1. (a) Dirava ena hesiai taudia be ma haida treinini henia karana dekenai dahaka idia dibaia, bona edena dala ai ita badinaia diba? (b) Inai stadi ai dahaka do ita herevalaia?

DIRAVA ena hesiai taudia idia diba, haida treinini henia karana ese anina namona ia havaraia. Bese kwarana tauna Aberamo be “treinini tuari taudia ia haboua” Lota idia hamauria totona, bona unai tatau idia kwalimu. (Gen. 14:14-16, NW) King Davida ena negai, “Iehova hanamoa anedia idia abia totona idia hadibaia taudia” be Dirava ena ruma lalonai Iehova idia hanamoa. (1 Siv. 25:7, BHḡ) Hari, ita be Satani bona ia murinai idia raka taudia ida ita tuari noho. (Efe. 6:11-13) Ma danu, namona be ita gaukara goada noho Iehova ita hanamoa totona. (Heb. 13:15, 16) Unai dainai, Dirava ena hesiai taudia gunadia bamona, ita kwalimu totona treinini ita abia be namo. Kongrigeisen lalonai, Iehova ese elda taudia dekenai ma haida treinini henia ena maduna ia henia. (2 Tim. 2:2) Elda taudia be edena dala idauidau idia gaukaralaia tadikaka idia treinini henia totona, unai amo do idia hegeregere mamoe naria gaukara karaia totona?

2. Elda be tadikaka ia do treinia lasi neganai, dahaka do ia karaia guna, bona dahaka dainai?

² Elda taudia be biru taudia bamona. Biru tauna be uhe ia do  hadoa lasi neganai, tano ia hanamoa guna, unai amo anina namona ia havaraia diba. Unai hegeregerena, tadikaka matamata ta oi treinia neganai, namona be Baibel ena hereva haida be unai tadikaka dekenai oi herevalaia, unai amo mai kudouna ibounai ida treinini do ia abia dae.—1 Tim. 4:6.

3. (a) Tadikaka ida oi herevahereva lalonai, edena dala ai Mareko 12:29, 30 ai Iesu ena hereva oi gaukaralaia diba? (b) Edena dala ai elda tauna ese ia gwauraia guriguri ese tadikaka ia hagoadaia diba?

³ Hereva momokani ese tadikaka ena kara bona lalohadai ia haidaua dalana oi diba totona, reana ia oi nanadaia, ‘Edena dala ai emu gwauhamata Iehova dekenai ese emu mauri ia haidaua?’ Bena iseda hesiai gaukara helagana be mai kudouna ibounai ida ita karaia daladia oi herevalaia diba. (Mareko 12:29, 30 duahia.) Reana gabeai oi guriguri, bona Iehova oi noia ena lauma helaga amo tadikaka ia durua totona. Bema tadikaka be ia totona oi gwauraia guriguri ia kamonai, ia do ia hagoadaia!

4. (a) Baibel sivarai haida oi gwauraia, unai ese tadikaka ena hetura karana Iehova ida ia hagoadaia diba. (b) Elda taudia be ma haida idia treinini henia neganai, edia tahua gauna be dahaka?

⁴ Treinini ena matamanai, Baibel sivarai haida amo tadikaka oi durua, unai amo do ia itaia namona be mai ura ida gaukara ia karaia namonamo, bona ia manau. (1 Kin. 19:19-21; Neh. 7:2; 13:13; Kara 18:24-26) Unai bamona kara be mai anina bada tadikaka dekenai, unai be tano durua gaudia amo tano ita hanamoa bamona. Unai ese ena hetura karana Iehova ida ia hagoadaia. France ai, elda ta ladana Jean-Claude ia gwau: “Haida lau treinini henia neganai, egu tahua gauna be tadikaka lau durua ena hetura karana Iehova ida ia goada totona. Nega namodia lau tahua Baibel siri ta ai duahia totona, unai amo tadikaka ena ‘matana do ia kehoa’ bona Baibel lalonai gau namodia do ia itaia.” (Sal. 119:18) Tadikaka hagoadaia daladia haida be dahaka?

5. (a) Edena dala ai treinini ia abia tadikaka ida tahua gaudia oi herevalaia be mai anina bada? (b) Dahaka dainai elda taudia ese matamata taudia idia treinia be namo? (Futnout itaia.)

⁵ Tadikaka oi nanadaia: ‘Kongrigeisen lalonai, emu tahua gaudia be dahaka?’ Bema ia be tahua gauna ta ia do abia hidi lasi, vadaeni ia oi durua ia hagugurua diba tahua gauna ta ia abia hidi totona. Guna oi ese tahua gauna ta oi atoa bona oi hagugurua neganai, ena moale be ia dekenai oi gwauraia. Unai be dala namona ta. Badina Africa ai, elda bona painia tadikaka ta ladana Victor ia gwau: “Lau matamata neganai, elda ta be egu tahua gaudia totona lau dekenai henanadai haida ia henia. Unai henanadai ese lau ia durua egu hesiai gaukara lau laloa bada totona.” Lo elda taudia haida idia hahedinaraia, mai anina bada gauna be tadikaka idia matamata—mauri lagani be 13 ia lao 19—neganai, idia dekenai treinini idia henia, bona edia mauri lagani hegeregerena kongrigeisen asainmen idia henia. Matamata negadiai treinini idia abia neganai, gabeai edia mauri lalonai unai ese idia do ia durua edia tahua gaudia idia laloa bada totona, bona anina lasi gaudia do idia dadaraia.—Salamo 71:5, 17 duahia. *

6. Iesu be ma haida ia treinia neganai, dahaka mai anina bada dalana ia gaukaralaia?

⁶ Hesiai gaukara karaia totona tadikaka ena ura oi habadaia dalana ta be: Do ia  karaia gauna oi hadibaia sibona lasi, to ia karaia ena badina oi gwauraia danu. Idia karaia gaukara ena badina oi gwauraia hedinarai dainai, oi be Hadibaia Tauna Badana Iesu oi tohotohoa. Hegeregere, Iesu be ena aposetolo taudia dekenai hahediba taudia halaoa hahegani ia do henia lasi neganai, ia do idia badinaia ena badina ia hadibaia guna. Ia gwau: “Dirava ese lau dekenai siahu ia henia, gau ibounai guba ai bona tanobada ai lau naria totona.” Bena ia gwau: “Unai dainai umui lao, bese ibounai taudia be hahediba taudia ai umui halaoa.” (Mat. 28:18, 19) Edena dala ai Iesu ena hadibaia dalana oi tohotohoa diba?

7, 8. (a) Hari, edena dala ai elda taudia ese Iesu ena hadibaia dalana idia tohotohoa? (b) Dahaka dainai tadikaka matamata oi hanamoa be mai anina bada? (c) Edena sisiba ma haida ese elda taudia ia durua diba? (Maua ladana “Ma Haida Hadibaia Dalana” itaia.)

⁷ Baibel amo tadikaka dekenai do ia karaia gaukara ena badina oi hadibaia. Unai amo do ia diba ia karaia gaukara be Baibel ena hakaua herevadia hegeregerena. Hegeregere, bema tadikaka ta oi hadibaia Kingdom Hall ena vareai gabuna ia hagoevaia totona, unai amo do ia goeva bona taunimanima idia raka diba. Reana Tito 2:10 oi duahia, bona hahedinaraia edena dala ai ena gaukara dainai Kingdom Hall be ‘iseda Hamauria Tauna, Dirava, ena hadibaia hereva do ia hahairaia.’ Danu, tadikaka oi hadibaia kongrigeisen ai idia noho buruka taudia ia laloa totona, bona edena dala ai ena gaukara ese idia ia durua. Unai oi herevalaia neganai, tadikaka matamata do ia itaia unai gaukara be idia hadibaia dainai ia karaia lasi, to taunimanima ia laloa bada dainai ia karaia. Unai gaukara ia karaia dainai do ia moale, badina ia diba unai ese kongrigeisen ai tadikaka taihu do ia durua.

⁸ Ma danu, tadikaka matamata be emu hereva ia badinaia totona ia gaukara goada dainai, ia oi hanamoa. Dahaka dainai unai oi karaia be mai anina bada? Hanamoa herevadia ese tadikaka ia durua ia goada ia lao totona, ranu ese tubutubu gaudia ia durua bamona.—Mataio 3:17 sekea.

9. (a) Taga tanodia ai, elda taudia be dahaka hekwakwanai idia davaria? (b) Dahaka dainai tadikaka matamata haida be edia mauri lalonai Iehova ena hesiai gaukara idia atoa guna lasi?

⁹ Taga tanodia ai, elda taudia idia davaria hekwakwanai ta be: edena dala ai mauri lagani 20 o 30 bapatiso tadikaka idia durua diba kongrigeisen gaukaradia idia karaia totona. Tano idauidau 20 ai idia  noho elda taudia edia hereva ese ia hahedinaraia, dahaka dainai matamata taudia idia ura lasi kongrigeisen ena gaukara idia karaia. Unai elda haida idia gwau, tadikaka haida be idia matamata neganai, edia tama sina ese idia hagoadaia lasi Iehova idia hesiai henia totona. Momokani, nega haida matamata taudia idia ura Iehova idia hesiai henia, to edia tama sina ese idia hagoadaia tanobada gaudia idia tahua totona! Unai dainai edia mauri lalonai Iehova ena hesiai gaukara idia atoa guna lasi.—Mat. 10:24.

10, 11. (a) Bema tadikaka ta ia ura lasi gaukara ma haida ia karaia, elda ese edena dala ai idia durua diba? (b) Elda tauna ese edena Baibel siri ia gaukaralaia diba unai tadikaka ia durua totona, bona dahaka dainai? (Futnout itaia.)

¹⁰ Bema tadikaka ta be ia ura lasi gaukara ma haida ia karaia, ena lalohadai ia haidaua totona oi gaukara goada bona haheauka be namo. Unai oi karaia diba. Tohu ia tubu maoromaoro totona, biru tauna ese au ta be tohu badinai ia haginia. Unai hegeregerena bema unai tadikaka oi durua, do ia itaia ena lalohadai ia haidaua bona maduna ia abia dae be namo. To edena dala ai unai oi karaia diba?

¹¹ Nega oi atoa tadikaka oi tura henia totona. Oi hadibaia kongrigeisen taudia be ena heduru idia ura. Bena ia ida oi helai bona Baibel siri haida umui herevalaia. Bona oi durua ena gwauhamata Iehova dekenai ia laloatao totona. (Had. 5:4; Isa. 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Reana do oi nanadaia: ‘Iehova dekenai emu mauri oi henia neganai, dahaka gwauhamata oi karaia?’ Bena oi nanadaia: ‘Oi bapatiso neganai, oi laloa Iehova ena hemami oi dekenai be edena bamona?’ (Aon. 27:11) ‘Satani be dahaka ia laloa?’ (1 Pet. 5:8) Laloatao, Baibel siri namodia be tadikaka dekenai oi duahia neganai, unai ese ia do ia hagoadaia bada.—Heberu 4:12 duahia. *

12, 13. (a) Elisaia be edena kara ia hahedinaraia? (b) Elisaia ena kamonai karana dainai, dahaka hahenamo ia abia?

¹² Tadikaka matamata e, kongrigeisen be emu heduru ia ura! Edena kara ese oi do ia durua Iehova ena hesiai gaukara ai oi kwalimu totona? Haere abia totona, namona be idaunegai ia noho tauna Elisaia dekenai ia vara gaudia haida ita laloa.

¹³ Lagani 3,000 gunanai, peroveta tauna Elia ese Elisaia ia noia ena hesiai tauna ai ia lao totona. Elisaia ese ia abia dae bona mai kamonai ida peroveta tauna burukana ia hesiai henia, bona gaukara maragidia haida ia karaia. (2 Kin. 3:11) Bena Elisaia be lagani siks lalonai treinini ia abia murinai, ia diba Elia ena gaukara Israela ai be do ia ore. Unai negai, Elia ese Elisaia ia hadibaia ia do ia rakatania totona, to Elisaia ese nega toi Elia ia hamaoroa: “Lau ese oi do lau rakatania lasi.” Elisaia be ena lalona ia hadaia ena hadibaia tauna ida ia noho totona. Elisaia ena kamonai bona badinaia karana dainai, ena hahenamo be Iehova ese dala ia karaia Elia be hoa dalanai ia lao karana ia itaia.—2 Kin. 2:1-12.

14. (a) Hari, edena dala ai tadikaka matamata ese Elisaia idia tohotohoa diba? (b) Dahaka dainai tadikaka matamata be kamonai karana ia hahedinaraia be mai anina bada?

¹⁴ Edena dala ai Elisaia oi tohotohoa diba? Mai ura ida gaukara maragidia oi abia dae. Emu hadibaia tauna be emu tura ai oi  halaoa, bona oi hadibaia ena heduru namona oi laloa bada. Unai amo oi hahedinaraia oi ura ia do oi badinaia noho. To, mai anina bada gauna be oi abia asainmen ibounai be mai ura ida oi karaia. Dahaka dainai unai be mai anina bada? Badina unai amo elda taudia do idia diba Iehova ia ura oi dekenai kongrigeisen ena maduna haida do idia henia.—Sal. 101:6; 2 Timoteo 2:2 duahia.

15, 16. (a) Edena dala ai Elisaia be ena hadibaia tauna dekenai hemataurai ia hahedinaraia? (Laulau ginigunana itaia.) (b) Edena dala ai peroveta taudia haida be Elisaia ena kara ese ia hagoadaia?

¹⁵ Elisaia ena sivarai ese ia hahedinaraia tadikaka matamata ese lo elda taudia idia matauraia be mai anina bada. Elia bona Elisaia be Ieriko dekenai peroveta taudia idia vadivadi henia murinai, idia ruaosi be Ioridane sinavai dekenai idia raka lao. Unuseniai, “Elia ese iena dabua badana ia abia, ia lokua, bona dabua dekenai sinavai ranu ia botaia. Vadaeni sinavai ranu be ia parara.” Ia kaukau sinavai idia hanaia murinai, ‘idia raka bona herevahereva noho.’ Momokani, Elisaia ia laloa lasi ia be gau ibounai ia diba vadaeni. To, ia ese Elia ena hereva ibounai ia badinaia ela bona Elia be lai badana ese ia abia lao. Gabeai, Ioridane sinavai ai, Elisaia ese Elia ena dabua amo ranu ia botaia, bona ia boiboi: “Lohiabada, Elia ena Dirava be edeseni?” Bena ranu ia parara lou.—2 Kin. 2:8-14.

¹⁶ Elisaia ese ia karaia hoa karana ginigunana be Elia ese ia karaia hoa karana hegeregerena. Unai oi itaia, a? Dahaka dainai unai ita laloa bada? Elisaia ia laloa lasi ia be hari ena ura hegeregerena gau haida ia karaia diba. To, ia be Elia ese ia karaia hesiai gaukara hegeregerena ia badinaia. Elisaia ese ena hadibaia tauna ia matauraia, unai ese peroveta taudia haida ia hagoadaia. (2 Kin. 2:15) To, Elisaia be lagani 60 lalonai peroveta gaukara ia karaia neganai, Iehova ese ia durua hoa karadia momo ia karaia totona, bona Elia ena ia hanaia. Unai sivarai amo dahaka oi dibaia?

17. (a) Edena dala ai tadikaka matamata be Elisaia idia tohotohoa diba? (b) Gabeai, Iehova ese tadikaka matamata be edena bamona do ia durua?

¹⁷ Namo lasi oi laloa kongrigeisen ai maduna oi abia neganai, emu ura hegeregerena gau haida oi karaia diba, anina be guna idia karaia hegeregerena oi badinaia lasi. Laloatao, kongrigeisen ai gau haida idia haidaua be kongrigeisen ena namo totona, eiava bema Iehova ena orea be hakaua hereva ta idia henia. Elisaia be Elia ese ia hadibaia daladia ia badinaia dainai peroveta taudia haida ia hagoadaia bona ena hadibaia tauna ia matauraia. Unai hegeregerena, Baibel ese ia hadibaia daladia oi badinaia dainai oi be tadikaka taihu oi hagoadaia bona lo elda taudia oi matauraia. (1 Korinto 4:17 duahia.) To, diba ma haida oi abia neganai, kongrigeisen do oi durua Iehova ena orea ese idia hadibaia gaudia haida idia badinaia totona. Momokani, Elisaia bamona, Iehova ese umui do ia durua gaukara momo umui karaia totona, bona unai be emui hadibaia taudia edia ia hanaia.—Ioa. 14:12.

18. Hari, dahaka dainai tadikaka treinini henia karana be mai anina bada?

¹⁸ Ai guriguri, inai atikol bona atikol ginigunana edia hakaua herevadia ese elda taudia do ia durua nega idia atoa ma haida idia treinini henia totona. Namona be idia hegeregere tadikaka ese unai treinini idia abia dae bona idia gaukaralaia Iehova ena mamoe idia naria totona. Unai bamona umui karaia neganai, tanobada ibounai kongrigeisen do ia goada, bona ita ta ta do ia durua inai mai anina bada negana ai Dirava ita badinaia totona.