1, 2. Edena dala idauidau ai Iehova ese ena taunimanima ia hereva henia?

 BAIBEL negadiai, Iehova ese dala idauidau ai iena hadibaia herevadia be iena taunimanima dekenai ia henia. Hegeregere, aneru ia siaia eiava matahanai o nihi amo vaira negana ai do idia vara gaudia ia hahedinaraia. Iehova ese idia haida dekenai gaukara ta ta ia henia danu. (Num. 7:89; Ese. 1:1; Dan. 2:19) Nega haida Iehova ese taunimanima haida ia abia hidi iena hadibaia herevadia idia gwauraia totona. Herevana edena dala ai Iehova ena taunimanima ese iena hadibaia herevadia idia abia, to idia badinaia taudia ese hahenamo idia davaria.

² Hari, Iehova ese Baibel, iena lauma helaga bona kongrigeisen amo iena taunimanima ia hakaua. (Kara 9:31; 15:28; 2 Tim. 3:16, 17) Iena hadibaia herevadia be idia hedinarai goevagoeva, hegeregere ‘iena gadona ita kamonai bamona, ia gwau, “Dala be inai, ia dekenai do umui raka lao.”’ (Isa. 30:21) Danu, Iesu be “igui hesiai tauna mai ena kamonai bona mai ena kara maoromaoro” ia gaukaralaia kongrigeisen amo Iehova ena hereva be ita dekenai ia hadibaia totona. (Mat. 24:45) Mauri hanaihanai ita davaria totona, unai hadibaia herevadia ita badinaia be mai anina bada.—Heb. 5:9.

3. Iehova ena hereva ita kamonai karana be dahaka ese ia hadikaia diba? (Laulau ginigunana itaia.)

³ Satani Diabolo ia ura dikadika Iehova amo hahemauri herevadia  ita abia dalana ia koua. Danu, iseda ‘kudouna be mai ena koikoi’ dainai, Iehova ita kamonai henia karana ia hadikaia diba. (Ier. 17:9) Unai dainai inai stadi lalonai, ita ese Dirava ena hereva ita kamonai karana idia hadikaia diba gaudia hanaia daladia do ita herevalaia. Danu, herevana dahaka ia vara, to Iehova guriguri henia karana ese eda hetura karana Ia ida do ia hagoadaia dalana do ita itaia.

4. Edena dala ai Satani ese taunimanima edia laloa dalana ia hakererea toho?

⁴ Satani ese hereva o lalohadai koikoidia ia gaukaralaia taunimanima edia laloa dalana ia hakererea totona. (1 Ioane 5:19 duahia.) Satani ese niuspepa, buka, reidio, TV, bona Intanet ia gaukaralaia tanobada ibounai dekenai ena lalohadai koikoidia ia halasia totona. Ena be unai gaudia ese heduru herevadia haida idia halasia, to nega momo idia ese Iehova ena taravatu utua karadia idia abia isi. (Ier. 2:13) Hegeregere, idia gwau tatau rua o hahine rua idia headava karana be kerere lasi, bona momo idia laloa unai bamona taudia dekenai Baibel ena hahemaoro herevana be auka herea.—1 Kor. 6:9, 10.

5. Edena dala ai Satani ena lalohadai koikoidia ita dadaraia diba?

⁵ Edena dala ai Dirava ena taravatu maoromaorodia idia ura henia taudia be Satani ena lalohadai koikoidia idia dadaraia diba? Edena dala ai do idia diba dahaka be namo bona dahaka be dika? Baibel ia gwau: ‘Idia ese Dirava ena taravatu do idia kamonai henia’! (Sal. 119:9) Dirava ena Hereva ese ita ia durua dainai ita laloparara dahaka be hereva momokani bona dahaka be koikoi. (Aon. 23:23) Iesu ia gwau, “taunimanima be aniani sibona amo lasi, to Iehova ena uduna amo idia mai hereva ibounai dainai do idia mauri.” (Mat. 4:4) Iseda mauri lalonai Baibel ena hakaua herevadia do ita badinaia daladia ita diba be namo. Hegeregere, Mose ese Iehova ena taravatu heudahanai karana dekenai ia do torea lasi neganai, tau matamata Iosepa ia diba Dirava ena matanai unai be kara dikana. Ena be Potifara ena adavana ese ia doria do idia heudahanai totona, to Iosepa ia ura lasi Iehova ena taravatu ia utua. (Genese 39:7-9 duahia.) Ena be Potifara ena adavana ese nega daudau lalonai unai bamona ia karaia, to Iosepa be iena hereva ia kamonai lasi, to Dirava ena gadona ia badinaia noho. Maoro bona kerere edia idau ita dibaia totona, gau badana be Iehova ena gadona do ita kamonai bona Satani ese hanaihanai ia halasia lalohadai koikoidia ita dadaraia.

6, 7. Satani ena koikoi herevadia ita dadaraia totona, dahaka ita karaia be namo?

⁶ Hari, tanobada ai tomadiho idauidau edia lalohadai ese daradara ia havaraia dainai, taunimanima momo idia laloa tomadiho momokanina do idia davaria diba lasi. To, bema ita ura Iehova ena hadibaia herevadia ita kamonai, hereva momokani ita davaria haraga diba. To, namona be ita abia hidi ita karaia daika do ita kamonai henia. Taunimanima rua edia gadona be nega tamona ita kamonai be auka. Unai dainai, namona be Iesu ena ‘gadona ita diba’ bona ia sibona  ita kamonai henia. Iehova ese Iesu ia abia hidi Iena mamoe ia naridia totona.​—Ioane 10:3-5 duahia.

⁷ Iesu ia gwau: “Hari umui kamonai herevadia do umui laloa namonamo.” (Mar. 4:24) Iehova ena hakaua herevadia be idia maoro bona idia hedinarai goevagoeva, to ita kamonai bona badinadia totona eda kudouna ita hegaegaelaia be gau badana. Bema ita naria namonamo lasi, Satani ena koikoi herevadia do ita abia dae, to Dirava ena sisiba namodia do ita dadaraia. Namo lasi dala oi kehoa tanobada taudia edia miusiki, vidio, TV, buka, hebamo, tisa bona diba bada taudia ese emu mauri idia biagua totona.—Kol. 2:8.

8. (a) Edena dala ai eda kudouna ese ita ia hakaua kerere diba? (b) Dahaka do ia vara bema eda kara ita hamaoromaoroa haraga lasi?

⁸ Satani ia diba iseda kudouna ai ura dikadia ita abia diba, bona ita ia veria toho unai ura ita hagugurua totona. Satani ese ita ia tohoa neganai, reana Iehova ita badinaia noho be auka. (Ioa. 8:44-47) Hegeregere, reana eda guriguri karana ita hadokoa, ita haroro momo lasi, bona hebou momo ita reaia. Unai gaudia ese idia hahedinaraia iseda kudouna be ura dikadia ese ia biagua matamaia, bona bema ita hamaoromaoroa haraga lasi, dika bada ita davaria diba. Bema ita naria namonamo lasi, Iehova ena gadona be metairametaira do ia maragi ia lao. Bena iseda ura dikadia ese ita do idia biagua, bona ita laloa do ita karaia diba lasi kara dika ta do ita karaia. (Roma 7:15) To, ita dekenai unai do ia vara lasi, bema ita gima noho bona karaharaga eda kara ita hamaoromaoroa. Bema ita be Iehova ena gadona ita kamonai noho, aposteit taudia edia lalohadai do ita dadaraia diba.​—Aon. 11:9.

9. Dahaka dainai iseda ura o lalohadai dikadia ita hamaoromaoroa haraga be namo?

⁹ Bema doketa ese tau ta ena gorere ia davaria haraga, unai tauna ia durua diba. Unai hegeregerena, bema ita itaia ita be ura o lalohadai dikadia ita abia, namona be kara ta ita karaia ita hamaoromaoroa haraga totona. Unai amo “[Satani] ena tarapu amo do idia raka siri” bona “iena ura [ita] karaia” lasi. (2 Tim. 2:26) Dahaka ita karaia be namo bema ita itaia iseda lalohadai bona ura be Iehova ena ura hegeregerena lasi? Namona be karaharaga mai manau ida Iehova dekenai ita giroa lou, iena sisiba ita kamonai, bona mai iseda kudouna ibounai ida iena sisiba ita abia dae. (Isa. 44:22) Namona be ita laloparara, bema abia hidi kererena ta ita karaia, ena be Iehova dekenai ita giroa lou, to unai kerere dainai idia vara hekwakwanai do ita mamia noho. Unai dainai, aonega karana be iseda lalohadai o ura dikadia do ita  hamaoromaoroa haraga bona Iehova do ita rakatania lasi!

10, 11. (a) Hekokoroku tauna ena kara haida be dahaka? (b) Kora, Datana bona Abirama edia gwau-edeede karana amo dahaka ita dibaia?

¹⁰ Namona be ita laloatao, iseda kudouna ese ita ia hakaua kerere diba. Oibe, iseda ura dikadia ese ita idia biagua diba! Mani, hekokoroku bona mataganigani karadia ita laloa. Hari do ita itaia, edena dala ai unai kara rua ese Iehova ita kamonai henia karana idia hadikaia, bona ita idia hakaua kerere diba. Hekokoroku tauna ia laloa ia ese ma haida ia hereaia. Reana do ia laloa ia be mai ena maoro iena ura hegeregerena gau ta do ia karaia, bona ta ese ia do ia hamaoroa lasi dahaka ia karaia totona. Reana do ia ura lasi Keristani tadikaka, elda taudia bona Dirava ena orea ese sisiba do idia henia. Unai bamona tauna dekenai, Iehova ena gadona regena be ia maragi ia lao.

¹¹ Israela taudia be tano gagaena ai idia noho neganai, Kora, Datana bona Abirama ese Mose bona Arona idia matauraia lasi. Idia hekokoroku dainai, unai gwau-edeede taudia be sibodia edia ura dalanai Iehova idia tomadiho henia. Iehova be dahaka ia karaia? Ia ese idia ibounai ia hamasedia. (Num. 26:8-10) Unai sivarai amo ita ese mai anina bada gauna ta ita dibaia! Iehova idia gwau-edeede henia taudia be dika bada do idia davaria. Baibel ia gwau: “Hekokoroku be hadikaia gabuna dekenai ia lao noho.”—Aon. 16:18; Isa. 13:11.

12, 13. (a) Mataganigani karana ese dika ia havaraia diba ena haheitalai ta mani oi gwauraia. (b) Mani oi hahedinaraia edena dala ai iseda kudouna ai mataganigani karana ia tubu haraga diba, bema ita koua haraga lasi?

¹² Mani mataganigani karana ita herevalaia. Mataganigani tauna ia laloa ia sibona ena ura ia badinaia be maoro bona kara maorona ia hahedinaraia lasi. Suria edia tuari biaguna Namana be lepera gorere ia davaria, to peroveta tauna Elisaia ese iena gorere ia hanamoa. Unai dainai, Namana be Elisaia dekenai harihari gaudia haida ia henia, to Elisaia ia ura lasi ia abidia. To, Elisaia ena hesiai tauna Gehasi be unai harihari gaudia totona ia mataganigani. Gehasi be sibona dekenai ia gwau: “Lohiabada ia mauri noho momokani hegeregerena, lau ese Namana ena murinai do lau heau lao, gau ta ia dekena amo do lau abia!” Bena ia ese Elisaia ia hadibaia lasi, to Namana ena murinai ia heau lao bona ia dekenai koikoi herevadia ia gwauraia unai amo “siliva moni 3000, bona dabua namodia rua do [ia] henidia.” Mataganigani tauna Gehasi dekenai dahaka ia vara? Gehasi ese Namana ena lepera gorere ia abia!​—2 Kin. 5:20-27.

¹³ Bema mataganigani karana ita biagua lasi, unai kara do ita manadalaia bona gabeai iseda mauri do ia hadikaia. Baibel lalonai Akana ena sivarai ese ia hahedinaraia mataganigani karana be mai ena siahu. Akana ia gwau: “Tuari dekenai ita abia kohu edia huana dekenai Babulonia kouti dabua namo herea lau itaia, bona siliva ena metau kilogaram rua, bona golo sisina danu, ena metau kilogaram kahana. Lau ese lau ura henidia bada dainai lau abidia.” Akana be unai ura dikana ia dadaraia lasi, to ia mataganigani dainai unai kohu be iena palai ruma lalonai ia hunidia. Akana ena kerere ia hedinarai neganai, Iosua ese Akana ia hamaoroa Iehova ese ia dekenai dika bada do ia mailaia. Unai dina tamona ai, Akana bona ena famili ibounai be nadi amo idia hodoa mase. (Ios. 7:11, 21, 24, 25) Herevana ita be edena bamona tauna, to mataganigani karana ese ita ia biagua diba. Unai dainai, “mataganigani karadia idauidau ibounai dainai do [ita] gima noho.” (Luka 12:15) Momokani, nega haida ita ese lalohadai kereredia o mirodia ita abia, to namona be ita sibona ese eda laloa dalana do ita biagua, bona dala ita kehoa lasi iseda ura dikadia ese ita idia dibagania bena ita kara dika.​—Iamesi 1:14, 15 duahia.

14. Dahaka ita karaia be namo bema ita itaia hekokoroku o mataganigani karana ita hahedinaraia?

 ¹⁴ Hekokoroku bona mataganigani karana ese dika bada idia havaraia diba. Abia hidi kererena dainai do idia vara diba hekwakwanai ita laloa neganai, unai ese ita do ia durua diba Iehova ena gadona ita kamonai noho totona. (Deu. 32:29) Baibel amo Dirava ese ita dekenai dala maorona ia hadibaia sibona lasi, to dala maorona bona kererena ita badinaia karana ena namo bona dika ia hadibaia danu. Bema iseda kudouna ese ita ia veria hekokoroku o mataganigani karana ita karaia totona, aonega karana be unai kara dainai gabeai do idia hekwakwanai ita laloa guna. Namona be ita laloa, edena dala ai ita karaia kara dika ese ita sibona, iseda famili taudia bona eda hetura karana Iehova ida ia hadikaia diba.

15. Iesu ena haheitalai amo dahaka ita dibaia?

¹⁵ Iehova ia ura mauri namona do ita moalelaia. (Sal. 1:1-3) Ia ese nega korikori ai heduru herevadia ia henia. (Heberu 4:16 duahia.) Ena be Iesu be goevadae tauna, to nega ibounai Iehova ia guriguri henia. Dala namodia momo ai Iehova ese Iesu ia durua bona hakaua. Hegeregere, aneru ia siaia Iesu idia durua, ena lauma helaga ia siaia ia hagoadaia, bona aposetolo taudia 12 ia abia hidi gwauraia neganai ia durua danu. Guba amo Iehova ia hereva, bona ia hamomokania Ia ese Iesu ia lalonamo henia bona ia durua. (Mat. 3:17; 17:5; Mar. 1:12, 13; Luka 6:12, 13; Ioa. 12:28) Iesu hegeregerena, ita danu be Iehova dekenai iseda kudouna ai idia noho gaudia do ita gwauraia hedinarai. (Sal. 62:7, 8; Heb. 5:7) Guriguri karana amo Iehova kahirakahira do ita noho, bona eda mauri do ita gaukaralaia ia ita hanamoa totona.

16. Edena dala ai Iehova ena heduru ita abia diba iena gadona ita kamonai totona?

¹⁶ Ena be Iehova ese ita dekenai sisiba ia henia, to ita ia doria lasi ita badinaia totona. Namona be iena lauma helaga totona do ita noinoi, bona ia ese ita dekenai do ia henia. (Luka 11:10-13 duahia.) To, gau badana be ‘iseda kamonai karana do ita naria namonamo.’ (Luka 8:18) Hegeregere, ita be koikoi taudia, bema Iehova ita noia ita do ia durua matabodaga karadia ita dadaraia totona, to hanaihanai ita be ponografi o matabodaga laulau ita itaia noho. Namona be Iehova ena lauma ia gaukara gabudia dekenai ita noho o ita lao. Hegeregere, ita diba lauma helaga be kongrigeisen heboudia dekenai ia noho. Unai dainai, Iehova ena hesiai taudia momo be dika idia dadaraia, badina hebou ai Iehova ena hereva idia kamonai. Unai ese idia ia durua edia kudouna ai ura dikadia idia abia matamaia neganai, karaharaga idia kokia.​—Sal. 73:12-17; 143:10.

17. Dahaka dainai sibona eda diba dekenai ita tabekau be namo lasi?

¹⁷ Israela ena King Davida mani oi laloa. Ia be mero matamata neganai, Pilistia taudia edia tau badana Goliata ia hamasea. Davida be tuari tauna, king, gimaia tauna bona Israela bese totona abia hidi ia karaia tauna. To, Davida be sibona ena diba dekenai ia tabekau neganai, iena kudouna ese ia koia. Ia be Bataseba ida kara dika badana ia karaia bona Bataseba ena adavana, Uria ena mase dalana ia karaia. To, Davida be matahakani ia abia neganai, mai manau ida ena kerere ia gwauraia hedinarai bona ena hetura karana Iehova ida ia hagoadaia lou.​—Sal. 51:4, 6, 10, 11.

18. Dahaka ese ita ia durua diba Iehova ena gadona ita kamonai henia noho totona?

¹⁸ Namona be 1 Korinto 10:12 ena sisiba ita badinaia bona sibona eda diba dekenai ita tabekau lasi. Ita sibona be eda raka dalana ita naria diba lasi dainai, eda kara amo do ia hedinarai ita be Iehova o Satani ita kamonai henia. (Ier. 10:23) Namona be hanaihanai do ita guriguri, lauma helaga ena hakaua dalana ita badinaia, bona Iehova ena gadona ita kamonai henia.