1. Iesu ese haroro gaukara be edena bamona ia laloa? Herevalaia.

IESU be ia ura bada Dirava ena Basileia ia herevalaia. Baibel ia gwau, Iesu ena haroro gaukara lalonai ia ese Basileia be nega 100 mai kahana ia herevalaia, to gau ma haida be unai bamona ia herevalaia lasi. Oibe, Iesu dekenai Basileia be mai anina bada.—Mataio 12:34 duahia.

2. Iesu ese taunimanima hida dekenai Mataio 28:19, 20 ena hahegani ia henia, bona dahaka dainai unai bamona ita hereva?

² Iesu ia toreisi lou bona nega sisina murinai, ia be Basileia harorolaia taudia 500 mai kahana dekenai ia hedinarai. (1 Kor. 15:6) Reana unai nega ai ia ese idia ia hagania Basileia ena sivarai be “bese ibounai taudia” dekenai do idia harorolaia. Unai be gaukara badana. * Iesu ia gwau unai gaukara badana be do idia karaia ela bona “inai nega oromana ena dokona,” bona hari unai ia vara noho. Reana oi danu be hari unai hahegani  bona peroveta herevana ena guguru karana oi durua noho.—Mat. 28:19, 20.

3. Inai stadi ai ita ese edena gau namodia toi do ita herevalaia?

³ Iesu ese unai hahegani ia henia murinai, ena hahediba taudia dekenai ia gwauhamata: “Lau be . . . umui ida do lau noho.” (Mat. 28:20) Anina be unai haroro gaukara badana be ena hakaua henunai do ita karaia. Unai hahegani ita hagugurua totona, iseda Dirava ese ita dekenai “gau namodia ibounai” ia henia. (Heb. 13:20, 21) Inai stadi lalonai, ita ese inai gau namodia toi do ita herevalaia: (1) Ita abia tulu idauidau, (2) ita gaukaralaia haroro daladia, bona (3) ita abia treinini. Mani idia hanaia lagani 100 lalodiai ita gaukaralaia tulu idauidau ita herevalaia guna.

4. Dahaka dainai haroro gaukara lalonai tulu idauidau ita gaukaralaia?

⁴ Iesu ese “Basileia ena hereva” be tano idauidau dekenai idia hadoa uhe ida ia hahegeregerea. (Mat. 13:18, 19) Biru tauna be uhe hadoa totona uma ia hegaegaelaia neganai, ia ese tulu idauidau ia gaukaralaia. Unai hegeregerena, iseda King ese ita dekenai tulu idauidau ia henia, unai amo taunimanima edia kudouna ita hegaegaelaia diba, Basileia ena sivarai idia abia dae totona. Ita ese tulu haida be lagani haida sibona lalonai ita gaukaralaia, to tulu ma haida be hari ita do gaukaralaidia noho. Unai tulu ibounai ese ita idia durua iseda haroro daladia ita hanamoa totona.

5. Haroro kadi be dahaka, bona edena dala ai idia gaukaralaia?

⁵ Lagani 1933 ai, pablisa taudia ese haroro kadi idia gaukaralaia matamaia, unai tulu ese haroro gaukara lalonai momo ia durua. Ia be kadi maragina ta bona ia lalonai Baibel hereva kwadogina ia noho. Nega haida kadi matamata mai ena hereva matamata idia printaia bona henia. Tadikaka C. W. Erlenmeyer be ia haroro matamaia neganai, ena mauri lagani be 10 bamona. Ia gwau: “Emai haroro ena hamatamaia herevana be, ‘Ia namo inai kadi oi duahia?’ Ruma tauna ese kadi ia duahia murinai, ia dekenai buka o magasin ai henia bona ai lao.”

6. Haroro kadi ese edena dala ai pablisa taudia ia durua?

⁶ Haroro kadi ese dala idauidau ai pablisa taudia ia durua. Hegeregere, ena be pablisa haida idia ura dikadika idia haroro, to idia hemarai bona idia diba lasi dahaka do idia gwauraia. To ma haida be mai gari lasi ida idia hereva. Idia ese miniti haida sibona lalonai idia diba gaudia ibounai be ruma tauna dekenai idia herevalaia diba, to nega momo mai aonega ida idia hereva lasi! To haroro kadi ese pablisa ibounai ia durua auka lasi dalanai idia hereva totona.

7. Haida be kadi idia gaukaralaia neganai, dahaka ia vara?

⁷ Hekwakwanai haida idia vara danu. Grace A. Estep ia gwau: “Nega haida ai idia nanadaia, ‘Unai kadi be dahaka ia herevalaia? Ia namo lau dekenai oi gwauraia?’” Danu, ruma taudia haida be kadi ai ia noho herevana idia duahia diba lasi. To ma haida be kadi sibona idia abia bona iduara idia koua. Bema ruma tauna be ia ura lasi kamonai, ia ese kadi ia abia bona ia darea maragimaragi. Ena be pablisa taudia ese unai hekwakwanai idia davaria, to haroro kadi ese idia ia durua edia dekena taudia idia haroro henia totona, unai amo taunimanima vairanai idia hahedinaraia idia be Basileia harorolaia taudia.

8. Rekodi masini be edena bamona idia gaukaralaia? (Laulau ginigunana herevalaia.)

 ⁸ Lagani 1930 murinai idia gaukaralaia tulu ma ta be rekodi masini. Tadikaka haida ese idia gwauraia, Arona, badina unai masini be idia totona ia hereva. (Esodo 4:14-16 duahia.) Bema ruma tauna ese gwaumaoro ia henia, pablisa ese Baibel tok kwadogina ia gadaralaia bena buka o magasin ia henia. Nega haida ruma bese ibounai idia haboua bona unai tok idia kamonai! Lagani 1934 ai, Watch Tower Society ese rekodi masini ia karadia matamaia, haroro ai idia gaukaralaia totona. Tadikaka ese Baibel tok idauidau 92 idia rekodia.

9. Edena dala ai rekodi masini ese haroro gaukara ia durua?

⁹ Hillary Goslin ese unai tok ta ia kamonai murinai, ia ese pablisa ia noia wiki ta lalonai unai rekodi masini do ia gaukaralaia, unai amo ena dekena taudia ese unai Basileia sivaraina do idia kamonai danu. Gabeai idia haida ese hereva momokani idia abia dae bona idia bapatiso. Bona Hillary ena natuna kekenidia rua be Gilead Sikuli dekenai idia lao bona tano ma ta dekenai idia siaidia. Haroro kadi bamona, rekodi masini ese pablisa momo ia durua haroro gaukara idia karaia matamaia totona. Gabeai, Tiokratik Haroro Sikuli amo Iehova ese ena taunimanima dekenai haroro daladia ia hadibaia.

10, 11. Edena dala ai niuspepa bona reidio idia gaukaralaia Basileia ena sivarai namona idia harorolaia totona, bona dahaka namo ia havaraia?

¹⁰ Iseda King ena hakaua henunai, Dirava ena taunimanima ese haroro dala idauidau idia gaukaralaia, taunimanima ibounai dekenai sivarai namona idia harorolaia totona. “Gaukara taudia be momo lasi” dainai, inai haroro daladia idia gaukaralaia. (Mataio 9:37 duahia.) Lagani 1900 murinai, niuspepa idia gaukaralaia taunimanima momo idia haroro henia totona. Wiki ta ta ai, Charles Taze Russell ese Baibel tok ta be nius halasia oreana dekenai ia siaia. Bena idia ese iena tok be United States, Canada, bona Europe ena niuspepa orea idauidau dekenai idia siaia. Lagani 1913 ai, Tadikaka Russell ena tok ibounai be niuspepa 2,000 dekenai idia halasia bona taunimanima 15,000,000 bamona ese idia duahia!

¹¹ Tadikaka Russell ia mase murinai, haroro dala namona ma ta idia gaukaralaia matamaia, sivarai namona idia harorolaia totona. April 16, 1922 ai, Joseph F. Rutherford ese ena haroro hereva ginigunana be reidio amo ia halasia bona taunimanima 50,000 bamona ese idia kamonai. Bena February 24, 1924 ai, orea ena reidio steiseni ginigunana, WBBR, idia gaukaralaia matamaia. December 1, 1924 ena Watch Tower ia gwau: “Ita diba momokani, reidio amo taunimanima dekenai hereva momokani ita halasia be dala namo hereana ta bona moni bada ita negea lasi.” Niuspepa bamona, reidio ese ita ia durua pablisa momo lasi gabudia dekenai taunimanima momo ita haroro henia totona.

12. (a) Edena haroro dala ma ta ita gaukaralaia diba? (b) Bema ita gari pablik gabudiai ita haroro totona, dahaka ese ita do ia durua?

¹² Pablik gabudiai haroro be dala namona ma ta taunimanima ita haroro henia totona. Hegeregere, basi stopu gabudia, trein abia gabudia, motuka atoa gabudia, stoa bona maketi gabudiai. Bema oi gari pablik gabudiai oi haroro totona, namona be heduru totona oi guriguri bona sekit  naria tadikaka, Angelo Manera, Jr. ena hereva oi laloa, ia gwau: “Ai dekenai haroro dala matamatadia be Iehova hesiai henia dalana ma ta, ia be dala ma ta emai abidadama ai hahedinaraia totona, bona unai ese emai Dirava badinaia karana ia tohoa danu, to emai kara amo ai hahedinaraia ai ura dala idauidau ai ia ai hesiai henia.” Bema mai gari lasi ida haroro dala matamatadia ita gaukaralaia, iseda abidadama Iehova dekenai ia goada bona haroro taudia namodia ai do ita lao.—2 Korinto 12:9, 10 duahia.

13. Iseda web sait ese edena bamona iseda haroro gaukara ia durua? Web sait oi gaukaralaia dainai, dahaka ekspiriens oi davaria?

¹³ Pablisa momo be mai moale ida taunimanima dekenai iseda web sait, jw.org, idia hahedinaraia, unuseniai Baibel buka bona magasin 700 mai kahana idia duahia bona daonloud diba. Dina ta ta ai, taunimanima 1.6 milioni mai kahana be eda web sait idia itaia. Guna, daudau gabudia ai idia noho taudia be reidio amo sivarai namona idia kamonai, to hari iseda web sait be unai ia karaia.

14. Dahaka dainai Basileia harorolaia taudia be treinini idia abia be namo, bona edena sikuli ese idia ia durua?

¹⁴ Ita herevalaia vadaeni tulu idauidau bona haroro daladia ese ita idia durua. To ita be dahaka treinini ita abia? Hegeregere, nega haida ruma tauna be rekodi masini amo ia kamonai herevana ia abia dae lasi. Nega ma haida ai, ruma tauna ia ura kamonai bona diba ma haida ia abia. Unai dainai namona be pablisa taudia idia diba edena dala ai koua herevadia do idia haerelaia bona hadibaia taudia namodia ai do idia lao. Dirava ena lauma helaga ena heduru amo Nathan H. Knorr ia laloparara pablisa taudia be treinini idia abia be namo, haroro gaukara idia karaia totona. Unai dainai lagani 1943 ai, kongrigeisen ta ta ai Tiokratik Haroro Sikuli idia karaia matamaia. Unai sikuli ese ita ia durua hadibaia taudia namodia ai ita lao totona.

15. (a) Haida be Tiokratik Haroro Sikuli ai tok idia henia neganai, dahaka ia vara? (b) Edena dala ai Salamo 32:8 ena hereva ese oi ia durua?

¹⁵ Tadikaka momo be taunimanima vairanai hereva karana idia manadalaia lasi. Lagani 1944 ai, Julio S. Ramu be ena tok ginigunana ia henia negana ia laloa. Iena  tok lalonai Baibel ese ia sivarailaia tauna Doega ia herevalaia! Ia gwau: “Unai nega ai egu aena, imana, bona uduna idia mareremarere bada.” Ma ia gwau: “Unai be egu nega ginigunana taunimanima vairanai tok lau henia totona, to tok henia karana lau hadokoa lasi.” Ena be ia auka, to natudia danu be unai sikuli lalonai tok idia henia. Angelo Manera, matamanai ita herevalaia tadikakana, ese ena stiuden ginigunana ia laloatao. Ia gwau: “Inai mero maragi ese ena tok ia matamaia neganai, ia gari bada dainai ia tai matamaia. To ia ura bada ena tok ia henia dainai, mai tai ida ia hereva ela bona ena tok ia haorea.” Reana oi danu be hemarai eiava gau haida ese oi idia koua dainai, hebou ai oi haere lasi eiava ena kahana idauidau oi durua lasi. To namona be Iehova oi noia oi do ia durua oi gari lasi totona. Ia ese Tiokratik Haroro Sikuli ena stiuden ginigunadia ia durua hegeregerena, oi do ia durua danu.—Salamo 32:8 duahia.

16. (a) Gilead Sikuli ena tahua gauna be dahaka? (b) Lagani 2011 amo daidia be unai sikuli idia lao?

¹⁶ Iehova ena taunimanima be Tiokratik Haroro Sikuli sibona amo treinini idia abia lasi. Misinari taudia bona ma haida be Gilead Sikuli amo namo bada idia davaria. Edia tisa ta ia gwau, edia tahua gauna be idia ura inai sikuli amo “stiuden taudia idia durua sivarai namona harorolaia gaukarana idia ura henia totona.” Gilead Sikuli be lagani 1943 ai ia matamaia. Unai lagani amo, stiuden taudia 8,500 ia hanaia be unai sikuli amo treinini idia abia bona tano 170 dekenai idia siaidia. To lagani 2011 amo, unai sikuli dekenai ful-taim hesiai gaukara idia karaia taudia idia boiria, hegeregere spesel painia taudia, loaloa naria taudia, Betele taudia, bona unai sikuli idia do lao lasi misinari taudia.

17. Gilead Sikuli ese dahaka namo ia havaraia?

¹⁷ Edena dala ai Gilead Sikuli ese momo ia durua? Mani inai oi laloa. August 1949 ai, Japan dekenai pablisa taudia be 10 sibona. Unai lagani ena dokonai, Gilead Sikuli amo treinini idia abia misinari taudia 13 be unuseniai haroro gaukara idia goadalaia. Hari Japan ai, pablisa taudia be 216,000 bamona, bona kahirakahira 42 pesen be painia gaukara idia karaia!

18. Iseda sikuli ma haida be dahaka?

¹⁸ Sikuli ma haida hegeregere, Basileia Hesiai Gaukara Sikuli, Painia Gaukara Sikuli, Basileia Evanelia Sikuli, Sekit Naria Taudia Bona Adavadia Edia Sikuli, bona Brens Komiti Taudia Bona Adavadia Edia Sikuli ese Iehova ena taunimanima ia durua bona edia abidadama ia hagoadaia. Oibe, unai ese ia hahedinaraia Iesu be ena taunimanima ia treinia noho!

19. Haroro gaukara dainai Charles Taze Russell be dahaka ia gwau, bona ena hereva be edena bamona ia momokani?

¹⁹ Dirava ena Basileia be lagani 100 mai kahana ia lohia vadaeni. Iseda King, Iesu Keriso, be ita ia do treinia noho. Lagani 1916 ai, Charles Taze Russell ia do mase lasi neganai, ia abia dae momokani sivarai namona harorolaia gaukarana be tanobada ibounai dekenai do ia lao. Ia gwau: “Gaukara be ia bada haraga noho, bona do ia bada ia lao, badina tanobada ibounai dekenai ‘basileia ena sivarai’ ita harorolaia be namo.” (Faith on the March, by A. H. Macmillan, rau 69) Iena hereva be momokani! Bona ita moale bada badina maino Diravana ese ita ia durua noho inai gaukara namona ita hagugurua totona! Oibe, ia ese ita dekenai “gau namodia ibounai” ia henia noho iena ura ita karaia totona!