1, 2. (a) Dahaka dainai Kolose kongrigeisen lalonai hekwakwanai badadia idia vara? (b) Idia gini goada totona Paulo ese dahaka sisiba ia henidia?

KOLOSE Keristani kongrigeisen lalonai hekwakwanai badadia idia vara! Tadikaka haida be Mose ena Taravatu idia badinaia auka dainai, kongrigeisen ia parara. Bona haida idia laloa mauri ena moale karadia idia karaia be kerere. Paulo be edia lalohadai kereredia ia hamaoromaoroa totona, ia tore henidia, ia gwau: “Umui naria namonamo, dika tau ta ese inai tanobada ena aonega bona anina lasi hereva koikoidia amo umui ia tarapua. Unai gaudia be taunimanima edia sene herevadia amo, bona idia be inai tanobada ena lalohadai badadia hegeregerena, to Keriso ena hadibaia herevadia hegeregerena lasi.”—Kol. 2:8.

² Bema unai horoa Keristani taudia be “tanobada ena lalohadai badadia” idia laloa momo, idia be Iehova ena hahemauri dalana idia dadaraia unai. (Kol. 2:20-23) Edia hetura karana Dirava ida idia gimaia totona, Paulo ese idia ia durua, ia gwau: “Guba gaudia do umui laloa noho, to tanobada gaudia do umui laloa lasi.” (Kol. 3:2) Oibe, namona be unai Keristani taudia be Iehova ese guba ai ‘idia totona ia atoa hegaegae vadaeni helarona’ idia laloatao noho.—Kol. 1:4, 5.

3. (a) Horoa Keristani taudia be dahaka ahuna idia laloa noho? (b) Inai stadi ai edena henanadai do ita herevalaidia?

 ³ Hari, horoa Keristani taudia danu be Dirava ena guba Basileiana bona ‘Keriso ida do idia abia hebou ahuna’ idia laloa noho. (Roma 8:14-17) To, tanobada helarona idia abia taudia be edena bamona? Edena dala ai idia dekenai Paulo ena hereva be mai anina bada? Edena dala ai “mamoe ma haida” ese “guba gaudia” do idia laloa noho? (Ioa. 10:16) Abidadama taudia Aberahamo bona Mose be hekwakwanai badadia idia davaria, to ‘guba gaudia idia laloa noho’? Edena dala ai idia ita tohotohoa diba?

4. Edena dala ai “mamoe ma haida”ese ‘guba gaudia idia laloa noho’ diba?

⁴ Herevana “mamoe ma haida” be guba helarona idia abia lasi, to idia danu be ‘guba gaudia idia laloa’ diba. Edena dala ai? Edia mauri lalonai Iehova Dirava bona ena Basileia idia atoa guna. (Luka 10:25-27) Unai ita karaia totona, Iesu ena haheitalai ita tohotohoa. (1 Pet. 2:21) Keristani ginigunadia edia negai bamona, hari tanobada ena aonega herevadia, lalohadai kereredia, bona kohu laloa bada karana be bada herea. (2 Korinto 10:5 duahia.) Namona be Iesu ita tohotohoa, bona eda hetura karana Iehova ida idia hadikaia diba gaudia amo sibona ita gimaia.

5. Kohu bona moni laloa momo karana dekenai, ita ta ta sibona ese dahaka henanadai ita laloa diba?

⁵ Ita be tanobada taudia bamona, kohu momo tahua karana ita laloa bada, a? Iseda lalohadai bona kara ese do idia hahedinaraia, ita be dahaka ita laloa bada. Iesu ia gwau: “Emu dava bada kohu ia noho gabuna dekenai, emu kudouna danu be unuseniai do ia noho.” (Mat. 6:21) Ita laloa bada gaudia ita dibaia totona, nega ta ta ai eda kudouna do ita tahua. Sibona do ita nanadaia: ‘Lau be moni lau lalohekwarahilaia momo, a? Lau be egu bisinesi o egu mauri hanamoa daladia lau laloa momo, a? Eiava lau hekwarahi kohu momo lasi maurina do lau noholaia, bona egu hetura karana Iehova ida do lau hagoadaia, a?’ (Mat. 6:22) Iesu ia gwau, bema ‘tanobada ai ita sibona totona dava bada kohu ita haboua,’ unai ese iseda hetura karana Iehova ida ia hadikaia diba.—Mat. 6:19, 20, 24.

6. Edena dala ai tauanina ena ura gaudia ita dadaraia diba?

⁶ Ita be goevadae lasi taudia dainai, nega momo ita ura tauanina ena ura ita badinaia. (Roma 7:21-25 duahia.) Bema iseda mauri lalonai Dirava ena lauma helaga ia gaukara lasi, ita be “dibura karadia” do ita karaia. Hegeregere, “regerege bada pati, kekero, matabodaga karadia, bona gwau-edeede hemarai karadia.” (Roma 13:12, 13) “Tanobada gaudia”—tauanina ese ia ura henia dikadika gaudia unai—ita dadaraia totona, namona be ‘guba gaudia sibona do ita laloa noho.’ Unai ita karaia totona ita gaukara goada be namo. Unai dainai Paulo ia gwau: “Egu tauanina lau botaia bona igui hesiai tauna bamona lau hakaua.” (1 Kor. 9:27) Oibe, do ita gaukara goada bema ita ura mauri ena heau helulu lalonai ita heau noho! Mani abidadama taudia rua edia sivarai ita herevalaia.—Heb. 11:6.

7, 8. (a) Aberahamo bona Sara ese dahaka hekwakwanai idia davaria? (b) Aberahamo be hanaihanai dahaka ia laloa?

⁷ Iehova ese Aberahamo ia noia ena ruma bese ida Kanana do idia lao neganai, Aberahamo be mai ena ura ida unai ia badinaia. Aberahamo ena abidadama bona kamonai karana dainai, Iehova be ia ida gwauhamata ta ia karaia. Ia gwau: “Lau be  oi dekenai tubuna momo do lau henia, dohore idia be bese bada herea. Oi do lau hanamoa.” (Gen. 12:2) To, lagani momo idia ore bona Aberahamo bona Sara be natuna lasi. Iehova ese Aberahamo dekenai ia karaia gwauhamatana ia laloaboio, a? Danu, Kanana ai mauri be auka. Aberahamo bona ena ruma bese ese Mesopotamia ena taga hanuana Uru dekenai, edia ruma bona varavara idia rakatania. Idia be kilomita 1,600 mai kahana bamona idia raka ela bona Kanana ai idia ginidae. Unuseniai idia be palai rumadia lalonai idia noho, hitolo bada negana idia davaria, bona henaohenao taudia be momo. (Gen. 12:5, 10; 13:18; 14:10-16) To, idia ese Uru dekenai giroa lou lalohadaina idia abia lasi!—Heberu 11:8-12, 15 duahia.

⁸ Aberahamo be “tanobada gaudia” ia laloa lasi, to “Lohiabada dekenai ia abidadama henia.” (Gen. 15:6) Oibe, ia be ‘guba gaudia ia laloa noho,’ badina hanaihanai Dirava ena gwauhamata ia lalodia. Unai dainai, Iehova, Ataiai Momokani Diravana, ese Aberahamo ena abidadama karana ia hanamoa. Ia dekenai ia gwau: “Guba oi itaia, hisiu oi duahia diba o lasi? Oiemu tubuna edia momo be dohore unai bamona.” (Gen. 15:5) Unai ese Aberahamo ia hagoadaia bada! Nega ibounai guba ena hisiu ia itadia neganai, Iehova ena gwauhamata ia dekenai ia laloatao. Bona Iehova ese ia makaia negana ai, iena gwauhamata hegeregerena Aberahamo ena natuna ta ia vara.—Gen. 21:1, 2.

9. Edena dala ai Aberahamo ena haheitalai ese ita ia durua, eda hesiai gaukara ita hamaragia lasi totona?

⁹ Aberahamo bamona, ita danu be Iehova ena gwauhamata do idia guguru negana ita naria noho. (2 Pet. 3:13) Bema ita be ‘guba gaudia ita laloa noho’ lasi, do ita mamia Iehova ena gwauhamata idia guguru haraga lasi, bona eda hesiai gaukara do ita hamaragia. Hegeregere, guna sibona emu ura gaudia haida oi dadaraia, unai amo painia gaukara o hesiai gaukara ma haida oi karaia totona, a? Bema unai bamona oi karaia, oi ai hanamoa. To, hari be edena bamona? Oi be Aberahamo bamona, Iehova ena hesiai gaukara oi goadalaia bona Ia ese vaira negana ai do ia hagugurudia gwauhamata oi naria noho, a? (Heb. 11:10) Ia be “Iehova ia abidadama henia, bona ia ese ia gwauraia maoromaoro.”—Roma 4:3.

10. Mose ia matamata neganai, ena mauri be edena bamona?

¹⁰ ‘Guba gaudia sibona ia laloa noho’ tauna ma ta be, Mose. Ia matamata neganai, “Aigupito taudia edia aonega ibounai be [ia] dekenai idia hadibaia.” Mose be unai edukeisen namona ia abia dainai, “ena hereva bona kara ai ia be mai ena siahu.” (Kara 7:22) Danu, Aigupito ese tanobada ia biagua negana lalonai, Mose be Farao ena ruma bese lalonai ia tubu daekau. Oibe, unai ibounai dainai Mose be Aigupito ai dagi bada tauna ta ai ia lao diba. To, Mose be mai anina bada gauna ma ta ia laloa noho—ia ura Dirava ena ura do ia karaia.

11, 12. Mose be daika amo ia abia aonega ia laloa bada, bona edena bamona unai ita diba?

¹¹ Mose ia do maragi neganai, ena sinana korikorina, Iokebeda, ese ia dekenai Heberu taudia edia Dirava ia hadibaia. Mose be Iehova amo ia abia aonegana ia laloa bada, bona ia laloa unai be dava bada gauna ta ese ia hereaia lasi. Unai dainai, ia ese Farao ena ruma bese amo ia abia diba hahenamo bona dagi ia dadaraia. (Heberu 11:24-27 duahia.) Oibe, Mose be ia maragi neganai ia abia hadibaia herevadia bona Iehova ia abidadama henia dainai, unai ese ia durua ‘guba gaudia ia laloa noho’ totona.

¹² Ena be Mose be edukeisen badana ia  abia, to ia ese unai diba ia gaukaralaia Aigupito ai sibona ena ladana ia habadaia bona taga tauna ai ia lao totona, a? Lasi. Baibel ia gwau, Mose “ia ura lasi ia idia gwauraia Farao ena natuna kekeni ena natuna. Ena lalona ia hadaia Dirava ena taunimanima ida hisihisi ia abia hebou, to kara dika ena moale, nega sisina do ia noho gauna ia ura henia lasi.” Mose ese ena diba ia gaukaralaia Iehova ena taunimanima ia gunalaia totona.

13, 14. (a) Mose be Iehova ena taunimanima ia do ruhaia lasi neganai, edena kara ia manadalaidia be namo? (b) Mose bamona, ita danu be dahaka ita karaia be namo?

¹³ Mose be Iehova bona Iena taunimanima ia lalokau henia. Mose ena mauri lagani be 40 neganai, ia laloa ia hegeregere Israela taudia be Aigupito ena igui hesiai amo ia ruhaia totona. (Kara 7:23-25) To, Iehova ese Mose dekenai unai gaukara ia do henia lasi neganai, Mose ese kara haida ia manadalaia be namo. Namona be ia ese manau, haheauka bona sibona biagua karana ia dibaia. (Aon. 15:33) Unai amo Mose do ia hegeregere vaira negana ai idia vara hahetoho bona hekwakwanai ia hanaia totona. Mose be lagani 40 mamoe naria gaukarana ia karaia lalonai, unai kara idauidau ia manadalaia.

¹⁴ Mose be mamoe naria gaukara amo ia dibaia gaudia ese idia durua, a? Oibe! Baibel ia gwau, “tanobada taudia ibounai edia huanai [Mose] sibona be manau herea.” (Num. 12:3) Mose be manau karana ia manadalaia dainai, taunimanima idauidau be mai haheauka ida ia kara henidia bona edia hekwakwanai ia hamaoromaoroa. (Eso. 18:26) Ita danu be Keristani kara namodia do ita manadalaia, unai ese ita do ia durua “hisihisi badana” amo ita roho mauri bona Dirava ena tanobada matamatana lalonai ita vareai. (Apok. 7:14) Ita be taunimanima ibounai, idia badu o lalohisihisi haraga taudia danu, ita gaukara hebou, a? Aposetolo Petero ena hereva ese ita ia durua, ia gwau: “Taunimanima idauidau ibounai umui matauraia, tadikaka oreana ibounai umui lalokau henia.”—1 Pet. 2:17.

15, 16. (a) Dahaka dainai ‘guba gaudia sibona ita laloa noho’ be namo? (b) Dahaka dainai Keristani taudia ese kara namodia idia hahedinaraia noho be mai anina bada?

¹⁵ Ita be “dina gabediai” ita noho bona “nega aukadia do idia vara.” (2 Tim. 3:1) Unai dainai, Dirava kahirakahira do ita noho totona, namona be ‘guba gaudia sibona do ita laloa noho.’ (1 Tes. 5:6-9) Mani ita itaia, eda mauri lalonai edena dala toi ai unai ita karaia diba.

¹⁶ Eda kara: Petero ia laloparara kara namodia be mai anina bada. Ia gwau: “Tanobada taudia huanai kara namodia do umui karaia noho, vadaeni . . . emui kara namodia idia itaia dainai Dirava do idia hanamoa.” (1 Pet. 2:12) Herevana ita be ruma ai, gaukara gabunai, sikuli ai, moale karadia ita karaia, o haroro gaukara ita karaia, to namona be ita gaukara goada eda kara namodia amo Iehova ita hanamoa totona. Momokani, ita be goevadae lasi taudia dainai, nega momo ita kerere. (Roma 3:23) To, bema ita ese ‘abidadama ena tuari namona do ita tuarilaia noho,’ eda goevadae lasi tauanina ena ura dikadia do ita dadaraia.—1 Tim. 6:12.

17. Edena dala ai Iesu ena laloa dalana ita abia diba? (Laulau ginigunana itaia.)

¹⁷ Eda laloa dalana: Kara namodia ita hahedinaraia noho totona, laloa dalana maorona ita abia be mai anina bada. Aposetolo Paulo ia gwau: “Keriso Iesu ena laloa dalana do umui dogoatao noho.” (Fili. 2:5) Iesu be edena bamona laloa dalana ia hahedinaraia? Ia manau. Manau karana dainai, haroro gaukara ai sibona ia henia  ma haida ia durua totona. Ma haida dekenai Dirava ena Basileia sivarai namona harorolaia gaukarana ia atoa guna. (Mar. 1:38; 13:10) Iesu ese Dirava ena Hereva ia laloa bada. (Ioa. 7:16; 8:28) Ia ese hanaihanai Toretore Helagadia ia stadilaia, unai dala amo siri maorodia ia gwauraia, bona ma haida vairanai edia anina ia herevalaia bona hahedinaraia goevagoeva. Bema ita manau, ita haroro bona sibona eda stadi ita karaia goadagoada, Keriso ena laloa dalana do ita abia.

18. Edena dala badana ai Iehova ena gaukara ita durua diba?

¹⁸ Eda heduru: Iehova ena ura be ‘guba bona tanobada ai idia noho taudia ibounai be Iesu ena ladanai do idia tui diho.’ (Fili. 2:9-11) Ena be Iesu be dagi bada ia abia, to gabeai mai manau ida Tamana ena ura do ia badinaia. Ita danu be unai ita karaia be namo. (1 Kor. 15:28) Edena dala ai? Namona be mai eda kudouna ibounai ida “bese ibounai taudia be hahediba taudia ai [ita] halaoa” ena hahegani ita badinaia. (Mat. 28:19) Danu, “taunimanima ibounai [iseda neiba taudia bona tadikaka taihu] dekenai kara namo ita karaia” be namo.—Gal. 6:10.

19. Namona be eda lalona ita hadaia, dahaka ita karaia totona?

¹⁹ Ita moale badina Iehova ese ita ia hadibaia loulou, ‘guba gaudia sibona ita laloa noho’ totona! Unai dainai, namona be “iseda vairanai ia noho heau helulu lalonai do ita heau mai haheauka ida.” (Heb. 12:1) Namona be ‘mai eda kudouna bona goada ibounai ida gaukara do ita karaia Iehova totona,’ bona iseda guba Tamana ese iseda hekwarahi do ia hanamoa.—Kol. 3:23, 24.