Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Keristani tauna ia mase neganai, ena tauanina idia gabua diba, a?

Mase tauanina do idia gabua o lasi ena abia hidi be tau ta sibona ese do ia karaia diba. Baibel ese unai bamona kara ia taravatua lasi, King Saulo bona ena natuna Ionatana edia mase tauanidia be idia gabudia bona edia turia idia guria. (1 Sam. 31:2, 8-13)​—6/15, rau 7.

Pablisa be momo lasi gabudia ia lao pablisa ese dahaka hekwakwanai ia davaria?

Hekwakwanai toi be inai: (1) mauri dala idauna, (2) famili laloa momo karana, bona (3) tura matamatadia davaria be auka. Unai hekwakwanai idia hanaidia pablisa momo be Iehova ese ia hanamodia.​—7/15, rau 4-5.

Dahaka dainai Iosepa ena kakadia ese ia idia badu henia?

Iakobo ese Iosepa ia lalonamo henia dainai, kouti dabua namo hereana ta ia henia. Iosepa ena kakadia be idia mama bona igui hesiai tauna bamona ia idia hoihoilaia.​—⁠7/1, rau 11-13.

Dahaka dainai pepapepa matamatadia be mai anina bada bona ita gaukaralaia be auka lasi?

Unai pepapepa ibounai edia sitaelo be tamona. Pepapepa ta ta ese ita ia durua Baibel siri ta ita duahia bona ruma tauna dekenai henanadai ta ita henia totona. Herevana ruma tauna ese edena haere ia abia hidi, to pepapepa ita kehoa bona Baibel ena hereva ita hahedinaraia diba. Danu, pepapepa ai idia noho henanadai ta ita hahedinaraia, unai amo lou henia ita karaia diba.​—8/15, rau 13-1.

Keristani tama sina be dahaka idia karaia diba edia natudia idia naria totona?

Emu natudia oi diba namonamo totona, gau badana be idia hereva neganai oi kamonai namonamo. Oi gaukara goada emu natudia be Baibel amo oi hadibaia totona. Mai lalokau ida idia oi hakaua, hegeregere, oi durudia edia daradara gaudia idia lalopararalaia totona.​—9/15, rau 18-21.

Dirava ena Basileia henunai dahaka hekwakwanai do idia ore vaitani?

Gorere, mase, moni gaukara ena hekwakwanai, tuari, aniani ena hekwakwanai, bona ogogami be do idia ore.​—10/1, rau 6-7.

Baibel ena hereva hegeregerena edena kontraka ese dala ia kehoa ma haida be Keriso ida guba ai idia lohia totona?

Iesu be Lohiabada ena Anibou ia hamatamaia murinai, iena abidadama aposetolo taudia ida kontraka ta ia karaia. Unai be Basileia kontrakana. (Luka 22:28-30) Unai dala amo idia diba, idia be Iesu ida guba ai do idia lohia.​—10/15, rau 16-17.

Kara 15:14 ai, Iamesi ese ia herevalaia ‘Dirava ena ladana idia abia’ taudia be daidia?

Unai be Iuda bona Iuda lasi taudia, idia be Dirava ese ia abia hidi besena, bona idia ese idia ia boiria tauna ena ‘kara hereadaedia be gabu ibounai dekenai idia gwauraia hedinarai.’ (1 Pet. 2:9, 10)​—11/15, rau 24-25.