Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Lagani ta ta ai Iesu ena mase ita laloatao totona, edena dala ai ita hegaegae diba?

Dala ta be, Baibel duahiduahi ena sediual ita badinaia, unai amo Iesu ena negai idia vara sivaraidia ita diba. Danu ita hekwarahi eda haroro gaukara ita habadaia totona. Bona Dirava ese Keristani taudia dekenai ia henia helarona ita lalohadailaia bona gurigurilaia.​—1/15, rau 14-16.

Japan taudia be dahaka harihari gauna namona idia abia?

Idia be edia gado ai Baibel bukana Mataio ena buklet idia abia, unai be New World Translation Baibel amo idia hahanaia. Unai buklet be haroro ai idia hariharilaia, bona Baibel idia diba lasi taudia momo ese idia abia dae.​—2/15, rau 3.

Dahaka dainai hahediba taudia ginigunadia be gabu momo dekenai sivarai namona idia harorolaia diba?

Roma Ena Maino (Pax Romana) negana ai tuari momo idia vara lasi. Unai negai, hahediba taudia ginigunadia be Roma taudia ese idia karaia dala idia gaukaralaia. Momo be Greek gado idia gaukaralaia dainai, hahediba taudia be unai gado dekenai idia haroro, bona Roma ena hanua ta ta ai idia noho Iuda taudia dekenai sivarai namona idia harorolaia. Bona hahediba taudia ese Roma ena taravatu idia gaukaralaia diba, sivarai namona ena maoro idia gwauraia hedinarai.​—2/15, rau 20-23.

Dahaka dainai Keristani taudia ese Ista idia moalelaia lasi?

Iesu ese ena aposetolo taudia ia hagania ena mase do idia laloatao, to ia gwau lasi ena toreisi lou do idia laloa.​—Luka 22:19, 20.​—4/1, rau 8.

Dahaka dainai hari, iseda pablikeisen ese Baibel ena sivarai bona ia laulaulaia gaudia idia herevalaia momo lasi?

Baibel ese ia hahedinaraia, taunimanima haida be mai anina bada gauna ta idia laulaulaia. Haheitalai ta be Galatia 4:21-31 lalonai ia noho. To, namo lasi ita laloa Baibel lalonai idia noho sivarai o ia vara gaudia ibounai be mai anina bada gaudia haida idia laulaulaia. To, Baibel ese ia sivarailaia taudia bona idia vara gaudia amo gau haida ita dibaia. (Roma 15:4)​—3/15,rau 17-18.

Dahaka dainai ia helalo-kerehai lasi tauna be kongrigeisen amo idia atoa siri be lalokau karana?

Baibel ia hahedinaraia bema ta be kongrigeisen amo idia atoa siri, unai be kongrigeisen ena namo totona idia karaia. (1 Kor. 5:11-13)Unai ese Dirava ena ladana ia hanamoa, kongrigeisen ia gimaia, bona kerere tauna be ena kara ia lalopararalaia.​—4/15, rau 29-30