LAGANI 1955 ai, Queensland, Australia ai lau vara. Daudau lasi murinai, egu sinana, Estelle, be Iehova ena Witnes taudia ida Baibel ia stadilaia matamaia. Lagani ta murinai ia bapatiso, bona egu tamana, Ron, be lagani 13 murinai hereva momokani ia abia dae. Lau be 1968 ai St. George, Queensland ena taoni ai lau bapatiso.

Lau matamata neganai, duahiduahi karana lau moalelaia bona gado idauidau lau ura henia. Ruma bese ida motuka dekenai ai loaloa neganai, nega haida egu tama sina do idia moale lasi, badina lau be motuka murinai buka lau duahia noho to ai loaloa gabudia edia hairai lau itaia lasi. To egu duahiduahi karana ese sikuli dekenai lau ia durua. Tasmania ena taoni ta Glenorchy ena haisikuli ta dekenai lau sikuli, bona egu maka namodia dainai prais haida lau abia.

To, gabeai abia hidi badana ta do lau karaia. Skolasip do lau abia dae bona iunivesiti dekenai do lau lao eiava? Duahiduahi bona gau idauidau dibaia karana lau ura henia bamona, lau moale badina egu sinana ese lau ia durua Iehova lau lalokau henia bada totona. (1 Kor. 3:18, 19) Unai dainai egu tama sina edia gwaumaoro lau abia murinai, sikuli lau rakatania bona January 1971 ai regula painia gaukara lau matamaia. Unai negai egu  mauri lagani be 15 bona sikuli ena setifiket lau abia.

Lagani eit lalonai, Tasmania dekenai painia gaukara lau karaia. Unai nega ai Tasmania kekeni hairaina ta, Jenny Alcock, lau adavaia, bona lagani foa lalonai taoni maragidia Smithton bona Queenstown dekenai spesel painia gaukara ai karaia.

Lagani 1978 ai nega ginigunana Australia ai rakatania bona Papua New Guinea, Port Moresby ai idia abia intanesinol hebouhebou ta dekenai ai lao. Lau laloatao misinari ta be Hiri Motu gado dekenai tok ta ia henia. Ena be ia gwauraia herevadia lau lalopararalaia lasi, to ena tok ese lau ia hagoadaia misinari ai lau lao, gado ma haida lau dibaia, bona unai bamona tok do lau henia totona. Unai neganai, lau laloparara Iehova lau lalokau henia bona gado idauidau lau ura henia dainai, gaukara namona ta lau karaia diba.

Australia dekenai ai giroa lou neganai, ai moale bada badina ai be Tuvalu ena motumotu ta ladana Funafuti, guna idia gwauraia Ellice Motumotu, dekenai ai idia siaia. January 1979 ai emai teritori matamata, Tuvalu dekenai ai ginidae. Unuseniai pablisa taudia be toi sibona.

Tuvalu gado ai dibaia be auka. Unai gado dekenai idia torea buka tamona be “Taravatu Matamata” Baibel. Unai gado ai diksinari be lasi eiava gado sikuli idia karaia lasi, unai dainai ai ura dina ta ta ai hereva 10 ia lao 20 bamona do ai dibaia. To gabeai ai laloparara, ai dibaia hereva ta ta edia anina korikori be ai lalopararalaia lasi. Hegeregere, nega ta gado dekenai ai ura taunimanima ai hadibaia babalau karadia be kerere, to lasi, ai be idia ai hamaoroa sikele bona raka auna do idia gaukaralaia lasi. Baibel stadi momo ai hamatamaia dainai, ai hekwarahi Tuvalu gado ai diba namonamo totona. Lagani haida murinai, guna ai stadi henia tauna ta ia gwau: “Ai moale bada badina hari emai gado ai oi hereva diba. To guna, oi gwauraia herevadia ai lalopararalaia lasi!”

To, dala ta ia kehoa gado ai dibaia namonamo totona. Ruma be lasi ai rentaia totona, unai dainai Witnes tauna ta ena ruma dekenai ai noho, unai be hanua badana ta dekenai. Anina be hanaihanai gado dekenai do ai hereva bona hanua maurina do ai noholaia. Lagani momo lalonai English gado dekenai ai kiki lasi dainai, Tuvalu gado be emai gado badana ai ia lao.

Daudau lasi, momo be hereva momokani idia ura henia matamaia. To dahaka do ai gaukaralaia idia ida ai stadi totona? Edia gado dekenai idia hahanaia  pablikeisen ta be lasi. Sibona edia stadi be edena bamona do idia karaia? Hebou totona idia mai neganai, edena bamona ane do idia abia, edena buka bona magasin do idia gaukaralaia, bona edena dala ai hebou totona do idia hegaegae? Edena bamona do idia goada idia lao bona do idia bapatiso? Unai manau taudia be edia gado amo Dirava ena hereva idia dibaia be namo. (1 Kor. 14:9) Ai laloa, ‘Ena be Tuvalu gado be taunimanima 15,000 sibona idia diba, to pablikeisen be Tuvalu gado ai do idia halasia, a?’ Iehova ese unai henanadai ia haerelaidia, badina gau rua ia henia: (1) Ia ura iena Hereva be daudau gabudia idia noho motumotu dekenai do ia lao, bona (2) ia ura ‘manau taudia bona hekokoroku lasi taudia’ be ena ladana dekenai idia tabekau.—Ier. 31:10; Sep. 3:12.

Lagani 1980 ai, brens ofesi ese ai idia abia hidi trensleisen gaukara ai karaia totona, ai laloa unai gaukara dekenai ai hegeregere lasi. (1 Kor. 1:28, 29) Guna, gavamani taudia amo mimeograph masini ta ai hoia, bona ai gaukaralaia emai hebou gaudia ai printaia totona. Tuvalu gado ai Mauri Ia Lao Henia Hereva Momokani bukana ai hahanaia bona unai masini amo ai printaia. Lau laloatao ai gaukara neganai, inka ena bonana be bada bona gabu be ia siahu bada. Unai negai paua be lasi.

Tuvalu taudia edia gado ena diksenari o buka haida be lasi dainai, Tuvalu Gado hahanaia gaukarana be mai ena hekwarahi. To, nega haida heduru be dala idauidau ai ai abia. Dina ta lau be hereva momokani ia dadaraia tauna ta ena ruma dekenai lau lao. Ruma tauna be tau buruka bona nega daudau tisa gaukara ia karaia, karaharaga lau ia hadibaia iena ruma dekenai ai lao lasi be namo. Bena ia gwau: “To lau ura gau ta lau gwauraia. Tuvalu gado umui hahanaia be ai herevalaia bamona lasi.” Ena hereva hamomokania totona ma haida lau hereva henia neganai, idia gwau ia be maoro. Unai dainai gau haida ai haidaua. To, lau moale badina Iehova be hereva momokani ia inai henia tauna amo heduru ia henia, to unai tauna be iseda buka bona magasin ia duahia.

 Tuvalu gado dekenai ai hahanaia pepapepa ginigunana be Memorial ena boiboi pepana. Unai murinai Basileia Sivarai Namba 30 ai hahanaia, bona English gado ida ai halasia. Ai moale bada, badina edia gado korikori ai pepapepa idia duahia diba! Gabeai, buklet bona buka haida be Tuvalu gado dekenai ai hahanaia. Lagani 1983 ai, Australia ena brens ofesi ese rau 24 Gima Kohorona idia printaia matamaia, wiki ta ta ai nega haida paragraf 7 o 8 ai stadilaia. Unai hanua taudia be dahaka idia laloa? Tuvalu taudia be duahiduahi karana idia ura henia dainai, iseda pablikeisen be momo ese idia duahia. Pablikeisen matamata ta ia mai neganai, gavamani ena reidio steiseni ai taunimanima idia hadibaia, nega haida niusi ai idia gwauraia! *

Gado hahanaia gaukara ai matamaia neganai, peni bona pepa sibona ai gaukaralaia. Gabeai, maniuskrip ai taipia loulou bena Australia brens dekenai idia siaia printaia totona. Nega ta, brens be taihu rua idia gaukaralaia unai hahanaia buka o magasin ena hereva ibounai be kompiuta ena MEPS ai idia atoa totona, to idia be Tuvalu gado idia diba lasi. Unai gado ena herevadia be nega rua idia taipia vareai neganai, idia ese kerere haida idia davaria. Unai dainai kompiuta ai idia davaria gaudia be pepa ai idia printaia bona ai dekenai idia siaia mai. Bena ai hamaoromaoroa murinai ai siaia giroa Australia brens dekenai idia printaia totona.

To gabeai senisi idia vara! Hari gado hahanaia taudia ese idia hahanaia gaudia be kompiuta ai idia karaia. Unai amo idia ese edia hahanaia gaukarana ai idia davaria kerere idia hamaoromaoroa bena Intanet amo idia siaia brens dekenai idia printaia totona. Unai dainai ai hekwarahi lasi post ofesi dekenai ai lao haraga maniuskrip ai siaia totona.

Lagani ta ta ai, lau bona Jenny be Pacific ena kahana idauidau dekenai emai hesiai gaukara ai karaia. Lagani 1985 ai, Tuvalu amo ai idia siaia lao Samoa dekenai. Unuseniai Samoa, Tonga, bona Tokelau gado hahanaia taudia ai durua, unai be Tuvalu dekenai ai karaia gaukarana be unuseni ai karaia. * Bena lagani 1996 ai, Fiji brens ofesi dekenai unai gaukara tamona ai karaia, unuseniai Fiji, Kiribati, Nauru, Rotuman, bona Tuvalu gado hahanaia gaukarana dekenai ai heduru.

Iseda buka o magasin idia hahanaia tadikaka taihu edia gaukara goadagoada karana lau moalelaia bada. Ena be unai gaukara be bada bona mai ena hekwarahi. To, unai tadikaka taihu ese Basileia ena sivarai namona be ‘bese ibounai bona iduhu ibounai, gado idauidau, bona kopi idauidau taudia ibounai dekenai idia gwauraia’ karana dekenai Iehova ena ura idia hahedinaraia. (Apok. 14:6) Hegeregere, magasin ginigunana be Tonga gado ai hahanaia totona ai hegaegae neganai, lau ese elda taudia ida lau hebou bona idia lau nanadaia daika ia hegeregere unai gado hahanaia gaukarana ia karaia totona. Elda ta be ena mekaniki gaukara amo ia doko, bena maoromaoro gado hahanaia gaukarana ia karaia. Unai be hagoadaia gauna momokani,  badina ia be mai ena famili bona ia diba lasi edena dala ai moni do ia abia. To Iehova ese ia bona ena famili ia durua, bona lagani momo lalonai gado hahanaia gaukarana ia karaia.

Unai bamona gado hahanaia gaukarana idia karaia taudia ese Hakaua orea taudia edia ura hegeregerena idia gaukara. Badina Hakaua Oreana taudia idia ura motumotu maragidia danu be hereva momokani do idia diba. Hegeregere nega ta idia henanadai, ‘Bema Tuvalu gado ai Baibel buka o magasin ta idia halasia, anina namona do ia havaraia, a?’ Hakaua Oreana dekenai lau duahia haere ese lau ia hagoadaia bada, ia gwau: “Badina ta ia noho lasi Tuvalu gado ena hahanaia gaukara oi koua totona. Ena be teritori be bada lasi, to taunimanima ese edia gado korikorina ai sivarai namona idia kamonai be namo.”

Lagani 2003 ai, lau bona Jenny be Fiji brens ena gado hahanaia depatmen amo ai idia siaia Patterson, New York ena hahanaia depatmen dekenai. Toana be lau lalohadailaia gauna ta ia vara momokani. Ai ese unuseniai tim ta ai durua, unai amo ma haida ai durua edia gado ai iseda buka o magasin idia hahanaia totona. Lagani ma rua lalonai ai ese gado hahanaia taudia dekenai treinini ai henia totona, tano ma haida ai vadivadi henia.

Hari, matamanai lau gwauraia sivaraina do lau herevalaia. Lagani 2000 ai, Hakaua Oreana idia laloa tanobada ibounai ai gado hahanaia gaukarana do idia durua. To unai negai, gado hahanaia gaukara idia karaia taudia be treinini namona idia abia lasi. Emai tahua gaukara lalonai ai davaria hekwakwanai be Hakaua Oreana dekenai ai gwauraia murinai, gwaumaoro idia henia tanobada ibounai ai gado hahanaia gaukara idia karaia taudia idia treinini henia totona. Unai treinini program lalonai English gado lalopararalaia daladia, hahanaia gaukara ena teknik idauidau bona gado hahanaia taudia idia gaukara hebou daladia idia hadibaia.

Unai treinini program dainai, dahaka anina namona ia vara? Hahanaia gaukara ia namo. Danu iseda buka bona magasin ita hahanaia gadodia edia namba ia bada daekau. Lagani 1979 ai emai misinari gaukara ia matamaia neganai, Gima Kohorona be gado 82 sibona dekenai idia hahanaia noho. Unai negai English magasin be do idia abia guna, bena hua haida murinai gado ma haida edia magasin do ia ginidae. To hari, Gima Kohorona be gado 240 ai idia hahanaia vadaeni, bona English gado bona gado ma haida edia magasin be nega tamona idia abia. Dirava ena hereva be gado 700 mai kahanai ai idia hahanaia vadaeni. Guna ai laloa unai do ia vara lasi.

Lagani 2004 ai, Hakaua Oreana ese disisen badana ta idia karaia, Baibel hahanaia gaukara do ia haraga totona. Hua haida murinai, Baibel hahanaia gaukara idia matamaia, unai amo New World Translation be gado momo dekenai idia hahanaia diba. Lagani 2014 amo, Baibel ibounai eiava ena kahana be gado 128 ai idia hahanaia vadaeni ​—⁠South Pacific ai idia herevalaia gado idauidau edia namba danu.

Egu hahenamo ta be lagani 2011 ai Tuvalu ena hebouhebou ta dekenai lau lao. Hua momo lalonai, Tuvalu dekenai medu ia diho lasi dainai gau ibounai idia kakoro, bona toana be hebouhebou do idia karaia lasi. Ai ginidae adorahi ai medu bada ia diho, to hebouhebou ai karaia. Ena be Tuvalu gado be momo ese idia herevalaia lasi, to lau abia hahenamo badana be Tuvalu gado ai New World Translation of the Christian Greek Scriptures lau halasia. Hebouhebou ia ore neganai, medu bada ia diho lou. Ibounai idia moale badina Dirava ena hereva idia kamonai murinai, medu bada ia diho.

Madi, Jenny, lagani 35 ai lau ida ia gaukara hebou, be unai hebouhebou dekenai ia noho lasi. Lagani 2009 ai, lagani 10 lalonai ia haheaukalaia kensa gorerena dainai ia mase. Ia toreisi lou neganai, Idia hahanaia Tuvalu Baibel idia halasia ena sivarai do ia kamonai neganai, do ia moale bada.

Hari, Iehova ese lau ia hanamoa bona lau dekenai turana namona ma ta ia henia, iena ladana be Loraini Sikivou. Loraini bona Jenny be Fiji Betele ena gado hahanaia depatmen ai idia gaukara hebou. Hari lau be egu adavana matamata ida Iehova ai hesiai henia, bona gado idauidau ai ura henia!

Idia hanaia laganidia lau laloa neganai, iseda lalokau Tamana, Iehova, be gado idauidau grup maragidia bona badadia ia naria dalana ese lau ia hagoadaia. (Sal. 49:1-3) Taunimanima be edia gado ai buka o magasin ta idia itaia eiava Iehova hanamoa anedia idia abia neganai, edia moale toana ese Iehova ena lalokau ia hahedinaraia. (Kara 2:8, 11) Saulo Teasi, Tuvalu elda tadikaka ta ena hereva lau do laloatao noho. Basileia ena ane be nega ginigunana ena gado dekenai ia anelaia murinai, ia gwau: “Lau laloa, namona be Hakaua Oreana oi hadibaia inai ane be Tuvalu gado ai ai abia be namo herea, English gado bamona lasi.”

September 2005 ai, hahenamo badana ta lau abia be Iehova ena Witnes taudia edia Hakaua Oreana ena memba ta ai lau lao. Hari lau be gado hahanaia gaukara lau karaia lasi, to Iehova lau tanikiu henia badina lau be tanobada ibounai ai idia karaia gado hahanaia gaukarana lau durua noho. Ita moale bada badina Iehova be ia ura ena taunimanima ibounai dekenai ena hereva do ia lao—ena be idia haida be Pacific Davara ena huanai idia noho motumotu maragidia ai idia noho! Salamo torea tauna ia gwau bamona: “Lohiabada be King! Tanobada, do oi moale! Bona umui davara ena motumotu ibounai do umui moale bada!”—Sal. 97:1.