona. Bema oi sibona ese emu elda maduna oi rakatania o emu maduna idia kokia, oi be ‘naria tauna ena maduna oi abia lou’ diba. (1 Tim. 3:1) Paulo be Kolose Keristani taudia totona “guriguri [ia] hadokoa lasi” badina ia ura idia ese Dirava ena ura dekenai diba maoromaoro do idia abia, “unai amo Iehova ena dala hegeregerena ai do [idia] raka bona gau ibounai dekenai ia do [idia] hamoalea.” (Kol. 1:9, 10) Bema oi ese elda maduna ma oi abia lou, Iehova oi noia oi dekenai goada, haheauka bona moale do ia henia. Inai nega dokona ai, Dirava ena taunimanima be lalokau mamoe naria taudia edia heduru idia abia be namo. Oi hegeregere bona oi ura emu tadikaka do oi hagoadaia, a?