1, 2.Iesu ia toreisi lou dinana ai, edena dala ai ena hahediba taudia ia hagoadaia?

 IESU ia toreisi lou dinana ai, hahediba taudia rua be Ierusalema amo hanua ma ta dekenai kilomita 11 bamona idia raka lao. Idia diba lasi Iesu ia toreisi lou vadaeni, to idia vara gaudia dainai idia lalohisihisi. Daudau lasi murinai, Iesu be idia dekenai ia mai bona idia ida ia raka hebou matamaia. Ia ese edia lalona ia hagoadaia. Edena dala ai? “Mose bona Peroveta Taudia ibounai edia toretore amo ia matamaia, bona ia dainai Toretore Helagadia lalonai idia torea hereva edia anina be idia dekenai ia gwauraia.” (Luka 24:13-15, 27) Unai negai, edia kudouna ia hamarerea badina ia ese Toretore Helagadia edia anina ia “herevalaia goevagoeva.”​—Luka 24:32.

² Adorahi ai, unai hahediba taudia rua be Ierusalema dekenai idia giroa lou. Aposetolo taudia idia davaria neganai, ia vara gauna be idia dekenai idia herevalaia. Idia hereva noho lalonai, Iesu be idia ibounai dekenai ia hedinarai. To, aposetolo taudia idia gari bada. Idia daradara momokani. Iesu ese edena bamona ia hagoadadia? Baibel ia gwau: “Edia lalona ia kehoa momokani, vadaeni Toretore Helagadia edia anina idia lalopararalaia.”—Luka 24:45.

3.(a)Dahaka hekwakwanai ita davaria? (b)Dahaka ese ita ia durua eda hesiai gaukara dekenai lalohadai maorona ita abia totona?

³ Unai hahediba taudia bamona, nega haida ita lalohisihisi  danu. Reana Lohiabada ena gaukara lalonai ita bisi, to anina namona ta ia vara lasi dainai ita lalomanoka. (1 Kor. 15:58) Eiava ita stadi henia taudia be idia goada lasi. Ita durua taudia haida ese Iehova do idia rakatania. Dahaka ita karaia diba, eda hesiai gaukara dekenai lalohadai maorona ita abia totona? Ita do ia durua gauna ta be, Baibel lalonai Iesu ena parabole edia anina ita lalopararalaia namonamo. Mani unai parabole toi bona idia amo ita dibaia gaudia ita laloa.

4.Ia mahuta uhe hadoa tauna ena parabole ena anina be dahaka?

⁴ Mareko 4:26-29 duahia. Ia mahuta uhe hadoa tauna ena parabole ena anina be dahaka? Parabole ai ia herevalaia tauna ese Basileia harorolaia taudia ta ta ia laulaulaia. Uhe ese kudou-maoro taudia dekenai ita harorolaia Basileia sivaraina ia laulaulaia. Vaia mauri lalonai ita karaia bamona, uhe hadoa tauna be “hanuaboi ai ia mahuta, bona daba ai ia toreisi.” Uhe be nega daudau lalonai ia tubu, idia hadoa negana amo ela bona utua negana. Unai nega lalonai, “uhe ena raurau matamata ia hedinarai bona ia tubu daekau.” Unai uhe be “sibona” metairametaira ia tubu, guna rau ia atoa, gabeai witi kwarana ia hedinarai bena huahua ia mage. Unai hegeregerena, kamonai tauna ena kudouna ai hereva momokani ia tubu neganai, metairametaira ia goada ia lao. Ia goada ia lao neganai ia ura Dirava ia hesiai henia, unai dainai Iehova dekenai ena mauri ia gwauhamatalaia bona ia bapatiso.

5.Dahaka dainai Iesu ese inai parabole ia herevalaia?

⁵ Dahaka dainai Iesu ese inai parabole ia herevalaia? Iesu ese ita ia durua ita laloparara Iehova ese “kudou-maoro taudia” edia kudouna ai hereva momokani ia hatubua. (Kara 13:48; 1 Kor. 3:7) Ita hadoa bona dairia, to ena tubu dalana ita biagua lasi. Ta ita doria o ena tubu dalana ita haharagaia lasi. Parabole ai ia herevalaia tauna bamona, ita diba lasi uhe be edena bamona ia tubu. Dina ta ta ena gaukara idauidau dainai unai tubu karana ita itaia lasi. To nega ia heau lalonai, Basileia uhena ia tubu bona huahua ia atoa. Bena hahediba tauna matamatana be ita ida anina haboua gaukarana ia karaia, bona ita ia durua bada.​—Ioa. 4:36-38.

6.Ta ena kudouna ai hereva momokani ia tubu karana be edena bamona ita laloa?

⁶ Inai parabole amo dahaka ita dibaia? Gau ginigunana be, ita abia dae ita ese Baibel stiuden ena tubu dalana hereva momokani ai be ita biagua lasi. Manau karana ese ita do ia durua stiuden ita doria lasi ia bapatiso totona. Dala idauidau ai stiuden ita durua, to namona be mai manau ida ita abia dae ia sibona ese gwauhamata do ia karaia. Ta be Dirava ia lalokau henia dainai mai kudouna ibounai ida ena mauri ia gwauhamatalaia. Iehova ese eda gwauhamata do ia abia dae bema ia ita lalokau henia.—Sal. 51:12; 54:6; 110:3.

7, 8.(a)Ia mahuta uhe hadoa tauna ena parabole amo dahaka gau ma haida ita dibaia? Haheitalai ta gwauraia. (b)Unai parabole amo Iehova bona Iesu dekenai dahaka ita dibaia?

⁷ Gau iharuana be, parabole amo ita dibaia gauna ita lalopararalaia neganai, do ita lalomanoka lasi bema matamanai eda gaukara ena anina ita itaia lasi. Ita haheauka be namo. (Iam. 5:7, 8) Bema stiuden ita durua namonamo, to ena kudouna ai hereva momokani ia tubu lasi, namo lasi ita laloa unai be iseda kerere. Iehova ese manau tauna ena kudouna ai hereva momokani ena uhe ia hatubua diba, bema unai tauna be mai ena ura ida ena kara ia haidaua. (Mat. 13:23) Unai  dainai, namo lasi ita laloa eda hesiai gaukara be anina lasi badina huahua ia havaraia lasi. Ita hadibaia taudia idia kamonai dainai, anina be eda hesiai gaukara lalonai ita kwalimu, a? Lasi, Iehova ese iseda hesiai gaukara be unai bamona ia laloa lasi. Herevana anina ia vara eiava lasi, to Iehova ese eda abidadama karana ia laloa bada.—Luka 10:17-20; 1 Korinto 3:8 duahia.

⁸ Gau ihatoina be, nega haida ta ena mauri lalonai ia haidaua gaudia be ita diba lasi. Hegeregere, misinari ta ese ia stadi henia headava tau bona hahine be ia idia hamaoroa idia ura bapatiso lasi pablisa ai idia lao. Ia hadibadia pablisa ai idia lao totona kuku ania karana idia hadokoa be namo. Ia hoa badina idia gwau hua haida gunanai kuku ania karana idia hadokoa. Dahaka dainai idia hadokoa? Idia laloparara kuku idia ania neganai Iehova ese do ia itadia bona ia be koikoi karadia ia inai henia. Unai dainai abia hidi idia karaia misinari ena vairanai kuku do idia ania o do idia hadokoa vaitani. Iehova lalokau henia karana ese ia durudia abia hidi maorona idia karaia totona. Hereva momokani ai idia goada, ena be misinari ia diba lasi edia kara idia haidaua.

9.Reke ena parabole ena anina be dahaka?

⁹ Mataio 13:47-50 duahia. Reke ena parabole ena anina be dahaka? Iesu ese taunimanima ibounai dekenai Basileia sivaraina harorolaia karana be davara dekenai reke badana negea karana ida ia hahegeregerea. Reke ese “gwarume idauidau” ia abia hegeregerena, iseda haroro gaukara ese taunimanima idauidau ia veria mai. (Isa. 60:5) Lagani ta ta ai iseda hebouhebou bona Memorial ai taunimanima momo idia mai karana ese unai ia hamomokania.Unai taudia haida be gwarume “namodia” bamona bona Keristani kongrigeisen lalonai idia haboua. To, ma haida be “ania diba lasi” gwarume bamona; Iehova ese ia dadaraidia.

10.Dahaka dainai Iesu ese inai parabole ia herevalaia?

¹⁰ Dahaka dainai Iesu ese inai parabole ia herevalaia? Laulau dalanai gwarume hapararaia karana be hisihisi badana lalonai do ia vara hahemaoro ginigabena ia herevalaia lasi. To, inai nega oromana ena dokonai do idia vara gaudia ia herevalaia. Iesu ia gwau hereva momokani do idia kamonai taudia haida sibona ese Iehova do idia hesiai henia. Momo be hebou idia mai. Haida idia ura idia ida Baibel ita stadilaia to do idia ura lasi edia kara idia haidaua. (1 Kin. 18:21) To ma haida be hari Keristani kongrigeisen idia bamoa lasi. Matamata taudia haida be Iehova ena taravatu idia ura henia lasi, ena be edia tama sina be Keristani taudia. Herevana dahaka, to Iesu ia gwau taunimanima ta ta ese abia hidi do ia karaia be namo. Bema abia hidi maorona idia karaia, Iehova ese idia be “kohu namodia” bamona do ia laloa.​—Hag. 2:7.

11, 12.(a)Reke ena parabole amo dahaka namo ita abia? (b)Unai parabole amo Iehova bona Iesu dekenai dahaka ita dibaia?

¹¹ Reke ena parabole amo dahaka namo ita abia? Inai parabole amo ita dibaia gauna ese ita do ia durua, bema Baibel stiuden ta eiava iseda natuna ta ese hereva momokani ia badinaia lasi, namona be ita lalometau o lalohisihisi lasi. Unai ia vara diba ena be ita hekwarahi idia ita durua totona. Herevana ta be Baibel stadi ia ura eiava hereva momokani ai ia tubu, to unai ese ia hahedinaraia lasi iena hetura karana Iehova ida do ia goada. Iehova ena lohia dalana idia  ura lasi badinaia taudia be gabeai Dirava ena taunimanima amo do ia kokia.

¹² Anina be hereva momokani idia rakatania taudia be kongrigeisen dekenai do idia giroa lou lasi, a? Eiava bema ta be Iehova dekenai ena mauri ia gwauhamatalaia lasi, do ita gwau ia be anina lasi, a? Lasi. Hisihisi badana ia do vara lasi neganai, unai bamona tauna dekenai dala ia noho ia giroa totona. Unai be hegeregere Iehova ese ia boiridia: “Lau dekenai umui giroa mai neganai, . . . umui dekenai do lau giroa lou.” (Mal. 3:7)Iesu ese boio merona ena parabole amo unai ia hahedinaraia.​—Luka 15:11-32 duahia.

13.Boio merona ena parabole ena anina be dahaka?

¹³ Boio merona ena parabole ena anina be dahaka? Parabole lalonai ia herevalaia hebogahisi tamana ese iseda lalokau guba Tamana, Iehova, ia laulaulaia. Ena ahuna ia noia bena ia haorea kava natuna ese kongrigeisen idia rakatania taudia ia laulaulaia. Kongrigeisen idia rakatania neganai, Iehova amo idia daudau bona Satani ena tanobada dekenai idia lao, unai be hegeregere “tano daudauna” dekenai idia lao. (Efe. 4:18; Kol. 1:21) To, gabeai idia haida idia laloparara neganai, Iehova ena orea dekenai idia giroa lou. Unai helalo-kerehai manau taudia be iseda dika gwauatao Tamana ese mai moale ida ia abidia dae lou.​—Isa. 44:22; 1 Pet. 2:25.

14.Dahaka dainai Iesu ese inai parabole ia gwauraia?

¹⁴ Dahaka dainai Iesu ese inai parabole ia gwauraia? Iesu ese ia hahedinaraia, Iehova ia ura kongrigeisen idia rakatania taudia be Ia dekenai do idia giroa lou. Parabole lalonai ia herevalaia tamana be ena natuna do ia giroa lou negana ia naria noho. Ia itaia ena natuna be “gabu daudauna amo ia mai noho lalonai,” karaharaga ia heau lao bona hedavari henia. Unai ese hereva momokani idia rakatania taudia ia hagoadaia, Iehova dekenai idia giroa lou haraga totona. Reana edia abidadama ia manoka, idia hemarai bona hekwarahi bada idia giroa lou totona. To, idia giroa lou neganai, guba ai moale bada do ia vara.​—Luka 15:7.

15, 16.(a)Boio merona ena parabole amo dahaka ita dibaia? Haheitalai haida gwauraia. (b)Unai parabole amo Iehova bona Iesu dekenai dahaka ita dibaia?

¹⁵ Boio merona ena parabole  amo dahaka namo ita abia? Namona be Iehova ena haheitalai ita tohotohoa. Helalo-kerehai tauna ia giroa lou neganai, ita ura lasi ita “kara maoromaoro auka herea” dainai ia ita abia dae lasi. Unai ese iseda hetura karana Iehova ida do ia hadikaia. (Had. 7:16) Ita dibaia gauna ma ta be, kongrigeisen ia rakatania tauna be ‘boio mamoe’ ta bamona, do ita davaria lou diba. (Sal. 119:176) Kongrigeisen ia rakatania tauna ta ita davaria neganai, mai lalokau ida heduru maorona ita henia ia giroa lou totona, a? Elda taudia do ita hadibaia haraga unai amo heduru idia henia diba, a? Unai ita karaia diba, bema Iesu ese ia gwauraia boio merona ena parabole amo ita dibaia gauna ita badinaia.

¹⁶ Idia giroa lou taudia haida ese Iehova ena hebogahisi bona kongrigeisen ena lalokau bona heduru idia moalelaia karana mani ita laloa. Lagani 25 lalonai kongrigeisen amo idia atoa siri tadikaka ta ia gwau: “Lau idia abia-vareai-lou negana amo egu moale ia bada noho, badina Iehova ese lau dekenai ‘goada matamata’ ia henia. (Kara 3:19) Tadikaka taihu be lau idia durua bona lalokau henia! Hari idia be egu Keristani ruma besena.” Iehova ia rakatania bona lagani faiv murinai ia giroa matamata taihu ta ia gwau: “Lau moale bada herea, badina Iesu ese ia gwauraia lalokauna be lau dekenai idia hahedinaraia. Iehova ena orea lalonai lau noho be hahenamo badana!”

17, 18.(a)Unai parabole toi amo dahaka mai anina bada gaudia ita dibaia? (b)Eda lalona ita hadaia dahaka do ita karaia?

¹⁷ Unai parabole toi amo dahaka mai anina bada gaudia ita dibaia? Gau ginigunana be, ita abia dae Baibel stiuden ena tubu hereva momokani ai be ita biagua lasi. Iehova sibona ese unai ia karaia diba. Gau iharuana be, ita gwau lasi ita idia bamoa taudia o eda stadi taudia ibounai ese hereva momokani do idia badinaia. Gau ihatoina be, ena be haida ese hereva momokani bona Iehova idia rakatania, to ita diba do idia giroa lou. Bona idia giroa lou neganai, Iehova ena kara bamona, idia ita abia dae.

¹⁸ Namona be ita ta ta ese diba, laloparara bona aonega ita tahua noho. Iesu ena parabole ita duahidia neganai, sibona ita nanadaia: ‘Inai parabole ena anina be dahaka? Dahaka dainai Baibel lalonai idia torea? Lau dibaia gaudia be edena bamona lau badinaia diba? Unai parabole amo Iehova bona Iesu dekenai dahaka lau dibaia?’ Unai bamona ita karaia neganai, ita hahedinaraia ita be Iesu ena hereva ena anina ita lalopararalaia.