MOMO idia diba Iesu ena aposetolo taudia be 12. To idia diba lasi hahine haida be Iesu bona iena aposetolo taudia idia durua. Unai hahine ta be Ioana.—Mat. 27:55; Luka 8:3.

Ioana ese edena dala ai Iesu ia durua? Bona iena haheitalai amo dahaka ita dibaia?

Ioana be “Kusa ena adavana.” Kusa be Heroda Antipa ena ruma bona kohu ia naria tauna. Ioana be Iesu ese gorere amo ia hanamoa hahinena ta. Iesu bona ena aposetolo taudia edia laolao ai, hahine ma haida bona Ioana idia lao danu.—Luka 8:1-3.

Iuda ena rabi taudia ese taunimanima idia hadibaia Iuda hahine be tatau ida do idia loaloa lasi, bema idia be edia varavara lasi. Danu, Iuda tatau be hahine dekenai do idia hereva momo lasi. To Iesu be unai kastom karana ia laloa lasi, Ioana bona abidadama hahine ma haida be ia idia bamoa.

Ioana ese Iesu bona ena aposetolo taudia ia bamoa dainai, ena ruma bese taudia bona ma haida ese idia lalonamo henia lasi, to unai ia laloa lasi. Iesu idia bamoa taudia be edia mauri dinadia lalonai edia ura gaudia idia dadaraia be namo. Iesu be ia murinai idia raka taudia dekenai ia gwau: “Dirava ena hereva idia kamonai bona idia karaia taudia be egu sinana bona egu tadikaka.” (Luka 8:19-21; 18:28-30) Iesu murinai idia raka taudia be sibona edia ura idia dadaraia dainai, idia be Iesu ena famili korikoridia bamona. Unai be hagoadaia herevana, ani?

Ioana bona hahine ma haida be “edia kohu idia gaukaralaia” Iesu bona aposetolo taudia 12 idia durua totona. (Luka 8:3) Buka ia torea tauna ta ia gwau: “Luka ia torea sivarai ese ia hahedinaraia lasi unai hahine be aniani idia hegaegaelaia, mereki idia huria, bona dabua idia turia. Sedira unai bamona gaukara haida idia karaia.  . . , to Luka be unai ia gwauraia lasi.” To, idia be edia moni, aniani, eiava kohu amo heduru idia henia.

Iesu bona ena aposetolo taudia be moni gaukara idia karaia lasi, to haroro gaukara sibona idia karaia. Unai dainai, taunimanima 20 bamona edia aniani bona gau haida hoia totona reana idia hegeregere lasi. Ena be haida ese edia ruma dekenai Iesu bona ena aposetolo taudia idia abia dae, to idia be mai edia “moni mauana” dainai, nega momo ma haida edia heduru dekenai idia tabekau lasi. (Ioa. 12:6; 13:28, 29) Ioana bona hahine ma haida be edia kontribusen dainai gau haida edia davana idia karaia diba.

 Haida idia gwau Iuda hahinedia dekenai moni o ruma namodia be lasi. To, toretore haida ese idia hahedinaraia Iuda hahinedia be kohu o moni idia abia diba, hegeregere: (1) bema tama ta ia mase, bona ena natudia memero be lasi, natuna kekeni ese tamana ena kohu o moni ia abia diba, (2) ia dekenai idia henia gaudia, (3) Headava ena kontraka dainai, bema adavana ese ia divos henia, (4) bema ena adavana ia mase, ia be mai ena maoro adavana ena moni o kohu ia abia, eiava (5) ia hoihoilaia gaudia amo moni ia abia.

Iesu ena murinai idia raka taudia be edia goada hegeregerena kontribusen idia henia. Idia haida be taga hahinedia. Ioana be Heroda ena hesiai tauna ena adavana dainai, haida idia gwau ia be taga hahinena ta. Reana Iesu ese ia karaia dava bada atai dabuana be ia bamona hahinena ta ese ia henia. Toretore tauna ta ia gwau “haoda tauna ta ena adavana ese unai bamona dabua ta do ia henia lasi.”—Ioa. 19:23, 24.

Baibel ia hahedinaraia lasi Ioana be moni dalanai ai heduru ia henia. To, ena goada hegeregerena kontribusen ia henia, bona unai amo gau ta ita dibaia. Basileia ena gaukara ita durua totona, iseda goada hegeregerena kontribusen ita henia diba. Mai moale ida ita henia diba gaudia be Iehova ese ia laloa bada.—Mat. 6:33; Mar. 14:8; 2 Kor. 9:7.

Iesu idia hamasea neganai, Ioana bona hahine ma haida idia noho, idia be “guna Galilea dekenai [Iesu] ia noho neganai, unai hahine ese ia idia bamoa bona idia hesiai henia. Bona ia ida Ierusalema amo idia daekau mai.” (Mar. 15:41) Iesu ena tauanina be au amo idia kokia neganai, “Galilea amo Iesu idia badinaia hahinedia danu be guria gabuna dekenai idia lao bona Iesu idia atoa dalana idia itaia, bona idia giroa, bonana namo muramura bona dehoro idia hegaegaelaia.” Sabati murinai, unai hahine idia giroa lou neganai, aneru idia itaia, unai aneru ese idia ia hamaoroa Iesu be ia toreisi lou vadaeni. Luka ese unai hahine edia ladana ia gwauraia, ‘Maria Magadala, Ioana, bona Iamesi ena sinana Maria.’—Luka 23:55–24:10.

Pentekoste 33 C.E. ai, Iesu ena hahediba taudia be Ierusalema ai idia hebou neganai, Iesu ena sinana, ena tadikakadia bona Ioana be idia noho danu. (Kara 1:12-14) Ioana ena adavana be Heroda Antipa totona ia gaukara dainai, Luka be Heroda Antipa dekenai gau momo ia diba, badina Luka sibona ese ena buka ai Ioana ena ladana ia gwauraia.—Luka 8:3; 9:7-9; 23:8-12; 24:10.

Ioana ena sivarai amo mai anina bada gaudia haida ita dibaia. Iena goada hegeregerena Iesu ia hesiai henia. Ia moale bada badina ia diba ena moni amo Iesu, aposetolo taudia 12, bona hahediba taudia haida ia durua. Ioana be dagedage negadiai Iesu ia hesiai henia bona badinaia. Unai be haheitalai namona, Keristani taihu taudia be ena kara idia tohotohoa be namo.