“Emai Abidadama Do Oi Habadaia”
“Lau oi durua egu abidadama lau hagoadaia totona!”—MAR. 9:24.
ANE: 81, 135
1. Dahaka dainai abidadama be mai anina bada? (Laulau ginigunana herevalaia.)
NEGA ta oi laloa: ‘Iehova ese hisihisi badana lalonai lau do ia hamauria bona tanobada matamata lalonai do lau mauri, a?’ Oibe. To ita roho mauri totona, gau haida ita karaia be namo, bona aposetolo Paulo ese mai anina bada gauna ta herevalaia. Ia gwau: “Bema tau ta be abidadama lasi, ia ese Dirava ia hamoalea diba lasi.” (Heb. 11:6) Ena be ita gwau diba unai be auka lasi, to momokani “abidadama be taunimanima ibounai ese idia abia gauna lasi.” (2 Tes. 3:2) Unai siri ese ia hahedinaraia iseda abidadama ia goada noho be mai anina bada.
2, 3. (a) Edena dala ai Petero ia hahedinaraia, abidadama be mai anina bada? (b) Edena henanadai be hari do ita herevalaia?
2 ‘Iesu Keriso ia hedinarai negana ai, ita ese hanamoa, hairai bona mataurai ita abia’ totona, abidadama be mai anina bada. Badina aposetolo Petero ia gwau abidadama be “idia tohoa vadaeni gauna.” (1 Petero 1:7 duahia.) Hisihisi badana ia mai haraga dainai, namona be ita hahedinaraia ita ura iseda King hairaina ia hedinarai, bona ena taunimanima ia hanamoa negana ai abidadama taudia huanai do ita noho danu. Badina “ita be abidadama taudia, bona unai abidadama dainai iseda mauri do ita haboioa lasi.” (Heb. 10:39) Unai dainai, Mareko ese ia herevalaia tauna bamona do ita gwau: “Lau oi durua egu abidadama lau hagoadaia totona!” (Mar. 9:24) Eiava Iesu ena aposetolo taudia bamona, do ita gwau: “Emai abidadama do oi habadaia.”—Luka 17:5.
3 Iseda abidadama habadaia totona, henanadai haida ita laloa be namo. Edena dala ai unai kara ita habadaia diba? Edena dala ai do ita hahedinaraia ita be mai eda abidadama? Edena bamona ita diba bema abidadama totona ita guriguri, iseda guriguri ena haere do ita abia?
DIRAVA IA URA HENIA ABIDADAMA KARANA
4. Daidia edia haheitalai ese iseda abidadama ia hagoadaia diba?
4 “Toretore Helagadia dekenai idia torea herevadia ibounai be ita hadibaia totona idia torea,” unai dainai Baibel ai abidadama taudia edia sivarai amo gau haida ita dibaia diba. (Roma 15:4) Aberahamo, Sara, Isako, Iakobo, Mose, Rahaba, Gideon, Baraki, bona ma haida edia sivarai ita duahia neganai, iseda abidadama ia hagoadaia. (Heb. 11:32-35) Danu, hari inai negai abidadama tadikaka bona taihu edia sivarai ita duahia neganai, unai ese ita ia durua iseda abidadama ita hagoadaia totona. *
5. Edena dala ai Elia ia hahedinaraia ia be Iehova ia abidadama henia? Iena haheitalai ese edena dala ai ita ia durua?
5 Peroveta tauna Elia ena haheitalai be Baibel lalonai ia noho. Mani oi laloa, iena sivarai ese ia hahedinaraia ia be Iehova ia abidadama henia bada. Elia be mai gari lasi ida King Ahaba dekenai Iehova ese hitolo bada do ia havaraia ena hereva ia gwauraia: “Mauri Diravana ena ladana dekenai, lau ese oi lau hamaoroa inai, paripari bona medu be do ia diho lasi, . . . lau hereva.” (1 Kin. 17:1) Hitolo bada ia vara neganai, Elia be Iehova ia abidadama henia, badina ia diba ia bona ma haida edia dabu gaudia be Iehova ese do ia henia. (1 Kin. 17:4, 5, 13, 14) Ia abia dae momokani Iehova ese natuna ta be mase amo ia hamauria lou diba. (1 Kin. 17:21) Danu ia abia dae Iehova ese guba amo lahi do ia siaia diho bona Karamele Ororona ai boubou patana do ia gabua. (1 Kin. 18:24, 37) Iehova ese doe bada ia haorea totona, toa ta ia hahedinaraia lasi neganai, Elia ese Ahaba ia hamaoroa, ia gwau: “Oi lao, oi aniani, oi inua danu, badina lau kamonai, medu ia mai noho.” (1 Kin. 18:41) Unai bamona sivarai ese ita ia durua ita sibona do ita tahua iseda abidadama ia goada noho eiava lasi.
DAHAKA DO ITA KARAIA EDA ABIDADAMA IA GOADA TOTONA?
6. Bema ita ura eda abidadama ia goada, dahaka totona ita guriguri be namo?
6 Ita sibona eda goada amo eda abidadama ita hagoadaia be hegeregere lasi. Badina abidadama be Dirava ena lauma helaga ena huahua ta. (Gal. 5:22) Danu, aonega karana be iseda abidadama totona do ita guriguri, badina Iesu ia gwau Tamana, “guba ai ese lauma helaga be idia noinoi taudia dekenai do ia henia.”—Luka 11:13.
7. Iseda abidadama ita hagoadaia dalana ena haheitalai gwauraia.
7 Namona be iseda abidadama Dirava dekenai ita hagoadaia noho. Iseda abidadama be lahi au ia araia noho gauna ida ita hahegeregerea diba. Lahi ia araia matamaia neganai, reana do ia hururu bada herea. To bema lahi au ma haida ita haboua lasi, lahi be do ia bodo matamaia diba ela bona gida siahudia sibona do idia noho. Bena unai gida siahudia be do idia keru idia lao. To lahi au momo ita haboua lou neganai, lahi do ia araia noho diba. Unai hegeregerena, hanaihanai Dirava ena Hereva ita stadilaia neganai, iseda abidadama do ia goada noho. Bena Baibel do ita ura henia bona Baibel ia Havaraia Tauna do ita lalokau henia bada. Unai ese iseda abidadama do ia hagoadaia.
8. Dahaka gaudia ese ita do ia durua eda abidadama ia goada noho totona?
Heb. 6:1, 2) Emu abidadama oi hagoadaia ena badina oi diba totona, Baibel ena peroveta herevadia oi dibaia be namo. Dirava ena Hereva amo emu abidadama oi tohoa, unai amo do oi diba edena dala ai oi be abidadama goada tauna ai oi lao diba.—Iamesi 1:25; 2:24, 26 duahia.
8 Dahaka gaudia ma haida ita karaia diba iseda abidadama ia goada totona? Ena be Baibel stadi amo diba oi abia bona oi bapatiso, to unai sibona be hegeregere lasi. (9, 10. Edena dala ai inai gaudia ese iseda abidadama ia hagoadaia: (a) hebamo namodia? (b) kongrigeisen heboudia? (c) haroro gaukara?
9 Aposetolo Paulo ese iena tadikaka ia hamaoroa ia gwau: “Do ita hagoadaia heheni, umui emui abidadama amo lau umui hagoadaia.” (Roma 1:12) Unai ena anina be dahaka? Nega ita atoa eda tadikaka bona taihu ida ita hebamo neganai, ta ta eda abidadama ita hagoadaia. Oibe, edia abidadama idia “tohoa vadaeni” taudia do ita bamoa. (Iam. 1:3) Hebamo dikadia ese eda abidadama idia hadikaia, to hebamo namodia ese eda abidadama idia hagoadaia. (1 Kor. 15:33) Unai dainai Baibel ena sisiba ia gwau “iseda hebou karana ita rakatania lasi,” bona “ita hagoadaia heheni” noho. (Heberu 10:24, 25 duahia.) Danu, hebou ai ita abia hakaua herevadia ese iseda abidadama ia hagoadaia. Paulo ese unai ia herevalaia, ia gwau: “Hereva idia kamonai murinai, idia abidadama.” (Roma 10:17) Unai dainai ita sibona ita nanadaia: ‘Hanaihanai Keristani heboudia dekenai tadikaka taihu lau bamoa, a?’
10 Haroro gaukara ita karaia neganai, ita ese haida edia abidadama bona iseda abidadama ita hagoadaia. Keristani taudia ginigunadia bamona, Iehova abidadama henia karana ita manadalaia bona mai gari lasi ida eda abidadama ita herevalaia.—Kara 4:17-20; 13:46.
11. Dahaka dainai Kaleba bona Iosua edia abidadama ia goada? Bona edena dala ai edia haheitalai ita tohotohoa diba?
11 Iehova ese iseda guriguri ia haerelaia bona ita ia durua dalana be iseda mauri lalonai ita mamia neganai, iseda abidadama do ia hagoadaia. Kaleba bona Iosua dekenai unai ia vara. Gwauhamata Tanona itaia totona idia lao neganai, idia hahedinaraia Iehova idia abidadama henia. Bona edia mauri lalonai Iehova ese idia ia durua dalana idia itaia neganai, edia abidadama ia hagoadaia. Unai dainai Iosua ese Israela taudia dekenai ia gwau: “Unai dainai, Lohiabada do umui gari henia, iena hesiai gaukara do umui karaia, mai emui momokani, bona mai emui laloa maoromaoro danu . . . . To lau, bona lauegu famili taudia, ai ese Lohiabada sibona ena hesiai gaukara do ai karaia.” (Ios. 23:14; 24:14, 15) Iehova dekenai ita tabekau bona ena heduru ita itaia neganai, iseda abidadama ia hagoadaia.—Sal. 34:8.
ABIDADAMA ITA HAHEDINARAIA
12. Iamesi be ena hereva amo dahaka ia hahedinaraia?
12 Edena dala ai ita hahedinaraia diba eda abidadama ia goada noho? Iamesi ia gwau: “Lau ese egu kara amo egu abidadama do lau hahedinaraia.” (Iam. 2:18) Iseda kara ese do ia hahedinaraia ita be mai iseda abidadama eiava lasi. Mani haheitalai haida ita itaia.
Haroro gaukara idia karaia taudia idia hahedinaraia edia abidadama ia goada (Paragraf 13 itaia)
13. Edena dala ai haroro gaukara amo iseda abidadama ita hahedinaraia?
13 Haroro gaukara ita karaia neganai iseda abidadama ita hahedinaraia unai. Dahaka dainai? Badina unai gaukara ita karaia neganai, ita abia dae Dirava be ena nega korikori ai tanobada ena dokona do ia mailaia, bona “do ia vara momokani.” (Hab. 2:3) Haroro gaukara ita goadalaia neganai, ita hahedinaraia iseda abidadama ia bada ia lao noho. Iseda abidadama ita sekea totona, namona be sibona ita nanadaia: ‘Edena dala ai haroro gaukara be mai anina bada? Egu nega bona goada lau gaukaralaia haida dekenai Dirava lau herevalaia totona, a? Dala idauidau lau tahua egu hesiai gaukara lau habadaia totona, a?’ (2 Kor. 13:5) Sivarai namona harorolaia gaukarana amo ‘hahemauri do ita abia,’ unai amo iseda abidadama ita hahedinaraia.—Roma 10:10 duahia.
14, 15. (a) Edena dala ai iseda mauri lalonai abidadama ita hahedinaraia diba? (b) Abidadama ia hahedinaraia ekspiriens ta herevalaia
14 Danu, abidadama do ita hahedinaraia bema mauri ena hekwakwanai ita haheaukalaia. Herevana ita gorere, lalohisihisi, lalometau, ita ogogami eiava hekwakwanai ma haida ita davaria, to ita diba Iehova bona iena Natuna ese “heduru be nega maorona” ai ita dekenai do idia henia. (Heb. 4:16) Iehova ita guriguri henia karana ese ia hahedinaraia ita abia dae momokani ia ese ita do ia durua. Iesu ia gwau Iehova ita guriguri henia diba ‘hari dina ena paraoa ia henia’ totona. (Luka 11:3) Baibel sivaraidia ese idia hahedinaraia Iehova be eda mauri durua gaudia ia henia diba. Israela taudia dekenai hitolo bada ia vara neganai, Iehova be Elia dekenai ia hereva hegeregerena ia vara. Elia be “sinavai maragi ena ranu ia inua, bona dabai bona adorahi neganai, galo manudia ese paraoa bona vamu idia mailaia.” (1 Kin. 17:3-6) Iehova ese Elia dekenai aniani bona ranu ia henia. Unai dainai ita abidadama Iehova ese iseda dabu gaudia do ia henia.
Abidadama do ita hahedinaraia bema mauri ena hekwakwanai ita haheaukalaia (Paragraf 14 itaia)
15 Ita diba momokani Baibel ena sisiba ita badinaia neganai, Iehova ese ita do ia durua. Asia ai headava taihu ta Rebecca ena famili dekenai unai ia vara. Mataio 6:33 bona Aonega Herevadia 10:4 ena hakaua hereva hegeregerena, idia be Basileia idia atoa guna bona idia gaukara goadagoada. Taihu ia gwau, nega ta ena adavana ia laloa ia karaia moni gaukarana ese ena hebou lao henia karana ia hadikaia diba, unai dainai iena moni gaukara ia rakatania. Edia natudia foa naria totona, aniani idia hoihoilaia matamaia. Idia gaukara goada dainai, edia moni ia hegeregere famili durua totona. Taihu ia gwau: “Ai mamia Iehova be ai ia rakatania lasi. Hanaihanai aniani ia noho.” Oi danu oi abia dae Baibel ena hakaua herevadia ese hari taunimanima ia durua diba, a?
16. Bema Dirava ita abidadama henia dahaka do ia vara?
Gal. 3:11; Hab. 2:4) Unai dainai Dirava ita abidadama henia ita ia durua totona. Paulo ia gwau: “Dirava ena siahu be iseda lalona ai ia gaukara noho, unai siahu amo, Dirava ese ita noia eiava lalohadailaia gaudia sibona lasi, to unai gaudia idia hereaia gaudia ia henia diba.” (Efe. 3:20) Iehova idia hesiai taudia be dala idauidau ai edia nega bona goada idia gaukaralaia. To idia diba edia goada be mai ena hetoana dainai, Iehova ena heduru idia abidadama henia, badina ia ese edia hekwarahi do ia hanamoa. Ita moale badina Dirava be ita ida ia noho!
16 Namona be ita daradara lasi, bema Dirava ena hakaua dalana ita badinaia, unai ese ita dekenai namo do ia havaraia. Paulo be Habakuku ena hereva ia torea, ia gwau: “Kara maoromaoro tauna be ena abidadama dainai do ia mauri.” (ABIDADAMA TOTONA ITA NOINOI ENA HAERE
17. (a) Aposetolo taudia be abidadama totona idia noinoi neganai, edena dala ai edia haere idia abia? (b) Dahaka dainai abidadama totona ita guriguri neganai, Dirava ese ita do ia durua?
17 Inai stadi ai ita herevalaia gaudia dainai, ita mamia ita ura iseda abidadama ita habadaia. Aposetolo taudia ese Iesu dekenai idia noinoi idia gwau: “Emai abidadama do oi habadaia.” (Luka 17:5) Pentekoste 33 C.E. ai, Dirava ese edia noinoi ia haerelaia, lauma helaga idia abia bona Dirava ena ura idia lalopararalaia. Unai ese edia abidadama ia hagoadaia. Unai neganai idia ese haroro gaukara badana idia karaia matamaia. Ita ese abidadama totona ita noinoi neganai, Dirava ese ita do ia durua, a? Baibel ia gwau “Dirava ena ura hegeregerena, ia ese ita do ia kamonai henia.”—1 Ioa. 5:14.
18. Edena dala ai Iehova ese ia idia abidadama henia taudia ia hanamoa?
18 Hari ita diba momokani, Iehova be ia idia abidadama henia taudia dekenai ia moale. Abidadama totona ita guriguri neganai, Iehova ese iseda guriguri do ia haerelaia, bona iseda abidadama do ia bada ia lao, unai amo do ‘ita hegeregere Dirava ena basileia ita abia’ totona.—2 Tes. 1:3, 5.
^ par. 4 Unai bamona taudia haida edia sivarai itaia, Lillian Gobitas Klose (July 22, 1993, Awake!), Feliks Borys (February 22, 1994, Awake!), bona Josephine Elias (September 2009 Awake!).