The Watchtower, September 15, 1950, ia gwau, nega haida Baibel ese ia herevalaia taunimanima ta, sivarai ta, o gau ta be vaira neganai do ia vara gauna ta ia laulaulaia. Guna iseda pablikeisen idia gwau, abidadama tatau bona hahinedia hegeregere, Debora, Elihu, Iepeta, Iobu, Rahaba, Rebeka bona ma haida ese horoa taudia o “hutuma bada” taudia idia laulaulaia. (Apok. 7:9) Hegeregere, guna iseda pablikeisen idia gwau Iepeta, Iobu, bona Rebeka ese horoa taudia idia laulaulaia. Debora bona Rahaba ese “hutuma bada” taudia idia laulaulaia. To, hari unai bamona idia karaia lasi. Dahaka dainai?

Baibel ese ia hahedinaraia, taunimanima haida be mai anina bada gauna ta idia laulaulaia. Galatia 4:21-31 lalonai, Paulo ia gwau hahine rua ese “gabeai do idia vara gaudia idia laulaulaia.” Aberahamo ena hesiai kekeni, Hagara, be Israela besena korikorina ia laulaulaia, idia be Mose ena Taravatu hegeregerena Iehova ena bese ai idia lao. To, Sara, “ura kwalimu hahinena,” ese Dirava ena hahine, Iena guba oreana ia laulaulaia. Paulo be Heberu taudia ia tore henia neganai, ia ese king-hahelaga tauna Melekisedeka be Iesu ida ia hahegeregerea. (Heb. 6:20; 7:1-3) Ma danu, Paulo ese Isaia bona iena natudia be Iesu bona iena horoa tadikaka ida ia hahegeregerea. (Heb. 2:13, 14) Paulo be lauma helaga ena heduru amo unai ia torea dainai, ia herevalaia gaudia ita abia dae.

Ena be Baibel ia gwau tau ta ese ma tau ta ia laulaulaia, to namo lasi ita gwau unai tau ena sivarai o ia dekenai ia vara gaudia ibounai ese mai anina bada gaudia ia laulaulaia. Hegeregere, ena be Paulo ia gwau Melekisedeka be Iesu ia laulaulaia, to Aberahamo ese king foa ia halusia  murinai Melekisedeka ese ia dekenai paraoa bona wain ia abia lao ena sivarai ibounai ia herevalaia lasi. Unai dainai, Baibel ai unai ese gau ta ia laulaulaia lasi.—Gen. 14:1, 18.

Keriso ia mase bona lagani momo murinai, toretore taudia haida be Baibel ena sivarai bona ia laulaulaia gaudia idia herevalaia momo. Origen, Ambrose, bona Jerome edia hahediba hereva ia hahedinaraia buka ta (The International Standard Bible Encyclopaedia), ia gwau: “Idia ese Baibel ena sivarai maragimaragidia bona ia laulaulaia gaudia idia tahua. Ena be unai gaudia haida be anina lasi o vaia ia vara gaudia, to idia gwau ena anina korikori be ia do hunia noho . . . , toretore taudia haida be Iesu ia hedinarai hanuaboina ai, ena hahediba taudia ese idia abia gwarume 153 ena anina idia ura tahua!”

Hippo tauna Augustine, be Iesu ese gwarume rua bona paraoa faiv amo hutuma 5,000 ia ubua sivaraina ia herevalaia. Unai negai bali ese witi ena namo ia hereaia dainai, Augustine ia gwau unai paraoa faiv be Mose ese ia torea buka faiv ia laulaulaia (“bali” ese “Taravatu Gunana” ia laulaulaia). Bona ma ia gwau unai gwarume rua ese king ta bona hahelaga tauna ta ia laulaulaia. Toretore tauna ma ta be Iakobo ese vasiahu kakakakana amo Esau ena vara guna ahuna ia hoia karana ia herevalaia neganai, ia gwau unai be Iesu ese ena rara amo taunimanima totona guba maurina ena davana ia karaia karana ia laulaulaia!

Reana unai ita lalopararalaia be auka. Badina taunimanima ta ia diba lasi edena Baibel ena sivarai ese gabeai do ia vara gauna ta ia laulaulaia o lasi. To ita diba gauna be inai: Bema Baibel ese ia hahedinaraia lasi tau ta, sivarai ta, o gau ta, ese gabeai do ia vara gauna ta ia laulaulaia, vadaeni namo lasi ita gwau unai gaudia be gau ta ia laulaulaia.To, edena dala ai Baibel ena sivarai bona haheitalai amo namo ita davaria diba? Roma 15:4 ai, aposetolo Paulo ia gwau: “Badina guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” Paulo ena hereva anina be, aposetolo edia negai ena horoa tadikaka be Baibel sivaraidia amo mai anina bada gaudia haida idia dibaia diba. To, Dirava ena taunimanima ibounai—horoa taudia o “mamoe ma haida,” herevana “dina gabediai” idia noho o lasi—be ‘guna idia torea herevadia ibounai’ amo namo idia abia o idia abia vadaeni.—Ioa. 10:16; 2 Tim. 3:1.

Horoa taudia bona mamoe ma haida—idaunegai idia noho bona hari inai negai idia noho taudia—idia diba Baibel ena sivarai ese idia ia durua diba, unai dainai idia dibaia gaudia idia badinaia noho. Hegeregere, namo lasi ita gwau Iobu bukana ena sivarai be Tanobada Tuarina Ginigunana ai horoa taudia ese idia haheaukalaia karana sibona ia laulaulaia. Dirava ena hesiai tatau bona hahine, horoa taudia bona hutuma bada taudia, be Iobu ese ia davaria gaudia hegeregerena idia davaria danu. Bona ‘Iehova ese ia hanamoa dalana idia diba, unai amo idia laloparara Iehova be lalokau bada bona hebogahisi Diravana.’—Iam. 5:11.

Mani oi laloa, hari iseda kongrigeisen lalonai inai oi itaia: Taihu burukadia haida be Debora bamona Dirava idia badinaia noho, matamata elda taudia be Elihu bamona mai aonega ida idia kara, painia taudia be Iepeta bamona mai gari lasi ida idia haroro, bona abidadama tatau bona hahine be Iobu bamona haheauka karana idia hahedinaraia. Ita moale Iehova ese ‘guna idia torea herevadia ibounai’ ia gimaia dainai, “Toretore Helagadia ese ita dekenai goada ia henia, unai amo helaro ita abia”!

Unai badina namodia dainai, vanegai lagani iseda pablikeisen be Baibel sivaraidia amo ita dibaia gaudia idia herevalaia, to unai sivarai ese ia laulaulaia gaudia bona idia guguru gaudia idia herevalaidia lasi.