1. Dahaka dainai iseda hetura karana Iehova ida ia goada be gau badana?

BEMA oi be bapatiso Witnes tauna ta, emu hetura karana Dirava ida be mai anina bada. To, Satani ena tanobada bona iseda goevadae lasi kara ese eda hetura karana Iehova ida ia tohoa diba. Unai be Keristani taudia ibounai dekenai ia vara. Unai dainai, iseda hetura karana Iehova ida ia goada be gau badana.

2. Edena dala ai iseda hetura karana Iehova ida ita hagoadaia diba?

² Emu hetura karana Iehova ida be edena bamona? Oi ura unai hetura karana ia goada noho, a? Iamesi 4:8 ia gwau: “Dirava kahirakahira do umui lao bona ia be umui kahirakahira do ia mai.” Unai ena anina be Dirava kahirakahira ita lao totona gau haida ita karaia be namo, unai amo Ia be ita kahirakahira do ia mai. Bema hanaihanai unai bamona ita karaia, iseda hetura karana Iehova ida do ia goada bona Iehova be iseda tura korikori ai do ia lao. Iesu ese ia hahedinaraia abidadama hegeregerena ita hahedinaraia diba, ia gwau: “Lau ia siaia tauna be ia noho momokani, bona . . . ia  lau diba.” (Ioane 7:28, 29) To, dahaka oi karaia diba Iehova kahirakahira oi lao totona?

3. Edena dala ai Iehova ida ita herevahereva diba?

³ Iehova kahirakahira ita lao totona, hanaihanai Iehova ida ita herevahereva be mai anina bada. Edena dala ai Dirava ida oi herevahereva diba? Gabu daudau ai ia noho turana ta ida edena bamona oi herevahereva? Reana nega momo revareva oi torea bona fon amo umui herevahereva. To, Iehova oi hereva henia totona, hanaihanai oi guriguri. (Salamo 142:2 duahia.) Bona Baibel oi duahia bona oi laloa dobu neganai, Iehova be oi ia hereva henia noho. (Isaia 30:20, 21 duahia.) Hari, do ita itaia edena dala rua ai herevahereva karana ese emu hetura karana Iehova ida ia hagoadaia, bona Iehova be emu turana korikori ai ia lao.

4, 5. Edena dala ai Iehova be ena Hereva amo oi ia hereva henia diba? Haheitalai gwauraia.

⁴ Oi abia dae Baibel lalonai idia noho hereva be Dirava ena hereva taunimanima ibounai totona. To, Baibel ese Iehova kahirakahira oi lao dalana ia herevalaia danu, a? Oibe. Edena dala ai? Baibel oi duahia bona stadilaia neganai, oi ia durua dalana bona emu mauri lalonai do oi badinaia dalana oi laloa; unai amo Iehova be iena Hereva amo oi ia hereva henia noho. Bena Iehova kahirakahira oi lao.—Heb. 4:12; Iam. 1:23-25.

⁵ Hegeregere, mani Iesu ena hereva oi duahia bona laloa dobu, ia gwau: “Tanobada dekenai umui sibona totona dava bada kohu do umui haboua lasi.” Bema emu mauri lalonai oi be Basileia oi atoa guna, oi diba Iehova be oi dekenai ia moale. To, bema oi laloa emu mauri ai gau haida oi haidaua bona Basileia oi atoa guna, vadaeni Iehova be ia kahirakahira oi lao diba dalana oi ia hadibaia noho.—Mat. 6:19, 20.

6, 7. (a) Baibel stadi karana ese edena dala ai ita ia durua, Iehova ita lalokau henia bona ia ese ita ia lalokau henia totona? (b) Baibel ita stadilaia ena badina maorona be dahaka?

⁶ Momokani, Baibel ita stadilaia neganai, do ita diba eda mauri lalonai dahaka ita karaia Iehova ita hesiai henia totona. Danu ita ia durua Iehova ena kara namodia ita laloa bada totona, unai ese eda lalokau ia dekenai ia habadaia.  Unai ia vara neganai, Iehova ese ita do ia lalokau henia bona iseda hetura karana do ia goada.—1 Korinto 8:3 duahia.

⁷ Iehova kahirakahira ita lao totona, gau badana be mai badina maorona ida Baibel ita stadilaia. Ioane 17:3 ia gwau: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.” Unai dainai, Baibel ita stadilaia ena badina maorona be Iehova do ita “diba.”—Esodo 33:13 duahia; Sal. 25:4.

8. (a) 1 King Taudia 15:1-5 ai, Iehova ese King Usaia ia kara henia dalana amo dahaka lalohadai ia havaraia diba? (b) Edena dala ai Iehova ita dibaia karana ese ita ia durua iena kara haida ita abia dae totona?

⁸ Bema Iehova ita diba namonamo, herevana Baibel ese iena kara ena badina haida ia hahedinaraia lasi, to unai do ita laloa momo lasi. Hegeregere, Iehova ese Iuda ena King Usaia ia kara henia dalana dekenai dahaka oi laloa? (2 Kin. 15:1-5) Ena be taunimanima be atai gabudiai “boubou karadia idia karaia noho, bona mai bonana muramura idia gabua noho,” to King Usaia be “Lohiabada ena vairanai ia kara maoromaoro.” To, Iehova ese “gorere ia henia, vadaeni lepera gorere ia davaria, ela bona ia mase dina.” Dahaka dainai? Unai sivarai ese ena badina ia hahedinaraia lasi. Unai dainai do ita gwau diba Iehova be Usaia ia panisia kava, a? Lasi. Bema Iehova oi diba namonamo, do oi diba ena matahakani be hanaihanai ia maoro. Anina be ia be “kota maoromaoro” Diravana. (Ier. 30:11) Unai ita diba dainai, ena be Iehova ese Usaia ia kara henia ena badina ita diba lasi, to ita abia dae Iehova ena hahemaoro karana be maoromaoro.

9. Dahaka ese ia hahedinaraia Iehova ese Usaia dekenai lepera gorere ia henia be mai badina?

⁹ To, unai sivarai ena kahana haida be Baibel ena siri haida ai ita davaria diba. Unai be 2 Sivarai 26:3-5, 16-21 ai, ena be guna Usaia be Iehova vairanai kara maoromaoro ia hahedinaraia, to gabeai ena mauri lalonai “hekokoroku ia vara, bona unai dainai ia dika.” Ia hekokoroku dainai, ia ura hahelaga taudia edia gaukara do ia karaia, to ia be maoro lasi unai gaukara ia karaia totona. Hahelaga taudia 81 be ia dekenai idia lao bona idia ura ia idia koua. To, Usaia be dahaka ia karaia? Ia hekokoroku bona hahelaga taudia dekenai “ia badu.” Unai dainai Iehova ese lepera gorere ia henia!

10. Dahaka dainai Iehova ena kara ita henanadailaia lasi? Bona edena dala ai Iehova ena kara maoromaoro karadia dekenai iseda abidadama ita hagoadaia diba?

¹⁰ Usaia ena sivarai amo dahaka mai anina bada gauna ita dibaia? Unai sivarai ese ia hahedinaraia dahaka dainai Iehova ese Usaia ia panisia. To, bema Baibel ese unai sivarai ai gau ibounai ia hahedinaraia lasi, dahaka do oi laloa? Iehova ena kara maoromaoro karana do oi henanadailaia, a? Eiava do oi gwau, Baibel ai idia noho sivarai o hereva ibounai be hegeregere ita ia hadibaia totona, unai amo do ita diba Iehova ena vairanai dahaka be maoro bona dahaka be dika. (Deu. 32:4) Iehova ita dibaia namonamo neganai, ia do ita lalokau henia bona ia karaia gaudia ibounai do ita henanadailaia lasi. Bona Dirava ena Hereva Baibel oi duahia bona stadilaia karana ese emu lalokau Iehova dekenai do ia habadaia. (Sal. 77:12, 13) Bena emu hetura karana Iehova ida do ia goada.

11-13. Edena bamona oi diba Iehova be guriguri ia kamonai henia? (Laulau ginigunana itaia.)

¹¹ Ita guriguri neganai, Iehova kahirakahira ita lao. Bona ia ita hanamoa, ita tanikiu henia, bona ena hakaua totona ia ita noia. (Sal. 32:8) To emu hetura karana Iehova ida ia goada totona, namona be oi abia dae ia ese emu guriguri ia kamonai.

¹² Taunimanima haida idia laloa guriguri be eda lalona ia hanamoa gauna ta sibona. Idia laloa guriguri be oi ia durua emu hekwakwanai oi lalohadailaia namonamo totona bona sibona emu hekwakwanai oi hamaoromaoroa. Guriguri ena namo ita laloa neganai, edena dala ai oi diba emu guriguri be Iehova ese ia kamonai?

¹³ Mani inai oi laloa: Iesu be tanobada ia do mai lasi neganai, ia itaia Iehova ese edena dala ai Iena hesiai taudia edia guriguri ia haerelaia. Unai dainai tanobada ai haroro gaukara ia karaia neganai, guriguri amo iena Tamana ia hereva henia. Nega ta Iesu be hanuaboi ibounai lalonai ia guriguri. Bema ia diba Iehova be ena guriguri do ia kamonai lasi, unai bamona do ia karaia, a? (Luka 6:12; 22:40-46) Eiava ena hahediba taudia do ia hadibaia idia guriguri totona, a? Iesu ia diba guriguri be Iehova ida herevahereva karana korikorina. Nega ta Iesu ia gwau: “Tamagu e, oi lau tanikiu henia badina lau oi kamonai henia. Momokani, lau diba oi be hanaihanai lau oi kamonai henia.” Ita danu, namona be ita abia dae Iehova be “guriguri kamonai henia Diravana.”—Ioa. 11:41, 42; Sal. 65:2, BHḡ.

14, 15. (a) Guriguri lalonai iseda ura gaudia ita gwauraia karana ese edena dala ai ita ia durua? (b) Taihu ta ena guriguri karana ese edena dala ai ena hetura karana Iehova ida ia hagoadaia?

¹⁴ Bema guriguri lalonai emu ura gaudia oi gwauraia hedinarai, Iehova ese emu guriguri do ia haerelaia, nega haida dala ma ta amo haere do oi abia. Iehova be emu guriguri ia haerelaia dainai, ia be emu turana korikori ai do ia  lao. Ma danu, emu lalohekwarahi gaudia oi herevalaia loulou neganai, Iehova be oi kahirakahira do ia mai.

¹⁵ Kathy ena sivarai mani ita laloa. * Ena be hanaihanai ia haroro, to ia moale lasi. Ia gwau: “Lau be haroro gaukara lau ura henia lasi. Egu moni gaukara amo lau ritaea neganai, elda ta ese lau ia hagoadaia regula painia gaukara lau karaia totona, bona painia aplikeisen ia henia danu. Bena egu lalona lau hadaia bona painia gaukara lau karaia, to hanaihanai Iehova lau guriguri henia, lau ia durua haroro gaukara lau ura henia totona.” Iehova ese ena guriguri ia haerelaia, a? Ia gwau: “Hari, lau be lagani toi painia gaukara lau karaia vadaeni. Hanaihanai lau haroro bona taihu ma haida amo diba lau abia dainai, haroro gaukara lau manadalaia. Hari, haroro gaukara lau ura henia bada. Ma danu, egu hetura karana Iehova ida ia goada, guna bamona lasi.” Momokani, Kathy ena guriguri karana ese ia durua iena hetura karana Iehova ida ia hagoadaia totona.

¹⁶ Iseda mauri lalonai, hanaihanai eda hetura karana Iehova ida ita hagoadaia noho. Bema ita ura Iehova be ita ia durua noho, namona be gau haida ita karaia Dirava kahirakahira ita lao totona. Hegeregere, hanaihanai Baibel ita stadilaia bona ita guriguri karana amo Iehova ida ita herevahereva. Unai ita karaia neganai, eda hetura karana Iehova ida do ia goada bona hahetoho idauidau do ita haheaukalaia.

16, 17. (a) Iseda hetura karana Iehova ida ia goada noho totona, dahaka ita karaia be namo? (b) Stadi gabena ai dahaka do ita herevalaia?

¹⁷ To, nega haida ena be ita guriguri loulou, to hekwakwanai be do idia vara noho. Unai bamona negadiai, eda abidadama Iehova dekenai ia boio diba. Reana do ita laloa Iehova be eda guriguri ia kamonai lasi eiava ia ura lasi eda turana ai ia lao. Edena dala ai unai hekwakwanai ita hanaia bona ita abia dae Iehova be eda turana korikori? Stadi gabena be unai do ia herevalaia.