WITNES matamata taudia haida be palani idia karaia do idia lao muvi ta idia itaia totona. Idia kamonai edia sikuli turadia momo be unai muvi idia itaia bona idia moalelaia. To, piksa itaia rumana dekenai idia ginidae neganai, idia itaia pousta ai be tuari kohudia bona hemataurai lasi dabua idia hahedokilaia hahine edia laulau idia noho. Dahaka do idia karaia? Do idia vareai sibona bona unai muvi do idia itaia, a?

Unai sivarai ese ia hahedinaraia, dina ta ta ai ita karaia abia hidi ese iseda hetura karana Iehova ida idia hagoadaia eiava hadikaia diba. Nega haida, reana oi ura gau ta oi karaia, to oi laloa namonamo murinai, emu lalona oi haidaua. Unai ena anina be, oi be abia hidi oi karaia diba lasi, o emu lalona oi haidaua karana be abia hidi maorona?

Iehova ita lalokau henia dainai, ia dekenai eda mauri ita gwauhamatalaia bona ita bapatiso. Iseda ura badana be Dirava do ita badinaia noho. To, iseda inai tauna Satani Diabolo ia ura iseda abidadama ia hadikaia. (Apok. 12:17) Ita be abia hidi ita karaia, Iehova do ita hesiai henia bona ena hahegani do ita badinaia. To, bema eda lalona ita haidaua bona Ia ita rakatania, eda mauri ita haboioa diba.

Lagani 2,600 bamona gunanai, Babulonia ena King Nebukanesa ese golo kaivakuku badana ta ia haginia, bona oda ia henia taunimanima ibounai ese unai kaivakuku do idia tomadiho henia. Kaivakuku idia tomadiho henia lasi taudia be lahi siahu herea momokani lalonai do idia negea vareai. To, Iehova Dirava idia gari henia memero toi​—Sataraka, Misaka bona Abetenigo—⁠be unai kaivakuku idia tomadiho henia lasi. Unai dainai, lahi siahu herea momokani lalonai idia negea vareai. To, Iehova ese hoa dalanai idia ia hamauria. Ena be idia diba do idia mase, to idia ura Dirava do idia badinaia noho.​—Dan. 3:1-27.

Gabeai, peroveta tauna Daniela be guriguri  karana ia hadokoa lasi, ena be ia diba unai kara dainai laiona edia guri lalonai do idia negea vareai. To hanaihanai ia karaia bamona, dina ta ta ai ia be nega toi Iehova ia guriguri henia. Daniela ese Dirava momokanina tomadiho henia karana dekenai ena lalona ia haidaua lasi. Unai dainai, Iehova ese Daniela be “laiona edia dagedage [imana, NW] dekena amo” ia hamauria.​—Dan. 6:1-27.

Hari, Dirava ena hesiai taudia danu be edia gwauhamata idia badinaia. Africa ena sikuli ta ai, Iehova ena Witnes matamata taudia haida be idia ura lasi edia tano ena pepe idia saluti henia. Sikuli naria taudia idia gwau, bema idia be stiuden ma haida ida pepe idia saluti henia lasi, sikuli amo do idia kokidia. Daudau lasi murinai, Africa ena edukeisen minista be unai taoni ia lao, bona unai Witnes matamata taudia haida ia hereva henidia. Unai Witnes matamata taudia be mai gari lasi bona gado namo ida edia kara ena badina idia herevalaia. Unai murinai, Witnes natudia idia doria lou lasi pepe idia saluti henia totona. Unai dainai, unai tadikaka bona taihu matamatadia be sikuli idia lao diba bona ta ese idia ia doria lasi, edia hetura karana Iehova ida idia hadikaia totona.

Joseph ena sivarai mani oi laloa. Iena adavana be kensa gorere ia davaria, bena daudau lasi murinai ia mase. Joseph ena famili be idia laloparara bona iena abia hidi idia matauraia. To, iena adavana ena famili be hereva momokani lalonai idia noho lasi, bona idia ura mase latanai Dirava ese ia moalelaia lasi kastom karadia haida do idia karaia. Joseph ia gwau: “Lau ese egu lalona lau haidaua lasi dainai, idia be egu natudia edia lalona idia veria toho; to idia danu edia lalona idia haidaua lasi. Danu, emai varavara haida idia ura emai kastom hegeregerena egu ruma ai mase tauanina ida do idia noho ela bona daba. To, idia lau hamaoroa, egu ruma ai unai do idia karaia lasi. Idia diba mase tauanina ida do idia noho ela bona daba, be lau bona egu adavana ese ai abia dae taravatudia do ia utua. Unai dainai, ai herevahereva murinai, idia ese gabu ma ta ai unai kastom karana idia karaia.

“Unai nega aukana lalonai, Iehova lau noia emai famili do ia durua, unai amo Iena taravatu do ai utua lasi. Ia ese egu guriguri ia kamonai, bona ai ia durua unai hahetoho ai haheaukalaia totona.” Joseph bona ena natudia be Iehova badinaia karana dekenai edia lalona idia haidaua lasi.

Lagani 32 C.E. ena Pasova ariana murinai, Sidono ai Poinikia hahinena ta be Iesu Keriso dekenai ia lao. Ia ese Iesu ia noia loulou iena natuna kekeni amo demoni ia lulua totona. Matamanai, Iesu be unai hahine ia haere henia lasi. Ena hahediba taudia ia hamaoroa: “Dirava ese taunimanima ibounai dekenai lau ia siaia lasi, to Israela besena ena boio mamoe sibona dekenai.” To, hahine be Iesu ia noia loulou dainai, Iesu ese ia hamaoroa: “Natudia edia paraoa idia abia bona sisia maragidia dekenai idia negea be maoro lasi.” Hahine be abidadama karana ia hahedinaraia, bona ia gwau: “Oibe Lohiabada, to sisia maragidia be edia biagudia edia teibolo amo idia moru aniani momoru idia ania danu.” Iesu ese ena lalona ia haidaua bona unai hahine ena natuna kekeni amo demoni ia lulua.​—Mat. 15:21-28.

Iesu ese unai ia karaia amo Iehova ia tohotohoa, badina dala ia kehoa neganai, Iesu be ena lalona ia haidaua. Hegeregere, Dirava ia ura Israela taudia do ia hamasea badina idia ese golo boromakau ta idia karaia. To, Mose ese ia noia Israela taudia do ia hamasea lasi neganai, Iehova be Iena lalona ia haidaua.​—Eso. 32:7-14.

Aposetolo Paulo be Iehova bona Iesu ia tohotohoa. Iena misinari loaloa ginigunana ai, Mareko ese Paulo bona Banaba ia rakatanidia. Unai dainai Paulo ia laloa misinari loaloa ma haida lalonai, Mareko do idia hakaua lou lasi. To, gabeai Paulo ia itaia Mareko be lo tauna ai ia lao bona gaukara namona ia karaia diba. Unai dainai, Paulo be Timoteo dekenai ia gwau: “Namona be Mareko danu oi hakaua mai, badina hesiai gaukara lalonai lau do ia durua.”​—⁠2 Tim. 4:11.

Ita be edena bamona? Eda hebogahisi, haheauka bona lalokau guba Tamana  ita tohotohoa dainai, nega haida eda lalona ita haidaua diba. Hegeregere, eda lalohadai ma haida dekenai ita haidaua diba. Ita be Iehova bona Iesu bamona lasi, badina ita be goevadae lasi taudia. Bema unai goevadae taudia rua be gau haida dekenai edia lalona idia haidaua, ita danu unai bamona ita karaia be namo, ani?

Nega haida, reana ita ese eda tiokratik tahua gaudia ita haidaua diba. Hegeregere, reana haida be Baibel idia stadilaia bona kongrigeisen heboudia dekenai idia lao, to edia lalona idia do hadaia lasi idia bapatiso totona. Eiava, tadikaka haida be idia ura lasi idia painia, ena be idia hegeregere unai dala ai edia hesiai gaukara idia habadaia totona. Bona tadikaka haida idia gaukara goada lasi kongrigeisen ai elda bona hesiai tauna ena maduna idia abia totona. (1 Tim. 3:1) Oi danu be unai bamona oi laloa, a? Emu lalona oi haidaua diba, a? Iehova be mai lalokau ida oi ia boiria unai hahenamo oi abidia, bona mai moale ida Dirava bona ma haida oi hesiai henia totona.

Africa ena Betele ta ai ia gaukara taihu ta ladana Ella ia gwau: “Matamanai Betele dekenai lau mai neganai, lau laloa do lau noho daudau lasi. Lau ura mai egu goada ibounai ida Iehova do lau hesiai henia, to danu egu famili lau laloa momo. Matamanai, idia lau reaia bada! To, lauegu daiutu turana ese lau ia hagoadaia, unai dainai Betele lau rakatania lasi. Hari, lau be lagani 10 Betele dekenai lau gaukara vadaeni, bona lau ura iniseniai do lau gaukara bona egu tadikaka taihu do lau hesiai henia ela bona hanaihanai.”

Kaino be ena tadina dekenai ia mama bona ia badu dikadika dainai, ia dekenai ia vara gauna ena sivarai oi laloatao, a? Dirava ese Kaino ia hamaoroa bema kara namo  ia karaia, vadaeni Dirava ese iena boubou gauna do ia abia dae. Dirava ese Kaino ia sisiba henia ena kara dika do ia biagua be namo, badina unai kara dika be iena “iduara dekenai ia naria noho,” ia do ia hadikaia totona. Kaino ese ena lalohadai bona kara ia haidaua diba, to ia ese Dirava ena sisiba ia dadaraia. Unai dainai, ena tadina ia alaia bona taunimanima alaia tauna ginigunana ai ia lao!​—Gen. 4:2-8.

King Usaia ena sivarai danu mani oi laloa. Matamanai, ia be Iehova ena vairanai kara maoromaoro ia karaia bona ena hetura karana Iehova ida be ia goada. To madi, Usaia be ena ladana namona ia hadikaia, badina ia hekokoroku. Ena be ia be hahelaga tauna lasi, to dubu helaga lalonai ia vareai bonana namo muramura ia gabua totona. Hahelaga taudia ese ia idia sisiba henia unai bamona do ia karaia lasi neganai, Usaia be ena lalona ia haidaua, a? Lasi. Usaia be “ia badu” bona edia sisiba ia dadaraia. Unai dainai, Iehova ese ia dekenai lepera gorere ia henia.​—2 Siv. 26:3-5, 16-20.

Oibe, nega haida ita ese eda lalona ita haidaua diba. Iseda negai ia vara sivaraina ta mani ita itaia. Joachim be lagani 1955 ai ia bapatiso, to lagani 1978 ai kongrigeisen amo idia atoa siri. Lagani 20 mai kahana murinai, ia helalo-kerehai bona kongrigeisen lalonai idia abia vareai. Vanegai, elda ta ese ia nanadaia dahaka dainai lagani momo kongrigeisen murimurinai ia noho neganai, Joachim ia gwau: “Lau be lau badu bona lau hekokoroku. To, lau lalohisihisi badina nega daudau kongrigeisen murimurinai lau noho. To, unai lagani lalodiai, lau abia dae Iehova ena Witnes taudia be hereva momokani idia hadibaia.” Unai dainai, iena lalohadai ia haidaua bona ia helalo-kerehai.

Reana nega haida ita danu ese eda lalohadai bona kara ita haidaua be namo. Bema ita ura Iehova ita hamoalea, namona be unai bamona ita karaia.​—Sal. 34:8.