LAUEGU sinana ese lau ia nanadaia: “Dahaka dainai oi ura lasi emu sene taudia oi tomadiho henia? Oi be idia dainai oi mauri, unai oi laloa lasi, a? Idia do oi hamoalea eiava lasi? Dahaka dainai lagani momo ai idia karaia sene karadia oi dadaraia? Iseda sene taudia matauraia lasi karana amo oi hahedinaraia iseda tomadiho karana be anina lasi.” Bena egu sinana ia tai matamaia.

To egu sinana be unai bamona lasi. Ena be stadi ia abia dae lasi, to ia ese dala ia karaia Baibel lau stadilaia totona. Lau be hanaihanai ena hereva lau kamonai dainai, lau dekenai ia auka ena hereva lau dadaraia totona. To unai lau karaia badina lau ura Iehova lau hamoalea. Oibe, Iehova ena heduru dainai, egu sinana ena hereva lau dadaraia.

Japan ai momo be Budis tomadihona idia badinaia. Hua rua lalonai Iehova ena Witnes taudia ida Baibel lau stadilaia murinai, lau abia dae Baibel ena hereva be momokani. Unai neganai lau laloparara lau be mai egu guba tamana, bona lau ura dikadika ia lau dibaia namonamo. Lau dibaia gaudia be mai moale ida egu sinana ida lau herevalaia. Bona Kingdom Hall ai Sunday heboudia lau lao henidia matamaia. Egu diba hereva momokani dekenai ia bada ia lao noho lalonai, egu sinana lau hamaoroa Budis ena tomadiho karadia dekenai do lau vareai lasi. Unai neganai, egu sinana ia gwau: “Iseda famili lalonai ta be sene taudia ia lalokau henia lasi be hemarai karana.” Lau ia oda henia Baibel stadi bona hebou lao henia karana do lau hadokoa. Lau laloa egu sinana be lau dekenai unai bamona do ia hereva lasi! Iena kara ia idau momokani.

Efeso karoa 6 amo lau diba, Iehova ia ura egu tama sina lau kamonai henia. Egu tamana be egu sinana ena hereva ia abia dae. Unai dainai lau laloa bema edia hereva lau kamonai, idia danu be egu hereva do idia kamonai bona emai famili lalonai maino do ia noho lou. To unai sibona lasi, sikuli ena eksam totona lau hegaegae be namo. Unai dainai lau lalotamona hua toi lalonai egu tama sina edia hereva do lau badinaia, to danu Iehova lau gwauhamata henia, unai hua toi murinai hebou dekenai do lau giroa lou.

To, lau karaia abia hidi be kerere. Badina matamanai lau laloa hua toi murinai egu hemami do ia idau lasi. To gabeai lau mamia lau be Iehova amo lau daudau. Danu egu tama sina be lau idia durua lasi, to hereva idauidau amo lau idia doria  Iehova tomadiho henia karana lau rakatania totona.

Kingdom Hall ai lau hedavari henia tadikaka taihu momo be edia ruma bese ese idia dagedage henidia. Idia ese lau idia hamaoroa Iehova be lau dekenai goada do ia henia. (Mat. 10:34-37) Danu, lau idia hamaoroa bema lau haheauka, egu tama sina be hereva momokani do idia abia dae. Unai dainai guriguri karana lau goadalaia badina lau ura Iehova tabekau henia karana lau dibaia.

Egu ruma bese ese dala idauidau ai lau idia dagedage henia. Egu sinana ese lau ia noia goadagoada, egu lalona lau haidaua totona. To nega momo gau ta lau gwauraia lasi. Badina emai hemami ai gwauraia hedinarai neganai, ai tai sibona. Reana unai bamona negadiai egu sinana ena hemami bona ia abia dae gaudia dekenai lau lalotamona be namo. Egu tama sina be lau dekenai ruma gaukara momo idia henia, badina idia ura ruma sibona dekenai do lau noho. Nega haida ruma idia lokaia bona lau be murimurina ai lau noho o lau dekenai aniani idia henia lasi.

Egu sinana be haida amo heduru ia tahua. Ia ese egu tisa ia hereva henia, to egu tisa be iena hereva ia durua lasi. Gabeai iena gaukara bosi dekenai lau ia abia lao, unai amo ia ese lau do ia koua tomadiho ma ta lau badinaia lasi totona. Ruma ai egu sinana ese varavara ma haida ia rini henia bona mai tai ida edia heduru ia noia. Unai ese lau ia habadua, to hebou lau lao neganai elda taudia ese lau idia hagoadaia egu sinana ese ia hereva henia taudia lau laloa totona, badina herevana egu sinana be ia diba lasi, to ia be unai taudia ia haroro henia.

Bena egu tama sina idia ura lau be iunivesiti dekenai lau lao. Idia laloa unai amo egu vaira  negana be do ia namo. Bona gaukara namona lau abia diba danu. Nega momo ai herevahereva neganai, ai tai, unai dainai egu tahua gaudia be revareva amo egu tama sina lau hadibaia. Egu tamana be mai badu ida ia gwau: “Bema oi laloa oi be moni gaukara ta oi davaria diba, namona be kerukeru sibona oi davaria, bema lasi, inai ruma oi rakatania.” Unai hekwakwanai be guriguri amo Iehova dekenai lau gwauraia. Murina dinana ai, lau haroro noho lalonai, taihu rua, idia be sibodia idia noho, ese lau idia noia edia natudia edia tisa ai lau lao totona. Unai lau karaia dainai egu tamana ena badu ia keru sisina. To, egu tamana be ia moale lasi bona lau ida ia herevahereva lasi, oibe, lau ia dadaraia matamaia. Egu sinana ese lau ia hamaoroa idia lau gwau-edeede henia be taina namo, to Iehova ena Witnes kekenina ai lau lao be dika herea.

Nega haida lau daradara Iehova ia ura egu tama sina edia ura lau dadaraia noho, eiava? To guriguri bona Baibel duahiduahi karana ese lau idia durua bena lau laloparara, egu tama sina be lau idia laloa bada dainai unai bamona idia karaia. Bona Iehova ese lau ia durua lalohadai maorona lau abia bona ia lau badinaia totona. Danu, haroro hanaihanai karana ese lau ia durua bada, bona lau moale. Oibe, painia gaukara be egu tahua gauna ai ia lao.

Taihu haida idia kamonai lau ura painia neganai, lau idia hamaoroa do lau naria ela bona egu tama sina edia lalona ia namo. Iehova lau noia lau dekenai aonega do ia henia, iseda buka bona magasin lau stadilaia, sibona egu lalona lau tahua, bona lo tadikaka taihu amo heduru lau abia. Gabeai egu lalona lau hadaia Iehova lau hesiai henia totona. Ma danu, bema lau naria, unai ese egu tama sina edia kara do ia haidaua lasi.

Egu sikuli ena lagani dokona ai, painia gaukara lau karaia matamaia. Hua haida painia gaukara lau karaia murinai, lalona lau hadaia pablisa be momo lasi gabunai lau painia totona. To egu tama sina idia ura lasi lau lao. Unai dainai lau naria ela bona egu mauri lagani be 20. Bena, egu sinana hamoalea totona, brens ofesi lau noia Japan ena saut kahanai painia gaukara lau karaia totona, unuseniai egu varavara haida idia noho.

Unuseniai lau painia neganai, lau moale badina lau stadi henia taudia haida be bapatiso idia abia. Danu, egu haroro gaukara durua totona, English gado lau dibaia. Spesel painia tadikaka rua be lau noho kongrigeisen dekenai idia noho danu. Lau itaia idia be haroro gaukara idia goadalaia bona idia ura ma haida idia durua. Unai dainai spesel painia be egu tahua gauna ai ia lao. Unai nega lalonai, egu sinana be nega rua ia gorere bada. Unai nega ta ta ai, lau giroa lou ia lau naria totona. Unai ia itaia neganai, ia hoa bada, bona metairametaira ena kara ia haidaua.

Lagani 7 murinai, tadikaka Atsushi amo revareva ta lau abia, ia be matamanai lau herevalaia spesel painia tadikakana. Unai revareva ai ia hahedinaraia ia ura lau ia adavaia bona egu lalohadai ia ura diba. To guna tadikaka Atsushi dekenai unai bamona hemami lau abia lasi, bona reana ia danu. Hua ta murinai, ia lau tore henia bona lau hamaoroa lau ura ia lau dibaia namonamo. Ai ruaosi emai ura gaudia be hegeregere, ai ura ful-taim hesiai gaukara ai karaia bona idia siaia gabudia dekenai do ai lao. Daudau lasi ai headava. Bona lau moale bada badina egu tama sina bona varavara ma haida be egu headava dekenai idia mai!

Regula painia ai karaia bona daudau lasi murinai, Atsushi be sekit naria tauna durua gaukarana  ia karaia matamaia. Gabeai, hahenamo ma haida ai abia. Ai idia hadibaia spesel painia gaukara do ai karaia bena sekit gaukara do ai karaia matamaia. Nega ta, emai sekit lalonai idia noho kongrigeisen ibounai ai vadivadi murinai, brens ofesi ese ai ia rini henia. Bona ai idia nanadaia: ‘Nepal ai, sekit gaukara ena asainmen do umui abia dae eiava lasi?’

Unai gabu daudau lau lao neganai, egu tama sina be dahaka do idia laloa. Unai dainai idia lau rini henia. Bona egu tamana ia haere, ia gwau: “Oi be gabu namo hereana dekenai do oi lao.” Wiki ta gunanai, iena turana ta ese Nepal ia herevalaia buka ta ia henia bona egu tamana ia laloa unai gabu be loaloa gabu namona.

Nepal ai, tadikaka taihu ida hesiai gaukara ai karaia lalonai, hahenamo ma ta ai abia. Bangladesh do ai vadivadi henia danu, ia be Nepal kahirakahira. Haroro gaukara be dala idauidau dekenai ai karaia. Lagani 5 murinai, Japan dekenai ai idia siaia lou, hari unuseniai sekit gaukara ai karaia noho.

Japan, Nepal bona Bangladesh ai, emai hesiai gaukara ai karaia neganai, Iehova lau dibaia namonamo! Unai tano ta ta edia mauri bona noho dalana be idauidau. Bona taunimanima ta ta edia kara danu be idauidau. Iehova ese taunimanima ta ta ia naria, abia dae, durua bona hanamoa daladia lau itaia.

Momokani, Iehova amo lau abia hahenamo be, ia lau dibaia, ia lau hesiai henia bona Keristani tadikaka namona lau adavaia. Dirava ese lau ia durua abia hidi maorona lau karaia totona, unai dainai hari Ia bona egu famili lau tura henia namonamo diba. Iehova lau tanikiu henia badina hari lau bona egu sinana be tura namodia. Danu lau moale badina lau, egu sinana, bona Dirava huanai maino ia noho.