Davida ia gwau, ia ese ‘nega ta ia itaia lasi kara maoromaoro tauna ta be Dirava ese ia rakatania, eiava ena natuna be aniani totona taunimanima dekenai idia noinoi.’ Davida be ia sibona ia herevalaia. Ia diba Dirava ese hanaihanai ia naria. (Sal. 37:25) To, ita gwau lasi Davida ena hereva ena anina be Dirava ena hesiai tauna ta be nega ta ia hitolo lasi o do ia hitolo lasi.

Nega haida Davida be hahetoho badadia ia davaria danu. Hegeregere, nega ta ia be Saulo amo ia heau. Davida bona ena tatau edia aniani ia ore dainai, ia ese paraoa totona ia noinoi. (1 Sam. 21:1-6) Oibe, unai negai Davida be ‘aniani totona ia noinoi.’ To, unai nega aukana ai, Davida ia diba Iehova be ia ia rakatania lasi. Danu, Baibel ese ia hahedinaraia lasi Davida be ia hitolo neganai aniani totona ia hegame.

Mataio 6:33 ai Iesu ia gwauhamata Basileia idia tahua guna abidadama hesiai taudia be Dirava ese do ia durudia. Ia gwau: “Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai [dabua, aniani bona inuinu gaudia danu] be umui dekenai do ia henia.” To danu Iesu ia gwau, iena “tadikaka” be dagedage do idia davaria dainai, do idia hitolo. (Mat. 25:35, 37, 40, BHḡ) Aposetolo Paulo dekenai unai ia vara danu. Ia be nega momo ia hitolo bona ranu mase.​—⁠2 Kor. 11:27.

Iehova ia gwau ita ese dala idauidau ai dagedage do ita davaria. Nega haida reana Iehova ese iseda inai taudia do ia koua lasi ita idia dagedage henia totona, unai amo ita ese Iehova badinaia karana ita hahedinaraia bona Diabolo ena samania herevana ita hakoikoia diba. (Iobu 2:3-5) Hegeregere, Nazi dibura kamepa ai iseda tadikaka be dagedage bada idia davaria dainai, tauanina dalanai idia dabu momokani. Nazi taudia ese idia gaukaralaia dala badana ta be inai: Witnes taudia dekenai aniani idia henia lasi, unai amo edia Dirava badinaia karana do idia rakatania. To, abidadama Witnes taudia be Iehova idia badinaia ela bona dokona, bona ia ese ia rakatanidia lasi. Iehova ese unai dagedage karadia amo idia ia koua lasi hegeregerena, Keristani taudia ibounai danu be hahetoho idauidau amo ia koua lasi. To, ita diba momokani Iehova be iena ladana dainai dagedage idia davaria taudia ibounai ia naria. (1 Kor. 10:13) Namona be Filipi 1:29 ena hereva ita laloatao. Ia gwau: “Keriso dainai umui ese unai hahenamo umui abia, ia umui abidadama henia sibona lasi, to danu ia dainai hisihisi umui abia.”

Iehova ia gwauhamata ia be ena hesiai taudia ida do ia noho. Hegeregere, Isaia 54:17 ai ia gwau: “Tuari gauna ta ese oi do ia hadikaia diba lasi.” Unai bona Dirava ena gwauhamata namodia ma haida ese idia hamomokania, Iehova be ena hesiai taudia ibounai do ia durua. To, Keristani taudia ta ta be hahetoho do idia davaria, bona nega haida reana do idia mase danu.