LAGANI 1870 lalodiai, Pittsburgh (Allegheny), Pennsylvania, U.S.A. ai, orea maragina ta be Baibel idia stadilaia matamaia. Unai orea maragina be Charles Taze Russell ese ia gunalaia. Idia ese Keriso ena mauri davalaia boubouna idia stadilaia, bona idia laloparara Iehova ena ura dekenai unai be mai anina bada. Idia moale badina idia diba unai mauri davalaia boubouna ese dala ia kehoa ita ibounai, Iesu idia do diba lasi taudia danu, ese mauri hanaihanai ita abia! Unai ese idia ia doria lagani ta ta ai Iesu ena mase ena Memorial hebouna idia karaia totona.—1 Kor. 11:23-26.

Tadikaka Russell ese ia halasia magasin, Zion’s Watch Tower, ese ia hahedinaraia mauri davalaia boubouna be Dirava ena lalokau karana badana. Unai magasin ia gwau Keriso ena mase laloatao negana be “mai anina bada negana,” bona duahia taudia ia hagoadaia Pittsburgh o gabu ma ta ai idia karaia Memorial hebouna idia lao henia totona. Ma ia gwau: “Ena be abidadama taudia rua o toi idia hebou”—eiava tamona—“to Lohiabada be idia ida do ia noho.”

Lagani ta ta ai, taunimanima momo be Memorial totona Pittsburgh idia lao. Memorial invateisen ia gwau: “Mai moale ida umui ai welkam henia.” Oibe, Bible Student taudia ese idia mai tadikaka taihu idia abia dae edia ruma dekenai, bona aniani dalanai idia durudia. Lagani 1886 ai, Memorial do lasi neganai, dina haida lalonai hebouhebou idia karaia. Zion’s Watch Tower ia gwau: “Biaguna, ena tadikaka bona hereva momokani umui lalokau henia taudia, umui mai.”

Lagani haida lalonai, Bible Student taudia ese Pittsburgh ai hebouhebou idia karaia, unai amo mauri davalaia boubouna idia abia dae bona Memorial totona idia lao taudia be unai hebouhebou idia lao diba. Bible Student taudia edia namba ia bada daekau, bona tanobada hegegemadai Memorial idia lao taudia edia namba ia bada daekau danu. Ray Bopp, Chicago ena ekalesia (hari idia gwauraia kongrigeisen) tauna be lagani 1910 ai ia vara gauna ia laloatao bona ia gwau, taunimanima handred momo idia lao dainai hora haida lalonai paraoa bona wain idia loalaia, to kahirakahira idia ibounai ese paraoa idia ania bona wain idia inua.

Memorial ai dahaka idia gaukaralaia? Ena be Iesu ese Lohiabada ena Anibou ai wain ia gaukaralaia, to Zion’s Watch Tower ia gwau dina ai idia hakaukaua grapes ena ranu idia gaukaralaia diba, unai amo “alkahol inua momo karana idia hadokoa taudia” idia hahekwakwanaia lasi. To, haida idia laloa “grapes amo idia karaia wain idia gaukaralaia be maoro,” unai dainai wain idia gaukaralaia. Gabeai Bible Student taudia idia laloparara wain kakakaka goevana ese Iesu ena rara ia laulaulaia be maoro.

 Iesu ena mase laloatao hebouna idia karaia neganai momo ese unai idia laloa dobu. To, kongrigeisen haida dekenai momo be idia tai, bona program ia ore murinai idia herevahereva lasi to idia giroa lou. To, lagani 1934 bukana ta ladana Jehovah, ia gwau Memorial be Iesu ese ia davaria hisihisi bona mase ita “lalohisihisilaia” negana lasi, to lagani 1914 ai Iesu be King ai ia lao karana ita “moalelaia” negana.

Lagani 1935 amo Memorial karaia dalana dekenai gau haida idia haidaua, badina Apokalupo 7:9 ese ia herevalaia “hutuma bada” ena anina idia hahedinaraia. Unai nega amo Iehova ena hesiai taudia ese unai orea idia gwauraia, gwauhamata Keristani taudia. Hari, unai hutuma bada taudia idia gwauraia Iehova idia tomadiho henia abidadama taudia, bona edia helaro be tanobada paradaisona ai do idia noho. Unai idia lalopararalaia murinai, Russell Poggensee ia gwau: “Lau diba lau be guba helarona do lau abia lasi, badina Iehova ese ena lauma helaga amo lau ia hadibaia lasi.” Tadikaka Poggensee bona abidadama taudia ma haida be Memorial hebouna idia lao henia, to paraoa idia ania lasi bona wain idia inua lasi.

Unai “mai anina bada negana” ai, haroro gaukara ese dala ia kehoa ibounai ese mauri davalaia boubouna idia laloa bada totona. Lagani 1932 ena Bulletin ese Keristani taudia ia hagoadaia, namo lasi Memorial hebouna sibona idia lao, to namona be hereva momokani ena sivarai idia harorolaia danu. Lagani 1934 ai, Bulletin ese “heduru taudia” ia boiria, bona inai henanadai ia henia: “Memorial neganai heduru taudia 1,000 do ita abia, a?” Informant ese horoa taudia ia herevalaia neganai, ia gwau: “Bema idia ese Basileia idia harorolaia, do idia moale bada.” Gabeai, tanobada helarona idia abia taudia ese unai hereva idia badinaia danu. *

Iehova ena taunimanima ibounai dekenai Memorial hanuaboina be mai anina bada. Herevana nega aukadia lalonai idia noho, to unai hebou idia karaia. Lagani 1930 ai, Pearl English bona ena kakana Ora be Memorial hebouna idia lao totona kilomita 80 idia raka. Misinari tauna ta Harold King be China ena dibura ruma dekenai ia noho neganai, Memorial ena ane ia torea, wain be grapes koremana amo ia karaia, bona paraoa be raisi amo ia karaia. Ena be Eastern Europe, Central America, bona Africa tanodia ai idia noho Keristani taudia be tuari eiava iseda gaukara idia taravatua negadia ai idia noho, to Iesu ena mase laloatao hebouna idia karaia. Herevana edeseni ita noho, nega namona o nega dikana ai ita noho, to namona be Memorial hebouna ai ita noho, unai amo Iehova Dirava bona Iesu Keriso ita hanamoa diba.