1. Taunimanima edia ura be dahaka, bona daidia be edia turana ai idia lao diba?

 NEGA MOMO taunimanima idia ura ma haida ese idia tura henia. Hegeregere, “taunimanima rua idia ura heheni bona ta ta idia diba namonamo neganai,” ita gwau idia be tura namodia. Ita moale badina iseda ruma bese bona turadia ese ita idia lalokau henia, laloa bada bona eda hereva bona kara idia lalopararalaia. To, ita tura henia diba tauna hereadaena be Iehova, iseda Havaraia Tauna Badana.​—Had. 12:1.

2. Iehova ena gwauhamata ita dekenai be dahaka, bona dahaka dainai momo be unai idia abia dae lasi?

² Iehova ese Baibel amo ita ia boiria ‘ia kahirakahira do ita lao,’ bona ia gwauhamata bema unai bamona ita karaia, ia danu be ‘ita kahirakahira do ia mai.’ (Iam. 4:8) Unai ese ita ia hamoalea! To, ena be ‘Dirava ia ura ia kahirakahira ita lao,’ momo be unai idia abia dae lasi. Badina idia laloa idia be goevadae lasi taudia bona Dirava be idia amo ia daudau. Dahaka oi laloa, Iehova kahirakahira ita lao diba, a?

3. Iehova be ita amo ia daudau, a?

³ Oibe, Iehova kahirakahira ita lao diba, badina ia be “ ita ta ta amo ia noho daudau lasi.” (Kara 17:26, 27; Salamo 145:18 duahia.) Iehova ia ura goevadae lasi taudia be ia kahirakahira do idia lao  danu, bona ia ura idia do ia tura henia. (Isa. 41:8; 55:6) Salamo torea tauna be Iehova ia herevalaia neganai, ia gwau: “Oi ese aiemai guriguri oi kamonai. Taunimanima ibounai be oi dekenai do idia mai. Oi ese oi abia hidi taudia, bona . . . oi mailaidia taudia, be idia moale bada.” (Sal. 65:2, 4) Mani Baibel lalonai, Iuda ena King Asa be Dirava kahirakahira ia lao, bona Dirava danu be Asa kahirakahira ia lao sivaraina ita herevalaia. a

4. King Asa ese Iuda taudia dekenai edena bamona haheitalai ia hahedinaraia?

⁴ Asa ese ia hahedinaraia ia be tomadiho goevana ia ura henia bada. Ia be Iuda ena king ai ia lao neganai, dubu helaga lalonai tatau bona hahine momo be matabodaga karadia idia karaia bona kaivakuku idia tomadiho henia. To, Asa be Iehova ia badinaia, badina ia ese unai taudia ibounai be dubu helaga amo ia kokidia. (1 Kin. 15:9-13) Ia ese Iuda taudia ia oda henia “Lohiabada, edia sene taudia edia Dirava do idia tahua, bona iena Taravatu bona oda do idia badinaia.” Iehova ese Asa ena lohia lagani ginigunadia 10 ia hanamoa dainai, Iuda besena be maino ai idia noho. Asa ia diba unai maino be Iehova amo ia mai, unai dainai Israela taudia ia hamaoroa: “Tano be ita dekenai ia do noho, badina be Lohiabada, iseda Dirava ita tahua vadaeni. Iena ura ita tahua dainai ia ese tano kahana ibounai dekenai maino ita dekenai ia henia.” (2 Siv. 14:1-7) To, unai murinai dahaka ia vara?

5. Dahaka ese Asa ena Dirava badinaia karana ia tohoa, bona dokonai dahaka ia vara?

⁵ Mani oi laloa, oi be King Asa bona Etiopia tauna Sera be ena tuari taudia 1,000,000 bona kariota 300 ida idia mai noho Iuda taudia tuari henia totona. (2 Siv. 14:8-10) Iena tuari orea badana ese oiemu tuari oreana be nega rua amo ia hanaia. Dahaka do oi karaia? Dirava do oi nanadaia dahaka dainai ia ese unai tuari taudia ia koua lasi, a? Sibona emu diba dekenai do oi tabekau, a? Asa ena kara amo ia hahedinaraia iena hetura karana Iehova ida be ia goada, bona ia ese Iehova ia abidadama henia momokani. Asa be Iehova ia boiboi henia, ia gwau: “Lohiabada, aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.” Dirava ese Asa ena noinoi be edena bamona ia haerelaia? Baibel ia gwau: “Lohiabada ese Etiopia taudia ia halusia.” Oibe, Etiopia taudia ibounai idia mase ore!​—2 Siv. 14:11-13.

6. Edena dala ai Asa ita tohotohoa be namo?

⁶ Dahaka dainai Asa ese Iehova ena hakaua bona gimaia karana ia abidadama henia momokani? Baibel ia gwau: “Asa be Iehova ena vairanai kara maoromaoro ia karaia” bona ia ese “mai ena kudouna ibounai ida Iehova ia badinaia.” (1 Kin. 15:11, 14, NW) Ita danu, namona be mai iseda kudouna ibounai ida Dirava ita hesiai henia. Unai bamona ita karaia be mai anina bada, bema ita ura hari bona vaira negana ai Iehova ita tura henia. Ita moale badina Iehova ese dala ia karaia, unai amo ita ia veria lao ia kahirakahira bona ita ia durua ia ita tura noho totona! Dirava ese unai ia karaia daladia rua mani ita itaia.

7. (a) Iehova ese dahaka ia karaia ia kahirakahira ita ia veria lao totona? (b) Dirava ese ia kahirakahira ita ia veria lao dalana hereadaena be dahaka?

⁷ Iehova ese taunimanima ia lalokau henia dainai tanobada hairaina ia karaia. Ia ese ita ia lalokau henia dainai iseda tauanina durua gaudia namodia ia henia, unai amo ita mauri noho diba. (Kara 17:28; Apok. 4:11) To, mai anina bada gauna be inai: Iehova ese ita dekenai  ena lalokau ia hahedinaraia totona iseda abidadama idia hagoadaia gaudia ia henia. (Luka 12:42) Danu, Ia gwauhamata ita guriguri henia neganai, do ia kamonai. (1 Ioa. 5:14) To, Iehova ese ia kahirakahira ita ia veria lao bona ita be ia kahirakahira ita lao dalana hereadaena be, Iesu ena mauri davalaia boubouna. (1 Ioane 4:9, 10, 19 duahia.) Iehova ese ena “natuna korikorina” be tanobada dekenai ia siaia, unai amo ita be kara dika bona mase amo ia hamauria.​—Ioa. 3:16.

8, 9. Iesu be dahaka ia karaia, Iehova ena ura ia guguru totona?

⁸ Iehova ese dala ia karaia, unai amo Keriso ia do vara lasi neganai idia noho taudia danu be Iesu ena boubou gauna amo namo idia abia diba. Iehova ese vaira negana ai taunimanima do ia Hamauria Tauna, Iesu ia perovetalaia neganai, Iena matanai unai be hegeregere Iesu ese ena mauri davalaia boubouna ia henia vadaeni. Badina Iehova ia diba iena ura be do ia guguru momokani. (Gen. 3:15) Lagani handred momo murinai, aposetolo Paulo ese Dirava ia tanikiu henia badina “Keriso Iesu ia henia mauri davana amo [taunimanima] ia ruhaia.” Paulo ma ia gwau, Dirava ese “idaunegai idia vara kara dika ia gwauatao” danu. (Roma 3:21-26) Oibe, bema Iesu be lasi, Dirava kahirakahira ita lao diba lasi!

⁹ Iesu sibona amo manau taudia be Iehova idia dibaia, Ia kahirakahira idia lao bona idia tura henia diba. Edena dala ai Baibel ese unai ia hamomokania? Paulo ia gwau: “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:6-8) Ita be gau ta ita karaia lasi, to Iehova bona Iesu ese ita idia lalokau henia bada dainai, mauri davalaia boubouna idia henia. Iesu ia gwau: “Tau ta be lau dekenai do ia mai diba lasi, bema Tamana, lau ia siaia tauna ese ia veria mai lasi.” Danu, ia gwau: “Tau ta be Tamana dekenai ia mai diba lasi, to lau sibona amo.” (Ioa. 6:44; 14:6) Edena dala ai Iehova ese Iesu amo taunimanima ta ta be Ia kahirakahira ia veria lao, bona ia durudia Iena lalokau lalonai idia noho, bona mauri hanaihanai idia abia diba? Ia ese lauma helaga ia gaukaralaia idia ia veria totona. (Iuda 20, 21 duahia.) Dirava ese ia kahirakahira ita ia veria lao dalana iharuana mani ita itaia.

10. Edena dala ai Baibel ese ita ia durua Dirava kahirakahira ita lao totona?

¹⁰ Inai atikol lalonai, ita be Baibel bukadia 14 bamona amo siri haida ita gaukaralaia vadaeni. Bema Baibel be lasi, edena bamona do ita diba ita be iseda Havaraia Tauna kahirakahira ita lao diba? Danu bema Baibel be lasi, edena bamona ita ese Iesu ena mauri davalaia boubouna ena sivarai, bona Iesu amo Iehova kahirakahira ita lao diba dalana do ita dibaia? Baibel sibona lalonai ita ese Iehova ena kara namodia bona iena ura taunimanima totona ita dibaia. Hegeregere, Esodo 34: 6, 7 ai Iehova be Mose dekenai ena kara ia herevalaia neganai, ia gwau: “Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga. Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho.” Do oi ura unai bamona tauna kahirakahira oi lao, ani? Iehova ia diba Baibel amo ia ita dibaia noho neganai, do ita abia dae ia mauri noho bona ia kahirakahira ita lao diba.

11. Dahaka dainai Dirava ena kara bona dala idauidau ita diba be mai anina bada? (Laulau ginigunana itaia.)

¹¹ Iehova Kahirakahira Oi Lao bukana ena hamatamaia herevana ia gwau: “Hetura karadia lalonai, hatamonaia gauna be ita tura henia tauna ita diba namonamo, ena kara korikori ita ura henia bona ita laloa bada. Unai dainai Dirava ena kara bona dala idauidau be Baibel ese ia hahedinaraia, unai ita stadilaidia be gau badana.” Iehova ita tanikiu henia badina ia ese dala ia karaia  Baibel be taunimanima ese idia lalopararalaia diba dalanai idia torea!

12. Dahaka dainai Iehova ese taunimanima ia gaukaralaia Baibel idia torea totona?

¹² Bema Iehova ia ura, reana aneru ia gaukaralaia Baibel idia torea totona, badina idia be ita bona eda gaukara idia laloa bada. (1 Pet. 1:12) Ita gwau diba, aneru ese Dirava ena hereva taunimanima totona idia torea diba. To, aneru be iseda hemami, manoka gaudia, bona eda ura gaudia idia gwauraia diba, a? Lasi, Iehova ia diba aneru edia hemami be taunimanima edia amo ia idau. Unai dainai Iehova ese taunimanima ia gaukaralaia Baibel idia torea totona, unai amo ita lalopararalaia diba. Ita be Baibel idia torea taudia bona idia sivarailaia taudia haida edia lalohadai bona hemami ita lalopararalaia diba. Danu, edia lalohisihisi, daradara, gari bona kerere sivaraidia ita duahia neganai, edia hisihisi ita lalopararalaia. Edia moale sivaraidia ita duahia neganai, moale mamina ita abia. Peroveta tauna Elia bamona, Baibel idia torea taudia be “mai [edia] hemami ita hegeregerena.”​—Iam. 5:17.

13. Iona ena guriguri oi duahia neganai, emu hemami be edena bamona?

¹³ Mani peroveta tauna Iona ita laloa. Dirava ese Iona dekenai asainmen badana ta ia henia neganai, Iona be ia heau. Bema aneru ta ese unai sivarai ia torea, reana ia ese Iona ena hemami korikorina do ia gwauraia lasi. Unai dainai, ita moale badina Iehova ese Iona ia abia hidi sibona ena sivarai ia torea totona! Hegeregere, lakaradonodono ena bogana lalonai ia guriguri, ia gwau: “Lohiabada e, mamina lau abia, egu mauri be ia ore ia lao noho. Unai neganai oi dekenai lau guriguri.”—Iona 1:3, 10; 2:1-9.

14. Dahaka dainai oi be Isaia ena hereva oi lalopararalaia?

¹⁴ Haheitalai ma ta be Isaia. Ia ese matahanai ta amo Iehova ena hairai ia itaia murinai, ia laloparara ia be goevadae lasi tauna. Ia gwau: “Madi, lau be dika momokani! Badina  egu uduna ia gwauraia hereva ibounai be miro bona dika, bona lau be hereva dika taudia edia huanai lau noho. To momokani lau ese King, Siahu Ibounai Lohiabada, egu matana dekenai lau itaia vadaeni.” (Isa. 6:5) Aneru ta be sibona unai bamona do ia herevalaia lasi. To, Isaia be unai bamona ia hereva diba bona ita ese ena hemami ita lalopararalaia.

15, 16. (a) Dahaka dainai ita be taunimanima edia hemami ita laloparara diba? Haheitalai haida gwauraia. (b) Dahaka ese ita do ia durua Iehova kahirakahira ita lao totona?

¹⁵ Aneru be Iakobo bamona idia gwau diba, idia be “hegeregere lasi,” a? Eiava Petero bamona idia gwau diba, idia be “kara dika” taudia, a? (Gen. 32:10; Luka 5:8) Kara maoromaoro aneru be Iesu ena hahediba taudia bamona do idia “gari dikadika,” a? Eiava Paulo bona ma haida bamona, aneru be dagedage negadiai sivarai namona idia harorolaia totona do idia hekwarahi idia “gari lasi” totona, a? (Ioa. 6:19; 1 Tes. 2:2) Lasi, badina aneru be goevadae bona edia goada be bada herea. To, goevadae lasi taudia be edia hemami idia herevalaia neganai, ita laloparara haraga badina ita danu be goevadae lasi taudia. Unai dainai, Baibel ita duahia neganai, “idia moale taudia ida [ita] moale, bona idia taitai taudia ida [ita] taitai.”—Roma 12:15.

¹⁶ Idaunegai, Iehova ese ena abidadama taudia ia hereva bona kara henia sivaraidia be Baibel lalonai ita duahia bona laloa dobu neganai, Dirava ena kara namodia momo do ita diba. Danu, do ita itaia edena dala ai Iehova be mai haheauka bona lalokau ida unai goevadae lasi taudia kahirakahira ia lao. Unai ese ita ia durua, Iehova do ita diba namonamo bona lalokau henia totona. Unai dala amo Iehova kahirakahira ita lao diba.​—Salamo 25:14 duahia.

17. (a) Asaraia be Asa dekenai dahaka sisiba namona ia henia? (b) Asa be edena dala ai Asaraia ena sisiba ia dadaraia, bona dahaka ia vara?

¹⁷ King Asa be Etiopia tuari taudia ia halusidia murinai, Dirava ese peroveta tauna Asaraia amo King Asa bona ena taunimanima dekenai aonega herevadia ia gwauraia. Asaraia ia gwau: “Umui be Lohiabada dekenai umui noho neganai, ia ese umui dekenai danu ia noho. Bema Lohiabada umui tahua, umui ese do umui davaria. To bema umui rakatania, ia ese umui do ia rakatania.” (2 Siv. 15:1, 2) To gabeai, Asa be unai sisiba namona ia dadaraia. Israela ena not kahana basileiana ese Iuda ia ura tuari henia neganai, Asa be Suria edia heduru ia tahua. Ia ese Iehova ena heduru ia tahua lasi, to kaivakuku idia tomadiho henia taudia edia heduru ia noia. Unai dainai, Iehova ese Asa ia hamaoroa: “Oi ese kara kavakavana oi karaia vadaeni, bona unai dainai hari ia lao, tuari be nega ibounai do idia vara oi dekenai.” (2 Siv. 16:1-9) Unai sivarai amo dahaka ita dibaia?

18, 19. (a) Bema iseda hetura karana Dirava ida ia dika, dahaka ita karaia be namo? (b) Edena dala ai Iehova kahirakahira ita lao diba?

¹⁸ Namona be Iehova do ita rakatania lasi. Bema iseda hetura karana Dirava ida ia dika, namona be Hosea 12:6 ena sisiba do ita badinaia. Ia gwau: “Emui Dirava do umui abidadama henia, bona ia dekenai do umui giroa lou. Lalokau bona kota maoromaoro karadia, be do umui dogoatao noho, bona mai laloa goada danu, emui Dirava ena kara totona do umui naria noho.” Unai dainai, namona be Iesu ena boubouna gauna ena namo do ita laloa dobu, bona Baibel do ita stadilaia namonamo, unai amo Iehova kahirakahira do ita lao.​—Deuteronomi 13:4 duahia.

¹⁹ Salamo torea tauna ia gwau: “To lau be Dirava badibadinai lau noho. Inai be namo herea momokani.” (Sal. 73:28) Namona be ita ibounai ese Iehova ena kara namodia do ita dibaia, unai amo iseda lalokau ia dekenai do ia bada ia lao. Bema Iehova kahirakahira ita lao, ia danu be ita kahirakahira do ia mai ela bona hanaihanai!