1, 2. (a) Tomadiho gunalaia taudia idia ura dahaka idia diba, bona Petero be edena bamona ia haere? (Laulau ginigunana itaia.) (b) Dahaka dainai Petero ia gari lasi?

 IESU ia mase bona dina haida murinai, aposetolo Petero be tatau haida ese idia dagedage henia. Idia be Iesu ena mase dalana idia karaia Iuda tomadiho gunalaia taudia. Idia badu badina Petero ese ia raka diba lasi tauna ta ia hanamoa, bona idia ura diba daika ena siahu bona daika ena ladana amo Petero be unai ia karaia. Petero be mai gari lasi ida ia haere: “Nasareta tauna Iesu Keriso, au dekenai umui kokoa kau to Dirava ese mase amo ia hatorea isi lou tauna, ena ladanai inai tauna ia namo bona umui vairanai ia gini.”—Kara 4:5-10.

² Dina haida gunanai, Petero be ia gari dainai nega toi Iesu ia gorea. (Mar. 14:66-72) To hari, dahaka dainai ia be unai tomadiho gunalaia taudia vairadiai ia gari lasi? Lauma helaga ese Petero ia durua. To danu, ia gari lasi badina ia abidadama momokani Iesu be ia toreisi lou vadaeni. Dahaka ese Petero ia durua dainai unai ia abia dae? Dahaka dainai ita danu be unai ita abia dae diba?

3, 4. (a) Aposetolo taudia be idia do vara lasi neganai, edena toreisi lou karadia idia vara? (b) Iesu be daidia ia hatoredia isi lou?

³ Iesu ena aposetolo taudia idia abia dae mase taudia idia toreisi  lou diba, badina guna unai bamona ia vara. Idia diba Dirava ese peroveta taudia Elia bona Elisaia dekenai siahu ia henia unai bamona hoa karadia idia karaia totona. (1 Kin. 17:17-24; 2 Kin. 4:32-37) Danu, mase tauna ta ena tauanina be guri lalonai idia negea bona Elisaia ena turia dekenai ia kamokau neganai, unai tauna be ia mauri lou. (2 Kin. 13:20, 21) Keristani ginigunadia be unai Baibel sivaraidia idia abia dae hegeregerena, ita danu ita abia dae Dirava ena Hereva be momokani.

⁴ Reana, ita ibounai be Iesu ese ia karaia toreisi lou edia sivarai ita duahia neganai, iseda kudouna idia hamarerea. Hegeregere, vabu ta ia hoa bada badina Iesu ese ena natuna tamona ia hatorea isi lou. (Luka 7:11-15) Ma nega ta, Iesu ese mauri lagani 12 kekenina ta ia hatorea isi lou. Iena tama sina idia lalohisihisi bada to ia toreisi lou neganai, idia hoa bona moale bada! (Luka 8:49-56) Bona Lasaro be guria gabuna amo ia toreisi lou bona ia raka-lasi neganai, unai idia itaia taudia ibounai idia hoa bada!—Ioa. 11:38-44.

5. Edena dala ai Iesu ena toreisi lou karana be guna idia vara toreisi lou karadia amo ia idau momokani?

⁵ Aposetolo taudia idia diba Iesu ena toreisi lou karana be guna idia vara toreisi lou karadia amo ia idau. Guna idia toreisi lou taudia be tanobada tauanina idia abia dainai, gabeai idia mase lou. To, Iesu be bodaga lou diba lasi lauma tauanina ai Dirava ese ia hatorea isi lou. (Kara 13:34 duahia.) Petero ia gwau, Iesu be “tauanina ai idia hamasea, to lauma tauanina ai ia toreisi lou.” Danu, “ia be guba dekenai ia daekau bona hari Dirava ena idibana kahanai ia helai bona aneru bona siahu taudia ibounai be ia henunai idia noho.” (1 Pet. 3:18-22) Guna idia vara toreisi lou karadia be hoa karadia, to Iesu ena toreisi lou karana be idia amo ia idau momokani.

6. Iesu ena toreisi lou karana ese edena dala ai aposetolo taudia edia mauri ia haidaua?

⁶ Iesu ena toreisi lou karana ese ena aposetolo taudia edia mauri ia haidaua. Ena be iena inai taudia idia laloa ia mase noho, to Iesu be ia mauri lou vadaeni. Iesu be lauma tauanina goadana ia abia dainai, taunimanima ta ese ia hamasea diba lasi. Iesu ena toreisi lou karana ese ia hamomokania ia be Dirava ena Natuna, bona hahediba taudia be unai idia diba dainai edia lalohisihisi ia ore bona idia moale bada. Unai sibona lasi, to unai ese lalogoada ia henidia danu. Badina bema Iesu ia toreisi lou lasi, Dirava ena ura ia hagugurua diba lasi bona idia harorolaia sivarai namona be anina lasi.

7. Hari, Iesu be dahaka gaukara ia karaia noho, bona edena henanadai idia vara?

⁷ Ita Iehova ena Witnes taudia ita diba Iesu be tau hereadaena ta sibona lasi. Ia be hari ia mauri noho bona tanobada hegegemadai idia karaia gaukarana ta ia gunalaia noho. Iesu Keriso be Dirava ena guba Basileia ena King dainai, kahirakahira ia ese kara dika taudia do ia kokia bona tanobada be paradaiso ai do ia halaoa. Unuseniai taunimanima do idia noho ela bona hanaihanai. (Luka 23:43) Bema Iesu be ia toreisi lou lasi, unai gaudia ibounai do idia vara lasi. Vadaeni, dahaka gaudia dainai ita abia dae momokani ia be mase amo ia toreisi lou? Ita dekenai iena toreisi lou ena anina be dahaka?

8, 9. (a) Dahaka dainai Iuda tomadiho gunalaia taudia idia ura Iesu ena guri gabuna idia gimaia? (b) Hahine haida be guri gabuna idia lao neganai dahaka ia vara?

⁸ Iesu idia hamasea murinai hahelaga taudia bona Farisea taudia be Pilato dekenai idia lao, bona idia gwau: “Tau badana e, ai laloatao unai koikoi tauna be ia do mauri noho neganai ia gwau, ‘Dina toi murinai do lau toreisi lou.’ Unai dainai, gima taudia oi  oda henia guria gabuna do idia gimaia ela bona dina toi idia ore, unai amo ena hahediba taudia do idia mai bona ena tauanina idia henaoa lasi bona taunimanima dekenai do idia gwau, ‘Ia be mase amo ia toreisi lou vadaeni!’ Bona unai koikoi herevana ese guna ena koikoi herevana do ia hereaia.” Pilato be idia dekenai ia gwau: “Umui be mai emui gima taudia. Umui lao, emui diba hegeregerena umui gimaia.” Bena idia be unai bamona idia karaia.—Mat. 27:62-66.

⁹ Iesu ena tauanina be nadi matuna amo idia karaia guri gabuna lalonai idia atoa, bona nadi badana amo idia koua. Iuda tomadiho gunalaia taudia idia ura Iesu be unai guri gabuna dekenai do ia noho hanaihanai. To Iehova ena palani be idau. Dina ihatoina ai, Maria Magadala bona Maria ma ta be guri gabuna itaia totona idia mai neganai, idia itaia nadi be ta ese ia kokia bona aneru be ena latanai ia helai noho. Aneru ese unai hahine ia hamaorodia guri gabuna do idia itaia badina Iesu ena tauanina be ia noho lasi. Aneru ia gwau: “Ia be iniseniai ia noho lasi, . . . ia toreisi lou vadaeni.” (Mat. 28:1-6) Oibe, Iesu be ia mauri lou!

10. Paulo ese edena dala ai Iesu ena toreisi lou ia hamomokania?

¹⁰ Gabeai, dina 40 lalonai idia vara gaudia ese idia hamomokania Iesu ia toreisi lou vadaeni. Aposetolo Paulo be Korinto kongrigeisen ia tore henia, ia gwau: “Lau ese lau abia mai anina bada gaudia be umui lau hadibaia, unai gaudia ta be inai, Keriso be iseda kara dika dainai ia mase, Toretore Helagadia lalonai ia torea hegeregerena. Oibe, ia idia guria, to dina ihatoina ai ia toreisi lou, Toretore Helagadia lalonai ia torea hegeregerena. Kepa [o Petero] dekenai ia hedinarai, bena aposetolo 12 dekenai ia hedinarai. Unai murinai, ia be tadikaka 500 mai kahana dekenai nega tamona ia hedinarai, idia momo be idia do mauri noho, to haida be mase lalonai idia mahuta vadaeni. Unai murinai Iamesi dekenai ia hedinarai, bena aposetolo taudia ibounai dekenai ia hedinarai, to dokonai lau dekenai danu ia hedinarai, hegeregere lau be ena nega maorona ai ia vara lasi natuna ta bamona.”—1 Kor. 15:3-8.

11. Edena dala ai Iesu ena toreisi lou be “Toretore Helagadia lalonai ia torea hegeregerena” ia vara?

¹¹ Badina ginigunana be, iena toreisi lou be “Toretore Helagadia lalonai ia torea hegeregerena.” Dirava ena Hereva ese unai toreisi lou karana ia perovetalaia. Hegeregere, Davida ia gwau Dirava ese ena “Helaga Tauna” be guri gabuna dekenai do ia rakatania lasi. (Salamo 16:10 duahia.) Pentekoste 33 C.E. ai, aposetolo Petero ia hahedinaraia unai siri be Iesu ia herevalaia. Ia gwau: “Davida be Keriso ena toreisi lou be guna ia diba bona unai ia herevalaia, ia gwau, Dirava ese Keriso be Mase Gurina dekenai ia rakatania lasi ena tauanina ia bodaga totona.”—Kara 2:23-27, 31.

12. Daidia ese ia toreisi lou tauna Iesu idia itaia?

¹² Badina iharuana be, momo ese Iesu idia itaia bona herevalaia. Dina 40 lalonai, Iesu be guri gabuna ena uma lalonai, Emausa dalana ai, bona gabu ma haida ai ena hahediba taudia dekenai ia hedinarai. (Luka 24:13-15) Unai negadiai, ia ese hahediba taudia ta ta, hegeregere Petero bona momo idia noho neganai ia hereva henidia. Oibe, nega ta ia toreisi lou tauna Iesu be hutuma bada taudia 500 ia hereva henidia! Momo ese Iesu idia itaia bona edia hereva ita dadaraia diba lasi.

13. Edena dala ai hahediba taudia edia haroro goadagoada karana ese ia hahedinaraia, idia abia dae momokani Iesu be ia toreisi lou?

¹³ Badina ihatoina be, ena hahediba taudia ese Iesu ena toreisi lou sivaraina idia harorolaia goadagoada. Idia ese Keriso ena toreisi lou sivaraina idia harorolaia goadagoada dainai, haida ese idia dagedage henidia bona hamasedia. Bema Iesu be ia toreisi  lou lasi, dahaka dainai Petero be ena mauri ia laloa lasi, to tomadiho gunalaia taudia dekenai Keriso ena toreisi lou sivaraina ia harorolaia, ena be idia ese Iesu idia inai henia bona ena mase dalana idia karaia? Badina Petero bona hahediba taudia ma haida idia diba momokani, Iesu be ia mauri lou bona haroro gaukara ia gunalaia noho. Danu, Iesu ena toreisi lou karana ese ena hahediba taudia ia hagoadaia idia danu be do idia toreisi lou. Hegeregere, Stefano ia mase badina ia abidadama ia be mase amo do ia toreisi lou.—Kara 7:55-60.

14. Dahaka dainai oi abia dae momokani Iesu be ia mauri noho?

¹⁴ Ihahanina be, gau haida ese idia hamomokania, hari ia be guba ai ia King bona ia be Keristani kongrigeisen ena Kwarana. Unai dainai, Keristani tomadiho momokanina be ia bada ia lao noho. Bema Iesu be mase amo ia toreisi lou lasi, unai do ia vara, a? Bema ia toreisi lou lasi, reana iena sivarai do ita diba lasi. To, badina namodia dainai ita abia dae Iesu be ia mauri noho, bona hari ia ese sivarai namona be tanobada hegegemadai idia harorolaia gaukarana ia gunalaia noho.

15. Dahaka dainai Iesu ena toreisi lou karana ese ita ia hagoadaia mai gari lasi ida ita haroro totona?

¹⁵ Iesu ena toreisi lou karana ese ita ia hagoadaia mai gari lasi ida ita haroro totona. Lagani 2,000 lalonai, Dirava ena inai taudia ese kara idauidau idia karaia sivarai namona be gabu ibounai do ia lao dalana idia koua totona. Hegeregere, aposteit bona hevaseha herevadia idia gwauraia, eda gaukara idia taravatua, ita idia dagedage henia bona hamasea. To, “tuari gauna ta ese” iseda Basileia harorolaia bona hahediba gaukarana do ia koua lasi. (Isa. 54:17) Ita be Satani ena hesiai taudia dekenai ita gari lasi. Iesu ena gwauhamata hegeregerena, ia be ita ida ia noho, bona ita ia durua noho. (Mat. 28:20) Ita be gau ta dekenai do ita gari lasi, badina ena be iseda inai taudia idia ura iseda gaukara idia koua, to do idia hegeregere lasi!

16, 17. (a) Edena dala ai Iesu ena toreisi lou karana ese ena hahediba herevadia ia hamomokania? (b) Ioane 11:25 ena hereva hegeregerena, Dirava ese Iesu dekenai dahaka siahu ia henia?

¹⁶ Iesu ena toreisi lou karana ese ena hahediba herevadia ibounai ia hamomokania. Paulo ia gwau bema Keriso ia toreisi lou lasi, Keristani tomadihona bona iseda haroro gaukara be anina lasi. Baibel ia diba bada tauna ta ia gwau: “Bema Keriso be ia toreisi lou lasi, . . . Keristani taudia be kavakava taudia, badina koikoi herevana badana ta idia abia dae.” Bema Iesu ia toreisi lou lasi, Evanelia bukadia ai idia noho sivarai be hebogahisi sivaraina ta sibona, bona idia hahedinaraia aonega bona kara namo tauna ta be iena inai taudia ese idia hamasea. To Keriso be ia toreisi lou dainai, unai ese ena hahediba herevadia ia hamomokania, bona vaira negana totona ia gwauhamatalaia gaudia ia hamomokania danu.—1 Korinto 15:14, 15, 20 duahia.

¹⁷ Iesu ia gwau: “Toreisi lou be lau bona mauri be lau. Lau ia abidadama henia tauna, ena be ia mase, to do ia mauri lou.” (Ioa. 11:25.) Unai gwauhamata herevana be do ia momokani vaitani. Iehova ese Iesu dekenai siahu ia henia guba dekenai do idia lohia taudia ia hatoredia isi lou, bona tanobada ai mauri hanaihanai do idia abia taudia milioni momo danu do ia hatoredia isi lou. Iesu ena boubou gauna bona iena toreisi lou karana ese ia hahedinaraia, mase be do ia ore vaitani. Unai oi diba dainai, oi ia hagoadaia hahetoho oi haheaukalaia bona mase garina oi gari lasi, a?

18. Iesu ena toreisi lou karana ese dahaka ia hamomokania?

¹⁸ Iesu ena toreisi lou karana dainai, ita abia dae Iehova ese mai lalokau ida taunimanima do ia hahemaoro henidia. Paulo  be idaunegai Atena hanuana ai tatau bona hahine haida dekenai ia gwau: “[Dirava] ese dina ta ia makaia vadaeni, ia abia hidi tauna ese mai maoromaoro ida tanobada ibounai do ia hahemaoro henia. Bona Dirava ese mase amo unai tauna ia hatorea isi lou karana amo, taunimanima ibounai dekenai ia hamomokania, unai be do ia vara momokani.” (Kara 17:31) Oibe, Iesu be Dirava ese ia abia hidi Diadi Tauna, bona ita diba ia be mai ena lalokau bona maoromaoro ida kota do ia karaia.—Isaia 11:2-4 duahia.

19. Iesu ena toreisi lou ita abidadama henia karana ese edena dala ai iseda mauri ia haidaua?

¹⁹ Iesu ena toreisi lou ita abidadama henia karana ese ita ia durua Dirava ena ura ita karaia totona. Bema Iesu be sibona ia bouboulaia bona mase amo ia toreisi lou lasi, ita be kara dika bona mase ena igui henunai do ita noho. (Roma 5:12; 6:23) Bema Iesu be mase amo ia toreisi lou lasi, do ita gwau diba: “Namona be ita aniani bona ita inuinu badina kerukeru do ita mase.” (1 Kor. 15:32) To ita be moale karadia ita laloa bada lasi. Ita be toreisi lou helarona ita laloa bada, bona ita ura Iehova ena hereva ibounai ita badinaia.

20. Iesu ena toreisi lou karana ese edena dala ai Iehova ena siahu bona aonega ia hahedinaraia?

²⁰ Iesu ena toreisi lou karana ese Iehova ena siahu bona aonega ia hahedinaraia, Ia be “mai momokani ida ia idia tahua taudia edia davana do ia henia.” (Heb. 11:6) Iehova ese siahu bona aonega bada ia gaukaralaia, Iesu ia hatorea isi bona guba dekenai mase diba lasi maurina ia henia totona! Danu, Dirava ia hahedinaraia ia be mai ena siahu ena gwauhamata iboudiai ia hagugurua totona. Iehova ia gwauhamata “garana” ta ese do ia hamomokania daika be mai ena maoro tanobada bona guba do ia lohiaia totona. Unai ia guguru totona, Iesu do ia mase bona ia toreisi lou be mai anina bada.—Gen. 3:15.

21. Toreisi lou helarona ena anina oi dekenai be dahaka?

²¹ Iehova ita tanikiu henia badina ia ese ita dekenai toreisi lou helarona ia henia. Baibel ia gwauhamata: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho. Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.” Unai helaro hereadaena be ta ese aposetolo Ioane dekenai gwauraia, ia gwau: “Inai hereva oi torea, badina idia be taunimanima ese idia abia dae diba bona idia be momokani.” Ioane be daika amo unai matahanai ia abia? Unai be ia toreisi lou tauna Iesu Keriso ese ia henia.—Apok. 1:1; 21:3-5.