1, 2. Iehova ena hesiai taudia be dahaka kara idia hahedinaraia?

IEHOVA ena hesiai taudia be guna idia perovetalaia gaudia edia guguru negana idia ura itaia. Hegeregere, Ieremia ia peroveta Iuda do idia hadikaia, bona lagani 607 B.C.E. ai Babulonia taudia ese Iuda idia hadikaia. (Ier. 25:8-11) Isaia be lauma helaga ena siahu amo ia peroveta Iehova ese gau ibounai do ia hanamoa, bona ia gwau: “Iehova dekenai idia naria noho taudia be idia moale!” (Isa. 30:18, NW) Mika, idaunegai Dirava ena taunimanima totona ia peroveta tauna, be mai lalona ibounai ida ia gwau: “Lohiabada do lau naria noho.” (Mika 7:7) Lagani momo lalonai, Dirava ena hesiai taudia be idia perovetalaia Mesia, eiava Keriso ena guguru negana idia naria.—Luka 3:15; 1 Pet. 1:10-12. *

² Hari, Dirava ena hesiai taudia be idia naria noho, badina Mesia ena peroveta hereva haida idia do guguru noho. Mesia Basileiana amo Iehova ese kara dika taudia ibounai do ia haorea, bona Satani ese ia biagua tanobadana ai iena taunimanima ia hamauria neganai, hisihisi ibounai do ia haorea. (1 Ioa. 5:19)  Unai dainai do ita noga noho, badina inai tanobada dikana ena dokona be ia kahirakahira.

3. Haida be dokona totona idia naria daudau dainai, dahaka idia gwau?

³ Ita be Iehova ita hesiai henia dainai, ita ura Dirava ena ura “tanobada dekenai do ia vara, guba dekenai ia vara bamona.” (Mat. 6:10) To, inai tanobada dikana ena dokona ia do ginidae lasi dainai, haida idia gwau: ‘Dahaka dainai ita naria noho?’ Namona be unai ita herevalaia.

4. Ita gima noho ena badina be dahaka?

⁴ Baibel ese ia hahedinaraia, tanobada dikana haorea negana ia kahirakahira dainai, namona be iseda kara bona hereva ita naria namonamo. Iesu be ia murinai idia raka taudia ia hamaoroa do ‘idia gima noho’ bona ‘idia noga noho.’ (Mat. 24:42; Luka 21:34-36) Iesu ena hereva hegeregerena, do ita naria noho be mai ena badina. Iehova ena orea be haheitalai namona ia hahedinaraia. Badina ia halasia buka bona magasin amo ita ia hagoadaia ‘Iehova ena dina ia mai negana ita naria bona ita laloa noho’ be namo. Bona Dirava ena gwauhamata tanobada matamata totona, do ita laloa noho.—2 Petero 3:11-13 duahia.

5. Dahaka dainai hari ita gima noho be mai anina bada?

⁵ Idaunegai idia noho Keristani taudia dekenai naria noho karana be mai anina bada, iseda negai danu unai bamona ita karaia be mai anina bada. Dahaka dainai? Badina Iesu ia gwauraia toa ese idia hahedinaraia ita be “nega oromana ena dokona” ai ita noho, badina Iesu be lagani 1914 ai ia lohia matamaia. Iesu ia peroveta bamona, inai tanobada ena toana be ia dika ia lao noho bona tanobada ibounai ai Basileia do idia harorolaia. (Mataio 24:3, 7-14) Iesu ese unai nega dokona ena daudau ia herevalaia lasi, unai dainai dokona do ia ginidae dinana be ita diba lasi, to namona be do ita hegaegae.

6. Dokona ia kahirakahira lalonai dahaka dainai ita diba tanobada ai dika do ia bada ia lao?

⁶ Reana do ita henanadai: “Nega oromana ena dokona” ai tanobada dekenai dika do ia bada ia lao, a? Baibel ia hahedinaraia “dina gabediai” kara dika do ia bada ia lao. (2 Tim. 3:1, 13; Mat. 24:21; Apok. 12:12) Unai dainai tanobada ai idia vara dika be do ia bada ia lao.

7. Mataio 24:37-39 ese dina gabedia be edena bamona ia herevalaia?

⁷ “Hisihisi badana” ia do vara lasi lalonai, oi laloa tanobada do ia dika momokani, a? (Apok. 7:14) Hegeregere, do oi laloa tano ibounai dekenai tuari do idia vara, taunimanima ibounai do idia hitolo, ruma bese ibounai ai gorere do idia vara, a? Lasi. Bema unai bamona ia vara, Baibel ena hereva idia abia dae lasi o idia daradaralaia taudia danu be do idia gwau, peroveta herevadia be hari idia guguru noho. To, Iesu ia gwau taunimanima momo be “ena noho negana” do idia “laloa lasi,” idia be edia ura karadia do idia karaia noho ela bona dokona ia ginidae. (Mataio 24:37-39 duahia.) Unai dainai, dina gabediai tanobada ai do idia vara gaudia be do ia dika, to Baibel ia hahedinaraia taunimanima be idia laloparara lasi ita be nega dokona ai ita noho.—Luka 17:20; 2 Pet. 3:3, 4.

8. Iesu ena hahegani, “gima noho,” idia badinaia taudia be dahaka idia lalopararalaia?

⁸ To, unai dina gabediai do idia vara toa idauidau dainai, Iesu ena hahegani, “gima noho,” idia badinaia taudia do idia laloparara ita be nega dokona ai ita noho. (Mat. 24:27, 42) Lagani 1914 amo ema bona  hari, unai toa idauidau idia guguru noho. Unai ese ia hahedinaraia hari ita be “nega oromana ena dokona” ai ita noho, bona daudau lasi inai tanobada dikana do ia ore.

9. Dahaka dainai inai tanobada dikana ena dokona totona ita naria noho be namo?

⁹ Vadaeni, hari dahaka dainai Keristani taudia idia naria noho be namo? Iesu ita badinaia dainai, ita naria noho be namo. Danu, Iesu ena noho negana ai idia vara toa idauidau ita lalopararalaia. Ita naria noho badina Baibel ese ia gwauraia gaudia ita hamomokania, unai ese ita ia hagoadaia ita gima noho bona tanobada ena dokona ita naria noho.

10, 11. (a) Iesu ese ena hahediba taudia ia hegaegaelaia dahaka idia karaia totona? (b) Bema Iesu ena murinai idia raka taudia idia laloa dokona be daudau, Iesu be dahaka ia gwau? (Laulau ginigunana herevalaia.)

¹⁰ Ita momo be lagani momo lalonai mai abidadama ida Iehova ita hesiai henia, bona ita do gima noho. To, namona be ita naria noho bona ita hesiku lasi. Iesu ia ginidae neganai inai tanobada dikana do ia hahemaoro henia, unai dainai namona be ita noho hegaegae. Iesu be ia murinai idia raka taudia ia hadibaia: “Umui gima noho bona umui noga noho, badina Dirava ese ia abia hidi negana be umui diba lasi. Ia be gabu daudau dekenai ia lao tauna hegeregerena, bona ena igui hesiai taudia ta ta dekenai gaukara ia henia ena ruma idia naria totona. Bona iduara naria tauna ia hagania do ia gima noho totona. Unai dainai do umui gima noho, badina umui diba lasi negana ai ruma Biaguna do ia mai. Ia be reana adorahi momokani ai eiava malokihi ai eiava kokoroku ia tai negana ai eiava daba maragi ai do ia mai. Vadaeni ia ginidae haraga neganai, namo lasi umui ia davaria umui mahuta noho. To umui lau hamaoroa gauna be ibounai dekenai lau gwauraia, gima noho.”—Mar. 13:33-37.

¹¹ Iesu murinai idia raka taudia idia laloparara Keriso ena noho be lagani 1914 ai ia matamaia, unai negai idia hegaegae badina idia laloa dokona be do ia mai haraga. Unai dainai Basileia harorolaia gaukarana idia habadaia. Iesu ia hahedinaraia gabeai do ia mai o “kokoroku ia tai negana ai eiava daba maragi ai” do ia mai. Bema unai ia vara ia murinai idia raka taudia be dahaka do idia karaia? Iesu ia gwau: “Gima noho.” Unai dainai ita naria daudau ese ia hahedinaraia lasi dokona be do daudau eiava ita gwau dokona be do ia mai lasi.

12. Habakuku ese Iehova dekenai dahaka henanadai ia gwauraia bona Dirava ena haere be dahaka?

¹² Peroveta tauna Habakuku oi laloa. Ia be Ierusalema hadikaia herevana ia perovetalaia. Unai hahegani ia abia neganai, Ierusalema ena hadikaia herevana be lagani momo lalonai idia gwauraia vadaeni. Dika ia bada ia lao, badina dika taudia ese kara maoromaoro taudia edia dala idia koua bona kota maoromaoro dalana idia hagagevaia. Habakuku ese ia gwauraia henanadai dekenai ita hoa lasi, ia gwau: “Edena negai lauegu boiboi do oi kamonai?” Iehova ese maoromaoro ia haere henia lasi to ia ese ena abidadama peroveta tauna ia gwauhamata henia unai peroveta hereva be do ia “vara momokani.” Dirava ese Habakuku ia hadibaia, ‘do ia naria noho.’—Habakuku 1:1-4; 2:3 duahia.

13. Habakuku be dahaka lalohadai ia abia diba, bona dahaka dainai unai be lalohadai kererena?

¹³ Bema Habakuku ia laloa manoka, reana do gwau diba: ‘Lau be Ierusalema hadikaia sivaraina be lagani momo lalonai lau kamonai vadaeni. Toana be unai nega be do daudau? Kahirakahira Ierusalema do idia  hadikaia ena peroveta herevana be do ia vara eiava? Vadaeni, haida ese unai gaukara do idia karaia.’ Bema Habakuku be unai bamona lalohadai kererena ia abia, Iehova ese do ia lalonamo henia lasi, bona reana Ierusalema idia hadikaia negana ai do ia mase diba.

14. Dahaka dainai ita gwau diba iseda naria noho karana dainai do ita lalohisihisi lasi?

¹⁴ Tanobada matamata ai do ita gwau diba, tanobada dokona totona idia perovetalaia herevadia be idia guguru momokani. Iehova ena gwauhamata herevadia idia vara momokani karana ita laloa dobu neganai, unai ese iseda abidadama ia hagoadaia, bona do ita abia dae ena gwauhamata ibounai be do idia guguru. (Iosua 23:14 duahia.) Iehova ita tanikiu henia, badina ia ese ‘ena siahu henunai nega eiava ia abia hidi dinadia’ dainai, ita ia hagoadaia namona be ita naria noho badina ‘gau ibounai edia dokona be ia mai kahirakahira vadaeni.’—Kara 1:7; 1 Pet. 4:7.

15, 16. Dahaka dainai hari ita ese haroro gaukara ita goadalaia be gau badana?

¹⁵ Hanaihanai Iehova ena orea ese ita ia hadibaia ita naria noho lalonai, Dirava do ita hesiai henia. Unai hadibaia herevadia ese ia hahedinaraia Iehova hesiai henia gaukara ita karaia, bona Iesu ena mai ena peroveta herevana ia guguru karana ita laloa noho. Hari inai nega oromana lalonai, dahaka mai anina bada gaukarana ita karaia be namo? Sivarai namona ita harorolaia goadagoada karana amo ita be Dirava ena Basileia bona ena kara maoromaoro ita tahua guna noho!—Mat. 6:33; Mar. 13:10.

¹⁶ Taihu ta ia gwau: “Bema Dirava ena Basileia ena sivarai namona ita harorolaia, momo do ita durua ia mai noho dika badana amo idia roho mauri totona.” Unai taihu be unai ia gwauraia badina lagani 1945 ai, bouti badana ta (Wilhelm Gustloff) be davara ai ia mutu neganai, ia bona ena adavana be idia roho mauri. Unai bamona dika badana lalonai, taunimanima ese mai anina bada gauna idia laloaboio diba. Unai taihu ma ia gwau, hahine ta be mai tai ida ia boiboi: “Egu baege! Egu baege! Egu herahera gaudia! Gau ibounai lau haboioa vadaeni.” To, haida be edia mauri idia laloa lasi to idia ura ma haida idia durua dainai, idia hekwarahi davara ai idia moru taudia idia durua totona. Unai dainai ita ura idia bamona ita karaia, bona ita gaukara goada taunimanima ita durua. Nega be kwadogi dainai, ita ura haroro gaukara ita goadalaia bona ma haida ita durua do ia mai dika badana amo idia roho mauri totona.

17. Dahaka dainai ita diba momokani dokona be ia kahirakahira?

 ¹⁷ Tanobada ai idia vara gaudia ese idia hahedinaraia Baibel ena peroveta herevadia be idia guguru noho, bona inai tanobada ena dokona be kahirakahira. Unai dainai namo lasi ita gwau tanobada ai do idia vara dika be do ia dika momokani murinai, Apokalupo ese ia herevalaia “doana 10” bona “dagedage gauna” be Babulonia badana, tomadiho koikoi oreana unai, do idia tuari henia. Namona be ita laloatao, unai idia karaia totona Dirava ese ena palani be ‘edia kudouna ai do ia atoa’—unai be do ia vara haraga bona ita diba lasi negana ai do ia vara! (Apok. 17:17) Inai tanobada dikana ena dokona be kahirakahira. Unai dainai Iesu ena hadibaia hereva ita badinaia be namo: “Do umui naria namonamo, aniani momo, inuinu momo, bona mauri ena lalohekwarahi amo emui lalohadai maorona umui hadikaia garina, bona karaharaga unai dina be umui latanai do ia ginidae, tarapu ese animal ia abia bamona.” (Luka 21:34, 35; Apok. 16:15) Namona be eda lalona ita hadaia Iehova ita hesiai henia noho totona, badina ita diba momokani ia sibona ese ‘ia idia naria taudia dainai ia gaukara noho.’—Isa. 64:4.

18. Stadi gabena ai dahaka do ita herevalaia?

¹⁸ Inai tanobada dikana ena dokona ita naria noho lalonai, namona be Iuda ena hereva do ita badinaia, ia gwau: “Lauegu lalokau taudia e, emui abidadama helagana ena latanai emui mauri do umui haginia goada. Lauma Helaga ena siahu dekena amo do umui guriguri noho. Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” (Iuda 20, 21) To, edena bamona ita hahedinaraia diba Dirava ese ia gwauhamatalaia tanobada matamata totona ita naria noho, bona ita ura unai do ia vara? Stadi gabena ai unai do ita herevalaia.