1. Iseda negai Keristani taudia be haroro gaukara ai dahaka koua gaudia idia davaria?

LAGANI handred gunanai, Bible Student taudia * be koua gaudia momo idia davaria. Aposetolo edia nega hegeregerena, unai Bible Student taudia ese idia harorolaia sivaraina be taunimanima momo idia do diba lasi. Idia be grup maragina ta sibona, bona taunimanima idia laloa idia be sikuli bada idia abia lasi taudia. Danu, gabeai idia be Satani Diabolo “ena badu dikadika” karana do idia itaia. (Apok. 12:12) Bona idia ese haroro gaukara be “nega ena dokona dekenai, metau dikadia momo do idia vara” neganai do idia karaia.—2 Tim. 3:1.

2. Hari, Iehova be dahaka ia karaia dainai, haroro gaukara ia bada lao noho?

² To, Iehova ia ura hari ena taunimanima ese sivarai namona harorolaia gaukarana do idia habadaia, bona gau ta ese Iehova do ia koua lasi ena ura ia hagugurua totona. Idaunegai Israela taudia be Babulonia amo ia hamauridia hegeregerena, hari ia ese ena hesiai taudia be “Babulonia badana,” tomadiho koikoi oreadia ibounai unai, amo ia hamauridia. (Apok. 18:1-4) Iseda namo totona ita ia hadibaia, ita dekenai maino ena hanamoa  ia henia, bona ita ia durua iena hadibaia herevadia be ma haida ita hadibaia totona. (Isaia 48:16-18 duahia.) Ena be Iehova ese iseda gaukara ia hakaua noho, to ita gwau lasi ia ese tanobada ai idia vara gaudia ia haidaua, unai amo ita ia durua ita haroro totona. Momokani, tanobada ai idia vara gaudia haida ese dala ia kehoa haroro gaukara ita karaia totona, to Iehova ena heduru dainai Satani ese ia lohiaia tanobadana ai idia vara dagedage bona hekwakwanai ma haida ita hanaia diba.—Isa. 41:13; 1 Ioa. 5:19.

3. Edena dala ai Daniela ena peroveta herevana ia guguru?

³ Iehova ena peroveta tauna Daniela ia gwau, dokona neganai “aonega” o hereva momokani do ia bada herea. (Daniela 12:4 duahia.) Iehova ese Bible Student taudia ia durudia Baibel ena hereva momokani idia lalopararalaia bona Kerisendom oreadia edia hahediba hereva koikoidia idia dadaraia totona. Hari, Ia ese ena taunimanima ia gaukaralaia Baibel ena hereva momokani be tanobada hegegemadai idia halasia totona. Ita itaia Daniela ena peroveta herevana be ia guguru noho. Kahirakahira taunimanima eit milioni be Baibel ena hereva momokani idia diba bona tanobada ibounai lalonai idia harorolaia. Dahaka gaudia haida ese Iehova ena taunimanima ia durua tanobada ibounai haroro gaukarana idia karaia totona?

4. Lagani 1800 bona 1900 lalodiai Baibel hahanaia karana dekenai dahaka ia vara?

⁴ Taunimanima momo be mai edia Baibel dainai, idia dekenai sivarai namona ita harorolaia diba. Lagani handred momo lalodiai, Kerisendom ena gunalaia taudia ese taunimanima idia koua Baibel idia duahia lasi totona, danu idia ese Baibel hahanaia taudia haida idia alaia mase. To, lagani 1800 bona 1900 lalodiai, Baibel hahanaia oreana ese gado 400 bamona ai Baibel idia hahanaia bona idia printaia. Unai lagani edia dokonai, taunimanima momo be mai edia Baibel, to ena hadibaia herevadia idia lalopararalaia lasi.

5. Baibel hahanaia gaukarana dekenai Iehova ena Witnes taudia be dahaka idia karaia?

⁵ Bible Student taudia idia diba haroro gaukara idia karaia be namo, unai dainai Baibel ena hadibaia herevadia idia hahedinaraia. Danu, Iehova ena orea be Baibel idauidau ia gaukaralaia bona hariharilaia. Lagani 1950 ai, New World Translation of the Holy Scriptures ia hahanaia, bona unai Baibel ibounai eiava ena kahana be gado 120 mai kahana ai idia hahanaia vadaeni. Lagani 2013 ai idia halasia New World Translation Baibel, English gado gauna dainai, gado ma haida ai idia hahanaia be auka lasi. Danu, unai bamona Baibel ese iseda haroro gaukara ia durua.

6, 7. (a) Idia hanaia lagani handred lalodiai, dahaka tuari idia vara? (b) Tano haida ai maino ia vara dainai, edena dala ai unai ese haroro gaukara ia durua?

⁶ Reana do oi henanadai, ‘Guna negadia ai maino be tanobada ai ia vara eiava lasi?’ Hegeregere, lagani 1900 ai, taunimanima milioni be tanobada tuaridia rua lalonai idia mase. To lagani 1942 ai, Tanobada Tuarina Iharuana lalonai Iehova ena Witnes taudia edia hakaua tauna, Nathan Knorr ese hebouhebou ta dekenai tok ladana “Maino—Do ia Noho Daudau Diba, A?” ia henia. Unai tok ai Apokalupo karoa 17 ia herevalaia bona ia hahedinaraia tuari murinai Aramagedono do ia vara lasi, to maino do ia vara.—Apok. 17:3, 11.

⁷ Tanobada Tuarina Iharuana murinai, maino ia vara lasi. Lagani 1946 bona 2013  huanai, tuari 331 bamona idia vara bona taunimanima milioni idia mase. To unai laganidia lalonai, tano momo dekenai taunimanima be maino ai idia noho, unai dainai Iehova ena taunimanima ese unai nega ai sivarai namona idia harorolaia. Dahaka ia vara? Lagani 1944 ai, tanobada ibounai lalonai Basileia harorolaia taudia be 110,000 bamona. Hari, unai namba ia bada daekau 8 milioni bamona! (Isaia 60:22 duahia.) Oibe, ita moale badina unai bamona maino negadiai sivarai namona ita harorolaia diba.

8, 9. Dahaka trenspot daladia idauidau ita gaukaralaia diba, bona edena dala ai unai ese iseda haroro gaukara ia durua?

⁸ Motuka bona gau ma haida ese haroro gaukara ia durua bada. Lagani 1900 ai, The Watch Tower ginigunana idia printaia bona lagani 21 murinai, United States ai motuka ibounai 8,000 idia noho, bona motuka edia dala be momo lasi. Hari, tanobada hegegemadai motuka bilioni ta mai kahana idia noho, bona motuka edia dala be momo herea. Motuka bona dala idia noho dainai, sivarai namona be gunika hanuadia ai idia noho taudia dekenai ita abia lao diba. Ena be motuka be lasi bona gabu daudau ita raka, to unai ita karaia badina ita ura hahediba taudia halaoa gaukarana ita karaia.—Mat. 28:19, 20.

⁹ Danu, trenspot daladia ma haida ita gaukaralaia. Ita ese motuka, bouti, bona trein amo Baibel bukadia be wiki haida lalonai gabu ta ta dekenai ita abia lao diba. Sekit naria taudia, Brens Komiti, misinari taudia, bona ma haida be hebouhebou idia lao o asainmen ma haida karaia totona peleini idia gaukaralaia. Danu, hedikwota amo Hakaua Oreana ena memba taudia bona tadikaka ma haida be peleini amo tano momo idia lao, unai amo tadikaka taihu idia hagoadaia bona hakaua herevadia idia henia totona. Unai bamona trenspot daladia ese dala ia kehoa Iehova ena taunimanima be mai lalotamona ida idia noho totona.—Sal. 133:1-3.

10. Edena dala ai ita diba English gado be tanobada hegegemadai idia gaukaralaia?

¹⁰ Aposetolo edia negai, Roma Basileiana dekenai taunimanima momo be, Greek gado, Koine, idia herevalaia. Hari, dahaka gado be momo ese idia herevalaia  diba? Reana momo do idia haere, unai be English gado. Buka ta (English as a Global Language) ia gwau: “Tanobada hegegemadai taunimanima 1.7 bilioni be English gado idia hereva o idia laloparara diba.” Tanobada hegegemadai momo be English gado idia diba, badina English gado be bisinesi, politikol, saiens, bona teknoloji dekenai idia gaukaralaia.

11. Edena dala ai English gado ese tomadiho momokani ia durua?

¹¹ Momo be English gado idia diba dainai, unai ese tomadiho momokani ia durua. Lagani momo lalodiai, The Watchtower bona pablikeisen ma haida be English gado gaudia idia printaia guna. Iehova ena Witnes taudia edia hedikwota ai English gado idia herevalaia. Bona Watchtower Educational Center, Patterson, New York, U.S.A. ai, stiuden taudia hadibaia totona English gado idia gaukaralaia.

12. Iehova ena hesiai taudia ese Baibel bukadia be gado hida ai idia hahanaia, bona edena dala ai teknoloji ese unai gaukara ia durua?

¹² Iseda maduna be bese ibounai dekenai Basileia ena sivarai namona do ita harorolaia, unai dainai iseda Baibel bukadia be gado 700 bamona ai ita hahanaia. Unai karaia totona, kompiuta program ladana MEPS (Multilanguage Electronic Phototypesetting System) ita gaukaralaia. Unai ese ita ia durua tanobada hegegemadai Basileia ena sivarai ita halasia, bona mai lalotamona ida ita noho. To, unai ia vara ena badina badana be, ita ese “gado goevadaena,” Baibel ena hereva momokani ita lalopararalaia.—Sepanaia 3:9 duahia. *

13, 14. Edena dala ai taravatu bona kota edia disisen ese ita idia durua?

¹³ Vanegai stadi ai ita herevalaia bamona, aposetolo edia negai Roma basileiana ese ia atoa taravatu ese Keristani taudia ia gimaia. Unai hegeregerena, hari tano ta ta dekenai idia atoa taravatudia ese Keristani taudia ia gimaia. Hegeregere, United States ai—iseda hedikwota ia noho gabuna—konstitusen o taravatu ese tomadiho, herevahereva bona hebouhebou karana ia koua lasi. Unai ese dala ia kehoa United States ai tadikaka idia hebou bona Baibel idia herevalaia, bona ma haida dekenai idia dibaia gaudia idia herevalaia diba. To, nega haida unai bamona gaudia karaia  totona kota ita lao. (Fili. 1:7) United States ai, ena be haida ese gavamani ena taravatu idia gaukaralaia Iehova ena taunimanima idia koua idia haroro lasi totona, to Iehova ena taunimanima be kota badadia idia lao bona nega momo unai kota dekenai idia kwalimu.

¹⁴ Tano haida ai kota ese gwaumaoro idia henia Iehova ita tomadiho henia bona haroro gaukara ita karaia totona. Tano ma haida ai kota dekenai ita kwalimu lasi, to dala ita karaia kota badadia ita lao totona. Hegeregere, June 2014 ai, European Court of Human Rights ia gwau ita ese kota ibounai 57 ita kwalimu, bona unai kota edia disisen be Europe ena tano ma haida dekenai idia badinaia danu. Ena be ‘bese ibounai ese ita idia inai henia,’ to tano momo ai kota edia disisen ese idia hahedinaraia ita be mai eda maoro tomadiho momokani ita badinaia totona.—Mat. 24:9.

15. Printa masinidia dekenai dahaka gau haida idia idau, bona edena dala ai unai ese ita ia durua?

¹⁵ Printa masini matamatadia ese tanobada hegegemadai sivarai namona harorolaia gaukarana ia durua. Lagani momo lalodiai, taunimanima be Johannes Gutenberg ese lagani 1450 ai ia karaia flatbed printa masini idia gaukaralaia. To idia hanaia lagani 200 lalonai, unai printa masini be idia idau. Printa masini badadia bona idia heau haraga diba gaudia idia karaia. Bona pepa bona buka karaia ena davana ia maragi. Unai bamona senisi idauidau idia vara dainai, dahaka ia vara iseda pablikeisen dekenai? Lagani 1879 ai, Watch Tower ginigunana be English gado gauna sibona idia printaia. Unai magasin be laulau ia noho lasi, bona kopi 6,000 idia printaia. Hari, The Watchtower be gado 200 mai kahanai idia printaia. Unai magasin lalonai laulau mai ena kala idia noho bona kopi 50 milioni idia printaia.

16. (a) Dahaka gaudia ese ita idia durua tanobada hegegemadai ita haroro totona? (Laulau ginigunana itaia.) (b) Edena dala ai Isaia 61:6 ena peroveta herevana ia guguru?

¹⁶ Idia hanaia lagani 200 lalonai, Dirava ena taunimanima ese sivarai namona harorolaia totona idia gaukaralaia gaudia ma haida mani oi laloa. Matamanai ita ese trein, motuka, bona peleini ita herevalaia. To idia gaukaralaia gaudia ma haida be inai: Basikele, taipraita, matakepulu taudia edia buka karaia masini, telegraf, telefon, kamera, audia, bona vidio rekoda, reidio, televisen, muvini piksa, kompiuta, bona Intanet. Unai ese dala idauidau ai ita idia durua, hahediba taudia halaoa gaukarana ita hagugurua totona. Baibel ia gwau, Iehova ena taunimanima be “bese idauidau edia kohu momo do [idia] abia.” Unai peroveta herevana be ia guguru, badina ita ese teknoloji ita gaukaralaia Baibel bona Baibel bukadia be gado momo ai ita halasia totona.—Isaia 61:6 duahia.

17. Dahaka dainai Iehova ia ura ia ida ita gaukara hebou?

¹⁷ Momokani, gau momo ese idia hamomokania Dirava be iseda gaukara ia hanamoa. Iehova be ena ura hagugurua totona iseda heduru dekenai ia tabekau lasi. To, iseda lalokau guba Tamana ia ura ita be ia “ida [ita] gaukara hebou taudia.” Bona ita ia durua ia bona iseda dekena taudia dekenai lalokau ita hahedinaraia totona. (1 Kor. 3:9; Mar. 12:28-31) Namona be eda nega ita gaukaralaia Basileia ena sivarai do ita harorolaia—tanobada hegegemadai lalonai unai be mai anina bada gaukarana. Gau badana be, Iehova ita tanikiu henia badina ia ese tanobada ibounai hadibaia gaukarana ia hakaua bona hanamoa!