1, 2. (a) Oi ura tanobada matamatana ai dahaka hahenamo oi itaia? (Laulau ginigunana herevalaia.) (b) Tanobada matamatana ai dahaka hahenamo badana do ita abia?

“MAURI KORIKORINA.” Ita momo be unai hereva ita kamonai neganai, tanobada Paradaiso ai do ia vara maurina ita laloa. Momokani, aposetolo Paulo be “mauri hanaihanai” be “mauri korikorina” ida ia hahegeregerea. (1 Timoteo 6:12, 19 duahia.) Ita be mauri hanaihanai ita naria noho bona unai ese moale bada do ia havaraia. Unai nega ai, dina ta ta ai ita noga neganai, iseda tauanina do ia goada bona gorere mamina do ita abia lasi. (Isa. 35:5, 6) Mani oi laloa, iseda lalokau taudia bona turadia ida do ita hebamo, idia haida be mase amo idia toreisi lou taudia. (Ioa. 5:28, 29; Kara 24:15) Saiens, miusiki, ruma haginia gaukara bona gaukara ma haida dekenai eda diba do ita habadaia.

² Tanobada matamata ai do ita abia hahenamo badana be, Iehova ena hereva do ita diba namonamo. Do ita moale bada badina do ita diba Iehova ena ladana idia hahelagaia bona iena lohia siahuna idia abia isi! (Mat. 6:9, 10) Danu taunimanima bona tanobada totona Iehova ena palani ginigunana ia guguru  neganai, do ita moale bada. Bona mani oi laloa, ita be goevadae taudia ai ita lao neganai, Iehova kahirakahira do ita lao!—Sal. 73:28; Iam. 4:8.

3. Hari dahaka totona ita hegaegae be namo?

³ Unai hahenamo ita abia diba, badina Iesu ia gwau “Dirava ese gau ibounai ia karaia diba.” (Mat. 19:25, 26) To bema ita ura tanobada matamata ai ita noho—bona Keriso ena Lagani 1,000 Lohia Negana ia ore murinai do ita mauri noho—namona be ita hekwarahi mauri hanaihanai ita “dogoatao auka” totona. Namona be ita diba inai tanobada dikana be do ia ore, bona lalohadai maorona ita abia tanobada matamatana totona do ita hegaegae. Edena dala ai inai tanobada dikana ai unai ita karaia diba?

4. Edena dala ai hari do ita hegaegae tanobada matamatana ai ita noho totona?

⁴ Edena dala ai hari do ita hegaegae Dirava ena tanobada matamata ai ita noho totona? Unai be hegeregere tano ma ta dekenai ita lao bamona. Unai tano dekenai ita lao totona edena bamona do ita hegaegae? Reana unai tano ena gado do ita dibaia guna. Bona edia kastom do ita diba danu. Reana edia aniani haida do ita tohoa. Bona do ita ura unai tano ai idia noho taudia bamona do ita noho. Unai hegeregerena, tanobada matamata ai ita noho totona, namona be hari iseda noho dalana ese ia hahedinaraia ita hegeregere unai negai ita noho totona. Mani inai haheitalai haida ita herevalaia.

5, 6. Tanobada matamata ai ita noho totona, edena dala ai hari Iehova ena hakaua herevadia badinaia karana ese ita ia durua?

⁵ Tanobada matamatana ai, Dirava be ena lohia siahuna do ia abia isi. Badina hari Satani ese ia biagua tanobadana ai, taunimanima idia ura sibona idia biagua. Haida idia laloa sibona idia naria be namo, eiava sibona edia abia hidi idia karaia be maoro. To momo be unai bamona idia karaia dainai, dahaka ia vara? Dirava ena hakaua herevadia idia badinaia lasi dainai, hisihisi idia davaria, idia moale lasi bona dika ia vara. (Ier. 10:23) Unai dainai taunimanima ibounai be Iehova ena lohia siahuna henunai do idia noho negana ita naria noho.

⁶ Tanobada matamatana ai, Iehova ena lohia siahuna henunai ita noho be moale gauna, badina unai negai ita ese tanobada do ita hagoevaia, bona idia toreisi lou taudia do ita hadibaia. Bona Iehova ese ita dekenai gaukara momo do ia henia. To, bema oi ura henia lasi gaukara be oi dekenai idia hamaoroa oi karaia totona, dahaka do oi karaia? Mai moale ida unai do oi abia dae bona do oi karaia, a? Ita momo do ita gwau, “Oibe.” Vadaeni, hari ita be Iehova amo ia mai hakaua herevadia ita badinaia noho, a? Bema unai bamona ita karaia noho, anina be ita hegaegae noho Iehova ena lohia henunai ita noho totona.

7, 8. (a) Dahaka dainai gaukara hebou karana be gau badana? (b) Keristani taudia haida dekenai idia vara senisi haida be dahaka? (c) Tanobada matamatana ai eda noho dalana ita herevalaia neganai, dahaka ita diba?

⁷ Hari Iehova ena hakaua herevadia ita badinaia sibona lasi, to tanobada matamata ai ita noho totona do ita hegaegae, to danu namona be mai moale bona lalotamona ida ita gaukara hebou. Bema ita idia hakaua taudia edia hereva ita badinaia, bona idia henia gaukara be mai moale ida ita karaia, tanobada matamatana ai unai kara do ita hahedinaraia danu. (Heberu 13:17 duahia.) Gwauhamata tanona ai, Israela taudia be idia haria tanodia ta ta ai idia noho. (Num. 26:52-56; Ios. 14:1, 2) Hari, ita diba lasi Tanobada matamata ai ita ta ta totona edena noho gabu do idia abia  hidi. To, unai nega ai do ita gaukara hebou dainai mai moale ida Iehova ena ura do ita karaia.

⁸ Basileia ena lohia henunai ita noho totona, bema hari ita hekwarahi Iehova ena orea ida ita gaukara hebou bona orea ena gaukara idauidau ita durua, unai hekwarahi be hekwarahi kava lasi. To, nega ia hanaia lalonai iseda noho dalana do ia idau. Hegeregere, United States ena brens ai idia gaukara taudia haida edia asainmen idia haidaua bona idia siaidia ful-taim haroro gaukara idia karaia totona, bona hari unai asainmen idia moalelaia bona hahenamo momo idia abia. Bema iseda asainmen ita abia dae, Dirava ena heduru totona ita guriguri, bona Dirava ena hesiai gaukara ita karaia, do ita moale bona hahenamo momo do ita abia, herevana inai nega dikana lalonai ita noho. (Aonega Herevadia 10:22 duahia.) Iseda vaira negana be edena bamona? Reana Tanobada matamata lalonai edeseni do ita noho be ita makaia vadaeni, to ita do idia hamaoroa ma gabu ta dekenai ita noho totona. Herevana edena gabu be ita totona do idia abia hidi bona dahaka hesiai gaukara do ita karaia, to ita diba ita karaia gaukara do ita laloa bada bona moalelaia.—Neh. 8:10.

9, 10. (a) Tanobada matamatana ai, edena bamona negadia ai haheauka karana ita hahedinaraia be namo? (b) Edena dala ai haheauka karana ita hahedinaraia diba?

⁹ Tanobada matamatana ai, ita ese haheauka karana be nega ta ta ai ita hahedinaraia be namo. Hegeregere, do ita kamonai haida edia turadia bona varavara be mase amo idia toreisi lou dainai idia moale. Unai negai idia ida do ita moale hebou bona eda lalokau taudia do idia toreisi lou totona do ita naria. (Roma 12:15) Bema hari mai haheauka ida Iehova ena gwauhamata ita naria noho, unai ese ita do ia durua nega vaira ai haheauka karana ita hahedinaraia totona.—Had. 7:8.

¹⁰ Danu ita hegaegae noho tanobada matamata lalonai ita noho totona, namona be Iehova ena orea ese ia halasia diba matamatadia ita abia dae. Baibel amo diba matamata ita abia neganai, nega ita atoa unai ita stadilaia totona, a? Bema ita laloparara namonamo lasi, ma diba haida abia totona oi naria, a? Bema unai ita karaia, tanobada matamatana ai Iehova ese taunimanima totona ena ura ia hagugurua neganai, do ia auka lasi haheauka karana ita hahedinaraia totona.—Aon. 4:18; Ioa. 16:12.

11. Taunimanima idia noho hebou namonamo totona, Iehova ese ita dekenai dahaka ia hadibaia noho? Edena dala ai unai ese tanobada matamatana ai ita do ia durua?

¹¹ Tanobada matamatana ai, ita do ia durua kara badana ta be gwauatao heheni karana. Keriso ena lohia lagani 1000 lalonai, kara maoromaoro taudia bona kara maoromaoro lasi taudia be metairametaira goevadae taudia ai do idia lao. (Kara 24:15) Unai negai ta ta dekenai kara namodia do ita hahedinaraia, a? Hari haida edia dika ita gwauatao bona ita kara namo henidia neganai, tanobada matamatana ai unai kara do ita hahedinaraia diba.—Kolose 3:12-14 duahia.

12. Dahaka dainai hari vaira negana totona ita hegaegae be gau badana?

¹² Namo lasi ita laloa tanobada matamatana lalonai ita ura henia gaudia ibounai be do ita abia kava sibona. To Iehova ena lohia siahuna henunai ita noho dainai, namona be ita abia gaudia do ita laloa bada, bona ita abia dae unai gaudia be hegeregere iseda mauri durua totona. Unai ena anina be hari inai negai Iehova ese ita  dekenai ia hadibaia karadia do ita badinaia be namo. Bema unai bamona ita karaia, tanobada matamatana ai danu unai karadia do ita hahedinaraia noho ela bona hanaihanai. Namona be “do ia mai tanobadana” totona iseda abidadama ita hagoadaia noho. (Heb. 2:5; 11:1) Danu, ita hahedinaraia ita ura dikadika tanobada matamatana ai kara maoromaoro sibona do ia noho. Momokani, ita be Dirava ena tanobada matamatana totona ita hegaegae noho.

13. Tanobada matamatana ai, dahaka mai anina bada gaukara do ita karaia?

¹³ Mauri korikorina totona ita hegaegae dalana ma ta ita laloa. Baibel ia gwauhamata tanobada matamatana ai aniani momo bona ma gau haida do ita moalelaia, to unai nega ai Dirava amo diba maoromaoro do ita abia neganai, iseda moale do ia bada herea. (Mat. 5:3) Dirava hesiai henia gaukara be eda mauri ai mai anina bada gauna ai do ita halaoa, bona Iehova hesiai henia gaukarana do ita moalelaia. (Sal. 37:4) Hari inai negai, bema Iehova ena hesiai gaukara ita laloa bada, anina be ita be vaira negana ena mauri korikorina totona ita hegaegae noho.—Mataio 6:19-21 duahia.

14. Matamata taudia ese mauri hanaihanai idia laloa noho totona, dahaka tahua gaudia idia atoa be namo?

¹⁴ Iehova ena hesiai gaukara lalonai, edena dala ai iseda moale ita habadaia diba? Dala ta be tahua gaudia ita atoa. Bema oi be matamata tau ta bona oi ura Iehova ena hesiai gaukara oi karaia, namona be ful-taim hesiai gaukara idia herevalaia buka o magasin haida oi duahia, bona hesiai gaukara ta be emu tahua gauna ai oi halaoa. * Lagani momo lalonai ful-taim hesiai gaukara idia karaia tadikaka taihu haida oi hereva henia diba. Dirava hesiai henia gaukara be emu tahua gauna ai oi halaoa dainai, Dirava ena tanobada matamata totona oi hegaegae noho. Bema hari oi dibaia gaudia oi badinaia, unai ese vaira negana ai oi do ia durua.

15. Dirava ena Basileia harorolaia taudia be dahaka tahua gaudia haida idia atoa diba?

¹⁵ Ita be Dirava ena Basileia harorolaia taudia dainai, dahaka tahua gaudia ita atoa diba? Tahua gauna ta be iseda haroro dalana ita hanamoa. Eiava Baibel ena hakaua hereva ta ita lalopararalaia totona ita stadilaia namonamo bona ita badinaia. Eiava hebou ai duahiduahi karana, eda haere karana ita hanamoa diba, a? Reana gau  ma haida oi laloa danu. To, point badana be inai: Tahua gaudia oi atoa neganai, unai ese oi do ia hagoadaia Dirava ena hesiai gaukara idauidau oi karaia totona, bona tanobada matamata totona do oi hegaegae.

16. Dahaka dainai Iehova hesiai henia gaukarana be mauri dala hereadaena?

¹⁶ Bema iseda nega ita gaukaralaia Dirava ena tanobada matamata totona ita hegaegae, unai be mauri namonamo. Dirava ita hesiai henia be hisihisi badana amo ita roho mauri totona lasi, to sibona eda ura dainai ita ura Dirava ita hesiai henia. Dirava ese ita ia karaia neganai, ia ura mauri do ita moalelaia. Iehova ese ita ia naria bona ena lalokau ita mamia neganai, eda mauri do ita moalelaia. (Salamo 63:1-3 duahia.) Unai dainai ita ibounai be Iehova ita hesiai henia dainai do ita moale bada. Momokani, haida be lagani momo lalonai unai hahenamo idauidau idia moalelaia noho, bona ita diba mauri dalana ma ta ese unai bamona moale do ia havaraia diba lasi.—Sal. 1:1-3; Isa. 58:13, 14.

17. Paradaiso ai, moale karadia be edena bamona do ita laloa?

¹⁷ Sibona eda ura gaudia bona moale karadia be Dirava ena tanobada matamatana lalonai do ita karaia danu. Badina Dirava ese ita ia havaraia neganai, ia ura eda ura gaudia bona gaukara idauidau do ita moalelaia. (Had. 2:24) Iehova be unai bona dala ma haida amo hanaihanai ita ibounai eda ura gaudia do ia henia. (Sal. 145:16) Bema eda hetura karana Iehova ida ita atoa guna, bona moale karadia bona laga-ani negadia be edia gabu maorodia ai ita atoa, do ita moale. Tanobada Paradaiso ai unai bamona do ita karaia. Unai dainai aonega karana be Dirava ena Basileia ita tahua guna bona vaira negai Iehova ena taunimanima ese idia abia hahenamo ita laloa be namo!—Mat. 6:33.

18. Edena dala ai do ita hahedinaraia Paradaiso ai mauri hanaihanai abia totona ita hegaegae noho?

¹⁸ Paradaiso ai, do ita moale bada herea. Unai dainai namona be hari unai mauri korikorina totona ita hegaegae noho. Dirava badinaia karadia do ita hahedinaraia noho bona Dirava ena Basileia harorolaia gaukarana ita karaia bona moalelaia noho. Dirava hesiai henia gaukara idauidau be eda tahua gaudia ai ita halaoa bona moalelaia. Bona Iehova ena gwauhamata ita abidadama henia dainai, namona be hari eda noho dalana amo ita hahedinaraia ita hegeregere tanobada matamatana ai ita noho totona.