1-3. Dahaka dainai Lana ia diba Iehova be iseda dabu gaudia ia diba?

LAGANI 2012 ai, Lana be Germany ai ia vara gauna ia laloaboio diba lasi. Iena guriguri ai ia noia gaudia rua edia haere ia abia. Ia be trein amo airport ia lao noho lalonai ena guriguri ginigunana ia gwauraia. Iehova ia noia dala do ia kehoa ta ia haroro henia totona. Airport dekenai ia ginidae neganai, ia idia hadibaia do ia guia peleini be kerukeru do ia roho, bena ena guriguri iharuana ia gwauraia. Badina iena moni ibounai ia haorea vadaeni, bona do ia noho gabuna be lasi.

² Lana be ena guriguri iharuana ia haorea gwauraia neganai, ta ia mai bona ia gwau: “Namo Lana, dahaka oi karaia iniseni?” Lana ia hereva henia merona be iena sikuli turana ta. Unai mero be South Africa ia lao gwauraia dainai, iena sinana bona tubuna hahine ida airport dekenai idia lao. Lana dekenai ia vara gauna idia kamonai neganai, mero ena sinana, Elke be Lana ia hamaoroa edia ruma dekenai ia noho diba. Elke bona ena sinana ese Lana idia naria namo herea, bona iena ful-taim hesiai gaukara bona ia abia dae gaudia idia ura diba dainai henanadai momo idia henia.

 ³ Daba ai, idia aniani murinai Lana ese edia henanadai ma haida ia haerelaia, bona edia adres bona fon namba ia abia unai amo gabeai ia rini henidia diba. Lana be ena gabu dekenai ia giroa lou bona regula painia gaukara ia karaia. Ia diba “guriguri ia kamonai Diravana” ese do ia durua.—Sal. 65:2, BHḡ.

4. Inai stadi ese dahaka do ia hahedinaraia?

⁴ Hekwakwanai ta ita davaria neganai, ita be maoromaoro heduru totona Iehova ita noia, bona ia ura iseda guriguri ia kamonai. (Sal. 34:15; Aon. 15:8) To, bema Iesu ena guriguri ita laloa dobu, reana mai anina bada gaudia haida be eda guriguri lalonai ita gwauraia lasi. Inai stadi ese do ia hahedinaraia, edena dala ai Iesu ese ena guriguri ai ia gwauraia gaudia foa ese ita do ia durua Iehova ita badinaia totona.—Mataio 6:11-13 duahia. *

5, 6. Dahaka dainai Iesu ia gwau namona be inai bamona ita noinoi, hari dina “aiemai aniani” mani oi henia, herevana ita dekenai ia noho aniani be hegeregere?

⁵ Iesu ia gwau namona be inai bamona ita noinoi, hari dina “aiemai aniani” mani oi henia, to ia gwau lasi “lauegu aniani.” Africa ai, sekit naria Tadikaka Victor ia gwau: “Hanaihanai Iehova lau tanikiu henia, badina lau bona egu adavana ai laloa momo lasi kerukeru ena aniani be edeseni do ai abia, eiava ai rentaia ruma ena davana karaia totona ai laloa momo lasi. Dina ta ta emai tadikaka taihu ese ai idia durua. Unai dainai, egu guriguri lalonai Iehova lau noia idia edia hekwarahi do ia hanamoa.”

⁶ Reana ita dekenai ia noho aniani be hegeregere, to iseda tadikaka taihu momo be idia ogogami. Danu iseda tadikaka taihu haida idia noho gabudiai disasta idia vara. Namona be idia totona ita guriguri, unai sibona lasi, to kara haida ita karaia idia ita durua totona. Hegeregere, bema gau ta dekenai idia dabu idia ita durua diba. Danu, tanobada ibounai gaukarana ita durua totona hanaihanai iseda kontribusen ita henia, badina ita diba unai moni do idia gaukaralaia iseda tadikaka taihu durua totona.—1 Ioa. 3:17.

7. Edena dala ai Iesu ena sisiba ese ia hahedinaraia, ‘kerukeru totona ita lalohekwarahi lasi’ be namo?

⁷ Iesu be “aiemai aniani” ia herevalaia neganai, ia be iseda dabu gaudia ia herevalaia. Unai dainai, Dirava ese tubutubu gaudia ia naria dalana ia herevalaia murinai, ia gwau: “Umui abidadama maragimaragi taudia e, Dirava ese umui dekenai dabua do ia henia lasi, a? Unai dainai namo lasi umui lalohekwarahi bona umui gwau, . . . ‘Dahaka dabua do ita hahedokilaia?’” Dokonai, inai sisiba ma ia gwauraia lou: “Kerukeru totona umui lalohekwarahi lasi.” (Mat. 6:30-34) Unai ese ia hahedinaraia vaira negana totona do ita lalohekwarahi lasi. Ita be noho gabuna, o famili durua totona moni gaukara ta, eiava medikol heduru maorona abia hidi totona ita guriguri diba. To unai gaudia sibona ita gurigurilaia lasi. Namona be iseda hetura karana Iehova ida ita laloa danu.

8. Iesu ese “hari dina aiemai aniani” ia herevalaia neganai, dahaka mai anina bada gauna ita laloa be namo? (Laulau ginigunana herevalaia.)

⁸ Iesu ese “hari dina aiemai aniani” ia herevalaia neganai, namona be Iehova ese ita dekenai ia henia herevadia ita laloa. Iesu ia gwau: “Taunimanima be aniani sibona amo lasi, to Iehova ena uduna amo idia mai hereva ibounai dainai do idia mauri.” (Mat. 4:4) Unai dainai namona be hanaihanai Iehova ita noia, nega korikori ai ia henia aniani o iena Hereva amo ita ia ubua.

9. Edena dala ai iseda kara dika be “abitorehai” bamona?

⁹ Iesu ia gwau: “Emai kara dika [abitorehai, futnout] oi gwauatao.” (Mat. 6:12; Luka 11:4) Iseda kara dika be abitorehai bamona. Lagani 1951 ena Gima Kohorona ese unai ia herevalaia namonamo, ia gwau: “Dirava ena taravatu ita utua bona ita kara dika dainai, ita be mai eda abitorehai. . . . Iseda kara dika dainai Dirava be iseda mauri dekenai gau ta do ia noia. . . . Ia be ita amo ena maino ia kokia diba, bona eda hetura karana ia ida ita hadikaia. . . . Dirava ita badinaia neganai iseda lalokau be ia dekenai ita hahedinaraia; to ita kara dika neganai, ita be mai eda abitorehai badina unai lalokau ita hahedinaraia lasi.”—1 Ioa. 5:3.

10. Edena dala ai Iehova be iseda dika ia gwauatao? Bona edena bamona unai ita laloa be namo?

¹⁰ Dina ta ta Dirava ita noia iseda kara dika ia gwauatao totona, unai ese ia hahedinaraia Iesu ena boubou gauna sibona amo Dirava ese iseda kara dika ia gwauatao diba. Ena be mauri davalaia boubouna be lagani 2,000 gunanai ia henia, to ita dekenai unai harihari gauna be mai anina bada. “Mauri ena davana be bada herea” dainai, tanobada ai ta be ia hegeregere lasi unai davana ia karaia totona. (Salamo 49:7-9; 1 Petero 1:18, 19 duahia.) Momokani, unai harihari gauna dainai hanaihanai Iehova ita tanikiu henia be namo. Danu, Iesu ia gwau lasi “egu kara dika,” to ia gwau “emai kara dika.” Unai dainai namona be ita laloatao Iehova be ia idia tomadiho henia taudia ibounai ia hebogahisi henia. Momokani, Iehova be ita bona tadikaka taihu ibounai edia hetura karana ia ida ia laloa bada. Unai dainai, bema haida ese ita idia kara dika henia, namona be edia dika ita gwauatao haraga. Nega momo, unai be kerere badadia lasi, to unai ese dala ia kehoa iseda tadikaka dekenai lalokau ita hahedinaraia, bona ita ura dika ita gwauatao, Dirava ese mai hebogahisi ida iseda dika ia gwauatao hegeregerena.—Kol. 3:13.

11. Dahaka dainai ma haida edia dika ita gwauatao be mai anina bada?

¹¹ Madi, ita be goevadae lasi dainai, nega haida do ia auka ta ena kerere ita laloaboio haraga. (Lev. 19:18) Bema ma haida dekenai unai ita herevalaia, reana unai ese kongrigeisen ia hapararaia diba. Bema unai hekwakwanai  ita hamaoromaoroa haraga lasi, ita be Dirava ena hebogahisi karana bona mauri davalaia boubou ita laloa bada lasi. Bema haida edia dika ita gwauatao lasi, iseda Tamana be iena Natuna ena boubou gauna amo iseda dika do ia gwauatao lasi. (Mat. 18:35) Iesu be guriguri ia herevalaia murinai, unai point ia hahedinaraia. (Mataio 6:14, 15 duahia.) Vadaeni, Dirava ese iseda kara dika ia gwauatao totona, namona be ita gaukara goada ia inai henia karadia ita dadaraia. Iesu ena guriguri ai ia gwauraia noinoi ma ta do ita herevalaia.—1 Ioa. 3:4, 6.

12, 13. (a) Iesu ia bapatiso murinai, dahaka ia vara? (b) Bema kara dika ita karaia, dahaka dainai ita gwau lasi unai be haida edia kerere? (c) Iesu be Dirava ia badinaia ela bona ia mase, unai ese dahaka ia hamomokania?

¹² Iesu ia bapatiso murinai ia dekenai gau haida idia vara. Unai ese ita ia durua inai noinoi, “ai oi durua unai amo hedibagani lalonai do ai moru lasi,” ita lalopararalaia totona. Iesu be Dirava ena lauma helaga ese tano gagaena dekenai ia hakaua lao. Dahaka dainai? “Diabolo ese ia dibagania” totona. (Mat. 4:1; 6:13) Ena badina oi diba, a? Dirava ese tanobada dekenai ena Natuna ia siaia ena badina ita diba neganai, do ita hoa lasi. Adamu bona Heva be Dirava ena lohia siahuna idia dadaraia neganai, henanadai haida idia vara. Bona unai henanadai edia haere abia totona Dirava ese nega ia henia. Hegeregere, Dirava ese taunimanima ia karaia neganai, gau ta ia kerere, a? Bema “Dika Tauna” ese goevadae tauna ta ia dibagania, Dirava do ia badinaia, a? Bema taunimanima be Dirava ena lohia siahuna henunai idia noho lasi, namo do idia davaria, a? (Gen. 3:4, 5) Nega vaira ai unai henanadai edia haere ita diba neganai, guba bona tanobada ai idia noho taudia ibounai ese do idia diba Iehova sibona be mai ena maoro ita ia lohiaia.

¹³ Iehova be helaga bona ta do ia dibagania lasi. To, Diabolo be “Hedibagani Tauna.” (Mat. 4:3) Diabolo be dala idauidau ai ita do ia dibagania. To, ita sibona ese do ita abia hidi Diabolo ena hedibagani do ita dadaraia eiava lasi. (Iamesi 1:13-15 duahia.) Iesu be hahetoho ia davaria neganai, ia be Dirava ena Hereva amo unai hahetoho ia dadaraia. Unai amo Iesu ia hahedinaraia Dirava ia lohia be maoro. To, Satani ia hesiku lasi. Ia naria “ela bona ma nega namona ta.” (Luka 4:13) Ena be Satani ese Iesu ia tohoa loulou ena abidadama hamanokaia totona, to Iesu ese unai ibounai ia dadaraia. Keriso ese ena kara amo ia hamomokania goevadae tauna ese Iehova ena lohia siahuna ena maoro ia abia isi diba, herevana dahaka hahetoho ia davaria. Satani ia ura Iesu murinai idia raka taudia, oi danu, ia hamorua.

14. Dahaka ita karaia be namo, unai amo hedibagani lalonai do ita moru lasi?

¹⁴ Iehova bona Satani huanai hepapahuahu ia do vara noho dainai, Satani ia koua lasi ita ia dibagania totona. Dirava be ita ia dibagania lasi. To, ita do ia durua hahetoho ita dadaraia bona ia diba momokani hahetoho ita hanaia diba. Iehova be ita dekenai ura kwalimu ia henia dainai, ita ia doria lasi kara maorona ita badinaia totona. Unai dainai namona be gau rua ita karaia, Dirava ena ura ita karaia noho bona guriguri karana ita hadokoa lasi. Iehova ese iseda guriguri be edena bamona ia haerelaia?

15, 16. (a) Ita dadaraia diba hedibagani haida be dahaka? (b) Bema ta be hedibagani lalonai ia moru, unai be daika ena kerere?

¹⁵ Iehova be ita dekenai ena lauma helaga ia henia, unai ese ita ia durua hahetoho ita dadaraia totona. Danu, Dirava be Baibel  bona kongrigeisen hebou amo ita ia hadibaia gau haida ita dadaraia totona. Hegeregere ita ia hadibaia anina lasi gaudia dekenai iseda nega, moni bona goada ita gaukaralaia kava lasi. Espen bona Janne be Europe ena taga tanona ta ai idia noho. Lagani momo lalonai, edia tano ai pablisa be momo lasi hanua ta dekenai regula painia gaukara idia karaia. Edia natuna mero ginigunana ia vara neganai, painia gaukara idia rakatania, bona hari edia natudia be rua. Espen ia gwau: “Hanaihanai Iehova ai guriguri henia, hahetoho dekenai ai moru lasi totona, badina hari ai be hesiai gaukara haida sibona ai karaia. Iehova ai noia ai ia durua Iena ura ai karaia noho bona haroro gaukara ai goadalaia totona.”

¹⁶ Hari inai negai hahetoho badana ta be ponografi itaia karana. Bema unai hedibagani lalonai ita moru, ita gwau lasi unai be Satani ena kerere. Dahaka dainai? Badina Satani bona iena tanobada ese ita idia doria diba lasi kara dika ita karaia totona. Haida be unai hahetoho dekenai idia moru badina edia lalona ai lalohadai dikadia idia abia. To unai ita dadaraia diba, badina iseda tadikaka taihu momo be unai hahetoho idia hanaia.—1 Kor. 10:12, 13.

17. (a) Edena dala ai dika tauna amo ita ia hamauria noinoi herevana ese ita ia durua? (b) Satani bona ena tanobada dekenai dahaka do ia vara?

¹⁷ “Dika Tauna amo ai oi hamauria.” Unai noinoi hegeregerena, namona be eda mauri lalonai ita hahedinaraia ita be “tanobada ena lasi.” Anina be Satani ena ‘tanobada bona ia lalonai idia noho gaudia ita lalokau henia lasi.’ (Ioa. 15:19; 1 Ioa. 2:15-17) Iehova ese Satani bona ena tanobada dikana ia haorea neganai, do ita moale bada! Laloatao, Satani be guba amo tanobada dekenai idia negea diho neganai, ia diba ena nega be kwadogi. Ia badu dikadika bona ia ura iseda abidadama ia hamanokaia. Unai dainai, hanaihanai ita guriguri dika tauna amo ita ia hamauria totona.—Apok. 12:12, 17.

18. Satani ena tanobada amo ita roho mauri totona, dahaka ita karaia be namo?

¹⁸ Unai nega namona oi naria noho, a? Vadaeni ita guriguri noho Dirava ese ena Basileia amo ena ladana do ia hahelagaia, bona ena ura gauna tanobada ai do ia hagugurua. Hanaihanai Iehova ita noia, iena Hereva amo ita ia ubua, bona eda dabu gaudia dekenai ita ia durua. Oibe, namona be eda mauri lalonai Lohiabada ena guriguri ita laloa bada.