1, 2. Sekit naria taudia be kongrigeisen momo ai dahaka idia itaia?

SEKIT NARIA TAUNA bona elda taudia be idia hebou. Hebou dokonai sekit naria tauna be mamoe naria taudia ia itadia bona edia gaukara goada karana dainai ia hebogahisi, badina idia haida be buruka momokani. To, gau ta ia laloa dainai ia henanadai: “Tadikaka e, ma haida umui treinini henia kongrigeisen maduna haida idia huaia totona, a?” Unai elda taudia idia laloatao, sekit naria tauna ena vadivadi gunana ai, idia ia hadibaia ma haida idia treinini henia totona. Bena elda ta ia gwau: “Momokani, unai ai karaia momo lasi.” Elda haida be unai elda ena hereva dekenai idia lalotamona.

² Bema oi be Keristani elda ta, reana unai bamona do oi haere. Tanobada ibounai ai, sekit naria taudia idia itaia kongrigeisen momo dekenai tadikaka matamata bona burukadia be elda taudia ese treinini idia henia be namo. Unai amo gabeai elda taudia idia durua diba mamoe oreana idia naria totona. To, treinini henia karana be mai ena hekwarahi. Dahaka dainai?

3. (a) Edena dala ai Baibel ese ia hahedinaraia treinini karana be mai anina bada, bona dahaka dainai ita ibounai be unai ita laloa bada? (Futnout itaia.) (b) Dahaka dainai elda taudia haida idia laloa ma haida treinini henia karana be auka?

 ³ Oi be mamoe naria tauna dainai, oi laloparara ma haida oi treinini henia be mai anina bada. * Oi diba kongrigeisen ia goada noho bona vaira nega ai kongrigeisen matamatadia durua totona, tadikaka momo idia noho be namo. (Isaia 60:22 duahia.) Danu, oi diba Baibel ese ita ia hagoadaia ‘ma haida ita hadibaia totona.’ (2 Timoteo 2:2 duahia.) Ataiai ita gwauraia elda taudia bamona, reana do oi laloa unai oi karaia be auka. Reana ruma bese ena maduna, moni gaukara, kongrigeisen ena maduna haida, bona gau ma haida dainai, nega be lasi kongrigeisen ai ma haida oi treinini henia totona. Bema unai bamona, namona be ita tahua dahaka dainai ma haida treinini henia karana be mai anina bada.

4. Nega be lasi ma haida treinia totona ena badina ta be dahaka?

⁴ Elda taudia be nega lasi ma haida idia treinia totona ena badina ta be dahaka? Reana haida idia laloa: ‘Treinini be mai anina bada, to kongrigeisen ena gaukara haida lau karaia guna be namo. Ena be haida treinini henia karana be gabeai do lau karaia, to kongrigeisen be do ia goada noho.’ Momokani, kongrigeisen ena gaukara haida oi karaia be namo, to bema ma haida oi treinini henia lasi, kongrigeisen ia hadikaia diba.

5, 6. Motuka taria tauna bona ensini sekea haheitalaina amo dahaka ita dibaia, bona edena dala ai treinini karana ida ita hahegeregerea diba?

⁵ Mani inai oi laloa: Motuka taria tauna ia diba ena motuka ia heau noho totona, ia sekea loulou bona oela ia senisia be namo, unai amo ensini do ia gaukara noho. To, do ia laloa: ‘Oela senisia karana be anina lasi, to gau badana be motuka ai petrol ia noho. Badina motuka ai petrol ia noho lasi neganai, motuka do ia heau lasi.’ Bona do ia gwau: ‘Bema oela lau haidaua lasi, ensini be do ia heau noho.’ To, ena dika be dahaka? Bema motuka taria tauna be ensini ia hanamoa haraga lasi, nega ta ena motuka ena ensini do ia dika. Bema unai ia vara, nega bona moni momo do ia halusia ena motuka hanamoa totona. Unai amo dahaka ita dibaia?

⁶ Elda taudia ese mai anina bada gaukara momo idia karaia, badina bema idia karaia lasi kongrigeisen do idia durua lasi. Unai dainai motuka taria tauna ese motuka ena petrol ia abia be namo hegeregerena, elda taudia be “mai anina bada gaudia” do idia laloa be namo. (Fili. 1:10) To, elda haida be maduna ma haida dekenai idia bisi dainai, ma haida idia treinia lasi, unai be hegeregere ensini idia sekea lasi. Bema unai bamona idia karaia, gabeai lo tadikaka momo do idia noho lasi kongrigeisen ena maduna haida huaia totona.

7. Elda taudia be nega idia atoa tadikaka idia treinia dainai, edena bamona idia ita lalodia be namo?

⁷ Unai dainai namo lasi ita laloa ma haida treinini henia karana be anina lasi. Elda taudia haida be kongrigeisen  ena namo vaira nega totona idia laloa dainai, nega idia atoa tadikaka matamata idia treinia totona. Unai elda taudia be naria taudia namodia bona kongrigeisen dekenai idia be hahenamo badana. (1 Petero 4:10 duahia.) Edena dala ai kongrigeisen idia durua?

8. (a) Edena bamona kara bona lalohadai ese elda taudia ia doria ma haida idia treinia totona? (b) “Pablisa momo lasi gabudiai idia painia” elda taudia edia maduna badana be dahaka? (Maua ladana “Gaukara Namona Ta” itaia.)

⁸ Ena be elda haida be lagani momo lalonai elda gaukara idia karaia, to namona be idia manau bona idia laloatao idia buruka neganai, kongrigeisen ena maduna haida do idia huaia diba lasi. (Mika 6:8) Danu, edia mauri lalonai dika idia vara kava diba, unai ese edia maduna kongrigeisen dekenai do ia haidaua. (Had. 9:11, 12; Iam. 4:13, 14) Unai dainai elda taudia be Iehova ena mamoe edia namo idia laloa dainai, lagani momo lalonai edia hesiai gaukara ai idia dibaia gaudia be tadikaka matamata dekenai idia hadibaia.—Salamo 71:17, 18 duahia.

9. Dahaka dainai tadikaka treinini henia karana be mai anina bada?

⁹ Ma haida idia treinini henia elda taudia be hahenamo ta mamoe oreana dekenai ena badina haida be dahaka? Idia ese kongrigeisen idia hagoadaia. Edena dala ai? Unai treinini karana dainai kongrigeisen ai tadikaka momo do idia hegeregere kongrigeisen idia durua hari mai lalotamona ida idia gini goada, bona vaira negai hisihisi badana idia haheaukalaia. (Ese. 38:10-12; Mika 5:5, 6) Unai dainai, elda taudia e, namona be hari emui hesiai gaukara lalonai tadikaka umui treinini henia noho.

10. Elda tauna be dahaka ia karaia ma haida ia treinini henia totona?

¹⁰ Momokani, elda taudia be nega bada idia gaukaralaia kongrigeisen ai mai anina bada gaukara idia karaia totona, unai dainai nega be lasi ma haida idia treinia totona. To, namona be nega oi atoa ma haida oi treinini henia totona. (Had. 3:1) Unai amo emu nega oi gaukaralaia namonamo bona nega vairai kongrigeisen ia durua.

11. (a) Tano ma haida ai idia noho elda taudia ese idia henia sisiba ese dahaka ia hahedinaraia? (b) Aonega Herevadia 15:22 hegeregerena, dahaka dainai elda haida edia lalohadai ita laloa be namo?

¹¹ Vanegai, elda haida idia nanadaia edena dala ai tadikaka haida dekenai treinini idia henia. * Ena be unai elda taudia edia sivarai be idauidau, to idia henia sisiba be tamona. Unai ese dahaka ia hahedinaraia? Aposetolo Paulo ena nega hegeregerena, Baibel ena hadibaia hereva be hari “gabu ibounai dekenai kongrigeisen ibounai” ai idia noho tadikaka ia durua diba. (1 Kor. 4:17) Unai dainai, inai stadi bona stadi gabena ai unai elda taudia edia lalohadai haida do ita herevalaia.—Aon. 15:22.

12. Elda be dahaka ia karaia guna, bona dahaka dainai?

¹² Elda ese tadikaka ena kudouna ia hegaegaelaia be namo. Biru tauna be uhe ia do hadoa lasi neganai, ia ese tano ia hegaegaelaia guna. Unai hegeregerena, namona be elda ese tadikaka ena kudouna ia hegaegaelaia o hagoadaia,  unai murinai ia dekenai maduna huaia dalana ia hadibaia. Vadaeni, edena dala ai elda ese tadikaka ta ena kudouna ia hegaegaelaia? Idaunegai peroveta tauna ta ese ia badinaia dalana ia badinaia diba. Unai be dahaka?

13-15. (a) Peroveta tauna Samuela be dahaka gaukara ia abia? (b) Edena dala ai unai gaukara ia karaia? (Laulau ginigunana itaia.) (c) Dahaka dainai hari elda taudia ese Samuela ena sivarai idia laloa bada be namo?

¹³ Lagani 3,000 gunanai, Iehova ese peroveta tauna Samuela ia hamaoroa, ia gwau: “Kerukeru, nega inai bamona neganai, lau ese Beniamina iduhu tauna ta oi dekenai do lau siaia. Vadaeni oi ese unai tau ena latanai olive dehoro do oi bubua, ia be lauegu bese Israela edia gunalaia tauna.” (1 Sam. 9:15, 16) Samuela ia laloparara iena lohia negana be do ia doko bona Iehova ese ia hagania lohia tauna ma ta do ia abia hidi. Reana Samuela ia laloa: ‘Edena dala ai unai tauna do lau durua lohia maduna ia huaia totona?’ Lalohadai ta ia abia bena palani ia karaia.

¹⁴ Unai dina murinai, Samuela be Saulo ia itaia neganai, Iehova be ena peroveta tauna ia hamaoroa, ia gwau: “Lau gwauraia tauna be inai.” Bena Samuela ese ena palani hegeregerena Saulo ia boiria idia aniani hebou totona. Bena ia ese Saulo bona ena hesiai tauna ia noia helai gabuna namona ai do idia helai, bona Saulo dekenai vamu namona ia henia. Bona Samuela ia gwau: “Do oi ania, badina be oiemu abia hidi nega laloa totona inai aria lau karaia.” Unai murinai, Samuela bona Saulo be peroveta tauna ena ruma dekenai idia raka lao, bona idia raka noho lalonai idia herevahereva. Samuela ia ura unai nega namona ia gaukaralaia Saulo ia hadibaia totona. Unai dainai, Saulo ia boiria bona ruma ena guhi dekenai idia daekau. Adorahi ena lai keruma ia toa lalonai Samuela be “atai daiutuna ai Saulo ida ia hereva noho” ela bona idia mahuta. Unai dina murinai, Samuela ese Saulo ia horoa, ia kisi henia bona hereva ma haida ia henia. Bena Saulo ia siaia, badina vaira nega ai do idia vara gaudia totona ia hegaegae vadaeni.—1 Sam. 9:17-27; 10:1; NW.

¹⁵ Momokani, ena be lohia tauna ta abia hidi karana be tadikaka treinini henia elda o hesiai tauna ta ai ia lao karana amo ia idau. To, elda taudia be Samuela ena sivarai amo gau haida idia dibaia diba. Mani unai gau rua ita laloa.

16. (a) Israela taudia idia ura king ta idia abia hidi neganai, Samuela ena hemami be edena bamona? (b) Samuela ese Saulo ia horoa neganai, Samuela be dahaka kara ia hahedinaraia?

¹⁶ Mai ura ida oi karaia, oi dadaraia lasi. Matamanai Samuela ia kamonai Israela taudia idia ura tau ta do idia abia hidi edia king ai ia lao neganai, ia badu bona ia mamia idia ese ia idia ura henia lasi. (1 Sam. 8:4-8) Ia ese edia ura ia dadaraia, to Iehova ese nega toi ia hadibaia edia hereva do ia kamonai. (1 Sam. 8:7, 9, 22) Ena be Samuela ia badu, to ena gabu do ia abia tauna dekenai ia mama lasi. Iehova ese Samuela ia hamaoroa Saulo do ia horoa neganai, Samuela be Iena hereva ia badinaia badina Iehova ia lalokau henia.

17. Edena dala ai elda taudia ese Samuela idia tohotohoa, bona unai ese elda taudia dekenai dahaka hemami ia havaraia?

¹⁷ Samuela bamona, elda taudia be mai lalokau ida tadikaka idia treinini henia. (1 Pet. 5:2) Unai elda taudia be mai ura ida kongrigeisen ena maduna haida be tadikaka dekenai idia hadibaia. Bona idia laloa idia treinini henia taudia be idia ida idia “gaukara hebou”  taudia—kongrigeisen ai idia be mai anina bada. (2 Kor. 1:24; Heb. 13:16) Bona elda taudia idia moale, bema idia itaia treinini idia abia tadikaka be idia dibaia gaudia idia badinaia bona kongrigeisen idia durua!—Kara 20:35.

18, 19. Edena dala ai elda ta ese tadikaka ena kudouna ia hegaegaelaia diba, bona dahaka dainai unai be mai anina bada?

¹⁸ Edia turana korikori ai oi lao danu. Samuela ese Saulo ia hedavari henia neganai, unai peroveta tauna ese oela be Saulo ena kwarana ai ia bubua haraga, bona unai king matamata ia siaia lao diba, herevana ia do hegeregere lasi. To Samuela be unai bamona ia karaia lasi, mai ura ida nega ia atoa Saulo ena kudouna ia hegaegaelaia totona. Hegeregere idia aniani, idia raka hebou, herevahereva, bona idia laga-ani namonamo murinai, peroveta tauna ia laloa unai be nega maorona Saulo ia horoa totona.

¹⁹ Unai hegeregerena, namona be elda taudia ese nega idia atoa idia treinini henia taudia be edia turana namona ai idia halaoa totona. Elda tauna ese ta be ena tura namona ai ia halaoa totona, gau haida ia karaia be namo. Tano ta ta ai elda taudia be edia noho dalana bona kastom hegeregerena unai idia karaia. Herevana edeseniai oi noho, to bema oi be gaukara momo oi karaia elda ta bona nega oi atoa tadikaka ta oi durua totona, tadikaka do ia mamia ia oi laloa bada. (Roma 12:10 duahia.) Momokani, bema mai lalokau ida tadikaka oi durua, emu heduru do idia laloa bada.

20, 21. (a) Hadibaia tauna namona be edena bamona do oi gwauraia? (b) Stadi gabena ai dahaka do ita herevalaia?

²⁰ Elda taudia e, laloatao: Hadibaia tauna namona be ia ura ta ia treinini henia sibona lasi, to ia treinini henia tauna ia lalokau henia danu. (Ioane 5:20 sekea.) Elda ese lalokau ia hahedinaraia neganai, tadikaka ese treinini do ia abia dae bona ia badinaia. Unai dainai, elda taudia e, emui tadikaka umui tura henidia bona idia umui treinini henia.—Aon. 17:17; Ioa. 15:15.

²¹ Elda tauna be tadikaka ena kudouna ia hegaegaelaia murinai, treinini ia henia diba. Elda be edena dala ai treinini ia henia diba? Stadi gabena ai unai do ita herevalaia.