GUY HOLLIS PIERCE, Hakaua Oreana ena memba ta, be Tuesday, March 18, 2014 ai ena tanobada maurina ia haorea, bena guba helarona ia abia bona Keriso ena horoa tadikaka ta ai ia lao. Ena mauri lagani be 79.​—Heb. 2:10-12; 1 Pet. 3:18.

Guy Pierce be November 6, 1934 ai, Auburn, California, U.S.A. dekenai ia vara, bona lagani 1955 ai ia bapatiso. Lagani 1977 ai, ena adavana lalokauna Penny ia adavaia bona natudia idia havaraia. Momo dekenai ia be tama ta bamona. Lagani 1982 ai, ia bona Penny ese painia gaukara idia hamatamaia, bona lagani 1986 ai tadikaka Pierce be United States ai sekit naria gaukara ia hamatamaia, bona lagani 11 lalonai unai gaukara ia karaia.

Lagani 1997 ai, tadikaka Guy bona taihu Penny be United States ena Betele famili lalonai idia vareai. Tadikaka Pierce be Haroro Naria Dipatmen dekenai ia gaukara, bona lagani 1998 ai, ia idia abia hidi Hakaua Oreana ena Gaukara Taudia Naria Komiti ia durua totona. October 2, 1999 ai, Watch Tower Bible and Tract Society of Pennsylvania ena lagani ta ta hebou ta ai, idia gwauraia hedinarai Tadikaka Pierce be Hakaua Oreana ena memba ta. Idia hanaia laganidia lalonai, ia be Gaukara Taudia Naria Komiti, Toretore Komiti, Buka Karaia Komiti, bona Kodineita Edia Komiti ai ia gaukara.

Tadikaka taihu be gabu idauidau amo idia mai bona edia kastom danu be idauidau, to idia ese Tadikaka Pierce idia ura henia, badina ia be kiri momo bona moale tauna. To ia idia ura henia badina korikorina be, ia be lalokau bona manau tauna, ia ese kara maoromaoro taravatudia bona hakaua herevadia ia matauraia, bona Iehova ia abidadama henia momokani. Tadikaka Guy Pierce ia diba momokani Iehova ena gwauhamata ibounai be do idia guguru, dina ia daekau hegeregerena. Unai dainai, ia ura tanobada ibounai lalonai unai hereva momokani ia hadibaia.

Tadikaka Pierce be Iehova hesiai henia karana dekenai ia hesiku lasi, nega momo dabai ia toreisi bona ia gaukara ela bona hanuaboi. Ia be tanobada hegegemadai ia loaloa, ena Keristani tadikaka taihu ia hagoadaia totona. Danu, ia ese nega ia atoa Betele famili taudia ta ta bona ma haida ia hagoadaia totona. Ena be lagani haida ia hanaia vadaeni, to tadikaka taihu haida be iena heabidae karana, hebamo karana, bona Baibel amo ia henia hagoadaia herevadia idia do laloa noho.

Iseda tadikaka bona tura lalokauna ena adavana, edia natudia siks, iena tubudia bona edia natudia be idia do mauri noho. Danu, ia hagoadadia tadikaka taihu momo idia do noho. Saturday March  22, 2014 ai, tadikaka Mark Sanderson, Hakaua Oreana ena memba ta, ese Brooklyn Betele ai Tadikaka Pierce ena fineral tok ia henia. Ia ese Tadikaka Pierce ena guba helarona ia herevalaia, bona Iesu ena hereva ia duahia, ia gwau: “Lauegu Tamana ena ruma lalonai noho gabudia be momo. Bema . . . lau lao bona umui totona gabu ta lau hegaegaelaia, do lau giroa mai bona umui do lau abia lao, lau noho gabuna dekenai umui danu be unuseniai do umui noho totona. Bona lau lao gabuna ena dala be umui diba.”​—Ioa. 14:2-4.

Momokani, ita ese Tadikaka Pierce do ita reaia bada. To, ita moale badina ia be ena ‘noho gabuna’ ena ‘dala ia diba.’