1, 2. Dirava ia ura ia idia tomadiho henia matamata bona buruka taudia ese dahaka idia karaia?

 OI BE matamata tauna ta, a? Bema oibe, namona be oi diba, Iehova ese oi ia laloa bada badina ena tanobada oreana lalonai oi noho. Tano momo ai, bapatiso idia abia taudia momo be matamata taudia. Matamata taudia momo ese Iehova hesiai henia karana idia abia hidi be hagoadaia gauna!

² Oi be matamata taudia ma haida bamoa karana oi moalelaia, a? Momokani unai oi moalelaia. Iseda mauri lagani tamona taudia bamoa karana ese moale ia havaraia. Herevana ita be matamata o buruka bona eda mauri daladia be idauidau, to Dirava ia ura mai lalotamona ida Ia ita tomadiho henia. Aposetolo Paulo ia gwau, Dirava ena ura be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:3, 4) Apokalupo 7:9 ese ia hahedinaraia, Dirava tomadiho henia taudia be “bese ibounai, iduhu ibounai, kopina bona gado idauidau amo” idia mai.

3, 4. (a) Hari, matamata taudia momo be edena kara idia hahedinaraia? (b) Edena kara be Efeso 4:25 ena hereva hegeregerena?

³ Iehova idia hesiai henia matamata taudia be Ia idia hesiai henia lasi matamata taudia amo idia idau! Iehova idia hesiai  henia lasi taudia momo ese sibona edia namo bona ura gaudia idia laloa bada. Tahua gaukara karaia taudia haida idia gwau, hari matamata taudia be sibona edia namo idia laloa bada, guna bamona lasi. Edia hereva dalana bona dabua toana amo idia hahedinaraia, buruka taudia idia matauraia lasi.

⁴ Unai kara be gabu ibounai dekenai ia vara. Unai dainai, Iehova idia hesiai henia matamata taudia idia hekwarahi unai kara idia dadaraia bona Dirava ena lalohadai idia abia totona. Aposetolo edia negai, Paulo ese Keristani taudia ia hadibaia, ‘hodahoda eiava lalohadai hari kamonai lasi taudia edia lalona dekenai ia gaukara’ gauna, idia dadaraia be namo. (Efeso 2:1-3 duahia.) Unai kara idia dadaraia bona mai lalotamona ida edia tadikaka danu idia gaukara hebou matamata taudia ita hanamodia be namo. Edia kara be Paulo ena hereva hegeregerena, ia gwau “ita ibounai be tauanina tamona ena kahana ta ta.” (Efe. 4:25) Tanobada gunana ena dokona ia kahirakahira lalonai, mai lalotamona ida ita gaukara hebou be gau badana. Mai lalotamona ida ita gaukara hebou totona, ita do idia durua Baibel sivarai haida mani ita laloa.

5, 6. Lota bona ena natuna kekeni edia sivarai amo gaukara hebou karana dekenai dahaka ita dibaia?

⁵ Guna, Iehova be ena taunimanima ia gimaia, badina metau negadiai mai lalotamona ida idia durua heheni. Hari, Dirava hesiai henia taudia, matamatadia bona burukadia, be Baibel sivaraidia amo diba idia abia. Unai sivarai ta be Lota ena sivarai.

⁶ Lota bona ena ruma bese be dika do idia davaria. Idia noholaia hanuana, Sodoma be Iehova ese do ia hadikaia. Dirava ena aneru ese Lota idia hadibaia hanua ia rakatania bona ororo dekenai do ia lao, idia gwau: “Umui heau mauri.” (Gen. 19:12-22) Lota ia kamonai, bona ena natuna kekeni rua be ia ida hanua idia rakatania. Madi, edia varavara be unai bamona idia karaia lasi. Lota ena natuna edia maoheni tatau idia laloa ia “hevaseha sibona.” Unai dainai idia mase. (Gen. 19:14) Lota bona ena natuna kekeni sibona idia mauri, badina idia gaukara hebou.

7. Aigupito idia rakatania neganai, idia lalotamona taudia be Iehova ese edena bamona ia durudia?

⁷ Sivarai ma ta mani ita laloa. Israela taudia be Aigupito idia rakatania neganai, orea ta ta idia karaia lasi bona sibona edia ura dalana dekenai idia raka lasi. Danu, Mose be ena “imana ia atoa maoromaoro davara ena ataiai” bona Iehova ese davara ia hapararaia neganai, Mose be sibona o Israela taudia haida sibona ida ia hanaia lasi. To, Iehova ese idia ia gimaia dainai, Israela taudia ibounai idia hanaia. (Eso. 14:21, 22, 29, 30) Mai lalotamona ida idia gaukara hebou, bona “orea idauidau taudia momo” ese idia bamoa. (Eso. 12:38) Bema idia haida, reana matamata taudia, be sibona edia ura dalana idia badinaia, dika bada do idia davaria. Unai bamona idia karaia bona Iehova ena gimaia karana idia reaia be kavakava karana, ani?​—1 Kor. 10:1.

8. Iehosapata ena negai, Dirava ena taunimanima be edena dala ai idia gaukara hebou?

⁸ King Iehosapata ena negai, “tuari taudia” goadadia momo be Dirava ena taunimanima tuari henia totona idia mai. (2 Siv. 20:1, 2) Dirava ena hesiai taudia be sibona edia goada amo idia kwalimu lasi. To, Iehova dekenai idia tabekau. (2 Sivarai 20:3, 4 duahia.) Bona idia ta ta sibona ena ura dalanai unai ia karaia lasi. Baibel ia gwau: “Iuda taudia ibounai  be unuseni, Lohiabada ena vairanai idia gini, mai edia natudia maragidia, bona edia adavadia bona natudia danu.” (2 Siv. 20:13) Herevana idia matamata o buruka, to mai abidadama ida idia gaukara hebou Iehova ena dala idia badinaia, bona Iehova ese ia gimadia. (2 Siv. 20:20-27) Dirava ena taunimanima ese hekwakwanai idia davaria neganai, unai haheitalai namona idia badinaia diba, ani?

9. Keristani taudia ginigunadia edia gaukara hebou karana amo dahaka ita dibaia?

⁹ Keristani taudia ginigunadia ese gaukara hebou karana idia hahedinaraia namonamo danu. Hegeregere, Iuda bona Iuda lasi taudia momo be Keristani taudia ai idia lao murinai, “aposetolo taudia edia hadibaia herevadia idia kamonai namonamo noho, gau ibounai idia haria hebou, idia aniani hebou bona idia guriguri.” (Kara 2:42) Dagedage negana lalonai unai gaukara hebou karana ia hedinarai goevagoeva, unai nega lalonai idia durua heheni be mai anina bada. (Kara 4:23, 24) Metau negadiai, ita gaukara hebou be gau badana, ani?

10. Edena negai gaukara hebou karana be mai anina bada?

¹⁰ Kahirakahira dika bada negana ta do ia vara. Peroveta tauna Ioela ia gwau, unai negai “dina be do ia dibura momokani.” (Ioe. 2:1, 2; Sep. 1:14) Unai negai Dirava ena taunimanima idia gaukara hebou be gau badana. Iesu ia gwau: “Basileia ta bema sibona ia hapararaia, ia be do ia dika.”—Mat. 12:25.

11. Salamo 122:3, 4 amo Dirava ena taunimanima be dahaka idia dibaia? (Laulau ginigunana itaia.)

¹¹ Inai nega oromana dikana do ia ore negana be kahirakahira, unai dainai ita gaukara hebou be mai anina bada. Mai lalotamona ida ita gaukara hebou karana be idaunegai Ierusalema ai idia haginia rumadia ida ita hahegeregerea. Unai ruma ta ta be kahirakahira ai idia haginia dainai, salamo torea tauna ese Ierusalema ia gwauraia idia “haginia namonamo” hanuana. Unai dainai hanua taudia be idia durua bona gimaia heheni diba. Danu, ruma be unai bamona idia haginia dainai, salamo torea tauna ese Israela besena be mai lalotamona ida Iehova tomadiho henia totona idia hebou karana ia laloa. (Salamo 122:3, 4 duahia.) Hari bona do ia mai hisihisi badana ai, Iehova ena taunimanima idia lalotamona be gau badana.

12. Dirava ena taunimanima idia tuari henia neganai, dahaka ese ita do ia durua ita roho mauri totona?

¹² Dahaka dainai unai negai ita lalotamona be gau badana? Esekiela karoa 38 ia peroveta, “Goga, Magoga tano tauna” ese Dirava ena taunimanima do ia tuari henia. Unai negai gau ta ese eda lalotamona karana ia hadikaia lasi be namo. Tanobada taudia edia heduru do ita tahua be anina lasi. To, namona be eda tadikaka taihu kahirakahira ita noho. Momokani, ita laloa lasi ita be orea ta lalonai ita noho dainai do ita roho mauri. Iehova ena ladana ai idia boiboi taudia be Iehova bona ena Natuna ese do idia hamauria. (Ioe. 2:32; Mat. 28:20) To, namona be hanaihanai mai lalotamona ida Dirava ena taunimanima ida ita noho. Dirava ese sibona edia ura dalana idia badinaia taudia do ia hamauria, a?—Mika 2:12.

13. Ita herevalaia sivaraidia amo, Dirava idia gari henia matamata taudia ese dahaka idia dibaia?

¹³ Ia hedinarai goevagoeva, sibona edia ura idia badinaia matamata taudia ita tohotohoa be aonega karana lasi. Do ia mai hisihisi negana be kahirakahira dainai, ita ibounai, matamata bona buruka,  ita gaukara hebou be gau badana. Oibe, hari be nega namona gaukara hebou karana ita manadalaia, unai amo dokona negana ai mai lalotamona ida do ita noho.

14, 15. (a) Dahaka dainai hari Iehova ese matamata bona burukadia ia hadibaia noho? (b) Iehova be dahaka sisiba amo ita ia hagoadaia ita lalotamona totona?

¹⁴ Iehova be ita ia durua, ‘mai eda lalotamona danu’ ia do ita hesiai henia totona. (Sep. 3:8, 9) Ia ese vaira negana totona ita ia hadibaia noho, unai negai “Keriso lalonai gau ibounai [do] ia haboua lou.” (Efeso 1:9, 10 duahia.) Oibe, Iehova ia ura iunives lalonai mauri gaudia ibounai be mai lalotamona ida ia do idia tomadiho henia, bona unai do ia hagugurua. Matamata taudia e, unai ese umui ia durua mai lalotamona ida Iehova ena orea ida umui gaukara hebou, a?

¹⁵ Hari, Iehova ese ita ia hadibaia mai lalotamona ida ita noho ela bona hanaihanai. Nega momo Baibel ese ita ia hadibaia, do ita “durua heheni,” ta ta ita “hebogahisi henia bona lalokau henia,” ita “durua heheni bona hagoadaia heheni noho.” (1 Kor. 12:25; Roma 12:10; 1 Tes. 4:18; 5:11) Iehova ia diba Keristani taudia be goevadae lasi, bona do idia hekwarahi lalotamona ai idia noho totona. Unai dainai, namona be “mai kudouna ibounai ida do [ita] gwauatao heheni.”​—Efe. 4:32.

16, 17. (a) Keristani heboudia ena badina ta be dahaka? (b) Matamata taudia ese Iesu ena haheitalai amo dahaka idia dibaia?

¹⁶ Iehova ese Keristani heboudia amo ita ia durua ita gaukara hebou totona. Nega momo Heberu 10:24, 25 ena hagoadaia herevana ita duahia. Unai hebou edia badina ta be ita “ta ta ibounai do ita laloa bona do ita hagoadaia, ita lalokau heheni bona kara namodia ita karaia totona.” Hebou karana amo “do ita hagoadaia heheni, bona unai kara do ita habadaia noho, badina [ita] itaia unai dina be ia kahirakahira noho.”

¹⁷ Hebou laloa bada karana dekenai Iesu be haheitalai namona. Ena mauri lagani be 12 neganai, ena tama sina danu tomadiho hebou badana ta dekenai idia lao. Dina ta ia idia tahua, to ia be matamata taudia danu ia loaloa kava lasi. Iosepa bona Maria ese dubu helaga lalonai idia davaria, dubu ena hadibaia taudia danu Dirava ena hereva idia herevalaia.​—Luka 2:45-47.

18. Edena dala ai iseda guriguri ese lalotamona karana ia havaraia diba?

 ¹⁸ Ita lalokau heheni bona Keristani heboudia amo iseda lalotamona karana ita hagoadaia sibona lasi, to ta ta totona ita guriguri danu. Bema iseda tadikaka totona ita guriguri, anina be idia ita laloa bada. Unai be Keristani taudia badadia sibona ese do idia karaia gauna lasi. Bema oi be matamata tauna, unai bamona oi karaia amo emu hetura karana emu Keristani ruma besena ida oi hagoadaia, a? Bema unai oi karaia, inai tanobada gunana ia ore neganai, do oi roho mauri.

19-21. (a) Edena dala ai ita hahedinaraia, “ita be tauanina ena kahana idauidau”? Haheitalai haida gwauraia. (b) Tadikaka haida ese disasta negadiai heduru idia henia karana amo dahaka ita dibaia?

¹⁹ Iehova ena taunimanima be Roma 12:5 idia badinaia noho, ia gwau: “Ita be tauanina ena kahana idauidau.” Dika badadia idia vara neganai unai kara ia hedinarai. December 2011 ai, lai gubana dainai Philippine ena motumotu ladana Mindanao be abata ese ia hadikaia. Hanuaboi tamona lalonai, ruma ibounai 40,000 mai kahana, iseda tadikaka momo edia ruma danu, be abata ese ia hadikaia. To brens ofesi ena ripoti ese ia hahedinaraia, “heduru henia komiti ese edia durua gaukara idia do hamatamaia lasi neganai, gabu ma haida amo Keristani tadikaka be edia heduru gaudia idia siaia.”

²⁰ Unai hegeregerena, Japan ena ist kahana dekenai tano mareremarere badana bona sunami ia vara neganai, tadikaka bona taihu momo ese dika bada idia davaria. Haida ese edia gau ibounai idia haboioa. Ena ruma ia haboioa taihuna, Yoshiko, ena noho gabuna ena daudau Kingdom Hall amo be kilomita 40 bamona. Ia gwau: “Gabeai, ai hoa badina tano mareremarere dinana murinai, sekit tauna bona tadikaka ma ta idia mai ai idia tahua.” Mai moale ida ma ia gwau: “Kongrigeisen ese Dirava ena hereva amo ai idia durua bona hagoadaia karana ai moalelaia bada. Danu ai ese kouti, tamaka, baege, bona dabua momo ai abia.” Heduru henia komiti ena memba ta ia gwau: “Japan lalonai tadikaka ibounai idia gaukara hebou, idia durua heheni totona. Tadikaka haida be United States amo idia mai ai idia durua totona. Ai henanadai dahaka dainai gabu daudau amo idia mai neganai, idia gwau: ‘Ai be emai Japan tadikaka danu ai lalotamona bona heduru idia abia be namo.’” Ena orea taudia ia laloa bada oreana lalonai oi noho dainai, oi moale, ani? Namona be oi diba Iehova ese unai lalotamona karana ia moalelaia.

²¹ Bema hari ita durua heheni, gabeai hekwakwanai idia vara neganai, do ita gaukara hebou diba, herevana edeseni ita noho. Unai kara ese ita ia durua, inai tanobada gunana ia ore gwauraia neganai, do idia vara hekwakwanai ita haheaukalaia totona. Japan ai lai badana ese ena ruma ia hadikaia taihu ladana Fumiko, ia gwau: “Nega dokona be ia kahirakahira momokani. Hekwakwanai lasi negana ita naria noho lalonai, namona be eda abidadama tamona taudia ita durua noho.”

22. Keristani lalotamona ese dahaka namo do ia havaraia?

²² Hari, matamata taudia bona burukadia be idia gaukara hebou karana amo idia hegaegae, inai lalotamona lasi tanobadana do ia ore neganai idia roho mauri totona. Guna bamona, iseda Dirava ese ena taunimanima do ia hamauria. (Isa. 52:9, 10) Namona be hanaihanai oi laloatao, do oi roho mauri diba bema Dirava ena lalotamona taudia danu oi gaukara hebou. Ita do ia durua gauna ma ta be ita abia vadaeni gaudia ita laloa bada. Stadi gabena ese unai do ia herevalaia.