1. Paulo ese Iehova idia hesiai henia goadagoada taudia be edena bamona ia laloa?

 APOSETOLO PAULO be sivarai namona harorolaia totona idia gaukara goada taudia ia laloa bada. Ia gwau: “Ai ese emui abidadama karadia, lalokau dainai umui karaia gaukara bona iseda Lohiabada Iesu Keriso umui abidadama henia dainai, emui haheauka karana be hanaihanai ai laloa. Unai gaudia be iseda Dirava bona Tamana vairanai umui karaia.” (1 Tes. 1:3) Oibe, Iehova danu be ena taunimanima ese idia karaia hesiai gaukara ibounai ia laloatao bona laloa bada, herevana unai be gaukara badana o maragina.—Heb. 6:10.

2. Inai atikol lalonai dahaka do ita stadilaia?

² Guna bona hari iseda negai, tadikaka taihu momo be ful-taim hesiai gaukara karaia totona sibona edia ura gaudia momo idia dadaraia. Inai atikol lalonai, ita be Keristani ginigunadia haida ese Iehova idia hesiai henia dalana do ita stadilaia. Danu, iseda negai ita karaia ful-taim hesiai gaukara haida do ita herevalaia, bona do ita itaia edena dala ai ful-taim hesiai taudia ita durua diba.

3, 4. (a) Keristani ginigunadia haida ese idia karaia ful-taim hesiai gaukara haida be dahaka? (b) Edena dala ai tauanina dalanai heduru idia abia?

³ Iesu ia bapatiso murinai, ia ese tanobada hegegemadai do idia  karaia haroro gaukarana ia hamatamaia. (Luka 3:21-23; 4:14, 15, 43) Iesu ia mase murinai, iena aposetolo taudia ese unai haroro gaukarana idia gunalaia, bona gabeai unai gaukara be tanobada hegegemadai ia lao. (Kara 5:42; 6:7) Keristani taudia haida, hegeregere Filipi be Palestine dekenai evanelia bona misinari gaukara idia karaia. (Kara 8:5, 40; 21:8) Paulo bona ma haida be gabu daudaudia dekenai idia haroro. (Kara 13:2-4; 14:26; 2 Kor. 1:19) Ma haida—hegeregere Silivanus (Sila), Mareko, bona Luka—be Baibel torea taudia o seketere gaukara idia karaia. (1 Pet. 5:12) Keristani taihu danu be unai abidadama tadikaka ida idia gaukara hebou. (Kara 18:26; Roma 16:1, 2) Ita moale badina Keristani Grik Toretoredia lalonai edia sivarai ita duahia, bona unai ese ia hahedinaraia Iehova be ena hesiai taudia edia gaukara ia laloa bada.

⁴ Edena dala ai Keristani ginigunadia edia negai, ful-taim hesiai taudia ese tauanina dalanai heduru idia abia? Nega haida tadikaka ese edia ruma dekenai idia abia dae bona dala ma haida ai idia durua, to idia ese tadikaka idia doria lasi unai bamona idia karaia totona. (1 Kor. 9:11-15) Tadikaka taihu bona kongrigeisen haida be mai edia ura ida heduru idia henia. (Kara 16:14, 15; Filipi. 4:15-18 duahia.) Danu, Paulo bona ia idia bamoa taudia be pat-taim moni gaukara idia karaia, edia dabu gaudia haida idia hoia totona.

5. Tadikaka ta bona ena adavana ese edia ful-taim hesiai gaukara be edena bamona idia herevalaia?

⁵ Hari danu, momo idia gaukara goada ful-taim hesiai gaukara idauidau idia karaia totona. (Maua ladana ““ Ful-Taim Hesiai Gaukaradia” itaia.) Idia ese ful-taim hesiai gaukara be edena bamona idia laloa? Oi ese idia oi nanadaia diba, bona edia haere ese oi do ia hagoadaia. Mani inai haheitalai oi laloa: Tadikaka ta be regula painia, spesel painia, misinari bona idau tano ta ena Betele ai ia gaukara. Ia gwau: “Lau davaria ful-taim hesiai gaukara lau karaia be abia hidi hereadaena ta. Egu mauri lagani be 18 neganai, egu vairanai inai gaudia toi idia noho: Iunivesiti, ful-taim moni gaukara bona painia gaukara. Lau hekwarahi edena lau abia hidi totona. Lau mamia Iehova be ful-taim hesiai taudia edia gaukara namona ia laloaboio lasi. Iehova ese lau dekenai ia henia aonega bona diba be dala idauidau ai lau gaukaralaia; bema moni gaukara lau abia hidi, unai bamona lau karaia diba lasi.” Iena adavana ia gwau: “Ai abia asainmen ibounai ese lau idia durua lo hahinena ai lau lao totona. Ai itaia dala idauidau ai Iehova ese ai ia gimaia bona hakaua. Bema ful-taim hesiai gaukara ai karaia lasi, unai do ai mamia lasi. Dina ta ta ai Iehova lau tanikiu henia, badina ful-taim hesiai gaukara ai karaia diba.” Oi ura emu mauri be unai bamona, a?

6. Edena dala ai Iehova ese iseda hesiai gaukara ia laloa?

⁶ Haida be edia noho dalana ia hegeregere lasi dainai, ful-taim hesiai gaukara idia karaia diba lasi. To, ita diba Iehova ese edia hesiai gaukara ia laloa bada danu. Hegeregere, Filemona 1-3 (duahia) ai Paulo ese Kolose kongrigeisen tadikaka taihu ibounai dekenai hanamoa hereva ia siaia, bona idia haida edia ladana ia gwauraia. Paulo bona Iehova ese edia gaukara idia laloa bada. Unai hegeregerena, iseda guba Tamana ese oiemu hesiai gaukara ia laloa bada danu. To, oi ese edena dala ai ful-taim hesiai taudia oi durua diba?

7, 8. Painia taudia edia gaukara be edena bamona? Bona edena dala ai kongrigeisen taudia ese idia durua diba?

⁷ Keristani ginigunadia edia negai idia noho haroro taudia bamona, iseda negai idia noho painia taudia danu be kongrigeisen idia hagoadaia. Momo idia gaukara goada hua ta ta ai hora 70 lalonai idia haroro totona. Edena dala ai idia oi durua diba?

⁸ Painia taihu ta ladana Shari ia gwau:  “Painia taudia be dina ibounai haroro gaukara idia karaia dainai, toana be idia goada. To, idia danu be haida amo hagoadaia herevadia idia abia be namo.” (Roma 1:11, 12) Lagani haida lalonai ia painia taihu ta be ena kongrigeisen painia taudia ia herevalaia, ia gwau: “Idia gaukara goada bona idia laga-ani lasi. Unai dainai ita ese eda motuka amo teritori dekenai idia ita abia lao, aniani totona ita boiria, basi davana ita henia, o moni dalanai heduru ma haida ita henia neganai, painia taudia idia moale. Unai kara amo ita hahedinaraia painia taudia ita laloa bada.”

9, 10. Haida be dahaka idia karaia edia kongrigeisen ai painia taudia idia durua totona?

⁹ Painia taudia oi durua dalana ma ta be idia oi bamoa. Painia taihu ta, Bobbi ia gwau: “Namona be wiki lalonai momo ese haroro grup idia bamoa.” Bobbi ena kongrigeisen ai painia taihu ma ta ia gwau: “Adorahi ena haroro totona ai idia bamoa taudia be momo lasi.” Hari, Brooklyn Betele ai ia gaukara taihu ta be guna ia painia negana ia herevalaia, ia gwau: “Unai negai, taihu ta be mai ena motuka bona ia gwau, ‘Bema haroro gaukara totona oi be bamoa tauna ta lasi, lau oi rini henia bona oi do lau bamoa.’ Ia ese egu painia gaukarana ia durua bada.” Bona taihu Shari ia gwau: “Haroro murinai, nega momo singul painia taudia be sibona idia noho. Namona be nega ta ta ai unai singul tadikaka o taihu haida umui boiria emui ruma bese ena tomadiho lalonai idia helai totona. Danu, gaukara ma haida lalonai idia umui boiria diba, unai ese idia do ia hagoadaia.”

¹⁰ Taihu ta be kahirakahira lagani 50 lalonai ful-taim hesiai gaukara ia karaia vadaeni, bona ia be guna singul taihu haida ida ia painia negana ia herevalaia, ia gwau: “Elda taudia be hua haida murinai painia taudia idia vadivadi henia. Idia henanadai bema ai gorere, emai pat-taim moni gaukara be hegeregere, bona bema ai be mai emai lalohekwarahi gaudia ma haida eiava lasi. Oibe, ai idia laloa bada. Emai ruma idia mai, unai amo idia itaia dahaka gaudia idia hanamoa diba.” Unai elda bona idia bamona taudia ma haida be Onesiporo ena haheitalai idia tohotohoa. Ena be iena ruma bese ia naria, to ia ese Paulo ia durua danu. Bona iena heduru be Paulo ese ia moalelaia.—2 Tim. 1:18.

11. Spesel painia taudia edia gaukara be edena bamona?

 ¹¹ Ful-taim hesiai gaukara ma ta be spesel painia gaukara. Spesel painia tadikaka bona taihu be idia gaukara goada hua ta ta ai hora 130 idia haroro totona. Edia nega bada be haroro gaukara o kongrigeisen gaukaradia ma haida idia karaia dainai, idia hegeregere lasi moni gaukara karaia totona. To, brens ofesi ese hua ta ta ai idia dekenai heduru moni sisina ia henia. Unai amo edia nega bada be haroro gaukara idia karaia diba.

12. Edena dala ai elda bona ma haida ese spesel painia taudia idia durua diba?

¹² Edena dala ai spesel painia taudia ita durua diba? Elda ta be brens ofesi ta dekenai ia gaukara bona spesel painia taudia momo ida ia herevahereva. Ia gwau: “Elda be spesel painia taudia ida idia herevahereva be namo. Edia noho dalana idia henanadailaia, bona idia tahua edena dala ai idia durua diba. Witnes taudia haida idia laloa spesel painia taudia be gau momo dekenai idia dabu lasi badina brens ofesi ese heduru moni sisina idia henia. To, tadikaka taihu be dala idauidau ai heduru idia henia diba.” Regula painia taudia bamona, spesel painia taudia danu be haroro gaukara ai haida ese idia bamoa be namo. Oi ese idia oi bamoa diba, a?

13, 14. (a) Sekit taudia dekenai dahaka heduru ita henia diba? (b) Dahaka oi karaia diba loaloa naria taudia oi durua totona?

¹³ Sekit taudia bona edia adavadia be lo Keristani taudia bona ita idia hagoadaia. To laloatao, ita ese idia do ita hagoadaia, haroro gaukara ai do ita bamoa, bona moale karadia totona idia do ita boiria danu be namo. Bema idia gorere dainai hospital dekenai idia noho o opereisen idia abia be edena bamona? Do idia moale bema tadikaka taihu ese idia vadivadi henidia, idia durua bona edia dabu gaudia idia henia. Laloatao, Paulo bona ena bamoa taudia be kongrigeisen idia vadivadi henia neganai, Luka, “momo ese idia lalokau henia doketa tauna,” be idia ia durua.—Kol. 4:14; Kara 20:5–21:18.

¹⁴ Loaloa naria taudia bona edia adavadia ese tura namodia edia hebamo bona heduru idia abia be namo. Sekit naria tauna ta ia gwau: “Egu turadia idia diba edena negai lau idia hagoadaia be namo. Lau dekenai henanadai maorodia idia gwauraia, bona unai ese lau ia durua egu lalohekwarahi lau herevalaia totona. Idia kamonai namonamo dainai, lau idia durua bada.” Sekit taudia bona edia adavadia be tadikaka taihu edia lalokau karadia bona hagoadaia herevadia idia moalelaia.

15, 16. Dahaka dainai Betele taudia edia gaukara be mai anina bada, bona edena dala ai idia ita durua diba?

¹⁵ Tanobada hegegemadai, Betele ai idia gaukara taudia be sivarai namona harorolaia gaukarana idia durua bada. Bema emu kongrigeisen o sekit lalonai Betele taudia haida idia noho, edena dala ai idia oi durua diba?

¹⁶ Matamanai, haida be Betele ai idia vareai neganai, reana idia lalohisihisi badina edia ruma bese bona turadia idia rakatania. Unai dainai, idia moale bema Betele bona kongrigeisen taudia ese idia tura henidia! (Mar. 10:29, 30) Ena be Betele gaukara idia karaia, to idia be nega idia atoa wiki ta ta ai kongrigeisen heboudia idia lao bona idia haroro totona. To, nega haida Betele taudia be gaukara ma haida idia karaia danu. Bema kongrigeisen taudia ese unai idia lalopararalaia bona idia hahedinaraia Betele taudia edia gaukara idia laloa bada, idia huanai lalotamona do ia noho.—1 Tesalonika 2:9 duahia.

17, 18. Idau tano idia lao ful-taim hesiai taudia be dahaka gaukara idia karaia?

¹⁷ Haida be idau tano ai ful-taim hesiai gaukara karaia totona idia lao. Reana idia dekenai  unai tano ena aniani, gado, kastom bona mauri dalana be idau. To, dahaka dainai idau tano idia lao?

¹⁸ Idia haida be misinari taudia, bona edia nega bada be idia haroro bona ma haida idia durua. Brens ofesi ese misinari taudia edia noho gabudia ia hegaegaelaia, bona heduru moni sisina ia henia edia dabu gaudia idia hoia totona. Idau tano ai ful-taim hesiai gaukara idia karaia taudia haida be brens ofesi dekenai idia gaukara o brens ofesi, trensleisen ofesi, Assembly Hall bona Kingdom Hall idia haginidia. Brens ofesi o tadikaka taihu ese idia durudia, hegeregere edia aniani bona noho gabudia idia hegaegaelaia. Betele taudia bamona, idia danu be kongrigeisen heboudia dekenai idia lao bona idia haroro. Unai dainai, idia ese dala momo ai kongrigeisen idia durua.

19. Edena dala ai idau tano idia lao ful-taim hesiai taudia ita durua diba?

¹⁹ Edena dala ai oi ese unai ful-taim hesiai taudia oi durua diba? Laloatao, emu gabu ai idia ginidae neganai, reana emui aniani haida do idia manadalaia lasi. Unai dainai, aniani totona emu ruma dekenai oi boiria neganai, oi nanadaidia edena aniani idia ura henia o idia ura tohoa. Do idia hekwarahi emu gado bona kastom idia dibaia totona. Unai dainai, oi herevalaia gaudia do idia lalopararalaia haraga lasi, to namona be oi haheauka bona oi durudia emu gado idia gwauraia namonamo totona. Idia ura do idia diba!

20. Edena dala ai ita ese ful-taim hesiai taudia bona edia tama sina ita durua diba?

²⁰ Lagani momo idia ore murinai, idau tano ai ful-taim hesiai gaukara taudia bona edia tama sina be idia buruka idia lao. Bema tama sina be Witnes taudia, edia ura badana be edia natudia ese edia ful-taim hesiai gaukara do idia rakatania lasi. (3 Ioa. 4) Ful-taim hesiai taudia be dala idauidau do idia tahua edia tama sina idia durua bona vadivadi henia totona. To, edia tama sina burukadia kahirakahira idia noho tadikaka taihu ese ful-taim hesiai taudia idia durua diba. Hegeregere, bema edia tama sina burukadia idia gorere, unai tadikaka taihu ese idia durudia diba. Laloatao, ful-taim hesiai taudia be hari inai negai tanobada ai idia karaia mai anina bada gaukara idia durua. (Mat. 28:19, 20) Oi bona emu kongrigeisen taudia ese ful-taim hesiai taudia edia tama sina burukadia umui durua diba, a?

21. Ful-taim hesiai taudia ese ma haida edia heduru bona hagoadaia herevadia be edena bamona idia laloa?

²¹ Ful-taim hesiai taudia be taga taudia ai idia lao totona idia gaukara lasi. To, idia gaukara goada Iehova idia hesiai henia bona ma haida idia durua totona. Unai dainai oi henia heduru do idia laloa bada. Hegeregere, idau tano ai ful-taim hesiai gaukara ia karaia taihu ta, ia gwau: “Ena be ma haida ese kadi ta dekenai tanikiu hereva kwadogina ta sibona idia torea bona henia, to unai ese ia hahedinaraia idia be oi idia laloa bona emu gaukara idia moalelaia.”

22. Oi ese ful-taim hesiai gaukara be edena bamona oi laloa?

²² Oibe, ful-taim hesiai gaukara be mauri dala hereadaena. Ia be gaukara badana, emu diba do ia habadaia, bona moale do oi davaria. Ful-taim hesiai gaukara amo oi dibaia gaudia ese oi do idia durua, unai amo vaira negana ai Dirava ena Basileia henunai emu hesiai gaukara do oi moalelaia. Oibe, namona be ita ese ful-taim hesiai taudia edia “abidadama karadia” bona “lalokau dainai [idia] karaia gaukara” ita laloa bada.—1 Tes. 1:3.