1, 2. (a) Iehova ia ura iena taunimanima be edena bamona kara do idia hahedinaraia? (b) Inai stadi ai, edena henanadai do ita herevalaidia?

 LAUMA HELAGA ese aposetolo Petero ia hasiahua dainai, ia ese Levitiko bukana ena siri haida ia herevalaia. Ia gwau idaunegai Israela taudia bamona, hari Keristani taudia danu idia helaga be mai anina bada. (1 Petero 1:14-16 duahia.) “Helaga Tauna,” Iehova ia ura horoa taudia bona “mamoe ma haida” do idia gaukara goada, edia kara ibounai lalonai idia helaga totona.—Ioa. 10:16.

² Inai stadi lalonai Levitiko bukana ena hereva namodia ma haida do ita stadilaia. Ita dibaia gaudia ese ita do idia durua helaga karadia ita hahedinaraia totona. Inai bamona henanadai haida do ita laloa: Dahaka dainai hahetoho negadiai gini goada karana be mai anina bada? Iehova ena lohia siahuna ita abia isi totona, Levitiko bukana ese ita dekenai dahaka ia hadibaia? Guna, Israela taudia ese idia karaia animal bouboulaia karana amo dahaka ita dibaia?

3, 4. (a) Dahaka dainai Dirava ena taravatu bona hakaua herevadia ita badinaia be gau badana? (b) Dahaka dainai ta ena dika davana do ita haloua lasi o ita badu henia noho lasi be namo?

³ Bema ita ura Iehova ita hamoalea, gau badana be iena taravatu bona hakaua herevadia ita badinaia. Danu, namo lasi helaga karana ita dadaraia o iena taravatu ita utua. Ena be ita be Mose ena Taravatu henunai lasi, to ena taravatu ese ita ia hadibaia  Dirava be edena kara ia abia dae bona edena kara ia dadaraia. Hegeregere, Israela taudia ia oda henidia: “Kara dika ena davana do umui haloua lasi, bona unai tau do umui badu henia noho lasi. To emui badibadinai tauna do umui lalokau henia, umui sibona umui lalokau henia hegeregerena. Lau inai Lohiabada, emui Dirava.”—Lev. 19:18.

⁴ Iehova ia ura ta ena dika davana do ita haloua lasi, o ita badu henia noho lasi. (Roma 12:19) Bema Dirava ena taravatu bona hakaua herevadia ita dadaraia, ita be Iehova ena ladana ita hadikaia unai, bona Diabolo be do ia moale bada. Ena be ta be mai ena ura ida ita ia kara dika henia, to namo lasi ita ese ia ita badu henia noho. Baibel ia gwau ita be “hodu” ta bamona, bona unai hodu lalonai be dava bada gauna ta ia noho. Unai dava bada gauna be iseda hesiai gaukara. (2 Kor. 4:1, 7) Ita ura lasi badu, poisini bamona muramura, be iseda lalona ai ia noho.

5. Arona bona ena natudia Nadaba bona Abihu edia sivarai amo dahaka ita dibaia? (Laulau ginigunana itaia.)

⁵ Levitiko 10:1-11 ese Arona ena bese lalonai ia vara lalohisihisi gauna ta ia sivarailaia. Lahi be guba amo ia diho haraga, bona palai dubuna ai Nadaba bona Abihu ia araia mase neganai, reana edia varavara idia lalohisihisi bada. Dirava ese Arona bona ena bese taudia ia taravatudia Nadaba bona Abihu totona do idia taitai lasi. Unai ese edia abidadama ia tohoa! Emu ruma bese tauna ta eiava tadikaka o taihu ta be orea amo idia atoa siri neganai, helaga karana oi badinaia dainai idia oi bamoa lasi, a?—1 Korinto 5:11 duahia.

6, 7. (a) Bema Witnes lasi varavara ta ese oi ia boiria iena headava do oi lao, dahaka point oi laloa be namo? (Futnout itaia.) (b) Oi lao lasi ena badina be edena bamona do oi gwauraia hedinarai?

⁶ Reana ita be Arona bona ena famili ese idia davaria hahetoho do ita davaria lasi. To, dahaka do oi karaia bema emu Witnes lasi varavara ta ese oi ia boiria iena headava dekenai ia badinai do oi gini, bona unai headava be edia dubu dekenai do idia karaia? Baibel ese unai headava dekenai do ita lao karana ia taravatua lasi, to abia hidi ita karaia totona Baibel ena hakaua herevadia ita badinaia diba. a

⁷ Unai bamona negadiai, ita ura Iehova ena hakaua herevadia ita badinaia bona ita helaga dainai, reana iseda Witnes lasi varavara be iseda kara dekenai do idia lalohisihisi. (1 Pet. 4:3, 4) Momokani, ita ura lasi edia lalona do ita hahisia, to mai hemataurai ida ita hereva henidia be namo. Reana nega bada ia do noho lalonai ita hadibadia diba. Namona be idia ita tanikiu henia bona ita gwau ita moale badina ita idia noia edia headava dinana ai edia badinai ita gini totona. Bena ita gwau, edia headava do ita lao lasi, badina ita ura lasi edia dubu lalonai idia karaia tomadiho karadia do ita karaia, bona ita ura lasi idia bona edia varavara idia lalohisihisi. Unai dala amo Baibel ena hakaua herevadia ita badinaia bona eda abidadama dekenai do ita gini goada.

8. Edena dala ai Levitiko bukana ese Iehova ena lohia siahuna ia herevalaia?

⁸ Levitiko bukana ese Iehova ena lohia siahuna ia herevalaia momo. Baibel ese nega 30 bamona ia hahedinaraia, Levitiko bukana ai idia noho taravatu ibounai be Iehova amo idia mai. Mose be unai ia diba dainai, Iehova ese ia oda henia gaudia ibounai ia karaia. (Lev. 8:4, 5) Unai hegeregerena, hanaihanai ita ese iseda Lohiabada, Iehova ena ura gaudia ita karaia be namo. Unai ita karaia totona, Dirava ena orea ese ita do ia durua. To nega haida, ita be sibona ita noho neganai, gau haida ese eda abidadama idia tohoa diba—tano gagaena ai Iesu dekenai ia vara bamona. (Luka 4:1-13) Bema ita be Dirava ena lohia siahuna ita abia isi bona ia ita abidadama henia, tau ta ese ita do ia dibagania lasi Dirava ena taravatu ita utua totona,  bona taunimanima dekenai do ita gari lasi.—Aon. 29:25.

9. Dahaka dainai bese idauidau ese Dirava ena taunimanima idia dagedage henia?

⁹ Ita be Keriso murinai ita raka bona Iehova ena Witnes taudia dainai, tanobada hegegemadai bese idauidau ese ita idia dagedage henia. To, ita diba unai do ia vara badina Iesu ese ena hahediba taudia ia hamaoroa: “Taunimanima ese umui do idia dagedage henia, umui do idia alaia mase, bona egu ladana dainai bese ibounai ese umui do idia inai henia.” (Mat. 24:9) To, ena be dagedage ita davaria, Basileia harorolaia gaukarana ita karaia noho bona Iehova vairanai ita helaga noho. Ena be ita be kara momokani taudia, tauanina dalanai ita goeva bona gavamani edia taravatu ita badinaia, to dahaka dainai taunimanima ese ita idia dagedage henia bada? (Roma 13:1-7) Badina ita abia dae Iehova sibona be iseda Siahu Ibounai Lohiabada! “Ia sibona” ena hesiai gaukara helagana ita karaia, bona iena kara maoromaoro taravatudia bona hakaua herevadia do ita dadaraia lasi.—Mat. 4:10.

10. Tadikaka ta be ena gini siri karana ia dadaraia neganai, dahaka ia vara?

¹⁰ Danu, ita be “tanobada ena lasi.” Unai dainai, tanobada ena tuari bona politikol karadia amo ita gini siri. (Ioane 15:18-21; Isaia 2:4 duahia.) Dirava dekenai idia gwauhamata taudia haida be edia gini siri karana idia dadaraia. Unai taudia momo be idia helaro-kerehai bona eda hebogahisi guba Tamana idia tura henia lou. (Sal. 51:17) To, haida be idia helaro-kerehai lasi. Hegeregere, Tanobada Tuarina Iharuana lalonai, Hungary ai tadikaka momo be dibura ruma ai idia atodia. Bena ami taudia ese iseda tadikaka 160, edia mauri be 45 henunai, be taoni ta ai idia haboudia, bona idia doria ami lalonai idia vareai totona. Unai abidadama tadikaka be gini siri karana idia badinaia, to idia huanai nain be gwauhamata idia karaia ami do idia vareai bona tuari iunifom idia abia. Lagani rua murinai, gini siri karana ia dadaraia tauna ta be idia abia hidi Witnes taudia do idia pididia mase totona. To, ia itaia iena kakana korikorina be unai abidadama Witnes taudia huanai ia noho neganai, ia gari bona ia heudeheude! To, ami taudia ese unai Witnes taudia idia pididia mase lasi.

11, 12. Idaunegai Israela taudia ese idia henia boubou gaudia amo dahaka ita dibaia?

¹¹ Mose ena Taravatu hegeregerena, Israela taudia be boubou gaudia idauidau idia henia diba. (Lev. 9:1-4, 15-21) Idia henia boubou gaudia be bero o toto gaudia lasi, badina idia ese Iesu ena boubou gauna goevadaena idia laulaulaia. Unai sibona lasi, to unai boubou gaudia ta ta karaia daladia be idauidau. Hegeregere, natuna matamatana ia havaraia sina ta ese do ia karaia boubou gauna mani ita laloa. Levitiko 12:6 ia gwau: “Iena mero o kekeni dainai do ia goeva totona ia naria dinadia idia ore neganai, hahine be hahelagaia tauna dekenai do ia lao. Hahine ese Lohiabada ena Palai Dubu ena iduara dekenai mamoe natuna, lagani tamona gauna, iena gabua ore boubouna, bona pune ta o manu ta ladana kerea ta, iena kara dika boubouna, do ia mailaia. Unai gau ruaosi be hahelagaia tauna ese do ia abia.” Dirava ia ura boubou gaudia idauidau do idia henia, to Taravatu lalonai iena lalokau karana ia hahedinaraia danu. Bema sina ta dekenai mamoe be lasi, ia ese kerea manu rua o pune maragidia rua ia bouboulaia diba. (Lev. 12:8) Iehova ese dava bada boubou gauna ia henia tauna ia lalokau henia bona laloa bada hegeregerena, unai ogogami hahine danu ia lalokau henia bona laloa bada. Unai siri amo dahaka ita dibaia?

¹² Aposetolo Paulo ese Keristani taudia ia hagoadaia ‘Dirava do idia hanamoa’ boubou gauna do idia henia. (Heb. 13:15) Iseda udu bibina amo Iehova ena ladana helagana do  ita harorolaia be namo. Taia kudima tadikaka taihu be saini gado amo Dirava idia hanamoa. Gorere dainai ruma sibona ai idia noho tadikaka taihu be revareva idia torea, telefon amo idia haroro, o vadivadi taudia idia haroro henidia. Ena be ma haida dekenai Iehova ena ladana ita hadibaia bona sivarai namona ita harorolaia karana be iseda goada bona diba hegeregerena ai ita karaia diba, to boubou gauna namona ita henia be gau badana.—Roma 12:1; 2 Tim. 2:15.

13. Dahaka dainai eda haroro gaukara ena ripoti ita henia be namo?

¹³ Iehova ita lalokau henia dainai, mai iseda ura ida iena ladana ita hanamoa. (Mat. 22:37, 38) To, ita idia noia hua ta ta ai eda haroro gaukara do ita ripotilaia neganai, eda lalohadai be dahaka? Ripoti ita henia be Dirava badinaia karana ta. (2 Pet. 1:7) To, namo lasi ita haroro ena badina badana be ita ura hora momo do ita ripotilaia. Unai be maoro lasi, badina buruka o gorere dainai ia raka diba lasi pablisa be miniti 15 ia ripotilaia diba. Iehova ia diba unai pablisa be Ia ia lalokau henia bona Ia hesiai henia ena hahenamo ia laloa bada. Unai dainai, ena be miniti haida sibona ia ripotilaia, to Iehova ese ia abia dae. Israela taudia haida be idia ogogami dainai dava maragi boubou gaudia idia henia hegeregerena, Iehova ena hesiai taudia haida be gorere o hekwakwanai ma haida dainai miniti haida sibona idia haroro, bona unai idia ripotilaia diba. Ita henia ripoti be tanobada hegegemadai ena ripoti ida idia haboua, bona unai ese eda orea ia durua vaira nega ena haroro gaukara totona palani idia karaia diba. Unai dainai, eda haroro gaukara ena ripoti ita henia be namo.

14. Dahaka dainai eda Baibel stadilaia karana ita tahua namonamo be namo?

¹⁴ Levitiko bukana ena hereva namodia haida oi laloa murinai, reana oi gwau, ‘Hari lau laloparara dahaka dainai Levitiko bukana be Dirava ena lauma amo idia torea bukana ena kahana ta.’ (2 Tim. 3:16) Emu lalona oi hadaia oi helaga totona, a? Iehova ia ura mai iseda kudouna ibounai ida ia do ita hesiai henia, bona ia dekenai iseda boubou gauna namona ita henia be maoro. Reana inai atikol rua lalonai Levitiko bukana amo oi dibaia gaudia ese emu lalona idia veria, Baibel ibounai oi stadilaia namonamo totona. (Aonega Herevadia 2:1-5 duahia.) Namona be sibona emu stadi oi karaia dalana oi tahua namonamo. Sibona oi nanadaia: ‘Lau be Iehova dekenai boubou gauna goevana lau henia, a? Eiava televisen raraia karana, vidio gadara bona spot gadara o lau ura karaia gaudia ma haida ese lo Keristani tauna ai lau lao dalana idia koua, a?’ Bema unai ia vara, Heberu bukana lalonai aposetolo Paulo ena hereva haida oi laloa dobu karana ese oi do ia durua.

15, 16. Dahaka dainai Paulo be Heberu tadikaka ia sisiba henidia?

¹⁵ Paulo be Heberu tadikaka ia tore henidia neganai ia sisiba henidia. (Heberu 5:7, 11-14 duahia.) Ia gwau idia be ‘kamonai karana dekenai idia haraga lasi,’ anina be idia laloparara haraga lasi. Dahaka dainai Paulo be unai bamona ia sisiba henidia? Ia ese unai Keristani taudia dekenai Iehova ena lalokau karana ia hahedinaraia, badina idia be  lauma ena “rata” idia do inua noho. Keristani tomadiho ena hahediba hereva badadia ita diba be namo. To, lo Keristani taudia ai ita lao totona, “aniani korikorina” ita abia be mai anina bada.

¹⁶ Heberu tadikaka be idia goada lasi ma haida idia hadibaia totona, to ta ese idia ia hadibaia noho. Dahaka dainai? Badina idia ese “aniani korikorina” idia dadaraia. Sibona oi nanadaia: ‘Lau be Baibel ena hereva dobudia lau laloa bada, a? Edia anina lau lalopararalaia, a? Eiava guriguri bona sibona egu stadi karana lau dadaraia, a? Bema unai ia vara, reana stadi sediual namona lau karaia lasi, a?’ Taunimanima do ita haroro henidia sibona lasi, to idia do ita hadibaia bona hahediba taudia ai do ita halaodia be namo.—Mat. 28:19, 20.

17, 18. (a) Dahaka dainai lauma “aniani korikorina” ita abia hanaihanai be gau badana? (b) Keristani heboudia ita do lao lasi neganai, kekero muramura inua karana dekenai lalohadai maorona be dahaka?

¹⁷ Reana ita momo dekenai Baibel stadilaia karana be auka. Iehova be ita ia doria lasi Baibel ita stadilaia totona. To, herevana ita be lagani momo lalonai o hari sibona Dirava ita hesiai henia, gau badana be lauma “aniani korikorina” do ita abia noho. Unai bamona ita karaia be gau badana, bema ita ura helaga karadia ita hahedinaraia noho.

¹⁸ Ita helaga totona, namona be Baibel do ita stadilaia namonamo bona Dirava ese ita dekenai ia hadibaia gaudia ita badinaia. Mani Arona ena natudia Nadaba bona Abihu oi laloa. Idia mase badina Dirava vairanai idia atoa lahi be “Lohiabada ena oda gauna hegeregerena lasi.” Danu, unai idia karaia neganai, reana idia be idia kekero. (Lev. 10:1, 2) Mani ita itaia Dirava ese Arona dekenai dahaka ia hereva. (Levitiko 10:8-11 duahia.) Unai sivarai ena anina be Keristani hebouna ita do lao lasi neganai, kekero muramura do ita inua lasi, a? Mani inai point oi laloa: Ita be Mose ena Taravatu henunai ita noho lasi. (Roma 10:4) Tano haida ai, iseda tadikaka taihu haida ese kekero muramura sisina be edia aniani ida idia inua, bena Keristani heboudia dekenai idia lao. Danu, Pasova idia karaia neganai, wain kapusi foa idia gaukaralaia. Iesu be Lohiabada ena Anibou ia hamatamaia neganai, iena aposetolo taudia ia hamaoroa wain do idia inua, unai be iena rara ia laulaulaia. (Mat. 26:27) To, Baibel ese “inuinu kekero” karana ia taravatua. (1 Kor. 6:10; 1 Tim. 3:8) Bona Keristani taudia momo be edia lalomamina ese ia biagua dainai, hesiai gaukara idauidau idia karaia gwauraia neganai, kekero muramura idia inua lasi. To, tano ta ta edia mauri daladia be idauidau, bona mai anina bada gauna be Keristani tauna ese ‘gau helagadia edia idau bona gau kavakava edia idau ia laloa namonamo.’ Unai amo do ia karaia karana be do ia helaga bona Dirava do ia hamoalea.

19. (a) Edena dala ai eda ruma bese ena tomadiho bona sibona eda stadi ita moalelaia diba? (b) Edena dala ai do oi hahedinaraia helaga karadia oi karaia noho?

¹⁹ Bema Baibel oi stadilaia goadagoada, hereva namodia momo do oi dibaia. Orea ese ia halasia tulu idauidau oi gaukaralaia diba, emu ruma bese ena tomadiho bona sibona emu stadi karana oi hanamoa totona. Iehova oi diba bona iena ura dekenai emu diba oi habadaia noho. Ia kahirakahira oi lao. (Iam. 4:8) Salamo torea tauna bamona, Dirava oi guriguri henia: “Lauegu matana do oi kehoa, vadaeni oiemu taravatu dekenai hoa gaudia do lau itaia namonamo.” (Sal. 119:18) Hahetoho negadiai, Baibel ena taravatu bona hakaua herevadia oi utua lasi. Mai emu ura ida “Helaga Tauna,” Iehova, ena taravatu oi badinaia bona “Dirava ena sivarai namona harorolaia gaukarana [oi] karaia” goadagoada. (1 Pet. 1:15; Roma 15:16) Inai nega dokona dikana lalonai, namona be helaga karadia oi karaia. Oibe, namona be ita ibounai ese helaga karadia do ita karaia bona iseda helaga Diravana, Iehova, ena lohia siahuna do ita abia isi.