1, 2. (a) Dahaka dainai ita gwau diba Iehova be ena taunimanima ia lalokau henia? (b) Dirava ese iseda lalona ai dahaka ura ia atoa?

DAHAKA dainai oi gwau diba Iehova be ena taunimanima ia lalokau henia? Unai henanadai ita do haerelaia lasi neganai, mani ekspiriens haida ita laloa: Lagani haida lalonai, tadikaka taihu ese taihu Taylene idia hagoadaia, lalohadai maorona ia abia bona do ia lalohekwarahi momo lasi. Taylene ia gwau: “Bema Iehova be lau ia lalokau henia lasi, iena sisiba herevadia lau dekenai do ia henia lasi.” Brigitte ena adavana ia mase dainai, ia sibona ese ena natudia rua ia naria, ia gwau: “Tama o sina sibona ruma besena lalonai, natudia naria karana be mai ena hekwarahi. To, lau diba Iehova be lau ia lalokau henia, bona hisihisi bona lalometau negadiai lau ia naria, bona egu hekwakwanai lau haheaukalaia diba.” (1 Kor. 10:13) Sandra ese gorere badana ta ia haheaukalaia. To hebouhebou ta ai, taihu ta ese Sandra ia durua. Sandra ena adavana ia gwau: “Ena be ia ai diba lasi, to ai ia laloa bada dainai ai moale bada. Tadikaka taihu ese lalokau karana idia hahedinaraia neganai, lau mamia Iehova be lau ia lalokau henia bada.”

² Ita ura ma haida ita lalokau henia bona idia ese ita do idia lalokau henia. Dirava ese ita ia havaraia neganai unai ura ia atoa.  To, bema dika badana ta ia vara kava, gorere o moni ena hekwakwanai, eiava haroro gaukara lalonai anina namona ia vara lasi, unai bamona negadiai haida ese lalokau idia hahedinaraia lasi neganai, do ita lalohisihisi diba. Bema ita laloa Iehova be ita ia lalokau henia lasi, namona be ita laloatao: Iehova dekenai ita be dava bada gauna ta bamona, unai dainai ia noho hegaegae iseda “imana idibana ia dogoatao” bona ita ia durua. Bema ia ita abidadama henia, ita do ia laloaboio lasi.—Isa. 41:13; 49:15; NW.

3. Dahaka ese ita ia durua diba Iehova ena noho hanaihanai lalokauna ita laloa bada totona?

³ Paragraf 1 ai ita herevalaia taudia idia diba momokani idia davaria hekwakwanai lalonai, Dirava be idia do ia durua. Ita danu ita diba momokani Iehova be ita do ia durua. (Sal. 118:6, 7) Inai stadi ai Dirava ese ena lalokau ia hahedinaraia dala foa do ita herevalaia: (1) Ia havaraia gaudia, (2) Baibel, (3) guriguri, bona (4) mauri davalaia boubouna. Bema Iehova ese ia karaia gau namodia ita laloa dobu, unai ese ita do ia durua ena noho hanaihanai lalokauna ita laloa bada totona.—Salamo 77:11, 12 duahia.

4. Iehova ese ia havaraia gaudia ita laloa dobu neganai, dahaka ia hahedinaraia?

⁴ Iehova ese ia havaraia gaudia amo iena noho hanaihanai lalokauna oi itaia diba, a? Oibe, Dirava be ita ia lalokau henia dainai gau idauidau ia havaraia. (Roma. 1:20) Hegeregere Iehova ese tanobada ia havaraia neganai, animal bona tubutubu gaudia idauidau ia havaraia, ita noho namonamo bona ita moale. Danu, Iehova ese tanobada ia havaraia namo herea, unai amo gau idauidau idia tubu, bona aniani idia havaraia. Unai dainai aniani namodia ita moalelaia! (Had. 9:7) Canada ai, taihu ta ladana Catherine be hanaihanai ia ura tubutubu gaudia bona animal idauidau ia itaia, bona unai ia moalelaia bada negana be April hua lalonai. Ia gwau: “Tubutubu gaudia idia tubu lou bona animal be edia gabu dekenai idia giroa lou be hoa gauna. Tano amo idia hedinarai flaoa idauidau bona manu be idia lao gabudia amo idia giroa mai, bona bisini manu be ena aniani ia noho gabuna dekenai ia giroa lou, unai be egu kisini ena windo ena murimuri kahana dekenai. Iehova be ita ia lalokau henia bada dainai, unai gau namodia ita moalelaia.” Iseda lalokau guba Tamana be ia havaraia gaudia ia ura henia bada, bona ia ura ita moalelaia danu.—Kara 14:16, 17.

5. Iehova ese taunimanima ia havaraia dalana amo edena dala ai iena lalokau ia hahedinaraia?

⁵ Iehova ese ita ia havaraia dainai, ita ese gaukara namodia ita karaia diba bona ita moalelaia. (Had. 2:24) Ia ura taunimanima ese tanobada do idia hahonua bona naria. Danu gwarume, manu, bona mauri gaudia ibounai do idia biagua. (Gen. 1:26-28) Bona Iehova ese ita dekenai ia henia hahenamo ta be ena kara ita tohotohoa diba!—Efe. 5:1.

6. Dahaka dainai Dirava ena Hereva ita laloa bada be namo?

⁶ Dirava ese ena lalokau ia hahedinaraia dalana ta be, ita dekenai Baibel ia henia. Unai amo ia ita dibaia bona taunimanima ia kara henia dalana ia hahedinaraia. Hegeregere, Baibel ai Israela taudia ese nega momo Dirava idia gwau-edeede henia ena sivarai ia noho. Salamo 78:38 ia gwau: “Dirava ese, iena bese taudia dekenai ia bogahisihisi henia. Idia edia kara dika ia gwauatao, bona ia ese idia ia hadikaia ore lasi. Nega momo ia ese iena badu ia hakerua, bona iena badu ena siahu momokani ia havaraia lasi.” Unai siri oi laloa dobu neganai, unai ese oi do ia durua Iehova ena lalokau bona oi ia naria  karana oi laloa bada totona. Namona be oi diba Iehova be oi ia laloa bada.—1 Petero 5:6, 7 duahia.

7. Dahaka dainai Baibel ita laloa bada be namo?

⁷ Namona be Baibel ita laloa bada, badina unai be Dirava ese ita ia hereva henia dalana badana. Tama sina bona natudia idia herevahereva namonamo be mai anina bada, unai amo ta ta idia abidadama henia diba bona idia lalokau heheni. Iehova ese edena bamona ita ia hereva henia? Ena be Iehova ita itaia lasi, eiava ena gadona ita kamonai lasi, to Baibel amo ita ia hereva henia, bona ita kamonai henia be namo. (Isa. 30:20, 21) Iehova ia ura ita ia hakaua bona dika amo ita do ia gimaia, badina ita be iena gwauhamata taudia. Bona ia ura ia do ita dibaia bona Ia ita abidadama henia.—Salamo 19:7-11; Aonega Herevadia 1:33 duahia.

8, 9. Iehova ia ura ia dekenai dahaka do ita dibaia? Baibel sivarai ta herevalaia.

⁸ Iehova ia ura do ita diba, ia be ita ia lalokau henia bona iseda kerere maragidia ia laloa bada lasi. Ia be iseda namo ia tahua. (2 Siv. 16:9) Iuda ena King Iehosapata dekenai unai bamona ia karaia. Nega ta, Israela ena King Ahaba be Ramoto Gileada abia lou totona ia lao Suria taudia ia tuari henia neganai, Iehosapata be abia hidi kererena ia karaia, badina ia ida ia lao. Ena be peroveta koikoi taudia 400 idia gwau Ahaba be tuari lalonai do ia kwalimu, to Iehova ena peroveta tauna Mikaia ia gwau do idia kwalimu lasi. Ahaba be unai tuari lalonai ia mase, bona Iehosapata be kahirakahira ia mase. Unai dainai Ierusalema dekenai ia giroa neganai, sisiba ia abia. Hananaia ena natuna mero Iehu ese Iehosapata ia hamaoroa:  “Namo sisina be oi dekenai ia noho.”—2 Siv. 18:4, 5, 18-22, 33, 34; 19:1-3.

⁹ Iehosapata ia lohia matamaia neganai, ia ese lohia taudia, Levi taudia, bona hahelaga taudia ia siaia Iuda ena tano ibounai dekenai Iehova ena taravatu be ena taunimanima dekenai idia hadibaia totona. Unai ia karaia dainai, idau bese taudia be Iehova idia gari henia. (2 Siv. 17:3-10) Herevana Iehosapata ia kerere, to Iehova be ia karaia kara namodia ia laloaboio lasi. Unai sivarai ese ita ia hadibaia, ena be ita be goevadae lasi taudia, to bema mai kudouna ibounai ida Iehova ita hamoalea, ita dekenai iena noho hanaihanai lalokauna do ia hahedinaraia.

10, 11. (a) Dahaka dainai guriguri karana be Iehova ese ia henia harihari gauna hereadaena? (b) Guriguri be edena bamona ita laloa be namo? (Laulau ginigunana herevalaia.)

¹⁰ Lalokau tamana ena kara be, natudia idia hereva neganai do ia kamonai henia namonamo. Ia ura idia lalohekwarahilaia gaudia do ia diba, badina edia lalona ai idia noho gaudia ia laloa bada. Guriguri be hahenamo badana, badina iseda guba Tamana Iehova ita hereva henia neganai, ia kamonai.

¹¹ Nega idauidau ai Iehova ita guriguri henia diba bona ita ia koua lasi. Ia be iseda Turana bona ia noho hegaegae iseda guriguri ia kamonai totona. Taylene, guna ita herevalaia taihu, ia gwau: “Iehova dekenai gau idauidau ita herevalaia diba, bona ta ese unai do ia koua lasi.” Dirava dekenai iseda hemami o lalohekwarahi gaudia ita gwauraia neganai, ia ese Baibel amo, iseda buka o magasin ta ena hereva amo, eiava tadikaka o taihu ta ena hagoadaia hereva amo ita do ia haere henia. Heduru totona ita noinoi neganai, Iehova ia kamonai bona ita noinoi gauna ia lalopararalaia namonamo. Iseda guriguri ia haerelaia karana amo ena noho hanaihanai lalokauna ia hahedinaraia.

12. Dahaka dainai Baibel ai haida ese idia gwauraia guriguri ita laloa be namo?

¹² Baibel ai haida ese idia gwauraia guriguri haida idia noho. Unai dainai nega haida iseda ruma bese tomadiho ai unai bamona guriguri ita herevalaia diba. Iehova ena hesiai taudia be edia guriguri lalonai idia gwauraia gaudia ese iseda guriguri karana ia durua diba. Mani inai taudia ese idia gwauraia guriguri ita laloa. Iona be gwarume ena bogana lalonai ia gwauraia guriguri. (Iona 1:17–2:10) Solomona be dubu helaga ia hahelagaia neganai, mai lalona ibounai ida ia gwauraia guriguri. (1 Kin. 8:22-53) Iesu ese ena hahediba taudia dekenai ia hadibaia gurigurina be iseda namo totona. (Mat. 6:9-13) Namona be hanaihanai “Dirava dekenai emui noinoi herevadia do umui gwauraia hedinarai.” Bema unai bamona ita karaia, “Dirava ena maino, laloparara ibounai ia hereaia gauna, ese eda kudouna bona lalona do ia gimaia.”—Fili. 4:6, 7.

13. Mauri davalaia boubouna ese taunimanima dekenai dahaka hahenamo ia henia?

¹³ Iesu ena mauri davalaia boubouna be harihari gauna bamona idia henia, unai amo ita ibounai be “mauri do ita abia.” (1 Ioa. 4:9) Dirava ese ia hahedinaraia lalokau badana be Aposetolo Paulo ese ia herevalaia neganai, ia gwau: “Keriso be ita kara dika taudia totona ia mase, unai be Dirava ese ia abia hidi negana ai. Ta be kara maoromaoro tauna totona ia mase be auka. To momokani, reana tau namona totona ta be do ia ura ia mase. To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:6-8) Unai lalokau hereadaena dainai taunimanima be Iehova ena lalonamo idia abia diba.

14, 15. Mauri davalaia boubouna ena anina be dahaka (a) horoa Keristani taudia dekenai? (b) tanobada helarona idia abia taudia dekenai?

 ¹⁴ Haida be Iehova ena noho hanaihanai lalokauna amo hahenamo idauna idia abia. (Ioa. 1:12, 13; 3:5-7) Lauma helaga ese idia ia horoa dainai, idia be “Dirava ena natudia” ai idia lao. (Roma 8:15, 16) Paulo ese horoa Keristani taudia ia herevalaia neganai, ia gwau ‘Keriso Iesu ida idia hakapua dainai, Dirava ese ia ida idia ia hatorea isi lou hebou bona guba dekenai idia ia hahelaia hebou.’ (Efe. 2:6) Unai hahenamo idia abia badina ‘Dirava ese ia gwauhamatalaia vadaeni lauma helaga amo idia ia makaia. Bona unai be iena amo ia vara. Unai lauma helaga be hamomokania gauna, Dirava ese ia gwauhamatalaia gaudia ibounai be idia dekenai do ia henia,’ unai be Dirava ese guba ai idia totona ia hegaegaelaia helarona.—Efe. 1:13, 14; Kol. 1:5.

¹⁵ Mauri davalaia boubouna idia abidadama henia taudia momo totona, dala ia noho Iehova ena turadia bona ena natudia ai idia lao, bona tanobada Paradaiso ai mauri hanaihanai do idia abia. Danu, Iehova ese mauri davalaia boubouna amo taunimanima ibounai dekenai ena lalokau ia hahedinaraia. (Ioa. 3:16) Bema iseda helaro be tanobada ai do ita mauri hanaihanai bona mai abidadama ida Iehova ita hesiai henia noho, tanobada matamata ai iseda mauri do ia hanamoa. Unai dainai mauri davalaia boubouna ita laloa neganai, ita be Dirava ena noho hanaihanai lalokauna ita laloa!

16. Iehova ese ena lalokau ia hahedinaraia daladia idauidau ita laloa neganai, edena dala ai ita ia durua?

¹⁶ Iehova be dala idauidau ai ita dekenai ena lalokau bada ia hahedinaraia. Salamo torea tauna Davida ia gwau: “Dirava e, oiemu laloa be lau dekenai idia dobu bona namo herea momokani. Oiemu laloa be momo herea momokani. Bema idia lau duahia neganai, idia be kone miri idia momo herea bamona.” (Sal. 139:17, 18) Iehova ese ita dekenai ia henia hahenamo idauidau ita laloa neganai, ita ia durua iseda lalokau Ia dekenai ita habadaia totona, badina ia ese ita ia lalokau henia bona naria. Unai dainai namona be ita gaukara goada ia ita hesiai henia totona.

17, 18. Dirava dekenai iseda lalokau ita hahedinaraia daladia haida be dahaka?

¹⁷ Iehova dekenai iseda lalokau ita hahedinaraia daladia be momo. Hegeregere, Basileia ita harorolaia goadagoada amo ita hahedinaraia Dirava bona iseda dekena taudia ita lalokau henia. (Mat. 24:14; 28:19, 20) Hahetoho negadiai Dirava ita badinaia neganai, ita hahedinaraia Iehova ita lalokau henia momokani. (Salamo 84:11; Iamesi 1:2-5 duahia.) Bema hekwakwanai idia bada idia lao, ita diba momokani Dirava be ita mamia hisihisi ia diba bona ita do ia durua, badina ia dekenai ita be dava bada gauna bamona.—Sal. 56:8.

¹⁸ Iehova ita lalokau henia dainai, ia havaraia gaudia bona iena kara namodia ita laloa dobu. Ita hahedinaraia Iehova ita lalokau henia momokani bona hanaihanai Baibel ita stadilaia karana amo iena Hereva ita laloa bada. Iehova lalokau henia karana ese ita ia veria lao ia kahirakahira dekenai. Bona iseda kara dika dainai ia vara mauri davalaia boubouna ita laloa karana ese Iehova lalokau henia karana ia habadaia. (1 Ioa. 2:1, 2) Iehova ese ita dekenai iena noho hanaihanai lalokauna be unai dala ai ia hahedinaraia dainai, ita ura ia dekenai iseda lalokau ita hahedinaraia danu.