ANITA * ia bapatiso bona Iehova ena Witnes hahinena ta ai ia lao neganai, ena adavana ese ia dagedage henia bada. Anita ia gwau: “Egu adavana ia ura lasi hebou lau lao bona ia ura lasi Dirava ena ladana lau gwauraia. Iehova ena ladana lau gwauraia neganai ia badu dikadika.”

Anita ese ena natudia rua dekenai Iehova ia herevalaia be auka. Ia gwau: “Egu ruma dekenai Iehova tomadiho henia karadia lau karaia diba lasi. Egu natudia lau stadi henidia diba lasi, bona hebou lau abidia lao lasi.”

Anita ena sivarai amo ita diba Keristani tauna ta be ena ruma bese amo dagedage ia davaria neganai, ena abidadama ia tohoa diba. Eiava tohoa gaudia haida be gorere badana ta, natu o adavana ia mase, eiava famili lalonai ta be Iehova ia rakatania. To, dahaka ese Keristani tauna ta ia durua Iehova ia abidadama henia noho totona?

Hahetoho oi davaria negadiai, dahaka do oi karaia? Aposetolo Paulo ia gwau: “[Oi] haheauka noho be namo.” (Heb. 10:36) To, dahaka ese oi ia durua diba oi haheauka totona?

Hekwakwanai ita haheaukalaia dalana ta be, guriguri amo Iehova dekenai ita tabekau. Mani sivarai ta ita laloa. Monday adorahi ta ai, Ana ena famili lalonai dika ta ia vara. Ena adavana ia mase, idia ruaosi be lagani 30 idia headava vadaeni. Ana ia gwau: “Egu adavana—ena mauri lagani 52 sibona—be gaukara totona ia lao neganai, ia giroa lou lasi.”

Dahaka ese Ana ia durua ia haheauka totona? Ia giroa lou ena moni gaukara dekenai badina unai ese ia durua ia wari momo lasi totona, to unai ese ena lalometau ia haorea lasi. Ana ia gwau: “Egu hemami ibounai be Iehova dekenai lau gwauraia bona ia lau noia egu adavana ena mase lau haheaukalaia totona.” Iehova ese iena guriguri ia haerelaia, a? Oibe, badina Ana ia gwau: “Dirava sibona ese ia henia lalomaino ese lau ia durua, lau laloa namonamo totona. Lau diba momokani Iehova ese egu adavana do ia hatorea isi lou.”—Fili. 4:6, 7.

“Guriguri ia kamonai Diravana” ia gwauhamata, dala idauidau ai ena hesiai taudia do ia durua ia idia badinaia noho totona. (Sal. 65:2, BHḡ) Unai gwauhamata ese iseda abidadama ia hagoadaia, ani? Unai ese ita ia durua ita haheauka ena badina ita diba totona.

Iehova be Keristani kongrigeisen amo ena taunimanima ia durua. Hegeregere, Tesalonika kongrigeisen taudia be dagedage idia davaria neganai, Paulo ese idia ia hagoadaia, ia gwau: “Do umui durua heheni bona hagoadaia heheni noho, hari umui karaia noho bamona.” (1 Tes. 2:14; 5:11) Tesalonika Keristani taudia idia lalokau bona heduru heheni dainai, unai nega aukana ai idia haheauka. Idia be haheitalai namona ita dekenai, bona idia ia durua gauna ese hari ita ia durua diba ita haheauka totona.

Kongrigeisen taudia bamoa karana ese ita ia durua “ma haida idia hagoadaia gaudia ita tahua noho.” (Roma 14:19) Hekwakwanai negadiai unai be mai anina bada. Paulo danu be hekwakwanai momo ia davaria, to Iehova ese goada ia henia bona ia haheauka. Nega haida, Dirava ese abidadama tamona taudia ia gaukaralaia Paulo ia hagoadaia totona. Hegeregere, Paulo be Kolose kongrigeisen taudia dekenai hanamoa hereva ia siaia ia gwau: “Idia ese lau idia durua bona hagoadaia bada.” (Kol. 4:10, 11) Oibe, Paulo idia lalokau henia dainai, dika ia davaria neganai ia idia durua bona hagoadaia. Reana oi danu be emu kongrigeisen taudia amo unai bamona heduru oi abia vadaeni.

Dirava ese lo elda taudia ia atoa Keristani kongrigeisen taudia idia durua totona. Idia be “lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” (Isa. 32:2) Momokani, idia be heduru namona idia henia! Elda taudia amo heduru oi tahua, a? Edia heduru amo goada ita abia ita haheauka totona.

Ita diba elda taudia be hoa karadia idia karaia diba lasi. Danu idia be goevadae lasi taudia, “[idia] be taunimanima sibona, [ita] bamona.” (Kara 14:15) To, ita totona idia gwauraia guriguri ese anina namona ia havaraia. (Iam. 5:14, 15) Italy ai, tadikaka ta be lagani momo lalonai gorere badana ta ia haheaukalaia, unai be masolo bona turia idia manoka idia lao gorerena. Ia gwau: “Tadikaka taihu edia lalokau bona edia vadivadi loulou karana ese lau ia durua lau haheauka totona.” Elda taudia be harihari gaudia namodia Iehova amo dainai, edia heduru oi tahua noho, a?

Ita haheauka totona gau ma haida ita karaia diba. Dala ta be, Dirava tomadiho henia karadia ita badinaia noho. John, ena mauri lagani 39 tadikaka ta ena sivarai mani ita laloa. Ia be kensa gorere ia davaria. Ia gwau: “Lau laloa unai gorere do lau abia lasi, badina lau do buruka lasi.” Unai negai, John ena natuna mero ena mauri lagani be 3 sibona. John ia gwau: “Egu adavana be emai natuna ia naria sibona lasi, to lau ia naria bona lau ia bamoa doketa ai itadia totona.” Kemoterapi o kensa taudia ese idia abia muramura, ese John ena tauanina ia hamanokaia momokani bona mumuta mamina ia abia. Unai sibona lasi, to John ena tamana ia gorere bada bona ta ese ia naria be namo.

Unai nega aukadia ai, John bona ena ruma bese be dahaka idia karaia? John ia gwau: “Ena be egu tauanina ia goada lasi, to egu ruma bese ida Dirava tomadiho henia karadia ai badinaia. Hebou ibounai ai lao, ai haroro, bona hanaihanai emai ruma bese tomadiho ai karaia, herevana nega haida unai be mai ena hekwarahi.” Oibe, John ia laloparara ena gorere ia haheaukalaia totona, Dirava tomadiho henia karadia ia badinaia noho be mai anina bada. Metau idia davaria taudia dekenai, John ena hagoadaia herevana be dahaka? Ia gwau: “Matamanai do oi hoa bona daradoko, to Iehova ese oi dekenai goada do ia henia bona ena lalokau do oi mamia. Iehova ese lau ia hagoadaia hegeregerena, oi do ia hagoadaia danu.”

Hari eiava vaira negana ai reana hahetoho badadia eiava dagedage do ita davaria, to ita diba momokani Dirava ese ita do ia durua ita haheauka totona. Namona be guriguri amo Iehova dekenai ita tabekau, kongrigeisen taudia ita bamoa, elda edia heduru ita tahua, bona hanaihanai Dirava tomadiho henia karadia ita badinaia. Unai ita karaia neganai, ita be Paulo ena hereva ita badinaia, ia gwau: “Umui haheauka noho be namo.”