TADIKAKA Choong Keon bona ena adavana Julie edia mauri lagani be 35 bamona, be lagani 5 gunanai Sydney, Australia ai regula painia gaukara idia karaia. Choong Keon ia gwau: “Ai be pat-taim moni gaukara ai karaia bona mauri namona ai noholaia. Ai noho gabuna ena weda be namo bona emai mauri ai moalelaia. Emai famili bona turadia edia hebamo ai moalelaia.” To, Choong Keon bona Julie be idia moale momokani lasi. Dahaka dainai? Idia hegeregere Iehova totona edia hesiai gaukara idia habadaia diba, to idia ura lasi edia mauri dalana idia haidaua.

To, lagani 2009 ena distrik hebouhebou ai idia kamonai tok ta ese edia kudouna ia hamarerea. Tok ia henia tadikaka ese helai taudia ia hagoadaia edia haroro gaukara idia habadaia totona. Ia gwau: “Mani inai haheitalai oi laloa: Motuka taria tauna be lauri o idiba kahana dekenai ia lao totona, motuka ia heau noho be namo. Unai hegeregerena, Iesu be ita ia hakaua diba iseda hesiai gaukara ita habadaia totona, bema ita hekwarahi bona ita gaukara goada noho.” * Idia mamia tadikaka be idia ia hereva henia bamona. Unai hebouhebou ai Taiwan dekenai misinari gaukara idia karaia tadikaka ta bona ena adavana idia intaviu henia. Haroro gaukara idia moalelaia ena sivarai idia gwauraia, bona idia gwau pablisa momo idia lao be namo. Unai negai danu, Choong Keon bona Julie idia mamia unai tadikaka be idia ia hereva henia bamona.

Julie ia gwau: “Hebouhebou murinai, Iehova ai guriguri henia goada do ia henia Taiwan do ai lao ena abia hidi ai karaia totona.” Ma ia gwau: “To ai gari. Ai mamia ai be hegeregere nega ginigunana nahu gabuna ena dobu kahana dekenai ai paudobi bamona.” Hadibaia Tauna 11:4 (BHḡ) ese idia ia durua abia hidi idia karaia totona. Ia gwau: “Lai ia naria noho tauna be uhe do ia hadoa lasi. Bona ori koremana ia itaia noho tauna be uma ena anina do ia gogoa lasi.” Choong Keon ia gwau: “Emai lalona ai  hadaia do ai ‘naria bona itaia noho’ lasi, to ‘hadoa bona gogoa’ gaukara do ai hamatamaia.” Idia guriguri loulou, misinari taudia edia mauri sivaraidia idia duahia, Taiwan idia lao vadaeni taudia dekenai e-mail idia torea, edia motuka bona ruma kohudia idia hoihoilaia, bona hua toi murinai Taiwan idia lao.

Tadikaka taihu 100 mai kahana be tano idauidau amo idia lao Taiwan dekenai pablisa be momo lasi gabudia ai idia haroro totona. Idia be Australia, Britain, Canada, France, Japan, Korea, Spain, bona United States amo idia mai, bona edia mauri lagani be 21 ia lao 73. Idia huanai singul taihu ibounai be 50. Dahaka ese unai tadikaka taihu goadadia ia durua tano idauna ai idia haroro totona? Mani edia sivarai ita duahia.

Singul taihu ta ladana Laura be Canada amo ia mai, bona Taiwan ena west kahana ai ia painia. To, lagani 10 gunanai, ia be haroro gaukara ia ura henia lasi. Ia gwau: “Lau haroro momo lasi dainai, haroro gaukara lau manadalaia lasi.” Bena ena turadia haida ese ia idia noia hua ta do idia lao Mexico dekenai idia haroro totona. Laura ia gwau: “Unai be egu nega ginigunana hora momo lalonai haroro gaukara lau karaia, bona lau hoa badina lau moalelaia bada!”

Unai ekspiriens namona ese Laura ena lalona ia veria Canada ai idau gado kongrigeisen ta ia bamoa totona. Ia be China gado dibaia ena klas ta dekenai ia lao, China gado grup ta ia bamoa bona abia hidi ia karaia Taiwan dekenai do ia lao. Bena, September 2008 ai ena tahua gauna ia guguru. Laura ia gwau: “Lagani tamona lalonai lau hekwarahi Taiwan taudia edia mauri dalana lau manadalaia totona, to hari lau ura lasi Canada dekenai do lau giroa.” Hari ia ese haroro gaukara be edena bamona ia laloa? Ia gwau: “Lau moalelaia bada. Baibel stadi taudia be Iehova idia dibaia bona edia mauri idia haidaua karana ese lau ia hamoalea. Taiwan ai lau painia dainai, nega momo unai moale korikorina lau mamia.”

Lagani 8 gunanai Brian bona Michelle, edia mauri lagani be 35 bamona be United States amo Taiwan  dekenai idia lao. To matamanai, idia mamia idia be edia haroro gaukara ai gau namona ta idia havaraia lasi. To lagani momo lalonai misinari gaukara ia karaia tadikaka ta ese idia ia hamaoroa: “Ena be oi ese tau ta dekenai pepapepa ta sibona oi henia, to namona be oi laloatao reana unai be unai tau ena nega ginigunana Iehova ena hereva ia duahia. Unai dainai, oi be gaukara badana oi karaia noho!” Unai hagoadaia herevana ese Brian bona Michelle ia durua idia lalomanoka lasi totona. Tadikaka ma ta ese idia ia hamaoroa: “Namona be hebouhebou ta ia lao hebouhebou ma ta murinai do umui sekea bema China gado umui herevalaia dalana be ia namo ia lao eiava lasi. Namo lasi dina ta ta unai umui karaia, badina do umui lalomanoka garina.” Hari idia be China gado idia diba namonamo bona painia taudia namodia ai idia lao.

Dahaka ese oi ia durua diba gado idauna oi dibaia totona? Namona be oi ura painia gaukara do oi karaia tanona oi vadivadi henia. Keristani heboudia dekenai oi lao, tadikaka taihu oi bamodia bona haroro gaukara ai idia ida oi gaukara hebou. Brian ia gwau: “Oi itaia momo be Basileia ena sivarai namona idia abia dae bona tadikaka taihu edia lalokau karana oi mamia neganai, do oi ura idau tano ai painia gaukara oi karaia.”

Taiwan ena pablisa be momo lasi gabudia ai painia gaukara idia karaia taudia be sibodia naria totona ma haida dekenai English gado idia hadibaia. To, Kristin bona Michelle be gwarume idia hoihoilaia. Kristin ia gwau: “Guna, unai bamona gaukara lau karaia lasi, to unai gaukara ese lau ia durua inai tano dekenai lau noho totona.” Kristin be hanaihanai ia amo gwarume idia hoia kastoma haida ia davaria. Unai pat-taim gaukara amo ia davaria monina ese Kristin bona ena adavana ia durua, unai amo edia nega bada be gaukara badana​—⁠painia gaukara, taunimanima haoda henia gaukarana idia karaia totona.

Lagani 7 gunanai United States amo tadikaka ta ladana, William bona ena adavana Jennifer be Taiwan dekenai idia lao. William ia gwau: “China gado ai dibaia, painia gaukara ai karaia, kongrigeisen ai durua bona pat-taim gaukara ai karaia dainai, nega haida emai tauanina ia hesiku.” Dahaka ese ia durudia idia kwalimu bona idia moale noho totona? Idia ese idia hagugurua diba tahua gaudia idia atoa. Idia diba China gado idia dibaia haraga be auka, unai dainai China gado idia diba haraga lasi neganai, idia lalomanoka lasi.

William ia laloatao guna sekit naria tauna ta ese ia hamaoroa: “Unai tano ena mauri dalana oi moalelaia sibona lasi, to emu hesiai gaukara oi moalelaia danu.” Anina be, tahua gauna ta ita atoa neganai, namona be mai moale ida do ita gaukara goada ita hagugurua totona. William ia gwau, ia bona ena adavana be unai hagoadaia herevana idia badinaia karana ese idia durua edia lalohadai idia haidaua, unai gabu ena elda taudia edia sisiba idia kamonai, bona edia kara haida idia haidaua unai amo unuseniai edia hesiai gaukara idia moalelaia diba. Ma ia gwau: “Danu, nega ai atoa emai teritori ai idia noho tubutubu gaudia ai moalelaia totona.”

William bona Jennifer bamona, Megan, United States amo ia mai singul painia taihu ta danu be ena ‘hesiai gaukara ia moalelaia noho.’ To danu, ia gaukara goada China gado do ia dibaia bona herevalaia namonamo totona. Wikeni ibounai, ia be pablisa haida ia bamoa bona Kaohsiung, Taiwan ena sisima atoa gabuna badana dekenai idia lao haroro totona. Megan be Bangladesh, India, Indonesia, Philippines, Thailand, bona Vanuatu amo idia mai haoda taudia momo ia haroro henidia vadaeni. Ia gwau: “Unai haoda taudia be idia noho daudau lasi dainai, maoromaoro idia ida Baibel stadi ai hamatamaia. Idia ibounai lau haroro henia totona, lau ese idia foa o faiv be  nega tamona lau stadi henia.” Ia be China gado ia manadalaia, a? Ia gwau: “Lau ura China gado do lau diba haraga, to tadikaka ta ena hereva lau laloatao, ia gwau, ‘Oi hekwarahi noho, bona Iehova ese oi do ia hanamoa.’”

Cathy be Britain amo, bona idau tano ta dekenai ia do lao lasi lalonai, tahua gaukara ia karaia edena tano be hegeregere singul taihu totona. Ia ese ena lalohekwarahi gaudia be guriguri amo Iehova dekenai ia herevalaia, bona brens ofesi haida ia tore henia bona ia henanadai, bema singul taihu be unuseni idia lao diba. Unai murinai, ia ese brens ofesi ta ta edia haere ia laloa namonamo, bena ia abia hidi Taiwan be gabu maorona ena hesiai gaukara ia karaia totona.

Lagani 2004 ai, Cathy ena mauri lagani be 31 neganai, Taiwan dekenai ia lao, bona kohu momo lasi maurina ia noholaia. Ia gwau: “Lau ese tadikaka taihu lau noia davana maragi ai au huahua bona uma aniani idia hoihoilaia gabudia be lau dekenai do idia hadibaia. Edia heduru namona ese lau ia durua egu moni lau haorea haraga lasi totona.” Dahaka ese Cathy ia durua kohu momo lasi maurina ia noholaia totona? Ia gwau: “Nega momo Iehova lau guriguri henia, lau do ia durua unai amo lau abia dae lau dekenai idia noho aniani bona dabua be hegeregere. Bona lau mamia Ia ese egu guriguri ia haerelaia, badina lau ia hadibaia edena gaudia be mai anina bada bona ena be egu ura gaudia haida lau reaia to do lau moale noho.” Ma ia gwau: “Lau ese kohu momo lasi maurina lau moalelaia, badina unai ese lau ia durua egu hetura karana Iehova ida lau hagoadaia totona.”

Unai sibona lasi, to Cathy be ena painia gaukarana ia moalelaia danu. Ia gwau: “Teritori ai lau haroro neganai, momo be sivarai namona idia abia dae. Unai ese lau ia hamoalea bada!” Cathy be Taiwan dekenai ia ginidae neganai, ia noho siti dekenai China gado kongrigeisen be rua sibona, to hari kongrigeisen seven idia noho. Ia gwau: “Lau itaia momo be sivarai namona idia abia dae bona idia momo lau durua dainai egu dina ta ta maurina lau moalelaia bada!”

Matamanai ita herevalaia taudia, Choong Keon bona Julie be edena bamona? Matamanai, Choong Keon ia laloa China gado ia diba namonamo lasi dainai, kongrigeisen lalonai ia be anina lasi. To, kongrigeisen tadikaka taihu be unai bamona idia laloa lasi. Choong Keon ia gwau: “Emai kongrigeisen idia hapararaia neganai, lau be hesiai tauna dainai lau dekenai maduna ma haida idia henia.” Mai kiri ida ia gwau: “Unai neganai lau mamia momokani, lau be pablisa be momo lasi gabuna dekenai lau noho. Lau moale badina lau mamia kongrigeisen taudia ese egu heduru idia laloa bada!” Hari, ia be elda gaukara ia karaia noho. Julie ia gwau: “Ai mamia gau momo ai hagugurua vadaeni, bona emai moale be guna bamona lasi. Ma haida ai durua totona ai mai, to ai mamia iniseni ai davaria ekspiriens idauidau ese ai idia durua bada. Iehova ai tanikiu henia badina dala ia kehoa iniseniai hesiai gaukara ai karaia totona!”

Tano momo ai, gogoa gaukara durua taudia be momo lasi. Oi be kahirakahira emu sikuli do oi haorea bona oi diba lasi emu mauri lalonai dahaka do oi karaia, a? Oi be singul bona oi ura Iehova ena orea lalonai gaukara namona oi karaia, a? Oi ura emu famili Iehova hesiai henia gaukara lalonai memori namodia do idia laloatao, a? Bema oi be oi ritaea, vadaeni emu ekspiriens be bada dainai ma haida oi durua diba, a? Laloatao, bema emu lalona oi hadaia emu hesiai gaukara do oi habadaia, bona pablisa be momo lasi gabudia dekenai oi lao, Iehova amo hahenamo momo do oi davaria.