Dahaka Dainai Lohiabada Ena Anibou Ita Karaia?
“Inai bamona do umui karaia noho lau umui laloatao totona.” —1 KOR. 11:24.
1, 2. Lagani 33 C.E. Nisan 14 ena hanuaboi ai, Iesu be dahaka ia karaia? (Laulau ginigunana itaia.)
LAGANI 33 C.E. Nisan 14 ena hanuaboi ai, hua kuboruna ia hedinarai bona Ierusalema be ia diaridiari. Iesu bona ena aposetolo taudia be Pasova ariana idia karaia ore—unai be lagani 15 gunanai Israela taudia be Aigupito amo idia roho mauri karana laloatao ariana. Unai murinai, Iesu be ena aposetolo taudia 11 ida mai anina bada aniani ta ia karaia. Unai amo ena aposetolo taudia ese lagani ta ta ai unai aniani do idia karaia, ena mase laloatao totona. a—Mat. 26:1, 2.
2 Iesu ia guriguri murinai, hatubua lasi paraoa be aposetolo taudia dekenai ia henia, bona ia gwau: “Umui abia bona umui ania.” Ia ese kapusi ta ia abia bona Dirava ia tanikiu henia murinai, ia gwau: “Inai kapusi amo umui ibounai umui inua.” (Mat. 26:26, 27) Unai murinai, Iesu be ena aposetolo taudia dekenai aniani ma haida do ia henia lasi, to idia dekenai mai anina bada gaudia momo do ia herevalaia.
3. Inai stadi ai dahaka henanadai do ita herevalaidia?
3 Iesu be ena mase ena Memorial, gabeai idia gwauraia “Lohiabada ena Anibou,” ia hamatamaia tauna. (1 Kor. 11:20) Reana haida do idia henanadai: Dahaka dainai Iesu ena mase ita laloatao? Paraoa bona wain edia anina be dahaka? Edena dala ai Memorial totona do ita hegaegae? Daidia ese paraoa idia ania bona wain idia inua diba? Bona Keristani taudia ese edia helaro idia herevalaia siridia be edena bamona idia laloa?
DAHAKA DAINAI IESU ENA MASE ITA LALOATAO?
4. Iesu ena mase ese dala ia kehoa dahaka ita abia totona?
4 Ita be Adamu bona Heva edia natudia dainai, mai eda kara dika bona ita mase. (Roma 5:12) Goevadae lasi tauna ta be hegeregere lasi Dirava dekenai ia bona ma haida edia mauri davalaia boubouna ia henia totona. (Sal. 49:6-9) To, Iesu sibona be hegeregere dainai, ena mase amo mauri davalaia boubouna ia henia—unai be ena goevadae tauanina bona ia bubua rarana. Iesu ese unai ia karaia amo dala ia kehoa kara dika bona mase amo ita ia ruhaia, bona mauri hanaihanai ita abia diba.—Roma 6:23; 1 Kor. 15:21, 22.
5. (a) Edena dala ai ita diba Dirava bona Keriso ese ita idia lalokau henia? (b) Dahaka dainai Iesu ena mase laloatao hebouna ai ita noho be namo?
5 Unai mauri davalaia boubouna ese ia hahedinaraia Dirava ese taunimanima ia lalokau henia bada. (Ioa. 3:16) Iesu ese ena mauri ia henia karana ese ia hahedinaraia ita ia lalokau henia. Dahaka dainai? Badina guba ai Dirava ena “gaukara karaia tauna bamona” ia noho neganai, ia be tanobada ai idia ‘noho taudia ibounai dekenai ia moale.’ (Aon. 8:30, 31) Dirava bona ena Natuna idia karaia karana ese iseda lalona ia veria Iesu ena mase laloatao hebouna ai ita noho bona ena hakaua herevana ita badinaia. Iesu ia gwau: “Inai bamona do umui karaia noho lau umui laloatao totona.”—1 Kor. 11:23-25.
PARAOA BONA WAIN EDIA ANINA BE DAHAKA?
6. Paraoa bona wain edia anina be dahaka?
6 Iesu be Memorial ia karaia neganai ia ese hoa dalanai paraoa bona wain be ena tauanina bona rara ai ia halaoa lasi. To, paraoa ia herevalaia neganai, ia gwau: “Inai be egu tauanina ia laulaulaia.” Bona wain ia herevalaia neganai, ia gwau: “Inai be egu rara, ia be ‘kontraka ena rara’ ia laulaulaia, taunimanima totona do ia bubua.” (Mar. 14:22-24) Unai dainai, paraoa bona wain ese Iesu ena tauanina bona iena rara ia laulaulaia.
7. Memorial ai idia gaukaralaia paraoa ese dahaka ia laulaulaia?
7 Lagani 33 C.E. ena hanuaboi ai, Iesu ese Pasova aria amo ia abia paraoa, hatubua muramura ia noho lasi gauna ia gaukaralaia. (Eso. 12:8) Baibel ai hatubua muramura ese koikoi karadia o kara dika ia laulaulaia. (Mat. 16:6, 11, 12; Luka 12:1) Unai dainai, Iesu ese hatubua muramura ia noho lasi paraoa ia gaukaralaia be maoro, badina unai ese iena tauanina goevadaena ia laulaulaia. (Heb. 7:26) Unai dainai, Memorial ai unai bamona paraoa idia gaukaralaia.
8. Memorial ai idia gaukaralaia wain ese dahaka ia laulaulaia?
8 Lagani 33 C.E. Nisan 14 ai, Iesu ese ia gaukaralaia wain be ena rara ia laulaulaia, hari Memorial ai idia gaukaralaia wain be unai bamona danu. Ierusalema murimurinai ia noho hanua ladana Gologota ai, Iesu ena rara ia bubua “kara dika gwauatao totona.” (Mat. 26:28; 27:33) Memorial ai paraoa bona wain be Iesu ese ia idia badinaia taudia totona ia henia boubou hereadaena ia laulaulaia bona unai ita moalelaia. Unai dainai, ita ura lagani ta ta ai idia karaia Lohiabada ena Anibou totona do ita hegaegae.
ITA HEGAEGAE DALADIA HAIDA
9. (a) Dahaka dainai Memorial ena Baibel duahiduahi ita karaia be namo? (b) Mauri davalaia boubouna be edena bamona oi laloa?
9 Dina Iboudiai Buka Helaga Tahua buklet lalonai ia noho Memorial ena Baibel duahiduahi sediual ita badinaia neganai, Iesu ia do mase lasi neganai ia karaia gaudia do ita laloa dobu. Danu, unai ese ita do ia durua eda kudouna ita hegaegaelaia Lohiabada ena Anibou totona. Taihu ta ia gwau: “Memorial ai naria mai moale ida. Lagani ta ta ai ena anina be ia bada ia lao. Lau laloatao, . . . fineral rumana ai lau gini bona tamagu ena mase tauanina lau itaia neganai, mauri davalaia boubouna ena anina lau laloa bada bona lau moalelaia. . . . Idia gwauraia Baibel siridia iboudiai lau diba bona edia anina lau gwauraia hedinarai diba. To egu tamana ena mase tauanina lau itaia neganai, mauri davalaia boubouna ese ia havaraia diba gaudia lau lalodia bona unai ese egu lalona ia hamoalea bada.” Oibe, Memorial totona ita hegaegae neganai, Iesu ena mauri davalaia boubouna ese kara dika bona mase amo ita ia ruhaia dalana do ita laloa dobu.
Inai tulu namodia oi gaukaralaia Memorial totona emu kudouna do ia hegaegaelaia (Paragraf 9 itaia)
10. Memorial totona ita hegaegae neganai, dahaka gau ma haida ita karaia diba?
10 Memorial totona ita hegaegae dalana ta be, palani do ita karaia eda hesiai gaukara ita habadaia, hegeregere Memorial neganai heduru painia ita karaia diba. Lohiabada ena Anibou totona eda Baibel stadi bona ma haida ita boiria neganai, do ita moale idia dekenai Dirava, ena Natuna bona Iehova idia hanamoa taudia edia hahenamo ita herevalaia totona.—Sal. 148:12, 13.
11. Edena dala ai Korinto taudia ese Memorial ai idia gaukaralaia paraoa bona wain idia gaukaralaia kerere?
11 Lohiabada ena Anibou totona ita hegaegae neganai, namona be aposetolo Paulo ena hereva Korinto Keristani kongrigeisen dekenai ita laloa. (1 Korinto 11:27-34 duahia.) Paulo ia gwau bema tau ta be kara maorona ia karaia lasi bona paraoa ia ania eiava kapusi amo ia inua ia be “mai ena kerere, [Iesu Keriso] ena tauanina bona ena rara dekenai.” Unai dainai, namona be horoa tauna ta be “sibona do ia tahua namonamo guna,” unai murinai ia hegeregere paraoa do ia ania bona wain do ia inua. To, bema unai bamona ia karaia lasi “ia ese sibona dekenai hahemaoro ia mailaia.” Korinto taudia momo be kara dika idia karaia dainai, momo be idia “manoka bona idia gorere, bona sisina momo be mase lalonai idia mahuta.” Reana idia haida be Memorial vairanai o lalonai idia aniani bona inuinu bada dainai idia mahuta. Idia ese hemataurai lasi dalanai paraoa bona wain idia gaukaralaia dainai, Dirava ese idia ia lalonamo henia lasi.
12. (a) Paulo ese Memorial be dahaka ida ia hahegeregerea, bona dahaka sisiba ia henia? (b) Bema paraoa ia ania bona wain ia inua tauna ese kerere badana ta ia karaia, dahaka ia karaia be namo?
12 Paulo ese Memorial be ma haida ida aniani hebou karana ida ia hahegeregerea, bona unai hebou lalonai idia noho taudia ia sisiba henia. Ia gwau: “Iehova ena kapusi bona demoni edia kapusi be nega tamona umui inua diba lasi. Bona ‘Iehova ena pata’ ai bona demoni edia pata ai nega tamona umui aniani diba lasi.” (1 Kor. 10:16-21) Bema Lohiabada ena Anibou ai paraoa ia ania bona wain ia inua tauna ese kerere badana ta ia karaia, elda taudia amo heduru ia tahua be namo. (Iamesi 5:14-16 duahia.) Bema unai horoa tauna ese ena kara amo ‘helalo-kerehai toana ia hahedinaraia,’ vadaeni Memorial ai paraoa ia ania bona wain ia inua karana ese ia hahedinaraia ia be Iesu ena boubou gauna ia matauraia.—Luka 3:8.
13. Dahaka dainai mai guriguri ida Dirava ese ia henia helarona do ita laloa?
13 Memorial totona ita hegaegae lalonai, mai guriguri ida Dirava ese ia henia helarona ita laloa karana ese namo do ia havaraia. Iehova dekenai edia mauri idia gwauhamatalaia bona ena Natuna murinai idia raka hesiai taudia be Iesu ena boubou gauna idia matauraia. Unai dainai, bema idia diba idia be horoa Keristani taudia lasi, vadaeni idia ese paraoa idia ania lasi bona wain idia inua lasi. To, edena dala ai ta do ia diba ia ese paraoa ia ania bona wain ia inua diba?
DAIDIA ESE PARAOA IDIA ANIA BONA WAIN IDIA INUA DIBA?
14. Memorial ai paraoa idia ania bona wain idia inua taudia be kontraka matamatana lalonai idia noho, unai ena anina be dahaka?
14 Memorial ai paraoa idia ania bona wain idia inua taudia idia diba momokani idia be kontraka matamatana lalonai idia noho. Iesu ese wain ia herevalaia neganai, ia gwau: “Inai kapusi ese kontraka matamatana ia laulaulaia, egu rara dainai ia vara.” (1 Kor. 11:25) Dirava be peroveta tauna Ieremia amo ia gwau, ia ese kontraka matamatana do ia karaia, unai ese Israela ida ia karaia Taravatu kontrakana ena gabu do ia abia. (Ieremia 31:31-34 duahia.) Dirava be lauma Israela taudia ida kontraka matamatana ia karaia. (Gal. 6:15, 16) Keriso ena mase bona ia bubua rarana ese unai kontraka matamatana ia hamomokania. (Luka 22:20) Iesu be unai kontraka matamata ena medieita, bona unai kontraka lalonai idia noho abidadama horoa taudia be guba ai edia ahuna do idia abia.—Heb. 8:6; 9:15.
15. Daidia be Basileia gwauhamatana lalonai idia noho, bona bema Keriso idia badinaia noho dahaka hahenamo do idia abia?
15 Memorial ai paraoa do idia ania bona wain do idia inua taudia idia diba momokani, idia be Basileia gwauhamatana lalonai idia noho. (Luka 12:32 duahia.) Iesu ena horoa tadikaka ai idia lao, ia idia badinaia bona ia abia hisihisi idia abia taudia, be guba ai ia ida do idia lohia. (Fili. 3:10) Idia be Basileia gwauhamatana lalonai idia noho dainai, Keriso ida guba ai king gaukarana do idia karaia ela bona hanaihanai. (Apok. 22:5) Idia sibona ese Lohiabada ena Anibou lalonai paraoa idia ania bona wain idia inua diba.
16. Roma 8:15-17 ena anina gwauraia hedinaraia.
16 Horoa taudia idia diba momokani idia be Dirava ena natudia bona idia sibona ese Memorial ai paraoa idia ania bona wain idia inua diba. (Roma 8:15-17 duahia.) Paulo ia gwau, idia boiboi: “Abba, Tamana!” Unai Aramia gado herevana “Abba” ese lalokau bona hemataurai dalanai idia gaukaralaia hereva, “tamana” ia hahedinaraia. Unai ese horoa taudia bona Iehova huanai ia noho hetura karana ia hahedinaraia, idia be ‘lauma amo Dirava ese ena natudia ai ia halaoa.’ Dirava ena lauma helaga ese idia ia hadibaia idia be Iehova ena horoa natudia. To, namo lasi ita gwau unai ia vara badina horoa taudia idia ura lasi tanobada maurina. Idia diba bema Iesu idia badina ela bona idia mase, idia be ia ida guba Basileiana lalonai do idia lohia hebou. Hari, Keriso idia badinaia 144,000 orena taudia sibona idia noho, idia sibona be Iehova, ‘helaga tauna ese ia horoa.’ (1 Ioa. 2:20; Apok. 14:1) Idia be lauma helaga idia abia dainai mai boiboi bada ida idia gwau, “Abba, Tamana!” Dirava idia tura henia be hahenamo badana.
BAIBEL ESE IA HEREVALAIA HELARONA LALOA BADA
17. Horoa taudia be dahaka helaro idia abia, bona edena bamona idia laloa?
17 Bema oi be horoa Keristani tauna ta, emu guriguri lalonai guba helarona do oi herevalaia. Baibel ese guba ai Headava Matamata Tauna, Iesu Keriso bona ena maoheni edia headava ia herevalaia neganai, oi diba unai be oi ia herevalai danu bona vaira neganai unai hahenamo oi abia totona oi naria noho. (2 Kor. 11:2; Ioa. 3:27-29; Apok. 21:2, 9-14) Baibel ai Dirava ese ena lauma natudia dekenai ena lalokau ia herevalaia neganai, do oi gwau, “Unai be lau ia herevalaia.” Bona Baibel ai Iehova ese ena horoa natudia dekenai hakaua herevadia ia henia neganai, lauma helaga ese emu lalona do ia veria unai oi badinaia bona emu kudouna dekenai do oi gwau, “Unai be mai anina lau dekenai.” Dirava ena lauma helaga ese oi ia hadibaia oi be guba helarona oi abia.
18. “Mamoe ma haida” be dahaka helaro idia abia, bona edena bamona unai oi laloa?
18 Bema oi be “hutuma bada” o “Mamoe ma haida” lalonai oi noho, Dirava ese oi dekenai tanobada helarona ia henia. (Apok. 7:9; Ioa. 10:16) Oi ura Paradaiso ai do oi noho hanaihanai, bona Baibel ese vaira negai tanobada maurina ia herevalaia dalana laloa dobu karana oi moalelaia. Oi ura vaira negai emu famili bona ma haida ida mai maino ida do umui noho. Ogogami, hitolo, hisihisi, gorere, bona mase do idia ore negana oi naria noho. (Sal. 37:10, 11, 29; 67:6; 72:7, 16; Isa. 33:24) Idia toreisi lou taudia do oi welkam henia bona tanobada ai do umui mauri hanaihanai. (Ioa. 5:28, 29) Iehova oi tanikiu henia, badina ia ese oi dekenai tanobada helarona ia henia! Ena be Memorial ai paraoa oi ania lasi bona wain oi inua lasi, to unai hebou oi lao henia karana ese ia hahedinaraia oi be Iesu Keriso ena mauri davalaia boubouna oi moalelaia.
DO OI LAO, A?
19, 20. (a) Dirava ese ia henia helaro namona oi abia totona, Dahaka oi karaia be namo? (b) Dahaka dainai Lohiabada ena Anibou oi lao be namo?
19 Ena be emu helaro be guba ai o tanobada ai, to unai helaro oi abia diba bema Iehova Dirava, Iesu Keriso bona mauri davalaia boubouna oi abidadama henia. Memorial hebouna oi lao henia karana ese oi ia durua emu helaro bona Iesu Keriso ena mase ese ia havaraia namo oi laloa dobu totona. Friday, April 3, 2015 ai taunimanima milioni momo be Kingdom Hall bona gabu ma haida dekenai Lohiabada ena Anibou do idia karaia. Namona be emu lalonai oi hadaia unai hebou oi lao totona.
20 Memorial hebouna oi lao henia karana ese oi do ia durua Iesu ena mauri davalaia boubouna oi laloa bada totona. Memorial tok oi kamonaia namonamo neganai, emu lalona do ia veria emu dekena tauna oi lalokau henia bona idia dekenai Iehova ena lalokau bona iena palani namona taunimanima totona do oi herevalaia. (Mat. 22:34-40) Namona be Lohiabada ena Anibou dekenai oi lao.
a Heberu taudia edia kalenda ai dina ia diho (6 oklok), daba ia rere, bena dina ma ia diho lou (6 oklok) be dina ta.