1, 2. Dahaka dainai Iesu be Mareta ia lalokau henia? Bona dahaka ese ia hahedinaraia ia danu be goevadae lasi hahine?

LASARO ena taihuna Mareta oi laloa neganai, dahaka oi laloa? Baibel ese ia hahedinaraia Mareta be Iesu ena turana namona ta bona ia lalokau henia. To, Iesu be Mareta sibona ia lalokau henia lasi, to Dirava idia badinaia hahine haida danu ia lalokau henia bona ia matauraidia. Hegeregere Mareta ena tadina Maria, danu be Iesu ena tura namona. Bona Iesu be iena sinana Maria ia lalokau henia danu. (Ioa. 11:5; 19:25-27) To, dahaka dainai Iesu be Mareta ia lalokau henia?

² Mareta be heabidae, gaukara goadagoada, bona Dirava ena hereva ia laloa bada dainai, Iesu ese ia lalokau henia. Ia be Iesu ese ia hadibaia gaudia ia abia dae momokani. Mareta be Iesu ia abidadama henia badina ia diba momokani Iesu be Mesia. (Ioa. 11:21-27) To, Mareta danu be goevadae lasi hahine. Badina nega ta, Iesu be ena ruma ai ia noho neganai, Mareta ia laloa gau ta ia maoro lasi, bona Iesu ia noia unai ia hamaoromaoroa totona. Mareta ia gwau: “Lohiabada e, egu tadina ese lau ia rakatania bona lau sibona lau gaukara be oi laloa lasi, a? Unai dainai ia oi  hamaoroa lau do ia durua.” (Luka 10:38-42 duahia.) Unai sivarai amo dahaka ita dibaia?

3, 4. Edena dala ai Maria be “gau namona” ia abia hidi? Bona Mareta be dahaka sisiba ia abia dae? (Laulau ginigunana herevalaia.)

³ Mareta bona Maria edia heabidae karana dainai, Iesu ese Dirava ena hereva amo idia ia durua. Maria be unai nega namona ia gaukaralaia Hadibaia Tauna Badana Iesu amo diba ia abia totona, bona “Lohiabada ena aena badinai ia helai bona ena hereva ia kamonai noho.” Bema Mareta danu be unai bamona ia karaia, Iesu ese do ia hanamoa.

⁴ To Mareta be aniani ia hegaegaelaia totona ia gaukara, bona ma gaukara haida danu ia karaia, badina ia ura Iesu do ia moale. To unai gaukara ibounai ia karaia dainai ia lalohekwarahi, bona Maria dekenai ia badu. To Iesu be unai ia itaia dainai Mareta ia hamaoroa, ia gwau: “Mareta e, Mareta e, oi be gau momo dainai oi lalohekwarahi.” Bona ma ia gwau aniani disi tamona be hegeregere. Bena Iesu be Maria ia hanamoa, ia gwau: “Maria ese gau namona ia abia hidi, bona ia amo do idia kokia lasi.” Reana Maria be unai nega ai ia ania aniani ia laloaboio vadaeni, to Iesu ena hereva ia kamonai dainai ia abia hanamoa hereva bona diba ia laloaboio lasi. Lagani 60 mai kahana murinai, aposetolo Ioane ia gwau, ‘Iesu ese Mareta bona ena taihuna ia lalokau henidia.’ (Ioa. 11:5) Unai hereva ese ia hahedinaraia Mareta be Iesu ena sisiba ia abia dae, bona gabeai ena mauri lalonai mai kamonai ida Iehova ia hesiai henia.

5. Edena dala ai iseda nega be Baibel negadia amo ia idau? Bona dahaka henanadai ita laloa be namo?

⁵ Edena dala ai iseda nega be Baibel negadia amo ia idau? “Hari inai negai, taunimanima edia aonega ia bada dainai printa masini badadia idia karaia, bona magasin idauidau momo idia halasia diba, reidio, TV o muvi idia karaia. . . . Dina ta ta ai lalona veria gau matamatadia idia halasia. . . . Vanegai sibona haida idia gwau iseda nega be aonega bada negana. Hari inai negai lalona veria gaudia be momo herea.” Unai hereva be lagani 60 gunanai, United States ena sikuli natudia dekenai idia gwauraia. The Watchtower, September 15, 1958 ia gwau: “Dokona ia kahirakahira dainai, lalona veria gaudia momo do idia hedinarai.” Unai be hari ia vara noho. Unai dainai mai anina bada henanadai be inai: Dahaka ita karaia diba anina lasi gaudia ese eda lalona idia veria lasi totona? Namona be Maria bamona, Dirava ena hesiai gaukara ita laloa bada.

6. Iehova ena taunimanima be edena dala ai tanobada taudia ese idia karaia gaudia idia gaukaralaia namonamo?

⁶ Tomadiho momokani ia tubu noho totona, nega momo Dirava ena tanobada oreana ese inai tanobada taudia ese idia karaia gaudia idia gaukaralaia. Hegeregere, “Photo-Drama of Creation” ena piksa, ia be mai ena kala bona gado regena danu. Tanobada Tuarina Ginigunana ia do matamaia lasi bona ia hamatamaia neganai, tanobada ibounai ai taunimanima milioni momo be unai piksa ese ia hagoadaia. Badina unai piksa ena dokonai Iesu Keriso ena Lohia Lagani 1,000 lalonai do ia vara mainona ia herevalaia. Gabeai, reidio amo Basileia ena sivarai idia halasia, bona taunimanima milioni momo ese idia kamonaia. Hari inai negai, tadikaka be kompiuta gaudia bona Intanet idia gaukaralaia, motumotu maragidia bona tanobada ena kahana ibounai ai taunimanima dekenai sivarai namona idia halasia totona.

7. (a) Dahaka dainai taunimanima ese idia karaia gaudia dekenai iseda nega ita haorea be mai ena dika? (b) Dahaka be mai anina bada gauna ita dekenai? (Futnout itaia.)

 ⁷ Baibel ese ita ia sisiba henia, bema tanobada taudia ese idia karaia gaudia gaukaralaia totona nega bada ita haorea, unai be mai ena dika. (1 Korinto 7:29-31 duahia.) Keristani tauna ese ia karaia gaudia haida be kerere lasi, hegeregere iena ura gaudia idauidau ia karaia, o duahiduahi, TV raraia karana, gabu idauidau itaia loaloa, stoa dekenai loaloa kava, kompiuta o gau matamatadia haida ia tahua. To unai bamona gaudia ia karaia totona nega bada ia haorea diba. Danu fon ai ta ta dekenai teks mesiji ia siaia, e-mail ia siaia, bona hanaihanai niusi bona spot gadara ia sekea karana ese ena nega ia haorea kava diba. * (Had. 3:1, 6) Bema anina lasi gaudia karaia totona nega bada ita haorea, mai anina bada gauna—Iehova tomadiho henia karana—ita laloa maragi diba.—Efeso 5:15-17 duahia.

8. Dahaka dainai tanobada lalokau henia lasi ena sisiba be mai anina bada?

⁸ Satani ena ura be inai tanobada gaudia ia gaukaralaia ita ia hakaua kerere totona. Aposetolo taudia edia negai unai ia vara dainai, hari danu unai do ia vara diba. (2 Tim. 4:10) Unai dainai, namona be inai sisiba ita badinaia: “Tanobada . . . lalonai idia noho gaudia umui lalokau henia lasi.” Bema hanaihanai unai sisiba hegeregerena eda mauri ita hanamoa noho, gau ta ese iseda lalona do ia veria lasi bona iseda Tamana dekenai eda lalokau do ita habadaia. Unai amo do ia auka lasi Dirava ena ura ita badinaia totona, bona hanaihanai Ia ese ita do ia lalonamo henia.—1 Ioa. 2:15-17.

9. Iesu ese matana ia herevalaia neganai, dahaka ia gwau? Bona edena dala ai haheitalai namona ia hahedinaraia?

⁹ Iesu be mai hebogahisi ida Mareta ia sisiba henia. Danu, Iesu be haida ia hadibaia bona ena haheitalai amo ia hahedinaraia Dirava ena ura be mai anina bada. Iesu ese ena hahediba taudia ia hagoadaia Basileia ena gaukara sibona do idia laloa, unai be hegeregere edia matana be gau tamona sibona ia raraia. (Mataio 6:22, 33 duahia.) Iesu be tauanina gaudia ia laloa momo lasi, ia be ruma o tano ta ia biagua lasi.—Luka 9:58; 19:33-35.

10. Iesu be haroro ia hamatamaia neganai, edena dala ai haheitalai namona ia hahedinaraia?

¹⁰ Iesu ena hesiai gaukara lalonai gau  momo idia vara, unai ese ena lalona ia veria diba ena hesiai gaukara ia rakatania totona, to unai ibounai ia dadaraia. Haroro gaukara ia matamaia neganai, Kaperanauma ai, hutuma ia hadibaia bona hoa karadia ia karaia murinai, taunimanima be ia idia noia edia hanua ia rakatania lasi totona. To Iesu be dahaka ia karaia? Ia gwau: “Taoni ma haida dekenai danu Dirava ena Basileia ena sivarai namona lau harorolaia be namo, unai badina totona Dirava ese lau ia siaia.” (Luka 4:42-44) Iesu be ena hereva hegeregerena, Palestine ena hanua ibounai ai taunimanima ia haroro henia bona ia hadibaia. Ena be ia be goevadae tauna, to ia hesiku danu, badina Dirava ena hesiai gaukara ia karaia goadagoada.—Luka 8:23; Ioa. 4:6.

11. Tau ta ena ruma bese lalonai ia vara hekwakwanai dainai Iesu be dahaka ia gwau? Bona Iesu be dahaka hadibaia hereva ia henia?

¹¹ Nega ta, Iesu be ia murinai idia raka taudia dekenai dagedage taudia edia kara idia haheaukalaia dalana ia herevalaia neganai, tau ta be ia dekenai ia gwau: “Hadibaia Tauna e, egu tadikaka oi hamaoroa egu tamana ena kohu be lau ida do ia haria.” To, Iesu ia ura lasi edia hepapahuahu lalonai do ia vareai. Ia gwau: “Tau e, daika ese lau ia abia hidi emui hahemaoro tauna eiava kohu haria tauna ai lau lao totona?” Bena Iesu be ena hereva idia kamonai taudia ia hadibaia, bema kohu ura henia karana dainai Dirava ena hesiai gaukara idia dadaraia, dika do idia davaria.—Luka 12:13-15.

12, 13. (a) Iesu ia do mase lasi neganai, Grik dubu gunalaia taudia haida idia ura dahaka idia karaia? (b) Iesu be dahaka ia karaia?

¹² Iesu be tanobada ai ia noho ena wiki dokona ai, hahetoho badana ia davaria. (Mat. 26:38; Ioa. 12:27) Gaukara momo ia noho ia karaia totona, bona kota vairanai ia do idia hahemaraia bona do idia hamasea. Lagani 33 C.E. Sunday, Nisan 9 ai ia vara gauna mani oi laloa. Idia perovetalaia hegeregerena, Iesu be doniki latanai ia helai bona Ierusalema dekenai ia vareai, bona hutuma be ia dekenai idia boiboi “Iehova ena ladanai ia mai King.” (Luka 19:38) Unai dina murinai, Iesu be dubu lalonai ia vareai bona mai gari lasi ida mataganigani bisinesi taudia ia luludia, badina Dirava ena ruma lalonai idia ese koikoi dalanai taunimanima dekenai moni idia abia.—Luka 19:45, 46.

¹³ Ierusalema ai, hutuma huanai Grik dubu gunalaia taudia haida idia noho, idia be Iesu ena hadibaia dalana idia moalelaia dainai aposetolo Filipo idia hadibaia idia ida hebou ta ia hegaegaelaia totona. To, Iesu ia ura mai anina bada gaudia ia hagugurua dainai, ia ura lasi gau ta ese unai ia koua. Bona Iesu ia ura Dirava idia inai henia taudia ese ia do idia hamasea boubou gauna bamona, unai dainai ia ura lasi taunimanima ese ia do idia diba. Unai dainai Iesu ena mase negana ia kahirakahira neganai, Andrea bona Filipo dekenai ia hadibaia, ia gwau: “Ena mauri ia ura henia tauna ese ena mauri ia hadikaia, to inai tanobada dekenai ena mauri ia inai henia tauna ese ena mauri do ia gimaia bona mauri hanaihanai do ia abia.” Iesu ia ura sibona ena mauri do ia bouboulaia, to ia ura lasi unai Greek taudia ia hamoalea. Ia gwauhamata ia gwau: “Bema ta be lau ia hesiai henia, Tamana ese ia do ia hanamoa.” Oibe, Filipo be Greek taudia dekenai ia lao bona unai hereva ia gwauraia.—Ioa. 12:20-26.

14. Iesu be haroro gaukara ia atoa guna, to dahaka ese ia hahedinaraia nega ia atoa danu gau ma haida ia karaia totona?

¹⁴ Ena be Iesu ia ura lasi ma ta ese ia do ia koua mai anina bada gaukara, sivarai namona harorolaia gaukara unai, ia karaia totona, to nega ia atoa danu gau haida ia moalelaia totona. Ia be headava ta ena boiboi herevana ia abia dae danu, bona unai nega ai ranu  be hoa dalanai wain ai ia halaoa. (Ioa. 2:2, 6-10) Iesu ena turadia bona ena hahediba taudia ese ia idia boiria aniani totona neganai, ia abia dae. (Luka 5:29; Ioa. 12:2) Mai anina bada gauna be, Iesu be nega ia atoa ia guriguri, ia laloa dobu, bona ia laga-ani totona.—Mat. 14:23; Mar. 1:35; 6:31, 32.

15. Aposetolo Paulo be dahaka sisiba ia henia? Bona edena dala ai haheitalai namona ia hahedinaraia?

¹⁵ Aposetolo Paulo ia gwau, “namona be ita idia hametaua gaudia ibounai” ita negea. Danu ia hahedinaraia gwauhamata Keristani tauna be heau helulu ta lalonai ia noho bamona. (Heberu 12:1 duahia.) Paulo be ia harorolaia gauna ia badinaia, bona Iuda ai taga bona ladana bada do ia abia gaukarana ia dadaraia. Ia be “mai anina bada gaudia” ia laloa bada bona Suria, Asia Minor, Makedonia, bona Iudea dekenai ia loaloa, Dirava ena hesiai gaukara ia karaia totona. Paulo be ena guba maurina ena helaro ia herevalaia neganai, ia gwau: “Lau rakatania gaudia lau laloaboio bona vaira gaudia totona lau hekwarahi noho. Oibe, lau hekwarahi noho egu tahua gauna lau abia totona.” (Fili. 1:10; 3:8, 13, 14) Paulo be ia headava lasi dainai, ‘hanaihanai Lohiabada ia hesiai henia bona gau ta ese ena lalona ia veria lasi.’—1 Kor. 7:32-35.

16, 17. Herevana oi be singul o oi headava, edena dala ai Paulo ena haheitalai ita tohotohoa diba? Ekspiriens ta gwauraia.

¹⁶ Paulo bamona, Dirava ena hesiai taudia haida be idia headava lasi dainai, ruma bese ena maduna be bada lasi bona Basileia gaukara idia karaia goadagoada diba. (Mat. 19:11, 12) Nega momo Dirava idia hesiai henia headava taudia edia ruma bese lalonai maduna momo idia noho. To herevana oi headava lasi o oi headava vadaeni, namona be ibounai ese ‘hametaua gaudia ibounai idia negea’ bona Dirava idia hesiai henia diba. Anina be nega idia haorea kava gaudia ita dadaraia, bona iseda nega ita gaukaralaia Dirava ena hesiai gaukara ita karaia totona.

¹⁷ Wales tanona ai, headava tau bona hahine, Mark bona Claire mani ita laloa. Idia ruaosi be sikuli idia haorea murinai, painia gaukara idia hamatamaia. Idia headava murinai painia gaukara idia do karaia noho. Mark ia gwau: “Ai ura kohu momo lasi maurina ai noholaia dainai emai daiutu toi rumana ai hoihoilaia bona pat-taim moni gaukara ai rakatania, unai amo intanesinol konstraksen ai vareai diba.” Lagani 20 idia hanaia vadaeni, idia be Africa tano ibounai dekenai idia loaloa, Kingdom Hall haginia gaukara idia durua totona. Nega ta edia moni be 15 dola sibona, to Iehova ese idia ia naria. Claire ia gwau: “Dina ta ta ai Iehova ai hesiai henia dainai, ai moale bada. Turadia momo ai davaria, bona gau ta dekenai ai dabu lasi. Ena be ai rakatania gaudia be gau maragidia sibona, to ful-taim hesiai gaukara lalonai Iehova ai hesiai henia ena moale be bada herea.” Ful-taim hesiai taudia momo be unai bamona ekspiriens idia davaria danu. *

18. Haida be dahaka henanadai idia laloa be namo?

¹⁸ To, oi be edena bamona? Bema oi itaia gau haida ese emu lalona idia veria dainai Basileia ena hesiai gaukara oi karaia goadagoada lasi, dahaka oi karaia be namo? Reana sibona emu Baibel duahiduahi bona stadi oi karaia namonamo neganai, haere do oi davaria. Edena dala ai unai oi karaia diba? Stadi gabena be unai do ia herevalaia.