EGU VAVANA Nikolai Dubovinsky ia do mauri noho lalonai inai ekspiriens ia torea. Guna idia gwauraia Soviet Union ese haroro gaukara idia taravatua negana ai egu vavana be Iehova ia hesiai henia. Ia ese ia mamia moalena bona ia davaria nega aukadia ia sivarailaia. Herevana hekwarahi bona nega aukadia ia davaria, to hanaihanai Dirava ia badinaia bona ena mauri ia moalelaia. Nega momo egu vavana Nikolai ia gwau ia ura matamata taudia ese ena sivarai idia kamonai, unai dainai lau ura ena sivarai haida lau gwauraia. Ia be lagani 1926 ai ia vara, bona ena ruma bese be biru taudia, Chernivtsi Oblast ai ia noho hanua ladana Podvirivka ai idia noho, unai hanua be Ukraine dekenai.

Vavana Nikolai ena sivarai ia matamaia: “Lagani 1941 ai, dina ta egu kakana mero Ivan be buka ladana The Harp of God bona The Divine Plan of the Ages, Watchtower magasin, bona buklet haida be ruma dekenai ia mailaia. Unai buka bona magasin ibounai lau duahia neganai, lau laloparara Diabolo ese tanobada ai hekwakwanai ia havaraia, to Dirava lasi. Unai buka bona Evanelia bukadia danu lau duahia, unai neganai lau diba hereva momokani lau davaria vadaeni. Bena ma haida ida egu helaro lau herevalaia. Unai buka bona magasin lau stadilaia neganai, hereva momokani lau lalopararalaia, bona egu ura Dirava hesiai henia totona ia habadaia.

“Lau diba egu abidadama dainai lau be hisihisi do lau davaria. Tuari ia matamaia vadaeni, bona lau be ta do lau hamasea lasi. Do idia vara hahetoho lau haheaukalaia totona, Baibel siri haida, hegeregere Mataio 10:28 bona 26:52 lau laloa loulou. Egu lalona lau hadaia nega ibounai Iehova lau badinaia totona, herevana unai lau karaia neganai do lau mase!

“Lagani 1944 ai egu mauri lagani be 18 neganai, lau idia boiria tuari lalonai lau vareai totona. Tuari totona ladadia idia abia gabuna ai, egu nega ginigunana abidadama tamona taudia haida lau hedavari henia, idia haida be tadikaka matamata. Mai lalotamona ida gavamani taudia ai hadibaia ai be tuari lalonai do ai vareai lasi. Ami tauna ia badu dainai, ia gwau ai dekenai aniani do idia henia lasi, to drein do ai geia, eiava ai do idia pidia. Mai gari lasi ida ai gwau: ‘Emui ura hegeregerena umui karaia diba. To ena be dahaka umui karaia ai dekenai, ai be Dirava ena taravatu do ai badinaia, “Taunimanima oi alaia lasi.”’—Eso. 20:13.

“To, lau bona tadikaka rua be Belarus dekenai idia siaia, idia dika rumadia ai hanamoa totona. Minsk dekenai tuari ai idia vara dika badadia lau do laloatao noho. Dala ena badinai lahi ese ia gabua audia idia noho. Mase tauanina idia noho kava bona hosi edia mase tauanina be drein bona uda lalonai idia hekure  noho. Lau itaia kariota, tuari kohudia, bona peleini idia dika gaudia idia noho kava. Lau itaia gaudia ese idia hahedinaraia taunimanima be Dirava ena hereva idia kamonai lasi dainai unai bamona dika idia vara.

“Lagani 1945 ai tuari ia doko, to tuari lalonai ai vareai lasi dainai, dibura rumana dekenai ai idia siaia lagani 10 ai noho totona. Lagani ginigunadia toi lalonai, tadikaka taihu ida ai hebamo lasi bona Baibel buka o magasin idia halasia gaudia ai abia lasi. To revareva amo ai ese taihu haida ai tore henia, to idia danu be hesiai gaukara ena kamepa dekenai idia siaia lao, bona lagani 25 lalonai unuseni do idia noho.

“Bena lagani 1950 ai, ai idia ruhaia bona emai ruma dekenai ai giroa lou. To dibura ruma ai lau noho neganai, egu sinana bona tadina kekeni Maria be Iehova ena Witnes taudia ai idia lao. Ena be egu kakadia toi be Witnes taudia lasi, to Baibel idia stadilaia. Haroro gaukara lau karaia noho dainai, Soviet sekuriti taudia idia ura dibura ruma dekenai lau idia siaia giroa. Gabeai gaukara idia naria tadikaka ese lau idia noia bema guri lalonai idia karaia ruma ai Baibel buka o magasin do lau karaia. Unai negai egu mauri lagani be 24 sibona.”

“Witnes taudia be do idia gwau, ‘Bema tano ena ataiai Basileia gaukara idia koua, vadaeni tano henunai gaukara do ita karaia.’ (Aon. 28:28) To, emai Baibel buka o magasin momo be hehuni ai idia printaia noho, tano henunai unai gaukara idia karaia. Egu kakana Dmitry ena ruma dekenai, daiutu ta be tano henunai ia noho, unai be egu ‘gaukara daiutu’ ginigunana. Nega haida wiki rua lalonai lau be daiutu lalonai sibona lau noho. Oksijen be lasi dainai, kerosini lamepa ia bodo, unai neganai do lau hekure diho bona hodahoda namona ia vareai totona do lau naria.

 “Nega ta, lau ida ia gaukara tadikaka ta be lau ia nanadaia; ‘Nikolai, oi bapatiso vadaeni, a?’ Ena be lagani 11 lalonai Iehova lau hesiai henia, to lau do bapatiso lasi. Unai dainai lau ida ia herevahereva bona unai hanuaboi ai gohu ta dekenai lau bapatiso, egu mauri lagani be 26. Lagani toi murinai, maduna ma haida lau abia, bona Tano Komiti ena memba ta ai lau lao. Unai nega ai, dibura ruma dekenai idia abia lao tadikaka edia maduna be tadikaka ma haida ese idia abia, unai amo Basileia gaukara be do ia heau noho.”

“Tano henunai ai karaia printa gaukara ena hekwarahi be bada herea! Lagani 7 lalonai, pulisi ese lau idia davaria lasi totona, hebou dekenai lau lao lasi, to sibona egu Baibel stadi lau karaia. Nega ta ta sibona lau lao egu famili lau vadivadi henia. Bona idia be egu noho dalana idia lalopararalaia dainai unai ese lau ia hagoadaia. Nega ta ta ai lau lalohisihisi bona nega momo lau hunia dainai, egu tauanina ia manoka. To gau idauidau do idia vara dainai, ai noho hegaegae. Hegeregere, nega ta adorahi ai pulisi ofesa rua be ai noho ruma dekenai idia mai. Lau be windo amo lau paudobi, bona uda lalonai lau heau vareai. Bena wisili bamona regena lau kamonai. To, ipidi ena regena lau kamonai neganai, lau laloparara unai be buleti! Pulisi tauna ta be hosi ia guia bona lau ia lulua bona ipidi amo lau ia pidia noho to lau ia reaia ela bona ena buleti ia ore. To buleti ta ese egu imana ia pidia. Lau idia lulua ena daudau be kilomita 5 bamona, bona uda lalonai lau komu. Gabeai kota dekenai lau idia hamaoroa nega 32 bamona lau idia pidia!

“Lau be nega momo tano henunai lau noho dainai, egu toana be gorere bamona. Unai dainai lau karaia gaukara lau karaia namonamo lasi. Tano henunai lau noho dainai egu helt be ia namo lasi. Unai dainai tano ataiai dekenai lau noho neganai, dina ena diari lau abia. Nega ta lau be tadikaka ese idia karaia mai anina bada hebou ta dekenai lau lao lasi, badina egu udu baubau bona uduna dekenai rara ia diho.”

“January 26, 1957 ai, lau idia dogoatao. Hua siks murinai, Ukraine ena Supreme Court ese disisen ia karaia, ipidi amo lau idia pidia totona. To, kerere tauna ta hamasea taravatuna be unai tano ena gavamani ese ia abia dae lasi dainai,  lau idia siaia dibura ruma dekenai, bona lagani 25 unuseni lau noho. Ai tadikaka 8 be hesiai kamepa dekenai idia siaia. Mordvinia kamepa dekenai ai idia siaia, unuseniai Witnes taudia ibounai 500 idia noho. Hehuni dekenai ai hebou bona grup maragidia ai Gima Kohorona ai stadilaia. Pulisi ese emai magasin haida idia itaia, bona gadi tauna ta ia gwau: ‘Bema magasin umui duahia noho, gau ta ese umui do ia koua o halusia diba lasi.’ Nega momo emai gaukara bona ma haida danu ai karaia namonamo. To, kamepa ena biaguna ia gwau: ‘Ai dekenai iniseni umui karaia gaukara be gau badana lasi. Ai ura umui ese ai do umui kamonai bona badinaia.’”

Lagani 1967 ai, leiba kamepa amo idia ruhaia murinai, Uncle Nikolai ese Estonia bona St. Petersburg, Russia ai tadikaka ia durua kongrigeisen idia haginia totona. Lagani 1991 ena matamana ai, 1957 ai idia karaia kota ena disisen idia koua, badina tadikaka dekenai kerere ta idia davaria lasi. Gavamani taudia ese Witnes taudia momo be dibura bona kamepa amo idia ruhadia. Lagani 1996 ai, Nikolai be Velikiye Luki ena siti dekenai ia lao, unai be Pskov Oblast dekenai, ena daudau St. Petersburg amo be kilomita 500 bamona. Ruma ta ia hoia, bona 2003 ai Kingdom Hall ta be iena tano dekenai idia haginia. Hari, kongrigeisen badadia rua be unai gabu dekenai idia hebou.

Lau bona egu adavana be Iehova ena Witnes taudia edia brens ofesi Russia dekenai ai gaukara. March 2011 ai, vavana Nikolai ia do mase lasi neganai, ai ia vadivadi henia. Iena hereva ese ai ia hagoadaia, bona mai moale ida ia gwau: “Lau itaia gaudia ibounai amo, lau gwau diba, Ieriko hanua hagegea ena dina namba 7 ia matamaia vadaeni.” (Ios. 6:15) Iena mauri lagani be 85. Ena be iena mauri dekenai hisihisi idauidau idia vara, to ia gwau: “Lau moale badina lau matamata neganai, Iehova hesiai henia ena abia hidi lau karaia! Unai dainai lau dekenai lalohisihisi ta be lasi!”