1-3. Edena dala ai Paulo ena abidadama Iehova dekenai ia goada? (Laulau ginigunana itaia.)

APOSETOLO taudia edia negai, Roma ai idia noho Keristani taudia be dagedage idia davaria. Roma taudia ese Keriso murinai idia raka taudia idia samania koikoi idia gwau, lagani 64 C.E. ai Roma hanua idia gabua, bona taunimanima idia inai henia. Bema oi be Keristani tauna ta unai negai, dina ta ta ai Roma ena tuari taudia ese oi do idia dogoatao bona hahisia bada. Emu tadikaka bona taihu haida be animal ese edia tauanina idia darea maragimaragi, eiava au ai idia kokodia kau bona hanuaboi ai lahi amo idia gabudia.

² Unai dagedage negadiai, aposetolo Paulo be nega iharuana Roma ena dibura ruma ai idia atoa. Reana Paulo ia laloa Keristani taudia ma haida ese ia do idia durua, to Timoteo ia tore henia neganai, ia gwau: “Lauegu kota ginigunana ai, tau ta ese lau ia durua lasi, to idia ibounai ese lau idia rakatania. Namona be Dirava ese edia kara ena davana ia henia lasi.” Paulo ma ia gwau: “To, Lohiabada ese lau ia durua bona lau ia hagoadaia.” Oibe, Iehova be Lohiabada Iesu amo Paulo dekenai siahu  ia henia. Edena dala ai unai ese Paulo ia durua? Paulo ia gwau: “Lohiabada ese laiona ena uduna amo lau ia hamauria.”—2 Tim. 4:16, 17. *

³ Paulo be ia vara gauna ia laloatao karana ese ia hagoadaia bona ia abia dae Iehova ese goada do ia henia ia davaria hahetoho bona vaira negadiai do idia vara hahetoho ia haheaukalaia totona. Ia gwau: “Lohiabada ese dika ibounai amo lau do ia hamauria.” (2 Tim. 4:18) Oibe, Paulo ia diba ena be nega haida ena tadikaka ese ia do idia durua lasi, to Iehova bona ena Natuna ese ia idia durua diba!

4, 5. (a) Daika amo heduru oi abia diba? (b) Edena dala ai emu hetura karana Iehova ida oi hagoadaia diba?

⁴ Nega ta hekwakwanai badana ta oi davaria bona oi laloa ta ese oi do ia durua lasi, a? Reana oi davaria hekwakwanai be, moni gaukara, sikuli, gorere, eiava hekwakwanai badadia ma haida. Reana haida amo heduru totona oi noinoi, to heduru oi abia lasi dainai oi lalohisihisi. Momokani, hekwakwanai haida be taunimanima ese do idia haorea diba lasi. To, dahaka oi karaia be namo? Baibel ia gwau ‘Iehova do ita abidadama henia.’ (Aon. 3:5, 6) Oi abia dae Iehova ese oi do ia durua, a? Oibe! Baibel sivaraidia ita duahia neganai, do ita abia dae Iehova ese ita do ia durua.

⁵ Unai dainai, taunimanima edia heduru ita abia lasi neganai ita lalohisihisi lasi, to Paulo bamona do ita laloa bona unai bamona negadiai Iehova ita abidadama henia bona ena lalokau karana do ita itaia. Unai ese emu abidadama bona emu hetura karana Iehova ida do ia hagoadaia.

6. Hekwakwanai ita davaria neganai, dahaka dainai nega haida Iehova ita abidadama henia be auka?

⁶ Reana oi be hekwakwanai badana ta oi davaria dainai oi lalohisihisi. Oi be hekwakwanai hamaoromaoroa daladia ibounai oi badinaia bona Iehova ena heduru totona oi noinoi. Hari lalomaino oi abia, badina oi abia dae ia ese oi do ia durua, a? Oibe! (Salamo 62:8; 1 Petero 5:7 duahia.) Unai bamona oi karaia loulou neganai, emu hetura karana Iehova ida do ia goada. To, nega haida Iehova ita abidadama henia be auka. Dahaka dainai? Badina ta be nega haida Iehova ese iseda guriguri ia haerelaia haraga lasi.—Sal. 13:1, 2; 74:10; 89:46; 90:13; Hab. 1:2.

7. Dahaka dainai nega haida Iehova ese iseda guriguri ia haerelaia haraga lasi?

⁷ Dahaka dainai nega haida Iehova ese iseda guriguri ia haerelaia haraga lasi? Laloatao, Iehova ese eda hetura karana be natu ta bona tamana edia hetura karana ida ia hahegeregerea. (Sal. 103:13) Tamana ese natu ia noia gaudia ibounai be do ia henia haraga lasi. Ia diba vaia natudia be gau ta do idia ura henia haraga, to gabeai do idia ura henia lasi. Danu ia diba dahaka be namo ena natuna totona, bona ia diba bema unai ese ma haida do ia durua o lasi. Ia diba natuna be dahaka ia ura bona edena nega ai do ia abia. Bema tamana ese natuna ena ura gaudia ia henia haraga sibona, ia be natuna ena hesiai tauna ai ia lao diba. Unai hegeregerena, iseda guba Tamana, Iehova be ita ia lalokau henia. Ia be iseda Havaraia Tauna dainai, ia diba edena nega maorona  ai eda guriguri do ia haerelaia. Namona be Iehova ita naria bona ita itaia edena dala ai ia ese iseda guriguri do ia haerelaia.—Isa. 29:16; 45:9 sekea.

8. Iseda diba bona goada be mai ena hetoana dainai, Iehova be dahaka gwauhamata ia henia?

⁸ Badina ma ta be Iehova ia diba iseda goada bona diba be mai ena hetoana. (Sal. 103:14) Unai dainai, tama ta bamona ita ia durua. Oibe, nega haida ita mamia hekwakwanai ita haheaukalaia diba lasi. To, Iehova ia gwauhamata “ia ese dala do ia kehoa” unai hekwakwanai ita hanaia totona. (1 Korinto 10:13 duahia.) Unai dainai ita diba Iehova ita abidadama henia diba, badina ia diba dahaka be maoro.

9. Bema heduru totona ita guriguri to haere ita abia haraga lasi, dahaka ita karaia be namo?

⁹ Bema heduru totona ita guriguri to haere ita abia haraga lasi, Dirava dekenai ita naria be namo badina ia diba edena nega maorona ai ita do ia durua. Laloatao, Iehova ia ura bada ita ia hamauria, to ia haheauka noho. Baibel ia gwau: “Lohiabada ese umui ia rakatania lasi, umui totona ia naria noho, umui dekenai do ia bogahisihisi totona. Inai bamona ia karaia, badina iena kara be maoromaoro nega ibounai. Momokani, Lohiabada dekenai idia abidadama henia taudia ese namo do idia davaria!”—Isa. 30:18.

10-12. (a) Dahaka gaudia dainai Keristani tauna ese gorere tauna ia naria be auka? (b) Nega aukadia ai Iehova abidadama henia karana ese edena dala ai emu hetura karana ia hagoadaia? Haheitalai gwauraia.

¹⁰ Hekwakwanai badadia oi davaria neganai reana Paulo bamona, do oi laloa oi be “laiona ena uduna” lalonai o kahirakahira oi noho bamona. Unai bamona negadiai Iehova oi abidadama henia be mai anina bada, to nega haida do ia auka. Hegeregere, oi be ruma bese tauna ta ia gorere bada bona ia oi naria. Reana aonega bona goada totona oi guriguri. * Unai oi karaia dainai, oi diba Iehova be oi ia itaia bona oi do ia durua oi haheauka totona, unai ese oi dekenai lalomaino ia henia, a?—Sal. 32:8.

¹¹ Reana gau haida dainai do oi laloa Iehova be oi ia durua lasi. Reana doketa amo sivarai dikana ta oi kamonai. Eiava varavara be oi idia durua lasi, to unai hekwakwanai idia habadaia. Namona be Iehova dekenai oi tabekau, ia ese goada do ia henia. Iehova kahirakahira oi lao noho. (1 Samuela 30:3, 6 duahia.) Iehova ese oi ia durua neganai, unai ese emu hetura karana ia ida ia hagoadaia.

¹² Linda * be unai bamona ia mamia. Iena gorere tama sina idia do mauri noho lalonai, nega daudau lalonai idia ia naria. Ia gwau: “Unai negadiai, nega momo lau, egu adavana, bona egu tadina mero be ai diba lasi dahaka do ai karaia. Ai laloa ai hegeregere lasi idia ai naria totona. To unai ai laloa lou neganai, ai itaia unai negadiai Iehova ese ai ia durua. Ia ese ai ia hagoadaia bona emai dabu gaudia be ai dekenai ia henia, herevana ai diba lasi dahaka do ai karaia.”

13. Edena dala ai taihu ta be Iehova ia abidadama henia dainai, ena hekwakwanai ia haheaukalaia?

¹³ Nega aukadia ai Iehova abidadama henia karana ese ita ia durua diba. Rhonda ena witnes lasi adavana be ia ura divos lalonai, Rhonda ena tadina mero be lupus gorere badana ta ia davaria. Hua haida murinai, ena tadina mero ena adavana ia mase. Rhonda be ena lalometau  ia ore ia lao neganai, regula painia ia hamatamaia. To gabeai, ena sinana ia mase. Dahaka ese Rhonda ia durua unai ia haheaukalaia totona? Ia gwau: “Hanaihanai Iehova lau guriguri henia; disisen maragidia lau karaia negadiai danu. Unai lau karaia neganai, lau mamia Iehova be tura korikorina ta bamona. Danu lau dibaia gauna ta be inai, namo lasi egu lalohadai o ma haida dekenai lau tabekau, to Iehova dekenai lau tabekau be namo. Bona lau mamia Iehova ese lau ia durua, badina gau ta dekenai lau dabu lasi. Unai dainai, Iehova ida lau gaukara hebou karana lau itaia.”

14. Edena dala ai Keristani tauna ta be Iehova ia abidadama henia diba, bema ena famili tauna ta idia atoa siri?

¹⁴ Gau ma ta ita laloa: Bema emu famili tauna ta be kongrigeisen amo idia atoa siri. Baibel stadilaia karana amo oi diba atoa siri taudia be edena bamona do oi kara henia. (1 Kor. 5:11; 2 Ioa. 10) To, nega haida ta idia atoa siri karana oi abia dae be auka. * To, oi abia dae emu guba Tamana ese oi dekenai goada do ia henia, Baibel ena hakaua herevadia oi badinaia totona, a? Oi laloa unai bamona negadiai ia kahirakahira oi lao bona emu hetura karana ia ida oi hagoadaia diba, a?

15. Dahaka dainai Adamu ese Iehova ena taravatu Eden umana dekenai ia badinaia lasi?

¹⁵ Mani tau ginigunana Adamu ita laloa. Bema Iehova ia badinaia lasi, ia laloa do ia noho hanaihanai, a? Lasi. Badina Baibel ia gwau, Satani be “Adamu ia koia lasi.” (1 Tim. 2:14) Vadaeni, dahaka dainai Iehova ia badinaia lasi? Adamu be Heva ese ia henia au huahua ia ania badina  reana ena adavana ia lalokau henia bada. Ia ese ena adavana ena hereva ia kamonai, to iena Dirava, Iehova, ia kamonai henia lasi.—Gen. 3:6, 17.

16. Daika ita lalokau henia bada be namo, bona dahaka dainai?

¹⁶ Unai ena anina be ita ese eda varavara do ita lalokau henia bada lasi, a? Lasi! To gau badana be Iehova do ita lalokau henia bada. (Mataio 22:37, 38 duahia.) Unai ita karaia neganai, iseda varavara ita durua diba, herevana idia be Iehova idia hesiai henia o lasi. Unai dainai namona be emu lalokau Iehova dekenai oi hagoadaia bona ia oi abidadama henia. Bona bema emu varavara ta idia atoa siri dainai oi lalohekwarahi, namona be mai kudouna ibounai ida Iehova dekenai oi guriguri. * (Roma 12:12; Fili. 4:6, 7) Unai hekwakwanai negadiai, namona be oi laloa unai ese emu hetura karana Iehova ida ia hagoadaia. Unai ese oi do ia durua Iehova oi abidadama henia bona oi haheauka totona.

17. Basileia harorolaia gaukara dekenai ita bisi neganai, edena dala ai ita hahedinaraia Iehova ita abidadama henia?

¹⁷ Dahaka dainai Iehova ese Paulo be “laiona ena uduna” amo ia hamauria? Paulo ia gwau: “Vadaeni sivarai namona lau harorolaia guguru, bona idau taudia ibounai ese idia kamonaia diba.” (2 Tim. 4:17) Paulo bamona, bema haroro gaukara ai ita bisi, ita hahedinaraia ita be Iehova ita abidadama henia bona ita diba ia ese iseda ura gaudia ibounai “do ia henia.” (Mat. 6:33) Ita be Basileia harorolaia taudia dainai, Iehova ese “sivarai namona harorolaia gaukarana” be ita dekenai ia henia, bona ia diba ita be ia “ida [ita] gaukara hebou taudia.” (1 Tes. 2:4; 1 Kor. 3:9) Dirava ena gaukara dekenai ita bisi noho neganai, Iehova ena heduru totona ita naria diba.

18. Edena dala ai Iehova ita abidadama henia bona iseda hetura karana ia ida ita hagoadaia diba?

¹⁸ Namona be inai nega lalonai iseda hetura karana Dirava ida ita hagoadaia. Bema hekwakwanai haida dainai ita lalomanoka, namona be Iehova ita abidadama henia bona ia kahirakahira ita lao. Oibe, Dirava ena Hereva ita laloa dobu, hanaihanai ita guriguri, bona Iehova hesiai henia gaukaradia lalonai ita bisi neganai, ita hahedinaraia Iehova ita abidadama henia. Badina ita diba ia ese ita do ia durua hari bona nega vairai idia vara hekwakwanai ita hanaia totona.