1. Taunimanima ese kara goeva be edena bamona idia laloa?

HARI, taunimanima momo be kara goeva idia laloa bada lasi. Tano momo ai, taunimanima idia laloa tatau be tatau (o hahine be hahine) ida idia sihari kava bona idia do headava lasi taudia idia mahuta hebou be kerere lasi. Bona unai bamona karadia be niuspepa, TV, muvi, bona Intanet ai idia hahedinaraia. (Sal. 12:8) Matabodaga karadia be ia bada ia lao dainai, reana do oi laloa, ‘Kara goeva ita badinaia noho diba, a?’ Haere be: Oibe, Iehova ena heduru amo Keristani taudia momokanidia be kara goeva idia badinaia noho diba.—1 Tesalonika 4:3-5 duahia.

2, 3. (a) Dahaka dainai ura dikadia ita dadaraia be gau badana? (b) Inai stadi ai dahaka do ita herevalaia?

² To, iseda mauri lalonai kara goeva ita badinaia totona, ura dikadia ita dadaraia be gau badana. Gwarume be guma ese ia koia hegeregerena, bema Keristani tauna ese lalohadai bona ura dikadia ia dadaraia haraga lasi, unai ese ia koia diba bena ia kara dika. Ita be goevadae lasi taudia dainai, unai ura dikadia ese eda lalona ia veria bena kara dika ita karaia. Metairametaira unai ura dikadia idia tubu idia lao bona dika ia  havaraia. Unai neganai, bema Iehova ena hesiai tauna be hahetoho ia davaria, reana ena ura ia badinaia diba. Oibe, iena “ura ia rogorogo bamona neganai kara dika ia havaraia.”—Iamesi 1:14, 15 duahia.

³ Namona be ita laloatao, nega sisina lalonai ia vara ura dikadia bema ita dadaraia lasi, kara dika badana ta ita karaia diba. Unai dainai bema iseda lalona ai ura dikadia ita kokia, matabodaga karadia do ita karaia lasi bona unai ese ia havaraia hisihisi do ita davaria lasi. (Gal. 5:16) Hari gau toi do ita herevalaia, unai ese ita do ia durua ura dikadia ita dadaraia totona. Unai be (1) iseda hetura karana Iehova ida, (2) Baibel ena sisiba, bona (3) lo Keristani taudia edia heduru.

4. Dahaka dainai Dirava kahirakahira ita lao be mai anina bada?

⁴ Baibel ia gwau, “Dirava kahirakahira do umui lao” totona namona be “emui imana umui hagoevaia, bona . . . emui kudouna umui hagoevaia.” (Iam. 4:8) Bema iseda hetura karana Iehova ida ita laloa bada, do ita hekwarahi eda kara, hereva bona lalohadai amo ia ita hamoalea totona. Bema ita ura iseda lalona o kudouna ia goeva, namona be kara goeva bona kara namodia sibona ita laloa. (Sal. 24:3, 4; 51:6; Fili. 4:8) Momokani, Iehova ia laloparara ita be goevadae lasi taudia. Ia diba nega haida ura dikadia ita abia diba. To, ita diba bema lalohadai dikadia ita kokia lasi, Iehova do ia moale lasi. (Gen. 6:5, 6) Unai ita laloa neganai, iseda lalona do ita hadaia kara goeva gaudia sibona ita laloa totona.

5, 6. Edena dala ai guriguri ese ita ia durua ura dikadia ita dadaraia totona?

⁵ Iehova dekenai eda abidadama ita hahedinaraia totona, mai anina bada gauna be lalohadai dikadia dadaraia karana ita gurigurilaia be namo. Guriguri amo Iehova kahirakahira ita lao, ia be ita kahirakahira do ia mai. Ita dekenai ena lauma helaga ia henia, unai amo ita ia hagoadaia lalohadai dikadia ita dadaraia bona kara goeva ita badinaia totona. Unai dainai, Dirava ita hamoalea totona ia dekenai iseda ura gaudia ita gwauraia hedinarai. (Sal. 19:14) Mai manau ida Dirava ita noia iseda lalona ia tahua totona, bema eda lalona dekenai “dika ta”—ura o lalohadai dikana ta—ia noho.(Sal. 139:23, 24) Hedibagani negadiai Dirava ita badinaia totona, hanaihanai Dirava ita noia ena heduru totona, a?—Mat. 6:13.

⁶ Reana eda famili maurina eiava eda kara gunadia dainai, nega haida do ita ura Iehova ia inai henia karadia ita karaia. To, Iehova ese ita ia durua diba eda kara ita haidaua totona, unai amo ena ura hegeregerena ia do ita hesiai henia. King Davida be unai ia diba. Davida be Bataseba ida ia heudahanai murinai, Iehova ia noia, ia gwau: “Lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” (Sal. 51:10, 12) Ita be goevadae lasi taudia dainai, kara dika urana ita abia diba, to bema ita ura momokani Iehova ita badinaia ia ese ita do ia durua. Ena be ura dikadia be eda lalona ai idia noho bona iseda lalohadai goevadia ia hadikaia diba, to Iehova ese ita ia durua diba ena taravatu be eda mauri lalonai ita badinaia. Dirava ese hahetoho idauidau amo ita ia gimaia diba.—Sal. 119:133.

7. Edena dala ai, Baibel ese ita ia durua lalohadai dikadia ita dadaraia totona?

⁷ Iehova ese ena Hereva, Baibel amo iseda  guriguri ia haerelaia diba. Baibel ese ia hahedinaraia, aonega tauna ena kara ginigunana be “kara goeva.” (Iam. 3:17) Hanaihanai Baibel ita duahia bona ita laloa dobu karana ese ita ia durua diba lalohadai dikadia ita dadaraia totona. (Sal. 19:7, 11; 119:9, 11) Danu, Baibel lalonai idia noho sivarai bona sisiba namodia ese ita idia durua diba ura dikadia ita dadaraia totona.

8, 9. (a) Dahaka dainai mero ta be lebulebu hahine ta ena hereva dainai ia moru? (b) Aonega Herevadia karoa 7 ese ita ia durua, edena bamona gaudia ita dadaraia totona?

⁸ Aonega Herevadia 5:8 ia gwau: “[Lebulebu] hahine dekena amo do oi raka siri. Iena ruma ena iduara kahirakahira do oi lao lasi.” Unai sisiba ita badinaia lasi neganai, ita be Aonega Herevadia karoa 7 ese ia herevalaia mero ena kara hegeregerena ita kara diba. Unai mero be hanuaboi ai, lebulebu hahinena ena ruma kahirakahira ia raka lao. Hahine danu ia hedavari, ena dabua ia kwatua toana be lebulebu hahine bamona. Unai mero ia rosia bona ia kisi henia. Hahine ena laloani herevadia dainai, mero ese ena hereva ia abia dae bona idia mahuta hebou. To, matamanai unai mero be mahuta hebou lalohadaina ia abia lasi. Bona ia be mero matamata sibona dainai, do ia vara dika ia itaia haraga lasi. To, bema  unai hahine ena ruma kahirakahira ia lao lasi, dika do ia davaria lasi!—Aon. 7:6-27.

⁹ Nega haida ita laloa maoromaoro lasi dainai, gabu kereredia ai ita noho neganai ura dikadia idia vara diba, a? Hegeregere, hanuaboi momokani ai televisen ai matabodaga laulaudia idia hahedinaraia. To, bema nega haida TV ai muvi idauidau oi itaia be edena bamona? Eiava reana Intanet ai Web sait haida oi sekea kava lalonai ponografi o matabodaga laulaudia idia hedinarai. Unai ese ura dikadia ia havaraia dainai, kara goeva ita badinaia be auka.

10. Dahaka dainai hauraia kava karana be mai ena dika? (Laulau ginigunana herevalaia.)

¹⁰ Ma danu, Baibel ese ita ia sisiba henia, edena dala ai tau o hahine eiava mero o kekeni ita kara henia. (1 Timoteo 5:2 duahia.) To namo lasi ma haida ita hauraia kava. Haida idia laloa edia hereva, kara o vairana ena toana amo ma ta hauraia karana be kerere lasi. To, hauraia kava karana o ta ena hauraia karana oi haloua neganai, unai ese lalohadai dikadia ia havaraia diba, bena kara dika badana oi karaia. Guna unai ia vara, to hari danu unai ia vara diba.

11. Iosepa be dahaka haheitalai namona ia hahedinaraia?

¹¹ Iosepa ese aonega karana ia hahedinaraia. Iosepa ena biaguna, Potifara ena adavana ese Iosepa ena lalona ia ania neganai, ia ese ia dadaraia. To, unai hahine ia hesiku lasi, dina ta ta ai Iosepa ia doria ia ida idia noho hebou totona. (Gen. 39:7, 8, 10) Baibel diba bada tauna ta ia gwau, reana Potifara ena adavana ia gwau: “‘Namona be nega sisina ita sibona ita noho,’ unai hereva amo ia hahedinaraia ia ura Iosepa be kara ta do ia karaia guna.” To, Iosepa be ena lalona ia hadaia unai hahine ena hauraia herevadia ia haloua lasi totona, bona maoromaoro ia dadaraia. Unai amo lalohadai dikadia do ia abia lasi. Ia ura Iosepa ia doria idia mahuta hebou totona, to karaharaga Iosepa ese ia dadaraia, bona ena “dabua ia rakatania hahine ena imana dekenai, ruma dekena amo ia heau murimuri dekenai.”—Gen. 39:12.

12. Edena bamona ita diba bema ita itaia o raraia momo gauna ese iseda lalona ia hadikaia diba?

¹² Danu, Baibel ese ita ia hadibaia, namo lasi iseda matana amo ita itaia gaudia ese iseda kudouna ia hadikaia. Bema eda matana ita naria namonamo lasi, unai ese matabodaga lalohadaidia ia havaraia o ia habadaia diba. Iesu ia gwau “bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mat. 5:28) King Davida dekenai ia vara gauna mani oi laloa. “Guhi dekena amo Davida ese hahine ta ia itaia, ia digu noho. Ia be hahine namona, mai ena hairaina.” (2 Sam. 11:2) Ia be unai hahine ia raraia noho dainai, unai ese ena lalohadai ia hadikaia. Unai dainai ia be tau ta ena adavana ia ura henia bona gabeai unai hahine ida ia heudahanai.

13. Dahaka dainai ‘iseda matana dekenai taravatu ita atoa’? Bona ena anina be dahaka?

¹³ Matabodaga lalohadaidia ita inai henia totona, namona be abidadama tauna Iobu ia karaia bamona, ‘iseda matana dekenai taravatu ita atoa.’ (Iobu 31:1, 7, 9) Namona be iseda matana ita biagua bona lebulebu dalanai ma ta ita itaia lasi. Anina be kompiuta ai, sainbod, magasin ai, eiava ma gabu haida ai idia hahedinaraia laulau dikadia ita itaia lasi.

14. Edena dala ai Baibel ena sisiba badinaia karana ese ita ia durua kara goeva ita hahedinaraia totona?

¹⁴ Bema ita herevalaia gauna ta dekenai gau ta ita hanamoa be namo, namona be  kara ta ita karaia haraga unai ita hamaoromaoroa totona. Namona be mai ura ida Baibel ena sisiba oi badinaia, unai ese oi do ia durua kara dikadia oi dadaraia bona kara goeva do oi hahedinaraia noho.—Iamesi 1:21-25 duahia.

15. Bema ita hekwarahi matabodaga lalohadaidia ita dadaraia totona, dahaka dainai heduru ita tahua be mai anina bada?

¹⁵ Bema ita hekwarahi matabodaga lalohadaidia ita dadaraia totona, lo Keristani taudia edia heduru ita tahua diba. Momokani, do ita hemarai unai hekwakwanai be ma haida dekenai ita herevalaia. To bema oi ura unai hekwakwanai oi hanaia, lo Keristani tauna ta ena heduru oi tahua, unai ese oi do ia durua lalohadai dikadia oi dadaraia totona. (Aon. 18:1; Heb. 3:12, 13) Iseda manoka gauna be lo Keristani tauna ta ida ita herevalaia neganai, idia ese ita idia durua iseda kerere ita dibaia totona. Unai amo iseda kara haida ita haidaua diba bona Iehova ena lalokau lalonai do ita noho.

16, 17. (a) Edena dala ai elda taudia ese ura dikadia idia abia taudia idia durua diba? Ekspiriens ta gwauraia. (b) Dahaka dainai ponografi idia itaia taudia ese heduru idia abia haraga be mai anina bada?

¹⁶ Elda taudia be ita idia durua diba. (Iamesi 5:13-15 duahia.) Brazil ai, mero matamata ta be lagani momo lalonai ia hekwarahi ura dikadia ia dadaraia totona. Ia gwau: “Lau diba lau lalohadailaia gaudia be Iehova ese ia moalelaia lasi, to lau hemarai ma haida dekenai unai lau herevalaia.” To ena kongrigeisen ai, elda ta be ia dekenai ia lao bona ia hagoadaia heduru ia abia totona. Unai mero matamata ia laloatao, ia gwau: “Lau hoa badina elda taudia be lau idia laloa bada, lau idia hebogahisi henia bona egu hemami idia lalopararalaia. Unai bamona idia kara dainai, lau moale bada. Lau idia hakala henia. Baibel amo idia hahedinaraia Iehova be lau ia lalokau henia, bona lau ida idia guriguri. Unai dainai ia auka lasi Baibel amo idia henia sisiba lau abia dae.” Lagani haida murinai, ia goada lou neganai, ia gwau: “Hari lau laloparara, haida amo heduru ita abia be mai anina bada, namo lasi ita sibona ita hekwarahi eda hekwakwanai ita hanaia totona.”

¹⁷ Bema ponografi itaia karana dainai ura dikadia oi abia, heduru oi tahua be gau badana. Bema heduru oi tahua haraga lasi, ura dikadia be “ia rogorogo bamona neganai kara dika ia havaraia,” unai ese ma haida do ia hahisia bona Iehova ena ladana do ia hadikaia. Iehova ena hesiai taudia momo idia ura Iehova idia hamoalea bona Keristani kongrigeisen lalonai idia noho dainai, heduru idia abia dae.—Iam. 1:15; Sal. 141:5; Heb. 12:5, 6.

18. Emu lalona oi hadaia dahaka oi karaia totona?

¹⁸ Satani ena tanobada ai momo be kara goeva idia badinaia lasi. To Iehova ena hesiai taudia be idau, badina edia lalohadai ia goeva bona Dirava ena taravatu idia badinaia noho, unai ese Dirava ia hamoalea! Namona be iseda lalona ita hadaia Iehova kahirakahira ita noho, bona iena Hereva bona Keristani kongrigeisen amo ia henia hakaua herevadia ita badinaia. Bema kara goeva ita hahedinaraia, do ita moale bona lalomaino do ita abia. (Sal. 119:5, 6) Vaira negana ai, Satani idia hadikaia ore murinai bona kara gagevadia be lasi neganai, tanobada ai do ita mauri hanaihanai mai moale ida.