Edia adavadia idia mase taudia be unai henanadai idia laloa momo. Reana idia ura tanobada matamatana ai edia adavadia idia toreisi lou neganai, do idia noho hebou lou. Dogae tadikaka ta ia gwau: “Lau bona egu adavana ai ura lasi emai headava do ia doko. Emai ura be mai lalotamona ida Iehova do ai tomadiho henia ela bona hanaihanai. Egu hemami be ia idau lasi.” Badina ta dainai ita laloa tanobada ai do idia toreisi lou taudia be do idia headava, a?

Lagani momo lalodiai, iseda magasin ese idia hahedinaraia, Iesu be reana tanobada toreisi louna ia herevalaia. Danu, iseda magasin ese idia hahedinaraia tanobada matamata ai idia toreisi lou taudia be do idia headava lasi. a (Mat. 22:29, 30; Mar. 12:24, 25; Luka 20:34-36) To, reana Iesu ena hereva be guba toreisi louna ia herevalaia, a? Mani Iesu ena hereva ita itaia.

Mani, Iesu ese unai hereva ia gwauraia negana ita laloa. (Luka 20:27-33 duahia.) Sadukea tomadiho taudia be toreisi lou helarona idia abia dae lasi, bona idia ese Iesu idia tarapua totona toreisi lou bona nakimi adavaia karana idia henanadailaia. b Iesu ia haere henidia: “Inai nega oromana ena natudia be idia headava. To Dirava vairanai idia hegeregere taudia be do ia mai nega oromana ai, mauri do idia abia bona mase amo do idia toreisi lou. Idia be do idia headava lasi. Momokani, do idia mase lou diba lasi, badina idia be aneru bamona, bona idia toreisi lou dainai, idia be Dirava ena natudia.”​—⁠Luka 20:34-36.

Dahaka dainai iseda magasin idia hahedinaraia, Iesu be reana tanobada toreisi louna ia herevalaia? Unai bamona idia hereva ena badina be rua: Ginigunana be, Sadukea taudia be Iesu idia nanadaia neganai, reana tanobada toreisi louna idia laloa. Unai dainai, ita laloa Iesu be idia ia haere henia neganai, tanobada toreisi louna ia herevalaia. Iharuana be, Iesu ena haere dokonai ia ese Aberahamo, Isako bona Iakobo ia herevalaidia. Unai abidadama taudia be tanobada ai do idia toreisi lou.​—⁠Luka 20:37, 38.

To, toana be Iesu be guba toreisi louna ia herevalaia. Dahaka dainai unai bamona ita hereva? Mani Iesu ese ia gwauraia herevadia rua ita itaia.

“Dirava vairanai idia hegeregere taudia be . . . mase amo do idia toreisi lou.” Abidadama horoa taudia be idia “hegeregere Dirava ena basileia [idia] abia” totona. (2 Tes. 1:5, 11) Iesu ena mauri davalaia boubouna dainai Dirava ese idia ia gwauraia kara maoromaoro taudia. Unai dainai, idia mase neganai idia be kara dika taudia bamona idia mase lasi. (Roma 5:1, 18; 8:1) Baibel ia gwau, horoa taudia be “idia moale bona idia helaga” bona idia hegeregere guba toreisi louna idia abia totona. (Apok. 20:5, 6) To, tanobada ai do idia toreisi lou taudia be “kara maoromaoro lasi taudia” danu. (Kara 24:15) Do ita gwau idia be “hegeregere” mase amo idia toreisi lou totona, a?

 “Do idia mase lou diba lasi.” Baibel ma ta ia gwau, “do idia mase lou lasi.” Oibe, edia abidadama ia goada ela bona idia mase horoa taudia be guba ai idia toreisi lou bona mase diba lasi maurina idia abia. (1 Kor. 15:53, 54) Guba toreisi louna idia abia taudia be mase ese ia biagudia lou lasi. c

Ataiai ita herevalaia gaudia dainai, dahaka ita davaria? Gaudia be inai: Iesu be Sadukea taudia dekenai headava bona toreisi lou ia herevalaia neganai, reana ia be guba toreisi louna ia herevalaia. Bema unai be maoro, vadaeni ena hereva amo ita diba guba ai do idia toreisi lou taudia be: (1) Do idia headava lasi, (2) idia mase diba lasi, bona (3) idia be aneru bamodia do idia lao. To, bema unai ita abia dae, unai ese henanadai haida ia havaraia.

Ginigunana be, bema Sadukea taudia be tanobada toreisi louna idia laloa, dahaka dainai Iesu be idia ia haere henia neganai guba toreisi louna ia herevalaia? Nega haida Iesu ese ena inai taudia be edia laloa dalana hegeregerena ia haere henidia lasi. Hegeregere, Iuda taudia ese idia noia toa ta do ia karaia neganai, ia gwau: “Inai dubu helaga umui hadikaia bona dina toi lalonai do lau haginia lou.” Iesu ia diba idia be dubu helaga idia herevalaia noho, “to ia herevalaia dubu helaga ena anina be ena tauanina.” (Ioa. 2:18-21) Reana Iesu ia ura lasi unai koikoi Sadukea taudia ia haere henidia, badina idia be toreisi lou herevana idia abia dae lasi, bona idia gwau aneru be lasi. (Aon. 23:9; Mat. 7:6; Kara 23:8) To, reana ia ura ena hahediba taudia dekenai guba toreisi louna ia hadibaia. Badina idia be iena hahediba taudia momokanidia bona gabeai guba ai do idia toreisi lou.

Iharuana be, dahaka dainai Iesu ena hereva dokonai tanobada ai do idia toreisi lou taudia Aberahamo, Isako, bona Iakobo ia herevalaia? (Mataio 22:31, 32 duahia.) Mani ita laloatao, Iesu ese unai bese kwaradia ia ura herevalaia neganai, inai hereva ia gwauraia guna, “mase amo toreisi lou karana dekenai.” Unai hereva ese ia hahedinaraia, matamanai Iesu be guba toreisi louna ia herevalaia, to hari ena hereva ia haidaua bona tanobada toreisi louna ia herevalaia. Iesu ia diba Sadukea taudia be Mose ena toretore idia laloa bada. Unai dainai, Iesu be lahi ese au ginigini ia araia neganai, Dirava ese Mose dekenai ia gwauraia herevadia ia gwauraia. Unai ia karaia badina ia ura Sadukea taudia ia hadibadia, tanobada toreisi louna be do ia vara momokani, badina unai be Dirava ena ura.​—⁠Eso. 3:1-6.

Ihatoina be, bema Iesu be guba toreisi louna ia herevalaia, vadaeni anina be tanobada ai do idia toreisi lou taudia be do idia headava diba, a? Baibel be haere ta ia henia lasi. Bema Iesu be guba toreisi louna ia herevalaia, vadaeni iena hereva amo ia hahedinaraia lasi tanobada matamatana ai do idia toreisi lou taudia be do idia headava.

Baibel ia gwau mase ese headava ia hadokoa. Unai dainai, bema dogae o vabu ta ia ura ia headava lou, namo lasi ia laloa unai be kerere. Unai be ia sibona ena disisen, bona bema ia headava lou, namo lasi ma haida ese ia idia gwauraia dika.​—⁠Roma 7:2, 3; 1 Kor. 7:39.

Momokani, tanobada matamata ena mauri totona, ita be mai eda henanadai momo. To, namo lasi unai gaudia ita laloa momo. Namona be ita naria ela bona idia vara. To, inai ita diba momokani: Dirava idia badinaia taudia be do idia moale, badina Iehova ese edia dabu bona ura gaudia ibounai do ia hagugurua.​—⁠Sal. 145:16.