1, 2. (a) Dahaka ese eda abidadama do ia hagoadaia, unai amo ita abia dae Basileia ese Dirava ena ura taunimanima totona do ia hagugurua? (b) Efeso 2:12 hegeregerena, edena dala ai kontraka idauidau ese ita idia hagoadaia? (Laulau ginigunana itaia danu.)

ITA Iehova ena Witnes taudia be nega momo ita gwau, Dirava ena Basileia sibona ese iseda hekwakwanai ibounai ia haorea diba, bona taunimanima dekenai unai hereva momokanina ita hadibaia. Danu, unai Basileia ena helaro ese ita ia hagoadaia bada. To, ita abia dae momokani, unai be Basileia korikorina ta bona Dirava ena ura do ia hagugurua, a? Bona dahaka dainai unai Basileia ita abidadama henia diba?—Heb. 11:1.

² Mesia Basileiana be Siahu Ibounai Diravana ese ia haginia, taunimanima dekenai iena ura ia hagugurua totona. Unai Basileia ia gini auka diba, badina Iehova be mai ena maoro do ia lohia totona. Unai Basileia ena kahana badadia ta ta—ena king, ia ida idia lohia taudia, idia lohiaia gabuna—be kontraka idauidau ese idia gwauraia. Unai kontraka o gwauhamata ta ta be Dirava o iena Natuna, Iesu Keriso ese idia karaia. Unai kontraka ta ta ita laloa dobu neganai, do ita laloparara edena dala ai Dirava ena ura do ia guguru, bona  do ita abia dae Mesia Basileiana be gavamani korikorina ta.—Efeso 2:12 duahia.

3. Inai stadi bona murina stadi ai, dahaka do ita herevalaia?

³ Baibel be Iesu Keriso ese ia lohiaia Mesia Basileiana idia herevalaia kontraka siks ia herevalaia. Idia be (1) Aberahamo kontrakana, (2) Taravatu kontrakana, (3) Davida kontrakana, (4) hahelaga tauna Melekisedeka bamona kontrakana, (5) kontraka matamatana, bona (6) Basileia kontrakana. Inai stadi bona murina stadi ai, do ita tahua edena dala ai unai kontraka ta ta ese Basileia idia herevalaia, bona edena dala ai idia ese Dirava ena ura tanobada bona taunimanima totona idia hagugurua.—Hereva ladana, “ Dirava ese Iena Ura Do Ia Hagugurua Dalana,” rau 12 ai itaia.

4. Genese bukana ena hereva bamona, Iehova ese dahaka hereva badadia toi ia gwauraia?

⁴ Iehova be tanobada ia hegaegaelaia taunimanima ese do idia noholaia murinai, ia ese hereva badadia toi ia gwauraia: (1) Ia ese taunimanima be iena toana hegeregerena do ia karaia. (2) Taunimanima ese tanobada be paradaiso ai do idia halaoa bona edia kara maoromaoro natudia amo do idia hahonua. (3) Taunimanima be kara namo bona kara dika hadibaia au ena huahua do idia ania lasi. (Gen. 1:26, 28; 2:16, 17) Dirava ese unai hereva badadia toi sibona ia gwauraia. Ia ese Adamu bona Heva ia karaia murinai, bema idia be unai hereva oredia rua idia badinaia, vadaeni Dirava ena ura be do ia guguru. To, dahaka ia vara dainai Dirava ese unai kontraka idauidau ia karaia?

5, 6. (a) Edena dala ai Satani ese Dirava ena ura ia hadikaia toho? (b) Eden ai Iehova be edena bamona Satani ena hepapahuahu herevana ia haerelaia?

⁵ Satani Diabolo ia ura Dirava ena ura ia hadikaia dainai, gwau-edeede karana ia havaraia. Ia ese taunimanima edia lalona ia veria Dirava do idia kamonai henia lasi totona. Ia ese hahine ginigunana, Heva, ia dibagania Dirava ese ia taravatua kara namo bona kara dika hadibaia au ena huahua ia ania totona. (Gen. 3:1-5; Apok. 12:9) Unai amo Satani ese Dirava ena lohia siahuna ia hepapahuahulaia. Gabeai, Satani ese abidadama taudia ia gwauraia dika, ia gwau idia be sibona edia namo idia laloa dainai Dirava idia hesiai henia.—Iobu 1:9-11; 2:4, 5.

⁶ Eden ai Iehova be edena bamona Satani ena hepapahuahu herevana do ia haerelaia? Ia ese unai gwau-edeede taudia ia hamasea diba. To bema unai ia karaia, Dirava ena ura, Adamu bona Heva edia natudia ese tanobada do idia hahonua totona, be do ia guguru lasi. Unai dainai, eda aonega Havaraia Tauna be maoromaoro unai gwau-edeede taudia ia hamasea lasi, to peroveta hereva badana ta ia gwauraia, unai be Eden kontrakana. Unai ia karaia badina ia ura iena ura ibounai do idia guguru.—Genese 3:15, BHḡ duahia.

7. Eden kontrakana ese ita dekenai dahaka gwauhamata ia hahedinaraia?

⁷ Eden kontrakana amo Iehova ese gaigai bona ena garana ia hahemaoro henidia, unai be Satani Diabolo bona Dirava ena lohia siahuna idia dadaraia taudia. Dirava ese hahine ena garana dekenai maoro ia henia Satani ia hamasea totona. Unai dainai, Eden kontrakana ese ia hahedinaraia, Satani bona ia havaraia kara dika be do idia ore. To unai sibona lasi, unai do ia vara dalana ia hahedinaraia danu.

8. Hahine bona ena garana dekenai dahaka ita dibaia?

⁸ Hahine ena garana be daika? Ia be lauma tauna ta. Dahaka dainai unai bamona ita hereva? Badina unai garana ese Satani  Diabolo do ia “haorea,” bona Satani be lauma tauna. (Heb. 2:14) Unai hegeregerena, garana ia havaraia hahinena danu be lauma hahinena ta. Iehova ese Eden kontrakana ia gwauraia murinai, lagani 4,000 lalonai Satani ena garana ia hutuma ia lao, to hahine bona ena garana be idia do hedinarai lasi. To, unai lagani lalodiai Iehova ese kontraka haida ia karaia. Unai kontraka idauidau amo Iehova ese hahine ena garana ia hahedinaraia, bona Iena hesiai taudia ia hadibaia ia ese unai garana amo Satani ese ia havaraia dika ibounai do ia haorea.

9. Aberahamo kontrakana be dahaka, bona edena nega ai ia guguru matamaia?

⁹ Iehova ese Satani ia hahemaoro henia bena lagani 2000 murinai, Ia ese Aberahamo ia oda henia iena hanua Uru do ia rakatania bona Kanana tanona dekenai do ia lao. (Kara 7:2, 3) Iehova ese ia hamaoroa: “Oiemu tano bona oiemu varavara bona oiemu tamana ena ruma oi rakatania, bona oi dohore lau hadibaia tano dekenai do oi lao. Lau be oi dekenai tubuna momo do lau henia, dohore idia be bese bada herea. Oi do lau hanamoa, bona oiemu ladana do lau habadaia, vadaeni taunimanima ese namo bada do idia davaria oi dekena amo. Oi idia hanamoa taudia be lauegu hanamoa do idia davaria, to oi idia hadikaia taudia be dohore lau hadikaia. Tanobada ena bese ibounai, be oi dainai namo bada do idia davaria.” (Gen. 12:1-3) Dirava ese Aberahamo ida ia karaia gwauhamata be Aberahamo kontrakana. Ita diba lasi edena nega ai Iehova ese nega ginigunana unai gwauhamata ia karaia. To, ita diba unai kontraka be lagani 1943 B.C.E. ai ia guguru matamaia. Unai nega ai Aberahamo ena mauri lagani be 75, bona Harana hanua ia rakatania bena Euperate Sinavaina ia hanaia.

10. (a) Edena dala ai Aberahamo be Dirava ena gwauhamata ia abidadama henidia momokani? (b) Aberahamo kontrakana ia guguru matamaia murinai, Iehova be dahaka ia karaia?

 ¹⁰ Iehova ese Aberahamo dekenai ena gwauhamata ia gwauraia lou lou, bona unai negadia ta ta ai hereva ma haida ia atoa kau. (Gen. 13:15-17; 17:1-8, 16) Bona Aberahamo be Dirava ena gwauhamata ia abidadama henidia momokani dainai, ia ura iena natuna lalokauna ia bouboulaia. Iehova be unai ia moalelaia dainai, guna ia karaia kontraka ia hamomokania totona, “gwauhamata metauna” ma ta ia gwauraia. (Genese 22:15-18; Heberu 11:17, 18 duahia.) Aberahamo kontrakana ia guguru matamaia murinai, metairametaira Iehova ese hahine ena garana ena sivarai haida ia hahedinaraia. Unai garana be Aberahamo ena bese amo do ia mai, ia be tau tamona lasi, ia be lohia dagina do ia abia, ena inai taudia ibounai do ia haorea, bona bese ibounai dekenai hahenamo do ia mailaia.

11, 12. Baibel ese edena dala ai ia hahedinaraia Aberahamo kontrakana be lauma dalanai do ia guguru, bona ita dekenai unai ena anina be dahaka?

¹¹ Aberahamo ena natudia korikori be Gwauhamata Tanona ai idia vareai neganai, unai be nega ginigunana Aberahamo kontrakana ia guguru. To, Baibel ia gwau unai kontraka be lauma dalanai do ia guguru danu. (Gal. 4:22-25) Aposetolo Paulo ese ia hahedinaraia, Aberahamo ena garana ena kahana ginigunana be Keriso, bona iharuana be 144,000 horoa Keristani taudia. (Gal. 3:16, 29; Apok. 5:9, 10; 14:1, 4) Garana ia havaraia hahinena be “ataiai Ierusalema”—Dirava ena guba oreana mai ena kamonai aneru danu. (Gal. 4:26, 31) Aberahamo kontrakana ena gwauhamata hegeregerena, hahine ena garana ese bese ibounai dekenai hahenamo do ia mailaia.

¹² Aberahamo kontrakana ese ia hahedinaraia guba Basileiana be do ia vara momokani, bona dala ia kehoa King bona ia ida idia lohia taudia ese unai Basileia do idia abia totona. (Heb. 6:13-18) Unai kontraka be do ia noho ela bona edena nega? Genese 17:7 ia gwau: “Ia be noho hanaihanai gwauhamata taravatuna.” Do ia gaukara noho ela bona Mesia Basileiana ese Dirava ena inai taudia ibounai do ia haorea, bona tanobada besedia ibounai be hahenamo do idia davaria. (1 Kor. 15:23-26) Oibe, tanobada ai idia noho taudia be hahenamo do idia abia ela bona hanaihanai. Dirava ese Aberahamo ida ia karaia kontrakana ia hahedinaraia, Iehova ia ura bada iena ura do ia hagugurua bona kara maoromaoro taudia be tanobada “ena gabu ibounai dekenai do [idia] noho”!—Gen. 1:28.

13, 14. Davida kontrakana ese dahaka ia hamomokania?

¹³ Eden kontrakana bona Aberahamo kontrakana ese ita idia hadibaia, Iehova ena lohia siahuna be Mesia Basileiana amo ia hahedinaraia, bona ia be Dirava ena kara maoromaoro taravatudia hegeregerena ia gini. (Sal. 89:14) Nega ta Mesia Basileiana be do ia kara gageva bona gavamani ma ta ese ena gabu do ia abia, a? Kontraka ma ta ese ia hamomokania unai bamona do ia vara lasi.

¹⁴ Mani Iehova ese idaunegai Israela besena ena King Davida dekenai ia karaia gwauhamatana ita laloa, unai be Davida kontrakana. (2 Samuela 7:12, 16 duahia.) Davida be Ierusalema ai ia lohia neganai, Iehova ese unai kontraka ia karaia, bona Davida ia gwauhamata henia Mesia be iena bese amo do ia vara. (Luka 1:30-33) Unai amo Iehova ese garana ena bese ena sivarai haida ia gwauraia, bona ia hahedinaraia Davida ena tubuna ta be Mesia Basileiana ena “Biaguna korikori” ai do ia lao. (Ese. 21: 25-27) Iesu amo, Davida ena terona “be do ia gini ela bona hanaihanai.” Oibe, Davida ena garana “be do idia vara noho hanaihanai, bona iena terona be do ia noho ela bona dina ena noho dinadia ibounai.” (Sal. 89:34-37, NW) Momokani, Mesia Basileiana be do ia kara gageva lasi, bona ena hahenamo be do ia noho ela bona hanaihanai!

15-17. Hahelaga tauna Melekisedeka bamona kontrakana hegeregerena, garana be edena dagi ma ta do ia abia, bona dahaka dainai?

¹⁵ Aberahamo kontrakana bona Davida kontrakana idia hamomokania hahine ena garana be king ai do ia lao. To, unai sibona be ia hegeregere lasi tanobada besedia ibounai dekenai hahenamo ia mailaia totona. Taunimanima dekenai hahenamo idia mailaia totona, namona be garana ese edia dika ia kokia bona Iehova ena tanobada hegegemadai famili oreana lalonai ia hakaudia vareai. Unai ia karaia totona, garana be hahelaga tauna ai do ia lao danu be namo. Eda aonega Havaraia Tauna ese unai ia hagugurua totona, hahelaga tauna Melekisedeka bamona kontrakana ia karaia.

¹⁶ Iehova be King Davida amo ia hahedinaraia, Ia ese Iesu ida kontraka ta do ia karaia. Unai kontraka ena kahana be rua. Ginigunana be, Iesu be “[Dirava ena] idiba kahana dekenai do [ia] helai,” ela bona ena inai taudia ibounai ia hamasedia. Bona iharuana be, Iesu be “Hahelagaia tauna, Melekisedeka hegeregerena do [ia] lao.” (Salamo 110:1, 2, 4 duahia.) To, dahaka dainai ia be “Melekisedeka hegeregerena do [ia] lao”? Aberahamo ena tubudia be Gwauhamata Tanona ai idia do vareai lasi neganai, Melekisedeka, Salema ena king be “Atai Momokani Diravana ena hahelaga tauna.” (Heb. 7:1-3) Iehova ese ia abia hidi unai gaukara ia karaia totona. Heberu Toretoredia lalonai, Melekisedeka sibona idia gwauraia king bona hahelaga gaukara ia karaia tauna. Danu, ia vairanai bona ia murinai ta be unai bamona gaukara ia karaia lasi dainai, Melekisedeka “be hahelagaia tauna ela bona hanaihanai.”

¹⁷ Melekisedeka bamona kontrakana amo, Iehova ese Iesu be hahelaga tauna bamona ia abia hidi. Unai dainai, Iesu be “hahelaga tauna ela bona hanaihanai, Melekisedeka bamona.” (Heb. 5:4-6) Unai ese ia hamomokania, Iehova be ia gwauhamata Mesia Basileiana amo bese ibounai dekenai hahenamo do ia mailaia.

18, 19. (a) Ita herevalaia kontraka ese Basileia be edena bamona idia herevalaia? (b) Murina stadi ai, dahaka do ita herevalaia?

¹⁸ Inai stadi lalonai ita herevalaia kontraka ita lalodia neganai, ita itaia unai kontraka be Mesia Basileiana idia herevalaia, bona unai Basileia be unai kontraka hegeregerena idia haginia. Eden kontrakana ese ia hamomokania, Iehova be hahine ena garana do ia gaukaralaia Iena ura tanobada bona taunimanima dekenai ia hagugurua totona. Aberahamo kontrakana ese ia hahedinaraia unai garana be daika, bona dahaka gaukara do ia karaia.

¹⁹ Davida kontrakana ese ia hahedinaraia Mesia be edena bese amo ia vara, bona ia dekenai maoro ia henia tanobada do ia lohiaia ela bona hanaihanai. Hahelaga tauna Melekisedeka bamona kontrakana ese garana dekenai maoro ia henia hahelaga tauna ena gaukara ia karaia totona. To, Iesu sibona ese taunimanima be goevadae taudia ai do ia halaoa lasi. Dirava ese ma haida ia horodia king bona hahelaga gaukara idia karaia totona. Edeseni amo do idia mai? Unai be murina stadi ai do ita herevalaia.