1, 2. Edena dala ai taunimanima edia harana be hoa gauna?

GADO dainai taunimanima be idia duahiduahi, toretore, hereva idia gwauraia, hereva ena anina idia laloparara, idia guriguri bona ane amo Iehova idia hanamoa diba. Iseda kwara harana dainai unai gau idauidau ita karaia diba. Saiens taudia be kwara harana idia stadilaia, to idia do laloparara lasi ia be edena bamona ia gaukara. Iseda kwara harana dainai gado ma ta ita dibaia diba, unai be hoa gauna. Gado ia stadilaia profesa ta ia gwau: “Natudia ese gado ma ta idia dibaia karana be vaia [taunimanima] edia kara ta.”

² Taunimanima be gado idauidau idia dibaia karana be Dirava ena harihari gauna ta. (Sal. 139:14; Apok. 4:11) Iseda kwara harana be dala namona ta ai ita gaukaralaia diba. Dirava ese “ena toana hegeregerena” ita ia karaia, bona ita be animal amo ita idau. Ita be mai iseda ura kwalimu bona abia hidi ita karaia diba iseda gado amo Dirava ita hanamoa totona.—Gen. 1:27.

3. Ita aonega totona, Iehova ese dahaka harihari gauna hereadaena ia henia?

³ Ita dekenai gado ia henia Tauna be Iehova, bona ia idia ura hanamoa taudia ibounai dekenai harihari gauna hereadaena ta  ia henia, unai be Baibel. Baibel ena kahana ibounai eiava ena kahana haida be gado 2,800 mai kahana ai idia hahanaia vadaeni. Baibel oi stadilaia neganai, Dirava ena laloa dalana be emu darana dekenai oi atoa noho. (Sal. 40:5; 92:5; 139:17) Danu oi dibaia gaudia oi laloa dobu karana ese “aonega ia henia, . . . hahemauri oi abia” totona.—2 Timoteo 3:14-17 duahia.

4. Laloa dobu ena anina be dahaka? Bona edena henanadaidia do ita laloa?

⁴ Laloa dobu ena anina be gau ta oi laloa loulou, ena be ia be gau namona ta eiava dika gauna ta. (Sal. 77:12; Aon. 24:1, 2) To Iehova Dirava bona iena Natuna, Iesu Keriso edia kara ita laloa dobu be namo. (Ioa. 17:3) Reana do ita laloa, duahiduahi bona laloa dobu karana ena idau be dahaka? Laloa dobu karana amo dahaka namo ia vara, bona edena dala ai laloa dobu karana ita manadalaia bona ita moalelaia diba?

5, 6. Oi duahiduahi neganai, dahaka ese emu laloparara bona laloatao karana ia durua diba?

⁵ Emu harana ese oi ia hadibaia diba gau idauidau oi karaia totona, nega haida oi karaia gaudia haida be oi laloa lasi. Hegeregere oi hahodi, oi raka, basikele ai oi heau. Bona nega haida oi duahiduahi neganai, unai ia vara. Reana oi duahiduahi lalonai, gau idauna ma ta do oi laloa matamaia. Unai ia vara lasi totona dahaka oi karaia be namo? Namona be oi duahia noho gauna ena anina oi laloa. Bena pablikeisen ena paragraf o hereva kwarana ta ena dokona ai, oi laga-ani bona oi duahia gauna oi laloa dobu. Dahaka oi dibaia oi laloa, bona oi lalopararalaia namonamo guna be namo.

⁶ Saiens taudia ese edia tahua gaukara lalonai idia davaria gaudia ese idia hahedinaraia, bema duahiduahi lalonai hereva ita gwauraia badabada, unai ese ita do ia durua ita duahia gaudia ita laloatao totona. Iseda harana ia Havaraia Tauna Iehova be unai ia diba. Unai dainai Iosua ia hamaoroa Iena Taravatu bukana be “gado maragina ai, [NW]” do ia duahia. (Iosua 1:8 duahia.) Bema Baibel oi duahia metairametaira o nega ibounai unai oi karaia, oi do ia durua oi duahia gauna oi laloatao noho totona.

7. Edena nega be nega namona Dirava ena Hereva ita laloa dobu totona? (Laulau ginigunana herevalaia.)

⁷ Duahiduahi karana be auka lasi. To ita laloa dobu neganai, namona be ita duahia gauna sibona ita laloa. Badina iseda harana be gau idauidau ia laloa matamaia diba. Danu, ita laloa dobu totona namona be eda tauanina ia hesiku lasi bona regerege lasi gabuna ta dekenai ita noho. Salamo torea tauna Davida ia mamia hanuaboi be nega namona iena mahuta gabunai ia hekure, ia laloa dobu totona. (Sal. 63:6) Iesu be goevadae tauna, to ia diba ia laloa dobu bona guriguri totona, regerege lasi gabuna ta ia abia hidi be namo.—Luka 6:12.

8. (a) Dahaka gaudia ma haida dekenai ita laloa dobu be namo? (b) Bema eda nega ita gaukaralaia ma haida dekenai Iehova ita herevalaia, iena hemami be edena bamona?

⁸ Baibel ai ita duahia gaudia ita laloa dobu be gau badana, to gau ma haida totona ita laloa dobu danu be namo. Hegeregere, Dirava ese ia havaraia gauna ta oi itaia neganai, namona be nega oi atoa bona sibona oi nanadaia: ‘Inai gauna ese edena dala ai lau dekenai Iehova ena kara ia hadibaia?’ Unai bamona oi laloa neganai, mai lalona ibounai ida Iehova do oi tanikiu henia. Bona ma haida ida oi noho neganai, do oi ura idia dekenai oi laloa bada gaudia oi herevalaia. (Sal. 104:24; Kara 14:17) Ma haida  dekenai Iehova ita herevalaia, o ita guriguri bona laloa dobu neganai, Iehova be unai kara dekenai ia moale bona ia laloa bada. Baibel ia gwau: “Lohiabada ese guba dekenai oda ia gwauraia, bona buka ta lalonai be Lohiabada idia gari henia taudia, bona Lohiabada idia [‘laloa,’ NW] noho taudia edia ladana idia torea.”—Mal. 3:16.

9. (a) Paulo ese Timoteo ia hamaoroa dahaka ia karaia totona? (b) Haroro gaukara totona ita hegaegae neganai, edena dala ai Paulo ena sisiba do ita badinaia?

⁹ Aposetolo Paulo ese Timoteo ia hamaoroa ena hereva dalana, ena kara bona ena hadibaia dalana do ia “laloa dobu” be namo. (1 Timoteo 4:12-16 duahia.) Timoteo bamona, ita abia Keristani maduna momo do ita lalodia danu. Hegeregere, Baibel stadi karaia totona ita hegaegae neganai, nega do ita atoa ita laloa dobu totona. Iseda Baibel stadi taudia ta ta edia diba ita habadaia totona, ita laloa gauna be edena henanadai o haheitalai do ita gaukaralaia. Unai dala amo iseda nega ita gaukaralaia dainai do ita moale, bona ita karaia gaudia ita laloa dobu neganai, iseda abidadama do ia hagoadaia bona ita ia durua eda Baibel stiuden taudia edia stadi be mai ura bada ida do ita karaia namonamo totona. Danu haroro gaukara totona ita lao neganai, iseda kudouna ita hegaegaelaia. (Esera 7:10 duahia.) Baibel ai, Kara bukana ena karoa ta oi duahia karana ese oi do ia durua emu ura haroro gaukara dekenai oi habadaia totona, unai be hegeregere “lahi ia hiriria” bamona. Laloa dobu dalana ta be palani do ita karaia, haroro ai ita gaukaralaia Baibel siridia bona do ita hariharilaia buka o magasin ita hegaegaelaia, unai amo iseda hesiai gaukara do ita karaia namonamo. (2 Tim. 1:6) Teritori ai idia noho taudia edia lalona ia veria diba herevadia do ita laloa. Unai bamona hegaegae karana dainai haroro gaukara do ita karaia namonamo, bona Dirava ena Hereva amo ‘lauma helaga ena siahu ita hahedinaraia.’—1 Kor. 2:4.

10. Dahaka gau namodia ma haida do ita laloa dobu diba?

 ¹⁰ Nega haida hebou ai pablik tok eiava hebouhebou ai oi kamonai mai anina bada herevadia oi torea, a? Ita torea herevadia ita riviulaia totona nega do ita atoa, unai amo Dirava ena hereva bona iena orea amo ita dibaia gauna ita laloa dobu. Danu hua ta ta ai Gima Kohorona bona Awake! magasin, bona hebouhebou ai idia halasia gau matamatadia ita duahia bona laloa dobu. Danu bema Yearbook ai ekspiriens ta oi duahia neganai, unai ekspiriens oi lalohadailaia guna, gabeai ekspiriens ma ta oi duahia. Unai amo oi duahia ekspiriens ese emu kudouna do ia hamarerea. Reana do oi ura hereva badadia oi makaia o nouti haida oi torea, unai amo lou henia oi karaia, mamoe vadivadi oi karaia, o gabeai tok oi henia neganai, oi gaukaralaia diba. Mai anina bada gauna be, nega oi atoa bona hanaihanai Baibel buka o magasin ai oi duahia gaudia oi laloa loulou. Unai amo oi duahia gauna be emu lalona ai do ia noho bona oi dibaia gau namodia dainai guriguri amo Iehova oi tanikiu henia.

11. Dahaka ita laloa dobu be mai anina bada, bona dahaka dainai? (Futnout itaia.)

¹¹ Momokani, Baibel ena hereva ita laloa dobu be mai anina bada. Bema nega ta Baibel idia taravatua, oi laloa dobu gaudia ese oi do ia durua diba. * Badina oi laloatao gaudia be ta ese do ia kokia diba lasi. Hegeregere oi ura henia Baibel siri ta o Basileia anedia do oi laloatao noho. (Kara 16:25) Bona Dirava ena lauma helaga ese oi do ia durua oi dibaia gau namodia oi laloatao totona, unai ese emu abidadama do ia hagoadaia.—Ioa. 14:26.

12. Edena dala ai Baibel duahiduahi ita karaia diba?

¹² Wiki lalonai dina haida oi makaia, Tiokratik Haroro Sikuli ena Baibel duahiduahi oi karaia bona oi laloa dobu totona. Danu nega ita atoa Iesu ese ia herevalaia bona ia karaia gaudia ita laloa dobu totona. Unai amo do oi abia dae, Iesu ena mauri bona ena haroro gaukara ena sivarai be taunimanima momo idia diba. (Roma 10:17; Heb. 12:2; 1 Pet. 2:21) Dirava ena orea ese ena taunimanima totona Tau Hereadaena bukana idia halasia. Unai buka ese Iesu ena mauri lalonai idia vara gaudia be edia nega hegeregerena ia gwauraia. Unai buka ena karoa ta ta ita duahia bona laloa dobu neganai, heduru bada do ita abia.—Ioa. 14:6.

13, 14. Dahaka dainai Dirava ia havaraia gaudia bona iena hereva ita laloa dobu be gau badana, bona edena dala ai unai ese ita do ia durua?

¹³ Dirava tomadiho henia karadia ita laloa dobu neganai, ita ia durua lo Keristani taudia ai ita lao totona. (Heb. 5:14; 6:1) Bema ta be nega ia atoa lasi Iehova bona Iesu edia ia lalohadailaia totona, iena abidadama do ia goada lasi. Bena hereva momokani do ia rakatania matamaia. (Heb. 2:1; 3:12) Iesu ia gwau, bema ta be “mai kudou namo ida” Dirava ena Hereva ia kamonai lasi o ia abia dae lasi, unai herevadia do ‘ia laloatao’ diba lasi. To ia be ‘mauri ena lalohekwarahi gaudia, taga bona moale karadia ia laloa bada, bona huahua namona ta do ia havaraia lasi.’—Luka 8:14, 15.

¹⁴ Unai dainai namona be nega ibounai Dirava ena Hereva do ita laloa. Unai ese ita do ia durua Iehova ena kara namodia ita tohotohoa totona. (2 Kor. 3:18) Dahaka gau ma haida totona ita noinoi be namo? Iseda lalokau guba Tamana ita dibaia noho, bona  iena kara ita tohotoho be hahenamo badana bona do ia doko diba lasi.—Had. 3:11.

15, 16. (a) Dirava tomadiho henia karadia ita laloa dobu neganai, dahaka namo ita abia? (b) Dahaka dainai nega haida ia auka ita laloa dobu totona, to dahaka dainai unai ita karaia be namo?

¹⁵ Iehova ia havaraia gaudia bona iena hereva ita laloa dobu neganai, hereva momokani dibaia totona iseda ura do ita habadaia. Unai dala amo ita ese iseda tadikaka taihu bona kamonai taudia do ita hagoadaia. Dirava ese ita dekenai ia henia harihari gauna, Iesu ena mauri davalaia boubouna unai, ita laloa dobu neganai, unai ese ita do ia durua eda Tamana, Iehova ida eda hetura karana do ita laloa bada. (Roma 3:24; Iam. 4:8) Tadikaka ta ladana Mark, be iena Keristani gini siri karana dainai lagani toi lalonai dibura rumana ai ia noho, ia gwau: “Laloa dobu karana be hegeregere oi be laolao ta oi karaia. Dirava tomadiho henia karadia ita laloa loulou neganai, Iehova Dirava dekenai gau matamatadia momo do ita dibaia. To nega haida vaira nega lau laloa neganai lau lalohisihisi o lalometau, to Baibel lau abia bona siri ta lau duahia bena lau laloa dobu neganai, lau mamia egu hemami ia namo.”

¹⁶ Momokani, tanobada ai lalona veria gaudia be momo, unai dainai nega haida ia auka ita laloa dobu totona. Tadikaka ta ladana Patrick ia gwau: “Egu darana be revareva idia udaia maua ta bamona, sivarai idauidau amo ia honu, sivarai haida be do oi ura henia to ma haida be do oi ura henia lasi, hanaihanai unai lau hamaoromaoroa be namo. Egu lalohadai ai idia noho gaudia lau tahua neganai, lau lalohekwarahilaia gaudia haida lau davaria, bona Iehova dekenai unai lau gurigurilaia, gabeai mai lalohadai maorona ida lau laloa dobu. Ena be lau do laloa dobu lasi neganai, unai gaudia lau karaia guna bona unai ese nega bada ia haorea, to lau mamia Iehova be lau kahirakahira ia noho. Unai ese egu lalona ia kehoa hereva momokani lau lalopararalaia namonamo totona.” (Sal. 94:19) Oibe, heduru namona be idia abia taudia be “dina ta ta ai Toretore Helagadia idia tahua namonamo” bona idia dibaia gaudia idia laloa dobu.—Kara 17:11.

17. Edena bamona negadia ai oi laloa dobu diba?

¹⁷ Haida be dabai momokani idia toreisi Baibel idia duahia, idia laloa dobu bona idia guriguri totona. To haida be dina tubu dekenai unai idia karaia. Reana nega haida do oi ura adorahi ai eiava oi do mahuta lasi neganai unai oi karaia. Haida be daba ai Baibel idia duahia bona idia do mahuta lasi neganai idia duahia lou, bona unai idia moalelaia. Herevana edena nega ita abia Baibel ita duahia totona, to namona be “dina bona hanuaboi” o hanaihanai ita duahia. (Ios. 1:8) Mai anina bada gauna totona iseda nega do ita gaukaralaia, unai amo dina ta ta ai Dirava ena Hereva do ita laloa dobu diba.—Efe. 5:15, 16.

18. Dirava ena hereva idia laloa dobu bona idia badinaia taudia dekenai Baibel ena gwauhamata be dahaka?

¹⁸ Baibel ia gwauhamata, Iehova ena Hereva idia laloa dobu, bona idia dibaia gaudia badinaia totona idia hekwarahi noho taudia ibounai be Ia ese do ia hanamoa. (Salamo 1:1-3 duahia.) Iesu ia gwau: “Dirava ena hereva idia kamonai bona badinaia taudia be idia moale!” (Luka 11:28) Mai anina bada gauna be inai, bema dina ta ta ai Dirava tomadiho henia karadia ita laloa dobu neganai, ita do ia durua Havaraia Tauna Badana, iseda harana ia karaia tauna Iehova, ena ladana do ita hanamoa. Bona hari mai moale ida do ita noho bona tanobada matamata ai Ia ese ita dekenai mauri hanaihanai do ia henia.—Iam. 1:25; Apok. 1:3.